الرادود احمد الزوار

[[💔موشح الى مولاتي أم البنين .ع.💔]]

☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆

ألوداع الملتقى عند الحسين

في أمان الله يا أم البنين

☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆

في أمان الله يا أم ألوفه
حيره يا مولاتي أذكر يا صفه
بكلشي واسيتيهم آل المصطفى
ولو يصح بيدچ تقدمين الوتين

☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆

حيرة شذكر وانتي مجموعة صفات
قدوة أنتي لجميع المؤمنات
ضربتي أروع أمثلة غيره وثبات
مفخرة و زوجة أمير المؤمنين

☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆

عن درايه و معرفه أختارج عقيل
بت حمولة ودين و المعدن أصيل
الهدف من عندچ يحصل كفيل
هيچ منه راد أمام المتقين

☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆

گله راید وحده جابتها الفحول
كون طيبة نسب من اهل الاصول
و بحنان تراعي أيتام البتول
وبلكي منها يصير ناصر للحسين

☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆

صار ما راده علي و جبتي العضيد
وزين يدري بوالده منه شيريد
حامه عالخِدّر الى قطع الوريد
مخضب و لا يسرة ضلت لا يمين

☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆

و داعتچ یالطاهره ورب السماء
مثل أبو فاضل فلا صح بالوفاء
وحده لكن جيش أصبح للفداء
صار بالغيره مثل للعالمين

☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆

✨️ثواب هذه القصيدة الى روح الفقيد سماحة القائد حسن نصر الله وعامة المؤمنين ✨️

جهاد البصيراوي

مقدمة لأُم البنين ع…..

سلام الله على صبرچ
على صبرچ سلام الله


خلصـتي العمـر شــوغات وجـروح
وي صوت ابن حذلم طلعت الروح
لحـد ســـاعة مماتچ ماهــده النوح
الله يعيــنچ اشــــگد شفـــتي اذيه


بيــه عـــازه الابـن والنـاس يدرون
يشيل اجنازت امه اويه اليشيعون
غايب ليش عنـــچ حـادي الضعون
هضيمه اچفوفه طاحن عالوطــيه


منو المثــلچ تضــحي باربع اقمـار
واحــــدهم كلف وسيــــوفهم نـار
يـم عباس بيــــچ الفكــــر يحــتار
فديتـــــي اهروش گلبـــچ للزچيه


فخــر عنـــدج يفاطم عيب ينقاس
النسه اتحسدج الان خلفتي عباس
ابوفائــچ وبولائــچ تشــــهد الناس
ومثل صبـــرچ صبـــح لهل البــريه

شگـد حلوه الولد يمـچ يحظرون
والعبـــاس بيــده يغمـض العيون
وفوگ امتونهم نعشـــچ يشيلون
ويدفنــــوچ وينصــــبولچ عــزيه


          الخادم
✍كامل السعيدي

آه وا ويلاه يا ام البنين 
آه وا ويلاه لليوث العرين 
@@@
ياللي شلتي كربله بماي الدمع 
وتبچي لين النفس منچ ينگطع 
على راس احسين عالي منگطع 
وحوله اولادچ ضحايا مجزرين 
@@@
ابذاكرت ضلعچ ضحايه كربله 
ومصرع حسين وسبيها العايله 
وليهم ادموعچ ياحره سايله 
وضل دليلچ ينبض ابحرگه الونين
@@@
بشر جاب اخبار هدتلچ امل 
وما يهمچ طاح بالرايه الكفل 
گلتي بس حسين ليكون انقتل 
وعسى دونه اولادي صرعه مطشرين
@@@
يالحفرتي اگبور اربع بالبقيع 
ولاچن انياحچ للكبر والرضيع 
وعلى جسام التحنه بالنجيع 
وعلى من سحبوها بالحبل المتين
@@@
ساعد الله گلبچ الكله وفه 
نحتي لين الموت آل المصطفى 
وگلتي بعد حسين عالدنيه العفه 
ويلي عالمقتول وحده ابلا معين 
@@@
بالبقيع النوح لعنان السمه 
حين تبچين ابمدامع من دمه 
اتصيحي اولادي فده بن فاطمه 
وعلى گبر الزهره ثكله تنحنين 
@@@
علي أحمد الحمود 
٧-١٢-٢٠٢٤
وفاة ام البنين ع

الهذا العزاء...ننوي الحظور
ونهدي الثواب...لهل الثغور

ابمكان البي ذكر للباري والعتره
أكيداً نكسب الألطاف والنَّظره
اليرابط من أجل دين الله واينصره
يستاهل دعاء ابمجلس الزهره

