رواياتي 📚 الوسام 3️⃣

قلت ليها عيب عليك تعايني ليهم قالت لي ستو النصوحه ارح ارح خشي قلت ليها لالا انا جيت أدي خالتو لبنى القروش حقت الصندوق وماشه
قالت لي والله ما تمرقي من هنا إلا تفطري وتشربي الشاي وأنا حلفت قلت ليها عشان كده ما بدور أجيك
دخلنا جوه وبقينا نتونس وحكيت ليها اليوم داك الحصل اي شنو مع الكلب تشيل وتضحك وحكت لي هي برضو ..قلت ليها البشوفنا يقول شفع ما ناس قربنا نخش ال30
قالت لي بري يختي انا عمري لسه 20 سنه واقف ليهو 7 سنه ولا بزيدو قلت ليها وأنا بضحك يختي اتصالحي مع الوضع قالت لي بري اتصالحي انتي ..مالك علييي انا لسه صغيره ..
قالت لي صحي ما وريتك انا خلاص قررت اعرس
قلت ليها ماشاء الله اتقدموا ليك يعني ..
قالت لي بري ماحصل لكن انا خلاص فترت من العليي دا دايره امسك بيتي بعدا ..
والليله بعد شفت ود الناس السكنو جداد ديل قررت أمش واتقدم ليهو انا مافوكا شي ..
ضحكت زين وأنا بقول ليها يادوب من ما جاب خبرك
قالت لي هييي في زمن الرسول في واحده مشت عرضت نفسا على الزواج ..
قلت ليها براك قلتيها زمن الرسول !
تعمليها هنا ! تلقي سيرتك في كل لسان وعرس مابعرسوك عشان كده الزمي مكانك واشحدي ربك .
قالت لي الله يديني نص البرود العندك دا واعيش مبسوطه ..بيني بينك علىك الله ما شايله هم الموضوع دا ..
قلت ليها ولا مفتكراه من الاساس متصالحه جدا ..
قالت لي عاد كيف ما تتصالحي معاه وإنتي جوك اتنين وتلاته واخوي زاتو جاك يامفتريه وتشيلي وترفضي تركزي كيف عاد ..
قلت ليها اصلو ماف فرق هم مرفوضين يعني زيي زيك ..
قالت لي زييك وين عليك أمان الله يجي واحد يقول دايرني ساي ويقول نظرة أقلبا عقد هههههه
في الوقت دا جات خالتو لبنى سلمت عليها واتونست معاها شويتين واديتا القروش ..ختو الفطور فطرنا وشربنا الشاي وقلت ليها بعدا انا ماشه طلعت معاي سندس تقدمني لقينا الناس المقابلين ليهم ديل خلصو دخيل العفش تعالي يا سندس جريني جر بدون ما افهم اي شي دخلتني بيت جيرانهم الجداد ديل من دخلنا لاقينا مرة خمسينيه كده واقفه بره في الحوش ومعاها ولد مقبل على الجهه التانيه نادت سندس بي صوت عالي وهي بتقول السلام عليكم يا ناس البيت. .
اتلفتو علينا الاتنين ورددو وعليكم السلام ..
اتحرك الولد من هناك ومشى وجات المره دي علينا وهي بترسم إبتسامة على وشها حبابكم اتفضلو رددت سندس وهي بتقول ليها نحن جيرانكم هنا جينا نساعد يا خاله قالت ليها والله ما بتقصرو ماف داعي تتعبو روحكم قالت ليها ماف تعب والله نرص معاكم نغسل ليكم العده أي شي الناس للناس عندك بنات ؟! قالت لينا عندي بتين لاكين في بيت عمهم بجو المسا ..
