نحن جند الله 🇸🇩🤎.

#فريضة_الوقت
فعل الخير، وافعلوا الخير لعلكم تفلحون،
فاستبقوا الخيرات،
التراحم،
التعاضد،
تفقُّد المسلم لإخوانه وأرحامه وجيرانه،
الصدقة،
بذل المعروف،
الكلمة الطيبة،
السعي في قضاء حوائج الناس،
إشاعة الأخبار المفرحة،
بث الأمل والطمأنينة في النفوس، وبعث الرجاء في القلوب،
التضرع لرفع البلاء والدعاء للمؤمنين،
أن يعود من له فضل زاد وطعام وشراب ومتاع على من لا شيء عنده،
التوبة والاستغفار وإدامة الصلاة والسلام على خير البشر،
وهذا كله من أسباب التعجيل بالفرج.

#هذا_الصباح❤️

بصراحة وآسفة إني بقول الكلام دا ..

بس مجتمع البنات معظمو -ما كلو- مجتمع ضاغط ومؤذي نفسياً والله..
لاحظت إنو البنات بيؤذوا بعض بصورة تكاد تحيرك زاتو،وما عارفة ليي؟
السؤال الذي حيّر العلماء وحيرني أنا زاتي
بس تعالوا ننكِت وراه شوية

البنات نادراً ما بيعلّقوا على بعض في الحاجات الحلوة من جوه قلبهم إلا السوِيات منهم بجد والواصلات مرحلة عالية من التصالُح مع الذات ..أما الأغلبية فهم عبارة عن رادارات لا تلتقط إلا أكتر الحاجات الإنتِ ما نفسك زول يعلِق ليك عليها ولا نفسك زول يلاحظها أصلاً..
فبتلاحظ مثلاً إنو الوزنها مثالي بتتنمر على البنات العندهم إشكالية في الحاجه دي ..وفي نفس الوقت بتكون عندها عُقدة من شعرها القصير/الخفيف أو من لونها مثلاً وبتحاول تحِس بالأفضلية بتعليقاتها السلبية على غيرها ..نظام تعمل covering لروحها!
أو واحدة شعرها طويل وبشرتها صافية وما بتعاني من أي مشاكل تلقاها بتتريق على البنات الشعرهم قصير وبشرتهُم متعباهم ، في نفس الوقت عندها عقدة اللون وما مخلية كريم في الدُنيا إلا وشارياه
أو العندها كل شئ وتلقاها تتريق على غيرها في كل صفة ربنا وهبها ليها وأخدها من غيرها ..وتكون في الآخر متعقِّدة من حواجبها الخفيفة البتعمل ليهم السبعة وذمتها عشان يظهرو
وقائمة طويلة عريضة بمختلف التراكيب الممكن تخطر على بالك!

خلونا نتفِق إنه الكمال لله
وأي واحدة ربنا ميزها بصفتين تلاتة أربعة وحرمها من حاجه معينة.. النقص لو ما إتوجد في الشكِل حيتوجِد في الشخصية لا بُد ..لا بُد
التصرُف الطبيعي والسَوِي إنك تحِبي ميزاتك وتتقبّلي عيوبك.. ولو بتقدري_عشرة خطوط تحت بتقدري دي_ تحسّني من حاجه حسنيها بس عشانِك ما عشان تكسبي نظرة رِضا من عِين ناقصة زيها زيك برضه.. وبدون ما تكوني مهووسة بالحاجة وبدون ما تكون مصدر قلق ليكِ.
أما الما طبيعي بالجد فإنك تلقى الواحدة تتباهى بالميزات من باب ربنا أداني ومش أداكم وفوق ذلك معاها وقاحة إنها تعايِر غيرها في كل حاجَه ربنا ميزها بيها وشالها من الحواليها.. اللي هو ناسية إنها برضه إستحالة ما يكون ما عندها عيوب، لأن الكمال لِله.

