قصائد منبريه مكتوبه 📚

رحلت الضعن 

راح اروح ومحتمل روحه طويلة
خل بالج بويه فاطم يالعليله

ــــــــــــــــــ 
الحسين 
انطيني اودعج بويه خل امشي بسفر
ما اخذتج لان وضعج في خطر
يا حياتي المهم صحتج يالنظر
حالتج من تستقر قلبي استقر

المسافة بنيتي ابد لا مو قليله
خل بالج بويه فاطم يالعليله

ــــــــــــــــــ 
العليلة
خلني امشي وياك ويروح الالم
افرش مصلايتك وكت العدم
لو اشيل بجفي من عمي العلم
لو اسلي اختي تره قليبي انجسم

عالمريض الرحلة بويه مستحيله
خل بالج بويه فاطم يالعليله

ــــــــــــــــــ 
الحسين
ياحبيبه قلبي اريدج سالمه
يالعزيزه المهم انتي الغانمه
اني سميتج على امي فاطمه
قلبي بويه اعليها ضل ينزف دمه

جنه اني وياها خل وياه خليله
خل بالج بويه فاطم يالعليله

ــــــــــــــــــ 
العليلة
مودع الله بويه يا وجه الغسق
دزلي مكتوبك لان ابقه بقلق
خايفه اعليك اني من شر ماخلق
بويه محروس ابسم رب الفلق

وبأسم طه وعلي وانته سليله
خل بالج بويه فاطم يالعليله

ــــــــــــــــــ  
الحسين
ادري بويه الفگد مر ما ينجرع
لاتخافين اعله ابوج من الوضع
نشفي دمعج لا يهل بيه الدمع
لو بجيتي ادري مثل بجي الشمع

كفي نوحج لان دمعاتج ثقيلة
خل بالج بويه فاطم يالعليله

ــــــــــــــــــ 
العليلة
راح تبقى اعيوني تنطر اعله الدرب
الفكد بويه أمر كلش صعب
يا لوداعك نار جن نار الحرب
راح اضل بعدك انوحاً وانتحب

شوفتك هيه الدوه الماكو مثيله
خل بالج بويه فاطم يالعليله
ــــــــــــــــــ 
الشاعر زين العابدين الشمري
تمت ببركة مولاي الحسين
رحلة الضعن
١٤٤٦ هجري

قناة الرجوع الى الله    @h_ameer1
قصائد منبريه مكتوبه  @h_ameer2
ملا ابو امير الفاطمي   @h_ameer3
قصائد نسائية مكتوبه  @h_ameer4

خذتلك خيرة
ــــــــــــــــــ 

بـويـة بدموعي خذتلك خيـرة
من شفت بعيونك اني الحيرة

ــــــــــــــــــ 

من خذتلك خيرة بدموعي التسيّل
عينك تسولفلي ناوي اعله الرحيل
وشكثر مهموم حزنك مو قليل
وجهك يسولف حزن تفسيرة

ــــــــــــــــــ 

ليش مايرضى ابد قلبي يهيد
بوية عندي احساس ترحل للبعيد
من أغمُض عيني احس تبقى وحيد
و وجهك بأي صوب بويه تديرة

ــــــــــــــــــ 

بويه احس يثگل علي دمع البكاء
من گلتلي رايح اني لكربلاء
جلمة تأذي وبنهايتها البلاء
وبيها سر وحجاية بوية جبيرة

ــــــــــــــــــ 

گمت اشم دخان من حرگ الخيام
وصوت اسمع بيك جن صوت الحطام
جنة صوت اضلوع متكسرة وعظام
وبالي يم صدرك بقىٰ بتفكيرة

ــــــــــــــــــ 

ياضوه اعيوني ونفس ريتي وهواي
من اصد لك ريگي ينشف من ضماي
وعلى العباس من اصد يتروه ماي
بعيني من انظر ينگط غيرة