غصبا عني بقيت اشتغل ورتبنا ليها الغرف دخلت باتجاه الممر اللي كانت فيهو العده عشان اشيلا وارصها وامش أهلي بعد السمبكه العملتا فيني سندس من دخلت الممر أكان القى لي كديستين جاريات علييي طوالي اتخارجت وخليت موضوع العده كلو كلو ..دخلت جوه ولكزت سندس بي يدي قلت ليها يابت ارح نبقى مارقين لانهم يادوب رحلو وأكيد في حاجات الزول ما بحب يفتحا جنب الغربا ما تبقي ثقيله كمان لأن بالطريقة دي حا تطفشيهم منك كلو كلو قالت لي خلاص نمش كلو شي ولا يطيرو مني من عاوزين نطلع المره حلفت إلا تضيفنا شي قدر ما رفضنا أبت تستجيب قالت لينا معقولة اول زيارة ليكم لينا وتطلعو ساي طلعت بره الحوش ولفت كده جاتنا بي كبايتين فيهم استيم ..
بقينا قاعدين ونشرب وهي بتسأل فينا عن الحي وبتحكي لينا أنهم كانو ساكنين وين وكم تفاصيل واثناء ما احنا قاعدين احس بي حاجه بتهبش فيني ....
#يتبع
#صلو_على_الرسول

اعزروني بسبب إنقطاع الكهربا ياجماعه ...

#يوماً_ما7
#هند_الهيباني

من فتحت الباب لقيتا سارة جات راجعه ...
قالت لي كدي انا تلفوني ما لقيتو مابعرفو وقع مني وين كدي اشوف مكان كنت قاعده ..
دخلت الهول وبقت تشوف دخلت وراها وقلت ليها ما حا تلقيهو عاينت لي طلعتو من وراي وقلت ليها لأنو عندي قالت لي أيوااا شكرا ليك مدت يدها تشيلو قلت ليها حيلك حبيبه ..
افتحي الرمز دا ..
قالت لي عفواً؟!
قلت ليها افتحي الرمز ..
قالت لي بي صفتك شنو افتح ليك الرمز عشان تشوفو شنو دي خصوصيات ولا يحق ليك انك تدخلي فيها اديني تلفوني عشان انا طالعه ..
قلت ليها بصفتي اتأخدت لي صورة بدون إذني ..
اتهجمت واتلبكت قلت ليها يلا يختي افتحي
قالت لي وليه أخد ليك صورة اصلا واستفيد شنو وكيف تتهمني من الاساس اتهام زي دا انتي بتلعبي ولا شنو جاطت وعلت صوتا لحد ما جو أمي ودينا جارين على صوتا العالي وبقو يسألو في شنو
قالت لي امي بتك المصون دي أبت تديني تلفوني وقالت لي إلا تشوف جواهو شنو وأديها الرمز
أمي قالت لي يا حلا عيب كده أدي البت تلفونا
قلت ليها اديني دقائق يا امي وحا تفهمي ..
عايني حبيبتي انا ما فاضيه لي كلام كتير وورجغه على الفاضي كلام واضح قلت ليك انتي صورتيني وواضح من مسكتك التلفون وأنا لما احس بي حاجه فمعناته هي صاح تمام ف بدون نقة وكلام كتير
أنجزي أفتحي لي أمسح صورتي الجوه دي وشيلي تلفونك ولو قلتي لا فمعناته تطلعي على بيتك بدون التلفون الليله كلام واضح ..
قالت لي كيف تكذبي فيني اصلا وتتهميني أتهام زي دا وأنا اصورك استفيد شنو من الاساس ..
قلت ليها ما دا المحيرني
انتي ليه بتتكلمي كتير افتحي التلفون أشوف
وإنتي تطلعي براءة وتشيلي تلفونك ..
بلعت ريقا 3 مرات واترددت كتير لحد ما فتحتو
دخلت المعرض وزي ما حسيت بالضبط وريتا التلفون وقلت ليها زي ما قلت ..اتفرجو ...
صور بملابسي حقت البيت وأنا بت انصاريه شايلاها مودياها وين كمان ...
مسحت الصور من المعرض ودخلت مسحتهم من المهملات وقلت ليها وأنا بمد ليها التلفون حبيبتي ما أنا البضحكو عليي تاني مره خليك أذكى من كده وإنتي بتاخديها بس برضو حا أعرفك ..
