The way to excellence ✍️

هل حدثت نفسك يوما بنعمة الانشغال ؟

أن تكون مشغولا دائما تكاد لا تجد وقتا لخلوتك بنفسك ؟

دقق في هذه الانشغالات
اذا كانت انشغالات تافهة ووهمية فهي آفة تأكل أثمن ما لديك وترميك في دوامة الوهم والضياع

وان كانت فيما ينفعك في دنياك وآخرتك لهي نعمة عظيمة ينبغي شكرها لكي لا تزول أو تتحول

فبعض الناس يصلحهم الانشغال .. ويقوّمهم ازدحام الأعمال

اكو مقطع في دعاء مكارم الأخلاق، يقول الإمام السجاد (ع): (وَاِكْفِنِي مَا يَشْغَلُنِي اَلاِهْتِمَامُ بِهِ) يعني ندعي منلتهي بالأمور الثانوية اللي تشغلنه عن الاهم

اكو مقطع مشهور جدااا ل استاذ شبّه حياة الإنسان بالوعاء وبده يضيف بيه أمور مثل الحصى والكرات الصغيرة ومن ثم الرمل وشبهن بالأمور اللي نعيشهه انو اكو امور لازم تكون ضمن الاولويات ومن ثم الاقل أهمية وهكذا

وهالشي رح يختلف من انسان لثاني لان كلمن فاهم الحياة شكل ولكن بالحقيقة رب العالمين وضع مقاييس نمشي عليهه وكل شي نعمله نريد بيه الاخره يعتبر للاخرة مو بس للدنيا يعتبر

فحلو من واحد ينشغل عن توافه الدنيا والترندات كل شوي ومدري شنو ب أمور تفيده بالدنيا والآخرة
كدراسة الطب ومساعدة الناس تعتبر وحدة من الأمثلة،

هواي ناس تشتكي من الضغط البيه بس الحقيقة اشوف الانشغال يولد التنظيم والابتعاد عن الامور الثانوية الكثيرة اللي غيرنه ملتهي بيهه

بحكم هواي اطلع فدائما اصادف شباب كل طموحه انو وين يطلع العصر، حرامات فترة الشباب هاي الفترة الذهبية تروح هيج، اللي رح ننسال عنهه( عن عمرك فيما أفنيت ، وَعَن شبابك فيما أبليت)

استاذ في جامعة لتدريس الحقوق والمحاماة ، أشر على طالبة وطردهه من المحاضرة بدون سبب وسط صمت شديد سأل الاستاذ ليش ندرس حقوق الانسان وليش اصلا تُوضع القوانين ، كان الجواب للعدالة، فسألهم من طردت زميتلكم بدون سبب ليش ولا احد تدخل وحجة وعارض ودافع عن حقهه ،

الجواب هو الخوف على المصالح ، وحدة من أخطر مشاكل الإنسان بصورة عامة هو الخوف من ان يكون عكس التيار أو الخوف على مصالح أخرى كأن تكون اجتماعية أو اقتصادية أو غيرها

تلكاه يشوف شي مو صحيح بالجامعة وميحجي خوفا من حجي الطلاب عليه أو اتهامه بالتعقيد

يشوف كورس يستغلون الطلاب الجدد ميحجي لان مستفاد مادياً منه

يشوف طلاب تقرة خطأ او عندة ملفات ضامهه يخاف ينصحهم ويطلّعون اعلى من عندة

يشوف ناس تنظلم يخاف يحجي ويصير وياهم

يشوف فوضى وتقصير أخطاء وحرام بمكان العمل يخاف يحجي و يتضرر

احيانا ناس تحتاج احد يحفزهه أو يكونون ضمن جماعة لفعل الصحيح ، أن تمشي وفق مبدأ صحيح أمر مو سهل وسط مجتمع متلوّن

ولكن لا ننسى ان كل شيء تحت ارادة الخالق وليس المخلوق ولو اجتمعوا على ضررك لا يستطعيوا الا بأرادة الله ، لذلك ابد لا تسكت على الخطأ وين مجان ومهما كان اللي وراه والتضحية التقدمهه تتعوض عليهه ، اما اليشوف الخطأ ويسكت عليه فهذه حاله حال القابل بيه ومتأمل بالناس

