✍ «ایتگین»

ایتمیشم ایچیمین دؤنگه‌لرینده
منی تاپان اولسا، موشتولوغو وار
هر یئر قالابالیق، هر یئر دومانلیق
بوردا دوز یوللارین، مین بوروغو وار

دیزیمده گوج یوخدور، یوللاری یورسون
یوللاردان یوللارا، کئچه بیلمیرم
دورنالار گؤیلرده، منی سسله‌ییر
یازیق اولسون یازیق، کؤچه بیلمیرم

ایتن اوشاقلیغیم، ایتن گونلریم
دییشدی فصیل‌لر، گئری قاییدین
بیرده تلسمه‌رم، بؤیومکلیگه
قاییدین قاییدین، بری قاییدین

سیزی ایتیرندن، هر سحر آخشام
باشیما مین دنیز، غوربت جالانیر
بیر چام اورمانی وار، کیپریکلریمده
سانکی داغ باشیندا، دومان دولانیر

ایندی بیر آز باشیم، یئرینده دئییل
اوگئی کیمی گلیر، اؤزوم اؤزومه
دونیادا هر نه وار، یاخشی‌دان پیس‌دن
آلاجا بولاجا، گلیر گؤزومه

دئمه‌دیم ایتمیشم؟، یامان ایتمیشم
هاردایام آختارین، تاپین گتیرین!
تاپیلان دئییلم، تاپیلسام آنجاق
کیمسه‌یه یوخ، منی، منه یئتیرین!

میرحسین_دلداربناب