قصيده ثقيله للزهرأء عليها السلام تقرأ بعدة اطوار
============


امي  يانبع  الحنان

وين  وداچ  الزمان

هيه تمسحلي دمعتي
تشعل  ايديها  شمعتي

يلي بحضانچ امان
وين  وداچ  الزمان

============

رايحه روحي وذكرت امي اليوم

صحت وين الچانت تزيح الهموم

گبل دمعي يصب مدمعها دموم

دنيتي خلاف امي ظلمه
يساعده الله  الفاگد أمه

رحتي من قبل الاوان
وين  وداچ  الزمان

💖💖💖💖

چنت من يقسه زماني وانفجع

اركض وبحضانها اصب الدمع

وانه اشكي  وهيه ليه تستمع

عيشتي صعبه بدونچ
بلگبر غمضن اعيونچ

وسفه منها الموت دان
وين  وداچ  الزمان

💖💖💖💖

امي ابطيبتها  ابداََ  ماشفت

تعبت اعلينه  على ماكبّرت

طيبة وبصينية امي انه اشبعت

الخبزه منها عافيه
ياأم  سوالف  دافيه

وسفه بيها الدهر خان
وين  وداچ  الزمان

💖💖💖💖

يامسيت العافيه اعلى أم المحنه

راحت الخيمه الذي چانت تلمنه

تناثرت مثل العقد ونطش شملنه

والقهر بعدچ صفالي
ضعتي مني يادلالي

بلنزل چن شمعدان
وين وداچ الزمان

💖💖💖💖

امي چانت تندعيلي بكل مسيه

حتى من ريح اليهب خافت عليه

امي  ابساعت  اذان  المغربيه

أتفرع وتدعي العصر
من دمه تبچي بقهر

كل مسه بوكت الأذان
وين  وداچ  الزمان

💖💖💖💖

طيبه بلدنيه ابد ماكو مثلها

امي جنات الخلد جوه رجلها

كون فدوه ونذر انه اندار الها

امي ايعثر بختها
ريتني  ما زعلتها

فراگچ اعلى عيوني بان
  وين  وداچ  الزمان

💖💖💖💖

چانت أم ملگه الحلو يسمونها

الگعده ماتحله ابد من دونها

ياحسافه وغمضيت اعيونها

ماتجيني  يلمشيتي
شمعه من عمري طفيتي

عگبچ وظلمه المكان
وين  وداچ  الزمان


===========
خادمة ال البيت وخادمتكم الحجيه ام علي البصره نسألكم الدعاء

الحجيه ام علي البصره بخدمة خدام الحسين عليه السلام
لانجيز حذف اسم الحجيه ام علي من قصائدها
او ينسب الكلمات لنفسه
غير مبرء للذمه امام الله والزهراء ع

رابط قناة اليوتيوب
اضغط على رابط القناة
ليأتيكم كل جديد 👇
https://youtube.com/channel/UCyZjN67zSy_dOdrSH6y84Iw

***

رابط قناة التلجرام  اضغط على رابط القناة يأتيك كل جديد 👇
https://t.me/ahzan2018