التخرج 🎓

آخر ايام الدراسة الجامعية ، فترة اسذكار الايام الصعبه وتوفيق رب العالمين النه وتعب اهالينة علينه وتعبنه بدراستنه وسهر الليالي والكعدة من الصبح والازدحامات والأقسام والامتحانات وغيرها الكثير الكثير

واحد يحمد رب العالمين بيه على توفيقه اله خلال السنوات الفاتت وتسهيله ، عادي يكدر ياخذ صور تذكارية لابس بيهه ملابس التخرج وأهله يفرحون بيه مبيهه شي

بس اشو عند البعض صارت السالفة اشبه بالتنافس بعرض الأزياء والأفكار ، والاغاني والركص وغيرهه وشي ابدا مو يم الطب، هاي المهنة المحترمة العظيمة ، هالامور اشو حته بره مدا نشوفهه لمن يدعي تخلفنه وتقدمهم

صراحة من المظاهر الجميلة اللي شفناهه هالسنوات الأخيرة

من الطالب اللي ع ابواب تخرج يروح للامام الحسين ع ويلبس ملابس التخرج بالضريح ويزور هذا الانسان العظيم اللي يمثل رمز الثورة على الظلم والفساد بكل الوانه ..

هذا ببداية حياته العملية المقبلة ..بصورة رمزية جاي يعاهد افضل الخلائق ان ما يسود وجهه من يشتغل ..ولازم يخلي بباله ان ما يظلم او يغش او يباوگ بالدوام او يهمل مراجع او يفضل مصلحته ع مصلحة المواطن اللي المفروض يخدمه ..

لان العمل جهاد ايضا مثل ما ثورة كربلاء جانت جهاد ومحط اختبار للناس ما نجح بيه الا القلة القليلة جدا .. العمل بالوظيفة صح الكل يستلم راتب بس قليل جدا من ينطيه حقة ويخلي الله بين عيونه..

بعنوان [ وصلنة مرحلة سادسة ]

وصلنة مرحلة سادسة وبعد اكو طلاب تنطي روحهه ومتنطي أمور مفيدة حصلتهه وتشاركهه وي الطلاب ، ناسين ان التوفيق بأيد رب العالمين مو بيدنه احنه البشر

وصلنة مرحلة سادسة واكو ناس تغيرت مدري ظهرت على حقيقتهه، الظاهر ديفكرون انو هاي اخر سنه و اللي منشوفه بعد عادي نسوي اليعجبنه وياه ، ويختمون هالسنوات بتصرفات مدري شلونهه على كولت المثل( اللحية التفاركهه لا تستحي منهه )

وصلنة مرحلة سادسة و بعد اكو طلاب متدرك أهمية تحمل المسؤولية وتحاول تستغل كل فرصه للغش والتحايل، والعمل الحقيقي مبقاله شي والحكمة تكول ( ومن شب على شيء شاب عليه)

وصلنة مرحلة سادسة وبعدهي الطلاب متعرف أهمية التعاون والعمل المشترك وبعدهي متأثره بالطبقيه والطائفية وجماعتي وجماعتك

ومن جهة ثانية............

وصلنة مرحلة سادسة واكو طلاب أدركت انو طالب الطب مو بس دراسة ،بل يحتاج يشتغل على باقي جوانب شخصيته واهدافه واصدقاءه وغيرهه من الامور البقيه

وصلنة مرحلة سادسة واكو طلاب عرفت انو الكلية مو مكان واحد يعيش بيه قصة فلم مثلا ، بل مكان تعلم

وصلنة مرحلة سادسة واكو طلاب كدرت تطور شخصيتهه بفترة قصيرة واستبدلت الصفات السلبية بالايجابية سواء بالدراسة او بباقي الجوانب

وصلنه مرحلة سادسة وعرفنه أهمية التواضع والابتسامة وحب الخير للاخرين شلون مؤثر وي المرضى و كذلك بين الدكتور وطلابه

