أروع سلسلة 🔗 للاستعداد لرمضان 💫

🌷 اهم الأهداف اللي هتستعد بيها لرمضان ✅ الصلاة .✅...

🌟 الصلاة هي حياتك ، هي راحتك ، هي سعادتك ، هي قرّة عينك ، هي صِلَتك بربّك ، وعلشان كده لازم تكون محافظ عليها على أكمل وجه علشان تقرّبك من حبيبك سبحانه وتعالى ..

🌟 وربنا سبحانه وتعالى شَرَع الصلاة تقريبًا في كل أمور الحياة .. فهنلاقي عندنا صلاة التوبة وصلاة الاستخارة وصلاة العيد وصلاة الاستسقاء وصلاة الكسوف والخسوف وصلاة الجنازة وصلاة قضاء الحاجة .. وده أكبر دليل على أهمية الصلاة وتأثيرها واحتياجنا لها في كل حاجة في حياتنا ..

👌 والنبي صلى الله عليه وسلم كان إذا حصل له أي أمر أو أفزعه في أي وقت ، لجأ إلى الصلاة ..وإنت كمان لو تعبان أو مهموم ، قوم صلّي ..

🌟 لما تكون تايه ومش عارف تعمل إيه وتروح فين ؟؟! أول وأهم حاجة تعملها إنك تلجأ لربك ومولاك وتقوم تصلّي وتحكيله .. حتى لو مش عارف إنت هتقول إيه بالظبط ! صدقني هترتاح جدًا وتلاقي الدنيا نوّرت ..

👌 وفي رمضان عندك صلوات الفرائض والنوافل اللي تقدر تكون بها من السابقين إلى الله تعالى لو أقمتها حق إقامتها ..

✋وخد شوية النصايح دي لعلها تكون سبب في استمتاعك بالصلاة واقامتها حق اقامتها بإذن الله :

👌 علشان تروح للصلاة بقلب مشتاق ، لازم تحب الصلاة، وتعرف قيمتها وأهميتها في حياتك وفضلها وثوابها عند الله، وتعظّم قدرها في قلبك ، لو عرفت قدر الصلاة وحبيتها مش هتبطل صلاة ! ، وياريت لو تقرأ كتابي ( جــرّب تقـرّب ) هيفيدك في الموضوع ده بإذن الله ..

كتيب -"جرب تقرب"
https://ia601901.us.archive.org/29/items/Dr-Mostafa/garrab.pdf

💚 الخشوع في الصلاة هو روح الصلاة ، و الخشوع ببساطة هو إنك تلاقي في قلبك لين ورقة وهدوء .. إن ييجي في قلبك خوف من النار وشوق للجنة .. إن الآيات اللي بتقرأها تلامس قلبك وتحس بالحنين والقرب من ربنا ..

🌟وطبعاً موضوع الخشوع كبير ويطول شرحه هنا ، فأنصحك بكتاب ( جنّة الدنيا ) هتلاقي فيه شرح بسيط لكيفية الخشوع ، ووسائل عملية للوصول للذَّة الخشوع في الصلاة بإذن الله ..

📝كتيب "جنة الدنيا"
كتاب هيخليك تستشعر حلاوة الخشوع في الصلاة :') 💜
https://ia601901.us.archive.org/29/items/Dr-Mostafa/gannat-addonia.pdf

🌻 وعلى ما تحمّل الكتاب وتقرأه .. هذكرلك بعض النقاط اللي ممكن تساعدك على الخشوع بفضل الله ..

🌟 من أهم وسائل الخشوع في الصلاة إننا نزرع حب الله في قلوبنا ، لحد ما يبقى شجرة متفرعة في كل مكان في قلبك ..ولما حُب الله يملا قلوبنا ، ساعتها هتتغير صلاتنا جذرياً !

▫️ساعتها هتجري على الصلاة جري لأنك رايح لحبيبك..
▫️ ساعتها هتنتظر معاد الصلاة بالدقيقة لأنه معاد مقابلة حبيبك .. معاد اللقاء والقرب ومناجاة حبيبك ..
▫️ساعتها هتحضّر قلبك وعقلك وتركز بكل طاقتك وتبقى حاسس بكلمة بتقولها لحبيبك وكل حركة بتعملها ..
▫️ ساعتها مش هتملّ ولا هتزهق ولا هتتعب مهما طال اللقاء بينك وبينه لأن مشاعر الحب بتطغى على كل ده ..
▫️ساعتها بس هتفهم ليه فيه ناس بتقف تصلِّي بالساعات يومياً وبتبقى في عالم تاني أثناء الصلاة ..

💚🌟 طيب .. نزرع حب ربنا في قلوبنا إزااااي نعرف الحلقة الجاية ان شاء الله ؟؟

🌙 الجواب بكل بساطة : بإننا نعرف ربنا ..إزاي هتحب حد متعرفهوش ؟!!
فلازم نعرف ربنا وإلهنا ومعبودنا كويس علشان نحبه ..
▫️- نعرف نعمه وأفضاله اللي مغرّقانا وهنحبه ..
▫️- نعرف عظمته وحكمته ولطفه وقدرته وهنحبه ..
▫️- نتأمل في أنفسنا وفي كل شئ كبير أو صغير في الكون وهنحبه ..
▫️- نعرف أسماءه وصفاته بالقراءة وسماع الدروس وهنحبه ..وأنصحك بسماع سلسلة شرح أسماء الله الحسنى لد/حازم شومان ..

👌النبي صلى الله عليه وسلم كان لما يحين وقت الصلاة ، بينسى الدنيا واللي فيها .. كان وقتها " كأنه لا يعرف أحداً " ..

🌟 فإنت محتاج تفصِل نفسك عن كل حاجة حواليك وقتها لمدة دقايق ، علشان تقدر تدّي نفسك فرصة للخشوع..

👌افصل نفسك عن الكون كله من بداية ما تخرج من بيتك أو شغلك أو أي مكان إنت فيه وتتجه للمسجد ..يعني وقت الصلاة اعتبر الكون كله توقف .. مفيش حاجة خلاص في الكون دلوقتي غير الصلاة .. مفيش أي حاجة تهمني علشان اشغل نفسي بها دلوقتي مهما كانت .. أنا خلاص أخدت أجازة من الدنيا وقت الصلاة ..*

👌اقطع حبل تفكيرك في الدنيا من بداية خروجك من البيت ؛ لأن اللي هتقعد تفكّر فيه وإنت في الطريق رايح تصلِّي ، هتكمّل تفكير فيه في الصلاة ، وكلنا مجرّبين !

🌷 فـ حاول تنسى الدنيا ومشاكلها وكل ما فيها الفترة دي واشغل نفسك في الطريق للمسجد بالذكر والاستغفار ، علشان تدخل الصلاة بقلب مُهيأ وذهن صافي ..

🌟 حاول يكون مع كل حركة بتعملها اطمئنان حقيقي في قلبك وأعضاء جسمك .. يعني ترفع إيدك وتقوم وتقعد وتتحرك باطمئنان .. بالراحة ، واحدة واحدة ، على مهلك ، متستعجلش .. الدنيا مش هتطير!*