اللي يجي بالساهل يمشي بالساهل ومُستحيل تكون فرحته زي الحاجة اللي سعيّنا وراها وتعبنا على خاطرها

لذة الوصول للشيء اللي نتمنّوه جميلة جدًا لدرجة إن الناس أحيانًا تحسابها وصلتنا وجتنا على طبق من ذهب بينما العكس صحيح تمامًا...

عن نفسي من سنوات ولليوم شبه مافيش شيء حققته بدون توفيق الله بدايةً ودائمًا، وسعيّ ومجهود مُفرط بكل معنى الكلمة!
ولا حاجة قدرت نوصلها ونتوفق فيها بالساهل
كله خدي من وقتي، جهدي، صحتي...
والظروف هذه وكل الصعوبات سعيدة وفخورة بيها أكثر من الأشياء اللي انجزتها
لإنها هي اللي علّمتني وخلّتني نكتشف هلبا تفاصيل ماكُنتش نعرفها.

التغيير للأفضل والنجاح تفاصيل ماتجيش في يوم وليلة!
ضروري تتعبوا على خاطر الحاجة اللي تبوها باش لما توصلوا تحسّوها تستاهل التعب هذا كله
وصدّقوني مافيش إنسان حياته مثالية وكاملة ويمشي يومه كله تمام ومن غير أي ظروف وعراقيل مُعينة، حتى لو كان يشارك فيكم في الجانب المُشرق منها بس، لغاية تحفيزكم مش أكثر
لكن هذا مُستحيل يعني إن حياته كاملة وكل اللي وصلّه جاه في لحظة أو دقائق...

ربي يباركلكم في خطواتكم ويسهل عليكم الطريق ويوفقكم 🤍.