لە بەشی یەکەمی ئەم بابەتە باسی تایبەتمەندییەکانی ئەم دارە و سوودەکانی کرا، لەم بەشەدا باسی دۆخی پێویست بۆ پەروەردەکردنی ئەم دارە دەکەین؛

ڕووناکی: داری جینکۆ پێویستی بە خۆری ڕاستەوخۆیە. ئەگەرچی لە سێبەریشدا دەڕوێت بەڵام لە شوێنێک کە ڕاستەوخۆ خۆری لێ بدات باشترە.

پلەی گەرمی: ٣- تا ٢١ پلە باشترین پلەی گەرمایە بۆ گەشەی ئەم دارە هەرچەند بەرگەی ٢٨- تا ٤٠ پلەش دەگرێت.

خۆڵ: داری جینکۆ لە زۆربەی خۆڵەکان -چ خۆڵی ترش* یان ئەلکالیدا*- گەشە دەکات بەڵام ئەو خۆڵە دەبێت ئاوەڕۆیەکی* باشی هەبێت و هەروەها باشتره لمی زۆر بێت.  باشتر وایە PHی خۆڵەکە لە نێوان ٥ بۆ ٥.٥ بێت.
لێکۆڵینەوەکان دەڵێن ڕواندنی ئەو دارە دەکرێت وەکوو پلانێکی ئابووری-جوانکاری سەیر بکرێت  کە سوودی زۆری هەیە و ئاکامی باشی لێ دەبێتەوە.

بەپێی هەواڵێکی ماڵپەڕی ku.964media.com ماوەیەک لەمەوبەر تیمێکی توێژینەوە ئەم دارەیان لە شاری هەولێر چاندووە و لێکۆڵینەوەی لەسەر دەکەن. بەڕێز عه‌بدولسه‌مه‌د مه‌حموود ساڵح به‌ڕێوه‌به‌رى توێژینه‌وه‌ى كشتوكاڵى هه‌ولێر لەو بارەوە گوتی: "وه‌كوو قۆناغى یه‌كه‌م له‌ قه‌زاى مێرگه‌سۆر ئه‌و داره‌مان چاند و له‌ قۆناغه‌كانى داهاتووش هه‌ندێک ناوچه‌ى هاوشێوه‌ى مێرگه‌سۆر بۆ چاندنى دیاری ده‌كه‌ین" و لە درێژەی باسەکە سێ ئامانجی بۆ چاندنی ئەم دارە دیاری کردووە:

یەکەم: جینکۆ دارێکی پزیشکییە و گه‌ڵاکەی بۆ چاره‌سه‌ریی زۆر نه‌خۆشی به‌كار دێت کە یەکیان گەڕانەوەی یادەوەرییە.

دووهه‌م: زیادكردنی جۆرێكی تازه‌ی داره‌ كه‌ سوودی بۆ پاکكردنه‌وه‌ی ژینگه‌ی كوردستان هەیە، چونكه‌ دارەکە توانایه‌كی باشی بۆ هه‌ڵمژینی گازه‌ زیانبه‌خشه‌كان هه‌یه‌.

سێهه‌م: زێدەکردنی جوانییه‌كی دیكه‌ به سروشتی هەرێمی کوردستانە، چونكه‌ كاتێک له‌ وه‌رزی پایز گه‌ڵاكانی ده‌وه‌رێت جوانییه‌كی ئه‌فسووناوی به‌ شوێنه‌كه‌ ده‌به‌خشێت و ده‌بێته‌ هۆی راكێشانی سەرنجی گەشتیاران.