رددت أمي يخسي عليك يا سارة ليه تاخدي ليها صورة من دون اذنا ..
قالت ليها صورة كانت هظار ساي بس وعشان اخليها ذكرى ..
قلت ليها سارة ما انا البنضحك عليي بالكلام دا
انتي ناسيه الحصل لي تجاهك قبل أيام والمعامله العاملتيمي ليها وجاية بتقولي لي ذكرى ..
ذكرى شنو بالضبط زي ما قلتي لي في الأول والظاهر انك بتعرفي حاجه إسما خصوصيه ..
ف شايفه انو تعرفي انو لا يجوز ليك تشيلي صورة بدون اذن صاحبا حتى لو كنتي ليهو قريبه شديد وأوريك كمان ...
طلعت على الغرفه بدون ما أزيد ولا حرف وأنا بفكر بيني وبين نفسي غرض سارة شنو من العملتو دا
.سبحان الله حتى زيارتا كانت بالنسبه لي مبهمه
وكيف كيف ..الحمدلله انو حسيت بيها قبل ما تعمل الكان في راسا ..يارب سترك وعفوك...

#سارة
طلعت وأنا بندب في حظي ياخ بت ما بعرف بتعرف اي شي كده كيف ..
جاطت وضعي وخربت كل خطه كانت في راسي
ومواعده حماد أجيب ليهو الصورة اديهو ياتو عذر هسي .دي علقة وين ياخ ....

#عثمان .
رجعت علاقتي مع ياسر طبيعيه جدا وكان بتعامل معاي كأنو ماحصل بيناتنا شي ..
بس جواي كان في خجل منو بسبب الحصل بيناتنا وسوء ظني فيهو ماعارف اقدر اتعايش مع الاحساس دا كيف ولطفو وطبيعتو معاي مخليني احس نفسي صغير جمبو ..

#دينا
طلعي لي معاك الشنطه حقت اليد الصغيره مسافة ما اسرح شعري انتي عارفه صلاح كان جى بعد يقول لي ارح ما حا القى وقت البس الطرحه زاتو عشان كده عاوزة اتجهز قبل يجي ...
حلا: هههههه والله عفيت منو صلاح هارشك هرشة صاح ايوه الرجال كده ولا بلاش ...
دينا :في عينك عاجبك حالي دا ..اخير زاتو عشان تنضفي براك ..
قلت ليها بس دي حسنتك الوحيده الحا أفقدا ضحكت وقالت لي بالله اصبري لي بوريك ...
بعد كم ساعه كان زوجها جى وأدتو اتغدا وشرب الشاي واتحركو طلعت وخلت لينا البيت مسيخ ..
رتبت المحل ودخلت صليت المغرب وراجعت لي كم ملف للمحاضرات وعد اليوم كده لحد ما جى الليل واستسلمت للنوم ...
بعد التنضيف والترتيب وعملت أمي الشاي شربنا سوا واتونسنا في كم موضوع قالت لي بعد شويه دايراك تودي لي قروش الصندوق دي لي لبنى ..
قلت ليها خلاص تمام ..
بعد ساعتين بالضبط اتجهزت لبست وطلعت على بيت ناس سندس بعد وصلت شارعهم لقيت في ناس بنزلو في عفش وفي ناس كتار داخلين ومارقين..
دقيت باب ناس سندس ..فتحت لي من اول دقه قلت ليها بسم الله مزروعة جنب الباب دا إنتي ..
ضحكت زين وقالت لي دي شنو المفأجاة السمحه دي
قلت ليها خليك مني بتسوي في شنو قالت لي انا في مهمة استكشاف الجيران الجدد ..

عباس :قصدك انا خفيف
لبنى :زي شاي البكى ..
كمان سندس زولة صريحه الفي قلبا في طرف لسانا وظرييفه ودمها خفيف
عباس:اي حسسوني بالألم والله انتو ماعرفتكم اهل ولا كاسرين خواطر ...
