ما يصح اثنين تجمعهن اكيد
گلبك وي حسين سيفك وي يزيد
_________
لاتعين الظالم ولو بالكلام
هذا يغضب يابشر رب الانام
لافرق ابكلمة لو ضرب السهام
تحبط اعمالك واثامك تزيد
_______
امر ثابت كل زمن هذا الشعار
يا بشر مو حفظته حتى الزغار
بالك بساعة غضب تاخذ قرار
تمجد بانجاس حكمو بالحديد
_______
لاتنافق تجمع بهالحالتين
بليل تلطم تصبح ويالمارقين
هذا وضعك مارضى عنه الحسين
من تزل حسين لطمك ما يريد
_________
تعبت الخيرين من هذا النفاق
صير واضح لاتعين أهل الشقاق
الدنيا گلها بالثلاث انت طلاق
مايهم بغيرها تبقه وحيد
_____
اقرة تاريخ الطفوف واعتبر
ما تفيد الدنيا وليالي السمر
العقيدة اخلاق وإيمان وصبر
لا تشارك نفسك بدم الشهيد
_______
صير شمعة وفتح عيون العمن
واعبر امواج العواتي والفتن
ما حصل بالطف تره في كل زمن
اعتبر برجالها تصبح سعيد
_________
وين آثار الظلم ال النبي
ما تفيد التوبة للسوة السبي
اعجمي لو اجنبي لو يعربي
الما يوالي حسين بجهنم حصيد
_______
لاتكول انه سلم للسالمه
وانته اتمجد عدوه وظالمه
حسين فكره وغير عالم عالمه
عالم الحق والمجالس والمفيد
_______
مجيد عبد الرضا القريشي
ربي ثبتنا مع الحسين ع وأصحاب الحسين ع