ــــــــــــــــــ 

اني من ما اشوفك اشعر بالحنين
من اشمك يسكت بقلبي الانين
ومن اگلك يا حبيبي يا حسين
يا دواي لقلبي ولـ تصبيرة

ــــــــــــــــــ 

بويه خذني وياك وي ضعنك اسير
من يجلجل ليلك افرشلك حصير
اني من دونك احس عمري قصير
بدونك تصير الحياة ازغيرة

ــــــــــــــــــ 
الشاعر زين العابدين الشمري

قناة الرجوع الى الله    @h_ameer1
قصائد منبريه مكتوبه  @h_ameer2
ملا ابو امير الفاطمي   @h_ameer3
قصائد نسائية مكتوبه  @h_ameer4

يالكافل بروحك نبي وحامي الرسالة
ونعم منك يا وفي وگد الكفالة
ــــــــــــــــــ 

گالوا عليك انته أشركت في عصر جاهلية
وانته أول الأمن گبل متأمن الـبـريـة
هذا اليسولف بالشرك ما يعرف القضية
مو مشرك الخلف علي دين أو وفه وحمية


هذا جواب الي حجة رد لسؤاله
ونعم منك يا وفي وگد الكفالة
ــــــــــــــــــ 

جانت قريش تحاججك وتگلك المطالب
قلبك جبير ويتسع و تحملت مصاعب
كل عمرك تود النبي وتحبه يا ابو طالب
عمرك قصير اعله الحزن وبعمرك المصايب


يالقلبك يسولف عشگ والحب وحالة
ونعم منك يا وفي وگد الكفالة
ــــــــــــــــــ 

معشر قريش التستمع يالگلت في سنيني
منك جواب الهم وصل گلت الحقيقة بيني
واللّهي لوّ وضعتمُ الشمسُ فـِي يمْيني
والگمر والله بيسرتي لا ما تركته ديـني


بعهدك يبو طالب گلت أعظم مقالة 
ونعم منك يا وفي وگد الكفالة
ــــــــــــــــــ 

لمن طغوا أهل الظلم وتمردوا واجوكم
يم الشعاب بلا رحم يالغالي طلعوكم 
وتأذوا أنصار النبي وبمكة ما رعوكم
وانتة جبير تمرضت يابو علي ونفوكم


صنت الأمانة أو ودعت يم الجلالة 
ونعم منك يا وفي وگد الكفالة
ــــــــــــــــــ 

قلب النبي حيل انفجع لمن رحل كفيلة
عام الحزن هذا الصبح خل وفگد خليلة 
راحت الروح بهل المسه للباري وي رحيله
أول الدعوة التضحية وانته صرت بديلة


گال أني ميت يا علي كون ابداله
ونعم منك يا وفي وگد الكفالة
ــــــــــــــــــ 

يالكرست عمرك وفه هالميزة من صفاتك
ضحيت كل عمرك اله بالحلم وامنياتك
بالغار تسأل على النبي ما تطمئن حياتك
ما تغفى عينك ما نمت يا لتنتظر صلاتك


بعدك علي لطه صبح يشبه خيالة 
ونعم منك يا وفي وگد الكفالة
ــــــــــــــــــ 

الشاعر زين العابدين الشمري
تمت ببركة المولى علي عليه السلام 

قناة الرجوع الى الله    @h_ameer1
قصائد منبريه مكتوبه  @h_ameer2
ملا ابو امير الفاطمي   @h_ameer3
قصائد نسائية مكتوبه  @h_ameer4

فاتحة وذكرة    راهب العترة   موسى ابن جعفر
ــــــــــــــــــ
لو لبسنه الأسود احنه العمر كلة
على الكاظم والمصيبة الماهي سهلة
ما تشرحة الدنيا كلها بالف جملة
المر على الكاظم ولا واحد يحملة

تسعر الجمرة    راهب العترة   موسى ابن جعفر
ــــــــــــــــــ 
ياهي من جروحه من نحسبها هينة
جرحة لو گيدة وغربته وهذا سجنه
بالسجن اربعطعش عام لأجلنا
خسر حريته وحياته وما خسرنة