لبنى وسندس:ههههههه...
#بعد_مرور_تلاته:أيام
ايوه يا امي انا طلعت خلاص ..
يلا معاكم سلامه..
وصلت الجامعه على الموعد ودخلت المحاضره ...
وبديت بالقاء التحيه وبديت باسئلة بسيطه بالانجليزي وركزت ليهم على Wh question
عشان يقدرو يفهمو اي سؤال مطروح ليهم ويفرقو بين السوال البسأل عن شخص والبسأل عن مكان والبسأل عن وقت والبسأل عن مسافه أو سعر وكيف أستخدم حروف الجر وأهمية الGramer في حياتنا
وليه أدونا ليها وحا نستفيد شنو من أزمنه فيها s عشان اقول سيمبل أو فيها ing عشان تكون كونتنوس وليه بالتحديد بدرسو الحاجات دي ..
قلت ليهم انو السيمبل عشان تعرف القدامك دا قال ليك كلام حقيقي والing بتعني انو دا حدث مستمر رفع طالب يدو وهو بقول لي معقوله الأمريكان كلامهم اليومي بكون كده وبستفيدو شنو اصلا من الازمنه دي ..
قلت ليهو طيب ممكن اسألك سوال إنت لو طلبت منك توريني الان إنت بتعمل في شنو اي سوال
حا تقول شنو عشان تأكد لي أنك قاعد تقوم بيهو حاليا قال لي بقول ليك انا بعمل في شنو وبتبعا بكلمه انجليزيه زي مثلا Now إلي معناها الان ..
حا اقول ليك انا باكل الان أو أقرا الان ..
قلت ليهو جميل ..
لما تمشي وتقابل واحد يتحدث اللغه دي لو ما قال ليك Now حا تتوه ..
هم بقولو الحدث البعملو فيهو وبتبعوهو بي ing دلاله على انو العمل دا بقومو بيهو الان في الوقت الراهن أو عمل مستمرين فيهو ..
اخدت واديت وشرحت كم حاجه والكل كان منسجم وهو بسمع في الشرح خلصت وقلت ليهم أي سؤال؟!
رفعت بت يدها وهي بتقول لي بصراحه يا استاذة لأول مره احس نفسي حابه الانجليزي وانضمو ليها كم طالب وطالبه وهم بقولو نظرتنا ليها اختلفت ..
ضحكت وقلت ليهم الحمدلله وأنا اوعدكم حا نكسر حواجز اللغه شويه شويه لحد ما تبقى ليكم ساهله ولذيذة رددت بالانجليزية ...طيب شكرا ليكم على حسن الاستماع ونتلاقى الاحد المقبل لو بقينا حيين
طلعت من القاعه ومشيت المكتب لأنو ادوني فصل اضافي برضو حا اشرف على تدريسهم الماده دي ..
قعدت شويه وجو باقي الاساتذة
قعدو ..
اتعرفت على كم استاذة كنت الاصغر بيناتهم
اقرب لي واحده عمراً كانت مروة عمرا 33
دخلت قلبي من اول وهله شفتها ولما جات واتعرفنا على بعض دخلت قلبي اكتر ...اتبادلنا الارقام والساعه 11 اتحركت على القاعه التانيه ...
المفترض أدرس فيها ..
كانت الأيام بتمش كده خلصت الاسبوعين الاوائل وأنا بدرس الفصلين ديل الأساسيات وأحببهم في اللغه لما حسيتهم بدو يفهمو بديت في المقرر لأني محصورة بزمن محدد أكمل فيهو المقرر..