تقدر تفهم بوضوح ليي ربنا ما أدّى أي بني آدم كل شئ ، لازم يكون في شئ ناقص لازم.. والسبب بسيط ، بتلقاه في قوله عز وجل (..كلا إنّ الإنسانَ ليطغَى) ..الشيخ الطنطاوي بيقول في تفسير الآية دي :
"لأن من طبع الإنسان أن يطغى، إذا ما كثرت النِعم بين يديه، إلا من عصمه الله- تعالى- من هذا الخلق الذميم"
يطغى مع إنه ما إختار الشخص الهو عليه ولا إختار جيناته ولا إختار شكله ولا إختار النِعم دي.. فرحان علي شنو؟ على الحاجات العُمرك ما إجتهدت فيها وربنا أداك ليها مجان؟ أو فرَضاً.. ما مجان مشيت إجتهدت فيها براك.. برضه فرحان لشنو؟ هي أصلاً ما حقتك ، ما حقيقية ولا عمرها حتكون ولو ما توفيقه ما كان عملتها! بتشكره بإنك تشوف نفسَك على غيرك مثلاً.. أو تتريق على خلق الله؟

فبجد هنا بجيك تساؤل..
ليي البنات والنسوان بيعملوا كدا؟
غيرة؟، حسد؟، حقارَة، قلة فهم؟، جهل؟ ، غباء؟
في الحقيقة أجمع ديل كلهم مع بعض وضيف ليهم ملعقتين من العُقد النفسية ، و3 ملاعق كُره للذات، و4 ملاعق قِلة ثقة بالنفس، و5 رشات من الإحساس بالدونية وكوبايتين كلاكيع ومفاهيم غلط وتربيَة مشوّهة و100 كباية سُوء أدب مع الله ومع خَلقه..
وبس كدا .. يطلع معاك الميكس الكامل لذلك الشخص الذي إذا رأى الشئ الجميل تجاهله أو إمتدحه بطرف لسانه وقلبَه في الداخل يغلِي ..هو نفسه الذي يحتفِي بعيوب غيره ويمسك الناس من اليد البتوجعهم ،هو نفسه الشخص الذي لا يخرج من فمه غير التعليقات السيئة والمؤذية والمُعايرات المسمومة المغلّفة بغلاف المزَاح.. هو نفسه الذي يستمتع بإحراج الآخرين والتقليل منهم، هو نفسه الذي يحسّ بالأفضلية بالتقليل مِن غيره، هو نفسه الذي لا يراعِي لمشاعرك نعم، لا إحساس ولا ضمير، هو نفسه الذي يرى أن من حقِه أن يقوم بتصنِيف الناس وتذكيرهُم بأشياء يعرفونها مسبقاً عن أنفسهم ولا يحتاجون من ينبّههم عليها.

المهم..
في المرة الجاية البتعلّق ليك فيه واحدة على حاجه ما مفروض تعلّق ليك عليها قولي ليها:
الله يشفيك، لأنو دا مرض صدقيني.


#واعيات.
#مريم_الشيخ.

#فريضة_الوقت

الشـــهادة لا تكفِّرُ الخيانة.

والإبقاء على المفسدين والمخربين في قطاعات الدولة ومؤسساتها خيانةٌ.

وترك شيء من التدابير الواقية من بأس العدو مع القدرة على الأخذ بها خيانة.

وهذه عاقبة الخائنين:

عن ابن مسعود رضي الله عنه قال: "القتل في سبيل الله يكفر الذنوب كلها إلا الأمانة".
ثم قال:
"يؤتى بالعبد يوم القيامة وإن قتل في سبيل الله، فيقال: أد أمانتك! فيقول: أي رب؛ كيف وقد ذهبت الدنيا؟ قال: فيقال: انطلقوا به إلى الهاوية، فينطلق به إلى الهاوية، وتمثل له أمانته كهيئتها يوم دفعت إليه، فيراها فيعرفها فيهوي في أثرها حتى يدركها، فيحملها على منكبيه حتى إذا نظر ظن أنه خارج، زلت عن منكبيه فهو يهوي في أثرها أبد الآبدين".
ثم قال:
" الصلاة أمانة، والوضوء أمانة، والوزن أمانة، والكيل أمانة، وأشد ذلك الودائع".

رواه البيهقي، وحسنه الألباني، وله حكمُ المرفوع إلى رسول الله صلى الله عليه وسلم؛ لأنه لا يُقال عن اجتهاد.