هه‌س.. هه‌سته‌ ئه‌ی كیژی هه‌ناوت شین!
ڕا.. ڕاوه‌شێنه‌ لێچكه‌كه‌ت! سووره‌..
ڕا.. ڕابه‌ ئه‌ی لاوی هه‌ناسه‌ت گڕ!
تی...تین و تاوی تۆیه‌؛ ته‌ندووره‌

مس..مست كه‌ ڕوو به‌ ئاسمان به‌رزه‌
مه‌ستانه‌ وا گه‌ر..گه‌رمی هه‌ستانن
شه‌ق..شه‌ق كه‌ هه‌ڵده‌درێن له‌ بێده‌نگی
ئێوه‌ن‌ كه‌ مۆلۆتۆف به‌ده‌ستانن!

دا..داره‌كان تووڕه‌ن له‌ دووكه‌ڵیان
بوو..بوونه‌ قه‌ڵماسك به‌‌ گژ زاڵم..
گا..گاشه‌به‌ردی تۆڵ و ڕق داوێن
سه‌نگفه‌ڕشه‌كانیش وان له‌‌ دژ زاڵم

قاپێلكی ترس و ڕه‌و، كڵاوخوودیان
پۆتین و باتووم لێر و وێ كه‌وتوون
جۆ..جۆگه‌له‌ و ڕووباره‌كان ده‌چڕن
تێكڕا سروودی ڕوو به‌ ده‌ریا چوون

من.. من شه‌قامی عیشق و ئازادی!
تۆ، تابڵۆی ڕێشانده‌ری، ئه‌ی ژن!
ئێ..ئێمه‌ هه‌نگاوی نه‌وه‌ستانین
كۆڵانی بن..بنبه‌سته‌ جێی دژمن

ها..ها به‌خێرهاتی كچم، ژینا!
ڕا..ڕاشه‌كێنه‌ په‌لكی شللێران
خوێ...خوێنی تۆ تێكه‌ڵ به‌ خوێنی مه‌
ده‌نگت فڕیوه‌ تاكو ئه‌ستێران

ئاوارە وڵات

🌱🌱🌱🌱🌱🌱🌱🌱
https://telegram.me/aaware