خاطر بعمره    راهب العترة   موسى ابن جعفر
ــــــــــــــــــ
من أجل شيعة علي عاش الظلامة
وابد ما شاف الهنا وشاف السلامة
ضحى بسنينه امتداداً للإمامة
والسنة تمر بعباداته وصيامة

يا عظم صبرة   راهب العترة   موسى ابن جعفر
ــــــــــــــــــ 
شما نقدم والله لاحسانة وجميلة
هالمواساة الحضرته شگد قليلة
وحگ معصومة الشبه من العليلة
جبل ما يحملها الهموم الثگيلة

لو الف عبرة   راهب العترة   موسى ابن جعفر
ــــــــــــــــــ 
ويلي من هاي الرزية وهوه وحدة
شبه من عمه الحسن وتسمه جعدة
فتتوا من الوجع وسمومه جبدة
مات صايم والسلاسل من تگيدة

بالوجع فترة   راهب العترة   موسى ابن جعفر
ــــــــــــــــــ
هاية تنعد من الاحزان الجبيرة
مات غربة بلا اهل عندة و عشيرة
للگبر من السجن اصبح مصيرة
غربة اليشيعونة حتى بموته حيرة

غربة والحسرة   راهب العترة   موسى ابن جعفر
ــــــــــــــــــ
تمت ببركة مولاي الكاظم عليه السلام
الشاعر زين العابدين الشمري
رجب الأصب ١٤٤٦هـ
اللهم عجل لوليك الفرج

قناة الرجوع الى الله    @h_ameer1
قصائد منبريه مكتوبه  @h_ameer2
ملا ابو امير الفاطمي   @h_ameer3
قصائد نسائية مكتوبه  @h_ameer4

هذا الغريب اوليدي اني امه الزجية
مثل الحسين احضر اله بالكاظمية
ــــــــــــــــــ
اني الزجية الوالدة والقلب لهفان
والطم بحسرة فاگدة بدموع الاحزان
وحضر عزاء اولادي يمتى وين ماجان
احضر مثل ما احضر ابني المات عطشان

احضر الة مثل الوگع بالغاضرية
مثل الحسين احضر اله بالكاظمية
ــــــــــــــــــ
اربعطعش عام بالم بالسجن مظلوم
صايم وساجد بالسجن واتحمل هموم
لا ضوه ولا حتى هوه ولا ماي لا نوم
واتفطر بفردة تمر والتمر مسموم

صايم ومات من الالم سم المنية
مثل الحسين احضر اله بالكاظمية
ــــــــــــــــــ
من الحديد من الثكل مترضرض الحيل
بگيودة عظمه المنكسر جن داسته الخيل
يحسب ليالي اعله الفرج بدموعه التسيل
يدري الفرج موت ونعش اربع حماميل

غربة النعش ما عندة اهل والله رزية
مثل الحسين احضر اله بالكاظمية
ــــــــــــــــــ
من ضلعي ما اشتم هوى لكن تعنيت
لوليدي موسى ومحنتة من قلبي حنيت
دمعه وره دمعه الة من حزني ونيت
بي عطر من عطر النبي ولحزنة هميت

عطر النبي وحيدر علي حامي الحمية
مثل الحسين احضر اله بالكاظمية
ــــــــــــــــــ
هذا الجسر يشبه ألم تل الغريبات
غربتهن تشيب القلب من الوطن مات
لو تمطر ادموم السمة من گد الاهات
جنة النعش راس برمح ويرتل آيات

جن كربلة وعاشر رجع من هالقضية
مثل الحسين احضر اله بالكاظمية
ــــــــــــــــــ
هاي السلاسل على النعش جن حبل الاشراع
درب السجن درب السبي بس يفرق اوداع
مو بس رجب هذا الألم بجروحي كلساع
مطروح ظل فوگ الجسر راهب على الكاع


نفس ابو الاكبر من بقى فوگ الوطية
مثل الحسين احضر اله بالكاظمية
ــــــــــــــــــ
الشاعر زين العابدين الشمري

