رايح يا علي رايح يبو حسين
شينشفها بغيابك دمعة العين

جرحك بويه ما طاب
شيحمل هذا الغياب
............

يا علي بهل ليله اودعك و الگلب بهمومه حاير
كل كسر يجبر يحيدر بس صعب كسر الخواطر
بعد ما تبطل دمعتي لحد ما تعمى النواضـــــــر
بويه حيدر يتمني وانته تدري العيد باچـــــــــر

يحيدر بويه حيره باچر شلون
ايتامك لو اجو عنك يسألــون

شگلهم راح أبو تراب
شيحمل هذا الغياب
............

عفت زينب للمأسي يا علي وبـــــــــس للألم
ريت ابن ملجم بدالك صابني وراسي نجسم
من شفت شيبت لحيتك يا علي مخضبها دم
هاي دنيانه الوسيعـــــه صارت اخلافك عدم

كلشي بموتتك بعيوني احس مات
يحيدر لا تضن أنســــــــاك هيهات

گلبي بفگدك انصاب
شيحمل هذا الغياب
............

الليلة بفراش المنيــــــــــــه يا وسف نايم ولينه
جرح البراســــه مضهده و للوداع تجمعينـــــــه
ساعة صوب لحسن ينظر ساعة يم حسين عينه
وصد على العباس گله انته تكفل هل حزينــــــه

المثل هالساعـــــة يا عباس رتـــــك
من أغمض عيوني انته لتكفل أختك

منك ضني ما خاب
شيحمل هذا الغياب
............

انا هاي الليلة رايح خلي اوصيكم وصيــــــــــــه
الحسن من بعدي ينسم ينسگي بسم المنيــــــــه
والحسين بكربلاء هناك بارض الغاضريـــــــــــــه
ينذبح عالغبره ضامي و فوگه تسحگ خيل اميه

الگمر تتگطع ايساره ويمينــــه
السهم ذاك المثلث يطفي عينه

يصيبه بگلبه نشاب
شيحمل هذا الغياب
............

وانتي يا زينب وحيده بكربله وتكتل غربتچ
من الخيام تصير للتل هناك يا زينب ركضتچ
عالرمال اطيح اخوتچ وانتي عالهزل صعتچ
حايره بلمت اليتامـــه وابد ما تنشف دمعتچ

على النوگ الهزل هاي المصيبة
وفوگ الضيم يا زينب غريبـــة

غريبة ومالچ أحباب
شيحمل هذا الغياب
............







خادم أمير المؤمنين ع
حسين الفيصلي