كشكول 🍁 سُوداني

معظمكم مشتركين في قنوات أكبر و أصغر من قنواتي (كشكول سوداني ، MU Chit chat ) ..
و أصحاب القنوات الأنتو مشتركين فيها منشوراتهم جميلة وفقراتهم زابطة وأدمنهم مواكبين الاحداث .
قنواتي أنشئتهم عشان الفرفشة والضحك وعشان أكتب فيهم يومياتي والمواقف الحلوة والمُرة البتحصل في حياتي وأشاركم جزء من أفكاري وهنا بخص قناة @MUDAILIES .

انشئتهم لانو في يوم من الأيام المنشورات و اليوميات البكتبها حالياً حتكون أجمل ذكريات ❤️.

فالحمدلله والشكر لله علي عدد الاعضاء المهول و رغم انه القناة اغلبها ونسات وخارجيات .
أنا ما بحسب نفسي مشهور او محبوب و تقديمي للمحتوي دي يمكن جزء منكم مستفيد منه وجزء لا.
ورغم عدد الاعضاء المحترم جداً دا ، لكن قليل منكم بعرفني في أرض الواقع.

📌 أنا مجرد شاب من ملايين الشباب السودانين العندهم قنوات في التلي وإذا في يوم لاقيتني حتعرف إنة مافي حاجة مميزاني واني إنسان عادي وبسيط جداََ ما الزول الانيق داك ، لابس أحسن لبس واخر عطر وسايق عربية و شغال بي أحدث تلفون وكلامي منمق ... الخ من الشكليات ، بالعكس حتستغرب من الشخصية الحتشوفها والاختلاف التام بين كتاباتي وبين شخصيتي .
ماعارف أنا بكتب في الكلام دا لية او الدافع وراهو بس عايز اقولكم إني فخور بي وجودكم في قنواتي و فخور شديد شديد والله ❤️❤️ وتاني ماعارف اشكركم كيف😹💔.
بس بتمني تفضلو معاي لحدي ما قدر ربنا يصيب وتكونوا داعمين لي رغم إني مرات دمي ثقيل و كريه وفقري و عندي تصرفات حمقاء و مزاجي متقلب طوالي.
وكتير و كتير من الصفات السلبية الما بقدر احسبها ، و إعتذاري لكل عضو حس مني بضرر أو سوء معاملة وهنا بخص الكانوا بشاركو في فقراتي والحبو يتعرفو علي وانا صديتهم 💔🚶‍♂️.

وفي الاخير ربنا يوفقني أسعدكم وأبسطكم واقدم ليكم محتوي مفيد في العام الجديد دا❤️❤️❤️.

اللهم أستودعتك وطني واهله وانت الذي لاتضيع ودائعه فاحفظه ياربي انك انت الحافظ ...اللهم إنا علمنا أنه مع العسر يسرا ومع الشدة فرج وإنك مبدل الاحوال من حال إلى حال. ربي إنك ترانا وتعلم بحالنا فأبدل عسرنا يسرا وابدل شدتنا بالفرج القريب
‏اللهم إن اهلنا قد خرجوا يطلبون العدل ' وانت العدل ، اللهم إنا استودعناك اهلنا " فاحفظهم بما تحفظ به عبادك الصالحين وكما حفظت كتابك الكريم.
حصناكم بالحي القيوم الذي لا يموت ودفع عنكم السوء بألف لا حول ولا قوة الا بالله العلي العظيم
اللهم النصر القريب لي بلادنا نصرا عاجلا غير آجلا 😭😭

اللهُم في يوم الجُمعة إروي أمانينا بِماء جودك وكرمك وحقق لنا الأحلام المُعلقة واجعلها جُمعة خير وعطاء وبركة تُزهر بِها أيامنا 🤍.