والحكيم من يتعلم من قصص الاخرين، ويستفاد من كل تجربه وموقف يمر بيهن ، بحيث كل يوم هو شخصيه جديدة يحاول قدر الإمكان اكتساب الصفات الجيدة والتخلص من السلبيه وتطوير لكل جوانبه الدراسية وغيرها

خلال تقدمي بالمراحل داخل الجامعة لاحظت العديد من الامور المهمة في الدراسة و تحصيل مستوى علمي اكبر من ضمنها هو موضوع البوست هذه واللي صراحة احد أصدقائي الاوائل هو اللي كان يستخدمه وتأثرت بيه

وهو البحث المستمر وعدم البقاء على طريقه ثابته ومكان ثابت

وهالشي اكثر شي يفيد مراحل الكلنكل

لا تحجم مصادرك ومكان تحصيل معلوماتك بملازم الكلية فقط أو مصدر معين

اطلّع اكثر رح تلكه مصادر افضل وتضيف اكثر ، قنوات شرح تختصر الطريق، مواقع شرح نفس amboss أو مواقع اسئلة نفسpass medicine وغيرهم الكثير من المواقع

وحتى قنوات تلي كَرام مرات تلكون بيهه شغلات مفيدة جداا تختصر هواي عليكم وتضيف الكثير سواء قنوات المراحل السابقه أو من غير جامعات

لاحظت كم قناة ديصير بيهه تعاون من اكثر من جامعه يشاركون يدزون بيهه وصراحة كلش مفيدات يصيرن ، احنه للأسف تعاون قليل ديصير بين طلاب الكروب نفسه والمرحلة نفسهه والكليه نفسهه واكيد بين الجامعات ولكن لو اكو تعاون اكبر صراحه مستوى الطلاب بعموم العراق يرتفع ويتحسن علمّيا

هواي أمور تحطم معنوية الطالب بالحصول على هيج صفه مهمه عند الطبيب ومن اشهرها كورسات البيسك خلقت الاعتمادية عند الطلاب بشكل فضيع

كذلك التركيز بس ع الدرجه ويقره ملزمة الكلية وهذهو

حُب الراحة وضياع الشغف عند الطالب وماكو حُب البحث والتميز
وهالشي هواي اله اسباب

عموما حاولوا تبحثون عن المعلومه اللي تنطرح بأفضل صورة ممكنه مهما كان مكانهه قناة او مصدر او ملزمه او موقع او كيسات مو بس تبقون بمكان واحد وهذهو .......

اذا أردتُ ان اختصر الطب في كلمة واحدة فهي" الشغف "

في طريق مملوء يما يُميت الأمل والطموح والرغبة والعزيمة من العشوائية والكسل وحُب الراحة والاهتمال لما يقول الناس والتأثير السلبي للبيئة المحيطة بنا والفساد في كُل تفصيله والتقصير واللا مبالاة واعداء النجاح ، سلاحك هو شغفك بما تُحب

الطريق مليء بالصعوبات والعثرات والتحديات التي لا يستطيع احد فهمها ، لأن لهم الجزء الظاهر منها فقط ، حتى الاهالي غير قادرين على فهم ما يمر به ابناءهم الا اذا كانوا ضمن التخصص نفسه

فهكذا طريق دون شغف يتحول الى تراب يدفنك وانّت حي

شغف في طريق يستحق أن تضيّع اكثر من نصف عمرك عليه ...

شغف في ان تكون احد اسباب راحة الاخرين ومساعدتهم ...

شغف في أن تُبدع في عملك وان تكون قدوة لغيرك ...

شغف في أن تكون ذا سلطة لتغيير العادات الخاطئة والواقع المتردي...

لكن لا يأتي اي شيء من هذا دون بناء الشخصية ، رؤية سلمية ، اهداف صحيحة ، تجمع أو اصدقاء صالحين ، تعب كثير وتفكير متميز و التخلي عن وسائل الراحة والمشتتات الكثيرة ، إخلاص النية والتوكل على الله والتمسك بمنهج الصالحين الناجحين

فالدراسة وحدها غير كافية لخلق طبيب ناجح في الحياة .

بكل شي بالحياة اكو فن

وال(history) احد اهم فنون الطب ،ورح يكون موضوع هذه البوست ...