تمت ببركة مولاي الكاظم عليه السلام
لاتنسوني من خالص دعائكم

قناة الرجوع الى الله    @h_ameer1
قصائد منبريه مكتوبه  @h_ameer2
ملا ابو امير الفاطمي   @h_ameer3
قصائد نسائية مكتوبه  @h_ameer4

#لمولانا_راهب_ال_محمد

هالله هالله الرضا وينـــــــــــــــه
خل يجي لموسى يعينـــــــــــــه
ـــــــــــــــــ ❁ ❁ ❁ ــــــــــــــــــ
وين ابــــــــــــــــو محمد الما رد
واحد من النادبينـــــــــــــــــــــه
ـــــــــــــــــ ❁ ❁ ❁ ــــــــــــــــــ
الضامن اليضمن غزالـــــــــــــــة
اليمه حست بالسكينـــــــــــــــة
ـــــــــــــــــ ❁ ❁ ❁ ــــــــــــــــــ
نريده يگصد للرصافـــــــــــــــة
مسرع من ارض المدينــــــــــــة
ـــــــــــــــــ ❁ ❁ ❁ ــــــــــــــــــ
بلچي لو موسى يشـــــــــــــوف
وليده راح يخف ونينــــــــــــــه
ـــــــــــــــــ ❁ ❁ ❁ ــــــــــــــــــ
ويگصد يغسله ويچفنـــــــــــــه
وبالنزاع يسدله عينـــــــــــــــــه
ـــــــــــــــــ ❁ ❁ ❁ ــــــــــــــــــ
وخل يوصيه بوصيتــــــــــــــه
ويوصي بعياله وبنينــــــــــــــه
ـــــــــــــــــ ❁ ❁ ❁ ــــــــــــــــــ
ما شبع شوف بعيالـــــــــــــــه
عمره خلّص ساجنينـــــــــــــــه
ـــــــــــــــــ ❁ ❁ ❁ ــــــــــــــــــ
وبالطوامير المظلمــــــــــــــــــة
خلّصت اغلب سنينـــــــــــــــــه
ـــــــــــــــــ ❁ ❁ ❁ ــــــــــــــــــ
كالخيال اصبح نحيـــــــــــــــــل
بكثر ماهو معذبينــــــــــــــــــــه
ـــــــــــــــــ ❁ ❁ ❁ ــــــــــــــــــ
وخل يشيل گيود رجلــــــــــــــه
بالنعش ومگيّدينـــــــــــــــــــــه
ـــــــــــــــــ ❁ ❁ ❁ ــــــــــــــــــ
ودمه سايل من گيـــــــــــــــوده
ونعشه بالدم صابغينــــــــــــــــه
ـــــــــــــــــ ❁ ❁ ❁ ــــــــــــــــــ
وخل يضمدله جروحـــــــــــــــه
ماكو ناس مضمدينــــــــــــــــــه
ـــــــــــــــــ ❁ ❁ ❁ ــــــــــــــــــ
وعلى متونه يشيل نعشـــــــــــه
من الجنود الشايلينـــــــــــــــــه
ـــــــــــــــــ ❁ ❁ ❁ ــــــــــــــــــ
وتلتم الشيعة وتنـــــــــــــــــــوح
بروح مكسورة وحزينـــــــــــــــه
ـــــــــــــــــ ❁ ❁ ❁ ــــــــــــــــــ
والمنادي يصيـــــــــــــــــــح هذا
موسى ابن طه نبينــــــــــــــــــه
ـــــــــــــــــ ❁ ❁ ❁ ــــــــــــــــــ
الراهب وشيخ الهواشــــــــــــــم
هذا يامن ناكرينـــــــــــــــــــــــه
ـــــــــــــــــ ❁ ❁ ❁ ــــــــــــــــــ
اسمه سر من الاســـــــــــــــــرار
ونوح خطه اعله السفينـــــــــــة
ـــــــــــــــــ ❁ ❁ ❁ ــــــــــــــــــ
عنده ميثاق الولايــــــــــــــــــــة
ووجه الله .. واصل دينــــــــــــه
ـــــــــــــــــ ❁ ❁ ❁ ــــــــــــــــــ
هاي ذرة من صفاتـــــــــــــــــــه
عكس ماهو معرفينــــــــــــــــــه
ـــــــــــــــــ ❁ ❁ ❁ ــــــــــــــــــ
عبد فاطم
مصطفى باسم الغزي