نسإل إلٓه العالمين..حَصِّن ثغور المُسلمين
ابجاه البتول

يحله الدعاء...ابلطم الصُدُور
ونهدي الثواب...لهل الثغور
........................................
بالهادي وعلي وبت سيد الكونين
يرب ابقوِّتك أيد حُماة الدين
ابجاه اهل الكساء وهل أتى وياسين
وفقهم النصرة فاطمه وحسين

ياناصرَ المُستَضعَفِين...حَصِّن ثغور المسلمين
ابجاه البتول

رزقه الثبات...الگلب الغيور
ونهدي الثواب...لهل الثغور
...........................................
ألَّلهمَّ يامَن حافظ القرآن
أحفظ ناصرين الدين يادَيَّان
سَدِّد رمية اهل الحق على العدوان
واهلك مَن أراد السوء بالإيمان

يامَن تِعِزِّ المؤمنين...حَصِّن ثغور المسلمين
ابجاه البتول

حتماً يفوز....البسمك يثور
ونهدي الثواب....لهل الثغور
..............................................
التدافع عالعقيده وعن أراضيهه
تعيش احرار مادام النفس بيهه
إيد ابإيد ندعي ابفد دُعاء ليهه
(أولي البأس الشَّديد) اتفوز تاليهه

والخَاتِمَه النَّصر المُبين...حَصِّن ثغور المسلمين
ابجاه البتول

رغم الجروح....لابُد سُرور
ونهدي الثواب....لهل الثغور
.......................................
يارب العرش يارافع السبعه
آمال الشعوب ابصاحب الطلعه
ابدعاء الفرج ندعي وانت التسمعه
ابجاه ام الحسين الطاهره البضعه

وابحيدر وأم البنين...حَصِّن ثغور المُسلمين
ابجاه البتول

يجلي الهُمُوم....يوم الضهور
ونهدي الثواب....لهل الثغور

سيد علي الموسوي

ياعلي...إلك أدعي ابدمعتي وبجروحي
ياعلي...ألله ينطيك الصبر ياروحي
( إنَّا للهِ وإنِّا إليهِ راجِعُون )

إلك أدعي ودعوتي..ابجرح گلبي ودمعتي
الله ينطيك الصبر يابو المصيبه
اشلون تگظي دنيِتَك...وَيَّه وادم أذِّتك
الغربه يعني اتعيش وي وادم غريبه

الوادم الماتستحي امن الله ورسوله
اشلون راح اتعيش وياهم هذوله
الطبو الدار الوصي وضلمو بتوله
والله ماعدهم كرامه ولا رجوله

ياعلي...ندعي ربنا ومايرد دعوانه
ياعلي...الله لايرضه على الأذَّانه
( إنا لله وإنا إليه راجعون )
......................................
گلبي بالهم مبتلي...وبالي يمك ياعلي
ضلعي مايوجعني توجعني غربتك
صعبه اشوفك تنكسر...وانت المبچّي الكفر
وصافن اعله الباب واجروح ابصفنتك

ايعينك الباري يحماي الحميه
حين شفت الباب دفعوهه عليه
ياعلي وابدفعة الباب القويه
تالي آنه ومحسنك طحنه سويه

ياعلي...واكبر اجروح الصفت تاذيني
ياعلي...أبچي گدام الحسن وحسيني
( إنا لله وإنا إليه راجعون )
......................................
جرحك ابكبر السمه...وحالك ابلا فاطمه
عايش ابدنيا مُضلمه وگاع صَحره
آنه بالنسبه إلك...روح عشت ابداخِلَك
وادري بفراگي تصير العيشه مُرَّه

آنه يمك ياعلي ومشدوه بالك
بلله عنك لو غبت شيصير حالك
واليگول البگه ابراسك عالجرالك
ابهالمصيبه ياعلي هو اشبگالك

ياعلي... حيلك انهَد والعيون امغيِّمَه
ياعلي...اشلون باچر من تودع فاطمه
( إنا لله وإنا إليه راجعون )
......................................
يالمصابي امعذِّبَك...وهاضمك وامتعِّبَك
وادري راح ايشيب گلبك من مصابي
اشلون عنك لو رحت...وين يافاطم صحت
راح تلگه اجواب حسرات اعله بابي

أقره بعيونك أنه ابهاي المسيه
ادگول كلشي ولا تروحين امن اديه
انكسر گلبك عالجره والصار بيه
اشلون لو دارك تضل مِنِّي خِليه