اذا احجي عنه علميا فهو يحتاج ممارسه هواي ، يعني شي ينضبط بالكثره وكذلك من يكون عندك كم من المعلومات لا بأس بيهه رح تكدر تسأل اسأله اكثر دقة وفائدة واختصار وتمشي systematically بذهنك

بس الجزء الاهم الاريد احجيه هي مجموعة نصائح يجب وضعها في الحسبان ....

اولاً :- ظروري تتعلم الاسلوب الصح بالحجي مع المريض والاهم المرافقين اللي وياه ، أنت ومهارتك بعد تكدر بأسلوبك الحلو تسحب الكلام اللي تريده ، وهذه احد اهم اركان فن الهستري

ثانياً :- حاول قدر الإمكان تاخذ هستري وحدك مو مجموعه لان هيج تتعلم افضل وهم امتحانك وحدك وهنا نحمل شعار ( اخذ الهستري بيدك محد يفيدك 😁 ) ويفضل تجي من وكت وتفتر ع الكيسات تشوف شعدهم وتاخذ الكيس اليعجبك وحاول تكتب يوميا الهستري مو تاخذه وما ترتبه ، عمود يقوه اسلوبك بالكتابه والتسلسل مال أحداث

ثالثاً :- حاول تحسس المريض وأهله انو صدك انت مهتم وحاس بيهم ، تره المرض ما ينحمل وكلنّه مجربين شعوره و الواحد كوه يتحمل روحه فكيف بجيش من الطلاب كل شوي يعيد عليهم نفس الحجي وكل شوي يجي واحد يجفص ابطنه يفحص ف هله هله بيهم المرضى

رابعاً :-مريض جاي عمود يتعالج يم الدكتور ويروح ديربالك تفتي من يمك بالعلاج مو شغلك وديربالك تنتقص من المريض ، احد الطلاب وصف المرضى وصف طبقي بأنو خيرهن المريضات ممكملات ثاني إبتدائي وهذه تعالي و وضاعه ، عند رب العالمين التفاضل بالتقوى مو بتقدير حضرة جنابك

خامساً :- حافظ على خصوصية المرضى من تكشفهم عند الحاجه مو فرجه للرايح والجاي وخصوصا النساء والتزم بكامل الحدود الدينيه اللي مرسومه الك لان كل شي شفت ، محد ملتزم بحدوده بحيث شفت طلاب بعيني راحوا فحصوا بنيه شابه لان حلوه ، هذه اعوف بيده الناس ؟؟؟ اشلون اامن بيه ما اعرف

دائما تعلم انو تعمل بالأمور المتوفره عندك

لان النظر لما عند الغير ينسيك ما لديك ، كل واحد منه عنده ميزات تختلف عن غيره، احنه مختلفين بنسب الفهم، الحفظ ،الذكاء ، الدهاء وغيرها من الميزات

فلان مشترك كورسات،
فلان بيتهم أقرب،
فلان ما كاعد قسم ،
فلان ابن دكتور او إخوانه دكاتره مو مثلي اول دكتور بالعائلة،
فلان عنده سيارته الخاصه واني خط والالتزام مزعج أو نفرات واتاخر ،
فلان كروبه زينين وكروبي لا ،
فلان حكومي واني اهلية ،
فلان من هاي الجامعه واني جامعتي مو زينه او متنطي درجة،
فلان جان بهاي المدرسه متميزين او موهوبين أو جان بره اصلا
فلان عنده سماعه ام 300 الف واني لا
فلان ما صار عنده ظروف مثلي ،

و إلى ما لا نهاية.................

