#مجرد_كارثه الحلقه 1

كل التفاصيل كانت حلوه ❤️
تنسيق الورد الاحمر مع الكوشه البسيطه وكل الاكسسوار نفس اللون ومتناسب ❤️
الطاولات المستطيله باللون البيج وعليها تحف الورد كانت الاختيار الصح
كان أحلى بيان على الهواء الطلق ممكن تشوفه عينك ✨
العيون كلها كانت على العروسه بي فستانها الاحمر يلي اختاراته نفس الديكور باش تكتمل طلتها المتناسقه ❤️....ابتسمت لجميع الحضور بعد ما طلع العريس ولبسها الدبله
سلمت على الكل بعد ما خلاص بدت الدنيا تفضى والناس تروح وركبت دارها..سكرت الباب تاركه الحضور يلي خلاص شبه مقعدش منهم حد غيرت فستانها وشافت لي نفسها بنضره اخيره للمرايا وطلعت

هدى:خليت الأمر بسيط جدا وقلت هادي مجرد كارثه ..سكرت عيوني وخديت نفس نهدي بيه نبضات قلبي قدمت خطوه ورخيت نفسي
فتحت عيوني وانا نشوف في البلاكونا تبتعد اكتر واكتر مر عليا شريط حياتي كله 💔
لو ان الناس كانت معاي الطف من هكي !
لو اني مطحتش في مصيبه كبيره زي هكي ...
شفت لي يدي اليمين وكان اخر شي نشوفه دبلتي
ردتني الارض بخبطه قويه كسرتلي ضلوعي
شفت الدم ساح وحسيت بي حرارة الموت تطلع مني ومعش شفت شي بعدها ......

________

ساره :مهتميتش لحد!
لا للعروسه يلي طاحت من الدور الرابع بعد بيانها بساعات واكيد توفت
ولا لي الناس يلي تجري وتعيط وتقيم فيها
ولا لي الرجاله يلي خشو من الصدمه يجرو بدون ما اي بنت تغطي روحها وتلبس حجاب
نمشي مسيبتهم وراي كلهم وخطواتي ثقيله ...تعثرت في الدروج الف مره 💔

خشيت للحمام وسكرت الباب وانا نسمع في عياطهم لوطه 💔
طحت ع الارض وشفت لي يدي 💔
غمضت عيوني وانا ندكر كيف حفرت التراب 💔
كيف مسكت الراجل وطيحته في الحفره
كيف هربنا في اخر لحضة ..... يعني انا توا مجرمه !
قاطه تفكيري صوت الباب يلي كان بيتكسر من الخبط ....فتحته بدون ما نوقف وانا حاسه نفسي في عالم تاني

ضرار:خش وسكر الباب ....عيونه كانت ماليانه توتر بس تكلم بقوه وحزم ...مصار شي
انسي يلي صار ولو طلع منك حرف موتك على يدي
ساره :تشوفله بصدمه والدموع تنزل بدون تعابير وجه
ضرار :وراي سفره والف مشروع بنديره مش رح نخلي حادث تافه ينهيلي حياتي
ساره :تحكي بملامح جامده من اثر الصدمه .....تافه!
الراجل كبير اكيد عنده صغار 💔..قتلناه
ضرار: تكلم بعصبيه ....انتي بروحك قلتيها كبير يعني شباني وهادي ساعته خلاص
لف ضهره بيطلع بس رجع شافلهامش رح نخليك ادمريلي حياتي حتى لو كنتي اختي
الشي هادا ميعنيش اني بنسكتلك .....ديري بالك
وطلع وسكر الباب وراه
ساره:حطت يديها على راسها وسكرت عيونها .....انا شن درتتت شن درت
________
الصدمة كانت مسيطره على الموقف ...لان ببساطه كل الحاضرين قاعدين مستوعبوش الكارثه يلي صارت قبل دقايق
شويه شويه ويلي توصله الفكره يعلى صوت عياطه
ارتفع صوت البكي والعياط من قوة المشهد يلي صار قدامهم والتمو الجيران يلي كانو قبل ساعه موجودين في البيان ❤️
التساؤلات عبت المكان ....شنو يلي يخلي بنت جميله وعاقله زي هدى تنتحر!؟
وتحديدا تختار يوم بيانها 💔
يوم خطبتها على الانسان يلي كانت تموت فيه من وهيا صغيره ....شنو يلي صار !

________
بتاريخ 4/6وفي الليله هادي تحديدا ...
كانت ليلةصعبه جدا على كل حد في العيله رجاله كانو او نساوين وبي الاخص الصبايا !
فاتت عليهم ليله كلها دموع وبكي وعياط واصل لاخر الشارع
والشيوخ طالعين خاشين للحوش وامية الرقيه في كل مكان خايفين يكون يلي صار نتيجة السحر !
والخوف الاكبر يصير لي حد تاني في العيله هكي

كل الناس الموجوده منهااااره وفي عيونهم الف حزن وصدمه !
الا زوز عيون بسس ....
العيون هادم بدات كان ماليهم الخوف💔......يتبادلو في نضرات التوتر بين بعض كأن كل واحد يوصي في التاني ميحكي شي ويرد باله كويس
________

بعيد على الكوارث هادي كلها
....كان في شخص موجود في المكان الغلط ✨
كانت فيه ورده موجوده بين صخور ولان الصخور اثرو عليها تغير لونها وصار لونها رمادي
كائن لطيف من يوم ولادته وهوا موجود في اخطر مكان في البلاد متعايش معاه كأن حوشه
والحقيقه ان معتبره حوشه ❤️

وبدون مقدمات قرر الشخص هادا يبعد على المكان يلي تربي فيه وينضم للعائله
ويشوف للكوارث كلها انهم #مجرد كارثه 🔥

________

اهلين بيكم في وسط عائلة ليبيه فيها كل العناصر المطلوبه ❤️
فيها مرت الخال يلي كل جهدها تفرق العيله بس وتحتفض بي راجلها ليها
فيها المرا يلي عندها خيرات الله هيا وصغارها لكن تحسد غيرها على سنتوب برتقال