ياعلي....تنحب وكسر الضلع موضوعك
ياعلي...ابغيبتي ياهو الينشف ادموعك
( إنا لله وإنا إليه راجعون )
.....................................
أنحب ودمعي ايهلي...(حسبُنا آلله ياعلي)
عالضلمنه وفرهد العِشره وهظمنه
باچر اولادي تحن...وزينب اوياهم تون
ويلي وينادون مشتاگين لُمنه

آه باچر لو متت تشبگني اديهم
تنحب املاك السمه وتبچي البچيهم
ولدي اعز امن الهوه وعينك عليهم
وآنه ماداعي بعد أوصيك بيهم

ياعلي....ولدي كون ابعينك اتخليهم
ياعلي...اهواي اريد ابزينب اتوصيهم
( إنا لله وإنا إليه راجعون )

سيد علي الموسوي

هالعزاء....مانتوفق انحظره
هالعزاء....لوما نظرة الزهره

من حظرنه للعزاء واتوفقينه
هاي دعوة فاطمه ونظرتهه لينه
اهواي ام الحسن متفظله علينه
حتى جيتنه بديهه ومو بدينه

هالعزاء...مانحظر إله ونقره
هالعزاء...لوما نظرة الزهره
.....................................
چان بيت احزان واحد فاطمه الهه
هسه صارت هالمجالس إلهه كلهه
هيه ام التعزيه وعونه الوصلهه
والله هذا الخير كله من فضلهه

هالعزاء...گلب الطاهره ايجبره
هالعزاء...لوما نظرة الزهره
.......................................
خل تلوم الناس بينه ماتهمنه
على حب هاي الخِدامه انشد حِزِمنه
نعتبر أم الأماجد هيه أمنه
نبتعد والزهره بالمجلس تلمنه

هالعزاء...يضمن للمُحِب أجره
هالعزاء....لوما نظرة الزهره
..........................................
بالعشگ يهل العشگ صرنه عوابس
وابمحبة فاطمه يحله التنافس
غير هاي الخدمه ابد ماعدنه واهس
واعله كل جو يختلف جو المجالس

هالعزاء....حَتماً يختلف عطره
هالعزاء....لوما نظرة الزهره
........................................
إي وحگ زينب واخوهه الغالي عباس
نبقه خدام الزچيه الآخر انفاس
عالم الخدمه يوادم عالم احساس
باچر ايبيض وجهنه ونرفع الراس

هالعزاء...نعمه ونكسب البُشره
هالعزاء....لوما نظرة الزهره

سيد علي الموسوي

قصيدة للامام القاسم الغريب ابن الكاظم ع..

وين اهلكم
وين اهلكم
يالساده چاليش متطشر شملكم
...
عدكم ابجسر الرصافه مات امام
وواحد ابابل أكل عمره الحنين
منكم المسموم والساحگته خيل
وما سٌلم من الذبح حته الجنين
ليش ماعدكم هلا بذيچ الديار
إبوين ماعدالله گاع امطشرين

صعبه صعبه
دنيه غربه
وابراحة البال مانوّخ جَملكم
...
بيكم بسامره وبگاع الدجيل
وبيكم بإيران شعلو چبده نار
وجعفر الطيار بالاردن غريب
وابوطالب حتى ماعنده مزار
وفاطمه الزهره بلا گبه وضريح
والامام المهدي ملّ الانتظار

نار اجتكم
شتتكم
واشما تضجون محد يفزع إلكم
...
عدكم اباخمره دعبل عنه گال
ومرقد الحمزه غريب اعله الجبال
وبَعلبك محتظه جوهرة الحياء
وبمصر ماتت نفيسه ام الدلال
ومسلم بكوفان طاح أمن السطوح
وشدو برجلينه ياوسفه الحبال

ذبّحوكم
هجّروكم
ياأكرم الناس يالمحد مثلكم
...
عائلة أشرف نبي وتتشردون
وعدكم اجروح ابقيع النائبات
وباراضي الشام خير أمن الله ضيم
دفنو اهناكه بنات امگبعات
زينب وغربتهه ماشالتهه گاع
آه يم عون ودموعچ جاريات

لو رقيه
هم سبيه
آ يالبعيدين يالمحد وصلكم
....
زفره من أحشائنه الليله تصيح
آ يالقاسم يبن موسى الحبيس
روحك ابقم اعله معصومه تطوف
وامنياتك يم علي ذاكه الانيس
الحله خدامك يقاسم موغريب
وانته عالحله وضواحيهه رئيس

ياجرحنه
شيعه احنه
خدام الاحسين سجلونه ابسجلكم
...
عندك أبنيه عفتهه إبلا حنان
فاطمه ويامحله هالاسم العظيم
وي امهه وجدهه راحت للحجاز
عبرت الصحراء بالعقل الحكيم
مثل ماامهه الزجيه بالحساب
اتعبّر الشيعه السراط المستقيم