من صفات الناجحين يعمل دون الإهتمام للظروف وبالعكس مرات يحولهه لعامل نجاح

النجاح ميتحدد بظروف معينه ، شفت طالب قسم يطلع الاول وشفت طالب من غير محافظه يستغل الطريق بالروحه والرجعه وطالع الاول ، وشفت طالب سماعته ب25 الف وطالع اول وشفت طالب مداخل ولا كورس وهم كدر يطلع الأول

دائما تعلم تستفاد من الميزات والظروف العندك وحاول تطورهن

والأهم ان تفهم انو النجاح مو فقط بالدراسة لازم تنجح على صعيد شخصيتك ودائما تشتغل عليهه

بعد التخرج من تشتغل حتصادف كل شي

ناس متخاف الله وميهمهه حياة الناس

ناس تقصر بكل واجباتهه

ناس محبطه متريدك تشتغل وتنجح

ناس متكبره تشوفك بعين الزغيره


ناس تتعامل ب ديلات واتفاقيات وفلوس حرام وشغلات وعلاجات مرات المريض ميحتاجهه (هواي حتشوفوهه)

وغيرها الكثير

صير صاحب مبدأ واوكف وي الحق وين مجان ، لا تقصر بواجباتك لا تزيد ع الناس وتتعامل وياهم بقساوة ، تره الألم جابهم الك خفف عنهم احجي وياهم نفسيا ادعمهم لا تصير مثل بعض الدكاتره يزيد ع المريض من خلال صياحه أو تكبره أو اهماله

والله حته عامل البلدية مع احترامي الكبير الهم ودورهم المهم في المستشفى بس حته دا اشوفهم يصيحون على المرضى والوياهم

حاول تغير الوسط الموجود بيه مهما كان مكانه أو موقعك بيه كون علاقات وي ناس طيبه وصيروا ايد وحده ، وحدك متكدر تغير واقعك

ابتعد عن الحرام بكل اشكاله عمود الله يوفقك، بنيه وياك زميله دراسه وبعدين زميله عمل مو عمود تخلصوهه ضحك وسوالف حدك وياهه دراستك وشغلك لا تعبر حدك المسموح الك

إياك ثم إياك يصيبك غرور أو تكبر تره محد رح يحترمك أو يحبك اله اللي نفس طينتك وهم علاقه مصلحه بالعاده

واذا شفت خطأ او ظلم احجي ، باع الآية القرآنية شلون توصف صاحب الحق (بَلْ نَقْذِفُ بِالْحَقِّ عَلَى الْبَاطِلِ فَيَدْمَغُهُ فَإِذَا هُوَ زَاهِقٌ) لان رب العالمين حيكون واكف وياك ويساعدك

حاول تحقق نجاحات واهدف ل أمور كبيره تنفع بيهه الناس لا تحجم عقلك وعلمك كد تحصل فلوس وهذهو ، سوي بحوث ، اطلّع بشكل مستمر ، اتعاون وي ناس كفوءة واطمح للنجاحات

وغيرها الكثير

ان اهم ما يجب أن يتميز به الإنسان هو المبدأ وان لا يقدم اي تنازلات في قباله

وخلال رحلتنا في مجال الطب والمجموعة الطبية سترى الكثير والكثير مما يتعارض مع المبدأ ومع الصح

سترى خروقات كثيرة منها في الجامعه ومنها ما بعدها

فمثلا في الجامعه سترى النفس الطائفي وسترى الطبقيات وترى من شغله الشاغل الكلام على الآخرين وترى من يدخل الجامعه ويتخيلها فلم سنمائي هو بطلها وقله قليله نفوسهم مريضه لم يسلم منهم القريب ولا البعيد

وهنا يجب أن تتسمك في مبدأك ، لا تكن ذا نفس طائفي عامل الآخرين على اساس ما تراه منهم، الجامعه مكان دراسة لا قصه رومانسيه في فلم ،ركز على دراستك ،

لا تعامل الآخرين بشكل طبقي محد احسن من الثاني بس بالتقوى اما فلان من غير محافظه فلان من ذيج المنطقه فهاي عيب وتدل على صغر عقلك و وضاعه تفكيرك وقلة احترامك

كل طالب عنده ظروفه الخاصه فإذا مكدرت تقدم مساعده أو تفيد الآخرين فلا تزيد عليهم ، ليكون شغلك الشاغل هو الغيبه وفلان هيج وفلانه سوت هيج ولبست هيج ، أقبح شي دا اشوفه من شباب متجمعين يحجون بأعراض الناس فلانه طالعه هيج اليوم او لابسه هيج ، ما عندك عرض تحجي بأعراض الناس أو تقبل احد يسوي هيج وي اخواتك فإذا تقبل معناهه ما عندك غيره