المستشفى التركي
قناة الرجوع الى الله    @h_ameer1
قصائد منبريه مكتوبه  @h_ameer2
قصائد منبريه مكتوبه  @h_ameer3
قصائد نسائية مكتوبه  @h_ameer4

​​​​​​​​​​​​​​​​​​​​​​​​​​​​​​

زوار زوار     موسى لحضرتك
هاي المحبين         كلها تعنتك

▪️▪️▪️▪️▪️ 

يا بو الجوادين كل هاي الخدم
والطالبة أمراد يم جود الكرم
متعنية زوار توگف بالحرم
وتواسي بالروح ودموع الألم


مولاي مولاي       ذولة شيعتك
هاي المحبين         كلها تعنتك

▪️▪️▪️▪️▪️ 

رغم الجراحات متعنية بصبر
رغم الصعوبات وأعوان الغدر
يا ابو الرضا أفواج يمك تنتشر
وتنادي مسموم وادك الصدر

ياسيد الروح        تذكر محنتك
هاي المحبين         كلها تعنتك

▪️▪️▪️▪️▪️ 

كل هاي الأجيال تبقى اعله العهد
وبكل السنين ما خلفت وعد
تحضر تواسيك مولاي الأسد
متعوفك وهاي كلمة وللأبد

عهداً يمولاي         لا ماعافتك
هاي المحبين         كلها تعنتك

▪️▪️▪️▪️▪️
 
من كل الإكتار طبت هالبشر
جن موج اليصير لو فاض النهر
كل خادم الجاي ينشد بي ظهر
ما همته ادروب لا موت وقدر

خدام خدام        بالحب وصلتك
هاي المحبين         كلها تعنتك

▪️▪️▪️▪️▪️
 
يا بن الميامين وابن المصطفى
يا راهب الدين قرآن الوفة
قصدتلك الناس والله بمعرفة 
جرحك يمولاي بعده ولا شفى



قصدتلك الناس    تمسح دمعتك
هاي المحبين         كلها تعنتك

▪️▪️▪️▪️▪️ 

قصة الم هاي واحزان ومحن
طامورة الموت ضاگت والزمن
يا وطن مسجون مو حر الوطن
بين الحياطين قلبك مُرتهن


والسجن تابوت    موت شمعتك
هاي المحبين         كلها تعنتك

▪️▪️▪️▪️▪️ 

ماكو من الاحباب يم نعشك جتف
وتحن يمولاي رايدلك عرف
تابوتك ادموم بجروح ونَزف
سجانك الشال نعشك يا كلف


لو عايشة هناك      كلها تلگتك
هاي المحبين         كلها تعنتك

▪️▪️▪️▪️▪️ 

يم بابك اليوم يا باب السمة
زوارك اطوف كبرك هايمة
تبجيلك عيون من هالمظلمة
يا سادس جروح أمك فاطمة


حجاج حجاج         يمك طافتك   
هاي المحبين         كلها تعنتك

▪️▪️▪️▪️▪️ 

 تمت ببركة مولاي الكاظم عليه السلام 
خادم الإمام الحسين عليه السلام 
…زين العابدين الشمري… 
 رجب الأصب/١٤٤٦ هجري
#اللهم_عجل_لوليك_الفرج​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​
قناة الرجوع الى الله    @h_ameer1
قصائد منبريه مكتوبه  @h_ameer2
قصائد منبريه مكتوبه  @h_ameer3
قصائد نسائية مكتوبه  @h_ameer4