#سارة
الكلام دا طوول والله يا ابتهال طلب مني صورة لي حلا بت بخيته ما بعرفو قصتو شنو وأنا والله ما اكذب عليك اضايقت منو ومن الوقت داك قلبي فارس عليها اكتر وزعلت منووو كيف يطلب صورتا
ابتهال:يابت ماتزعلي نفسك كده مش هو طلبا بكون داير يرد اعتبار نفسو بشوفا واحتمال زاتو يشيلا برسلا لي أصحابو ويخرب ليها سمعتا العاجباها دي
وتبقى عندو رخيصه ساي بعدين زاتو انتي عارفه
هي دام مغطغطه كده حا يكون متشوق يشوفا وما حا يركز معاك عشان كده تطفي اللهفه دي بي انو يشوفا وماعندك قضيه يعمل بالصورة شنو بعدا هو حر ان شاء الله ينشرا في التيك توك ..
هو خطبك وأكيد دايرك ما تركزي ..
سارة :كلامك صاح والله
خلاص انا بحاول أجيب ليهو صورة ليها بي اي طريقه واعمل زي ما قلتي لي
ابتهال:ايوه خليك كده وامشي صالحي ...
سارة :تمام اتفقنا ..يلا مع السلامه ..
#ياسر
والله ما عارف اقول ليك شنو يا أحمد خجلان منك خجل انا والله ما داير اشيل القروش دي انا عاوز اعتمد على نفسي ..
احمد:اسمعني هنا يازول قروشي اعتبرا قروشك
ومتى ما احتجت حاجه تعال لي والله لو ماعندي اتصرف ليك ..
ياسر : كتر خيرك واوعدك حا نرجع ليك قريب
احمد:انا كده حا اخسرك والله ياخ شنو برجعا ليك برجعا ليك انا طلبت منك هسي ترجعا وريتك انا ترجعا لي بشرطا ولا بستلما وأنا حلفت
ياسر:كتر خيرك يا الغالي ...
#حلا
سمعت صوت الباب بدق مشيت وفتحتو لقيتا سارة سلمت علييي بي طريقه غريبه وبتتظارف ...
اخدت قعدتا وكل دقيقتين ترفع يدها الفيها الدبله وتعاين لي ..قلت بي صوت اقرب للهمس الجن بيتداوة كعبه الاندراوة..قالت لي قلتي شنو ..
قلت ليها قلت انتي كيفك كويسه
قالت لي الحمدلله ..بقت رافعه تلفونا وتطقطق قعدت مسافه وهي بنفس الوضعيه
وبعد نص ساعه طوالي وقفت على حيلا وقالت لينا يلا سلام انا بعد دا ماشه وراي كم حاجه عاوزة اعملهم ...
قلت ليها أقيفي اشربي العصير هدي دينا بتكون عملتو ..جات دينا جابتو شربت منو نص الكباية ووقفت على حيلا وقالت لينا يلا انا ماشه قدمناها لي باب الشارع طلعت وقفلنا الباب دخلو ناس دينا جوه والباب تاني دقا مشيت فتحتو لقيت.........
#يتبع.....

ضحكنا وبعد نص ساعه جابو الجبنه والفنكوش..
بقينا نشرب ونتونس ونحكي ..
حكيت لي خالتو لبنى الحصل في بيت ناس انتصار وميته بالضحك ..بعد شويه سمعنا صوت الباب
رددت خالتو لبنى وقالت لي سندس افتحي الباب بكون دا اخوك عباس ..
طوالي لفيت طرحتي وربطت النقاب راجع واستعدلت ..
جى داخل قال السلام عليكم رديت السلام
قال لي حلا كيفك ان شاء الله كويسة قلت ليهو الحمدلله ..عثمان كيف قاعد ..قلت ليهو كويس الحمدلله في قاعد هسي خليتو هناك ..
اتكلم مسافة وقال لي سندس كبي لي كباية
شال كبايتو وطلع الشارع ...
بعد مسافه فكيت النقاب خالتو لبنى قالت لي متين تجي بيتي دا عروس لي ولدي عباس دا عشان ترتاحي من القعاد كده وقت يجي .