صادق الطلاب الزينه اللي متاخذ غيبه ميكون كلامهم بذيء وميكون شغلهم الشاغل بس يردون ونسه وميهتمون لحدود رب العالمين ، جامعه مكان دراسه فحاول قدر الإمكان تستفاد منه وتكون علاقه وي ناس طيبه وصير ابو مبدأ ميتغير وميتاثر بالناس الثانيه

تعلم تكول الصراحة من هسه وانت طالب وابد لا تكذب أو تحاول تتذاكه

دكتور ما فهمت ، دكتور ما فحصت
،دكتور ما اعرف الجواب ، دكتور ما سويت فلان شغله، دكتور ما اعرف اصلا اسوي فلان شغله

غلطك هسه ك طالب ما يترتب عليه شي بس غلطك بعدين يترتب عليه هواي أمور واكو اغلاط صعب تطلع من تبعاتهه

اللي يحاول يلزّك كل شي و ميكون صريح مع الدكتور بهواي أمور سواء باليومي أو بالامتحان وحته يكذب مو بعيدة يصير مثل ثنين ابالي مقيمين وحده نسائيه مفروض اتوّر المرضى وتراقب المؤشرات الحيويه مالتهن ولكن كتبت كل شي من يمهه عمود تخلص من وكت وترجع للبيت خطيه صايمه 😬

و واحد ايضا بمستشفى للاطفال مقيم كاتب من يمه وما قايس وما ناطي علاج ولكن ع الورقه كل شي تمام وبالواقع المريض نحو الأسوء ودخل بمشاكل صحيه دون تلقي علاج أو فحص

طبعا ناهيك عن التقصير شلون يتم التعامل وياه يوم القيامة ولكن بالدنيا هم وراك تبعات ممكن تنتهي بفصلك من عملك أو فصول عشائرية وطلايب انت في غنى عنهه

كثير من تصرفاتنه في المستقبل نابعه عن البناء اللي دنبنيه من هسه لشخصيتنه واهدافنه وغيرهه

صير من هسه صريح وما تكذب وتحجي ما تسكت من اكو خطا وطموح وتخاف الله وتتمنى الخير لغيرك وشوف شلون يصير مستقبلك

اتذكر بداية تعييني بالاطراف جنت الزم طوارئ وحدي واكون مسؤولة عن كل شي..
كم الخوف الي جنت اعيشة لا يوصف ،
لدرجة مجنت أكدر انام بليل اذا ثاني يوم عندي كول!
بالطوارئ مجرد اسمع صوت عجلات تتحرك ارجف بمكاني وشكد افرح اذا يطلع الصوت جاي من عامل النظافة ديحرك السدية حتى ينظف.😁

كل حالة تجي حتى وان كان المريض ديبالغ بوصف المه او عنده انهيار ويدخلون عائلته مخبوصين جنت انخبص واخاف مثلهم
واذا اجت حاله خطرة تتسارع نبضاتي..

كم من التوتر والخوف من التقصير استمر ما يقارب الشهرين ..حتى كدرت اعتاد ع هذا الوضع ..
الحمدلله وراها صرت الزم الطوارئ واني مسيطرة أكثر ومرتاحة .

هسه من اشوف الأصغر يتعينون ويجون ما متعودين ع الجو وشايلين نفس المخاوف اتذكر هاي الاية :
((كَذَٰلِكَ كُنتُم مِّن قَبْلُ فَمَنَّ اللَّهُ عَلَيْكُمْ))

بداية كل أمر لابد نواجه صعوبة ومخاوف سرعان ما تذوب بمرور الوقت ،
انت مو احسن من الأصغر منك انت مجرد عبرت المرحلة وصرت تشوفها أسهل لان مرت بتفاصيلها!

بكل جوانب الحياة اذا شفت احد أصغر منك مرحلة او اقل منك علما او دينيا تذكر هذه الآية ..
ارحمهم و انسب الفضل لصاحب الفضل..
((كَذَٰلِكَ كُنتُم مِّن قَبْلُ فَمَنَّ اللَّهُ عَلَيْكُمْ))

منقول