صح زغيره
بس اميره
هوه انتم ابواب للرحمه اصلكم
....
محمد الجماسي
اللهم عجل لوليك الفرج

هالليله بأصوات النحيب
نصرخ وداعا يالغريب
واقاسما..واقاسما
...
مثل مانحيي الليالي الفاطميه
ننصب اعله القاسم الليله العزبه
انواسي ابوه المندفن بالكاظميه
وللرضا انقدم تعازي بهالمسيه

ياوسفه اشراف العباد
كل واحد ايموت ابلاد
واقاسما...واقاسما
....
فاطمه المعصومه كون الليله يمه
بآخر انفاسه تواسيه وتشمه
ابشوفة احبابه الغريب ايزول همه
وماتضل الدنيه بين اعيونه ضلمه

معصومه يمه الليله كون
اخت واخوهه يلتقون
واقاسما..واقاسما
...
عنده بس ابنيه ياناس وزغيره
لااهل يمه ولايمه عشيره
بآخر انفاسه بقه الناظر يديره
عله احسين اللمو اضلوعه ابحصيره

هذا الامام اشكد حنين
يبجي وينادي اهلي وين
واقاسما..واقاسما
...
ناس الامضيفينه من شافو يعاني
والعمر ماباقي ينعد بالثواني
ناشدو عن اسمه كال القاسم آني
ابن موسى الكاظم وسيد زماني

بس الوكت بايامي دار
خلاني احن ليل ونهار
واقاسما..واقاسما
....
كلهم اخذو ابنيتي لو رحتو الوطنه
هيه الاتدليكم اعله ابيوت اهلنه
وانتو ماقصرتو يالكلكم محنه
بالحشر ويانه مثواكم الجنه

ومن غمض اعيونه الامام
سووله بالحله مقام
واقاسما..واقاسما
....
كون هاي الليله نلتم بمزاره
نلطم بحركتنه وانون بحراره
بالكلب بانين اله كبه ومناره
يا الهي ارزقنه للقاسم زياره

اخو الرضه وللحاجه باب
هالليله غطوه بالتراب
واقاسما..واقاسما
....
محمد الجماسي
اللهم عجل لوليك الفرج

نزله للسيده الزهراء





مولاتي مولاتي
يافاطمه
١
طاعت الزهره امر واجب عليه
وبصمت من المهد عبد الزجيه
عبد مولاتي صرت صبح ومسيه
واشعر بهذا الشرف لايگ عليه

بعيوني وضنوني
شايلها عشگ
وگليبي بس الها
كل لحظه يدگ
بكل مجلس وياها
لا ما افترگ

يشهدلي يشهدلي
رب السمه

مولاتي مولاتي
يافاطمه
٢

صرت عبد الفاطمه ويشهد بكائي
بالمجالس عابس بهذا انتمائي
أشعر مقصر رغم هذا وفائي
ردت منها بالحشر اخذ جزائي

بالدمعه من انعه
ترسمني صور
علتني وخلتني
أشعر بالفخر
خادمها اتشرف
وبطول الدهر

أنسيه حوريه
ياعالمه
مولاتي مولاتي
يافاطمه

٣

شما أقدم خدمتي أشعر قليله
وابد ما اسمع حچي الناس الدخيله
عشرتي وياها والسفره طويله
باچر بيوم بالحشر هيه الكفيله

وياها والگاها
تشفع بس الي
من احجي واتباها
يسمع عاذلي
هالليله الخاطرها
احضر يا علي

يحضرني يحضرني
حامي الحمه
مولاتي مولاتي
يافاطمه
٤

الها متحزم لحد يوم المنيه
للمجالس احضر بيوم العزيه
اشگد قليله بالسنه لجل الزجيه
اتلث روايات الليالي الفاطميه

ما اشبع من اسمع
نجمات السمه
من تطلع بالمدمع
تنعه فاطمه
ما ملها
تبقه الها
روحي هايمه

رويني رويني
شابع ضمه
مولاتي مولاتي
يافاطمه
٥

بالليالي الفاطميه اكتبت عهدي
ابقه احييها وعلي يشهد المهدي
هالليالي ما املها وهيه عندي
مثل امي ومثل ابويه ومثل ولدي

احزاني ودمعاتي
تبقه للابد
للزهره من زغري
منطيها عهد
حضريني ناديتچ
يالزهره مدد

وعيوني وعيوني
تبچي دمه
مولاتي مولاتي
يافاطمه







لاتنسون والدي ووالدتي وأبني عباس من الرحمه والمغفره خادمكم رياض الرسل الجابري