تۆ خزمی کامە خوڕترین کانی نیشتمانی
کە هەر بیرت بکەم دادەکەی
سەرڕێژم ئەکەیت و
لە چاومەوە سێڵاوێک ڕێ دەخەی
تۆ
بەرامەی کامە سێوەڕە مێرگ و
کامە جاترە بژوێنی
کە لە لاتەوە تێپەڕببم
مەستانە دەمدوێنی
تۆ هوروژمی
کامە تۆفانی کوێستانی
کە هەر بە گوزەر کردنت زانیم
دەبێ هەڵبکێشم
ساردترین هەناسەی وێرانیم
ڕاستم کەوە
تۆ کام تازەترین تاڵی
گزینگی گەرم و تیژی بەرەبەیانی
کە بە خەیاڵیشت ناوێرم
چاوت دەبێ لەبەر هەڵگڵۆفم و
تەنیا هەستت ئەگەر بشێ پێ بسپێرم
حاڵ و هەوای
کامە ناسکترین ئیلهامی هەڵبەستی
کە هەڵدەکەی من بە نووسینتەوە ڕێ دەگرم
بەرەو بەرزترین لووتکەی ئۆخژن و
سەربەستی!

@Honrave
#سۆران_حوسێنی