قلت ليها مالك عليي ياخالتو ضحكت زيين وقالت لي مالو ما عاجبك قلت ليها ولدك عباس دا مايشوف ليهو طرحه لافه طوالي وشوو يجيب قلوب
بعدين لا أعرف امسك أولادي لا أعرف امسكو هو من البنات مالك عليي سندس ضحكت لمن وقعت من السرير قالت لي انتي الظاهر لخبطتي قايله نفسك بتتكلمي معاي ونسيتي دي أمي من شدة انفعلتي
قلت ليها هيييي وتاني هييي انا خالتو لبنى دي بتكلم معاها على راحتي وعندي أعز منك ..وأكيد هي انا عندها اعز منك زاتو مش يا خالتو ..
سندس قالت لي ما حصل ..
قلت ليها وريها بالله يا خالتو قالت ليها صاح عزيزه عليي ضحكت وبي مكاواة طلعت لساني وكاويت سندس وجيت سلمت على خالتو لبنى في راسا
وسندس صرت وشها ..قلت ليها الزعلان كلمو يقع الخزان كلمو .... جدعتني بالمخده ..
وتمينا ضحكنا بعد مسافه قلت ليها هيي انا بعدا حا أمش ارح أحكي لي الشمار ..
قالت لي ههههاي شمار شنو كمان والله مافي ولا ربع شمار لكن انتي ما بتجي الاكده ...
قلت ليها ايواااا بقينا كده يا جعفر ؟!
ضحكت وقالت لي اييي يا خليل ..
قلت ليها تمام ارجيني تاني النجيك
اتونسنا شويه وبعدا قلت ليهم انا بعد كده ماشه البيت قعدت اكتر من 3 ساعات قالو لي بيتي
رفضت لبست سندس عشان تقدمني طلعنا الشارع
وبقينا ماشين واخدتنا الونسه ووصلتني قريب البيت وما ركزنا كان بعد وصلنا قالت لي حلا ..
قلت ليها اها .قالت لي هييي ارح قدميني ..
ضحكت لما دمعت قلت ليها هييي نحن شغلتنا دي ضاربه اي واحده خوافه اكتر من التانيه ارح نقيف في نص المسافه واي واحده ترجع البيت بي طريقتا قالت لي خلاص وصلنا وقلت ليها يلا انتي في درب وأنا في درب اقري قران وأبقي جاريه.واتحركنا ..
لحد ما قربت أصل بيتنا بي شارعين اشوف في حاجه لونا أسود دققت النظر قلت يمكن قماشه ولا شجره أكان أقرب والقى شي كبيره وووب كلب قولة هوووو مسكت عبايتي في يدي وفكيت الجريه بي سرعة 80 وحاسه قلبي أتقطع عاينت وراي على اساس حا اكون فتو لقيتو وراي صرخت ووبعليي الحقوني يا ناس الحقوني .....
هداك بيتنا بقيت جاريه من قربت أصل اتزكرت ناس بيتنا اللي يفتحو الباب بعد دق ساعه
لو وقفت الليله بجيني داء السعر ..
طوالي فت البيت زاتو وتميت جريتي .نفسي أتقطع وزول في الشارع ماف بكونو في صلاة العشا وأنا اتجارى زي المجانين كان شافني زول بي هيئتي ولبسي الأسود في أسود دا يقول دي براها جنيه جاريه زول بجي عليي ماف ..
جاريه ومحل أقبل ما بعرف. ..
لا قادرة أعاين وراي اشوف لا قادرة اتابع جري حاسه رجلي انتهو ....ومواصله في جرييي أكان القى لي شارع مضوي وفي ولد قاعد في كرسي بره
ساعة الخوف أصلو العقل بكون ماف تابعت جرييي ولا ختيت ليهو اعتبار جاريه بس وعديتو بعد وصلت نهاية الشارع لقيتو بس بعاين لي وقفت بعيد واتلفتا ورا لقيت مافي اي كلب ولا في اي شي ..
اجييي مشى متين ووين ..
يافضيحتي مايكون من قبيل ماف كلب وأنا ببرطع في الشارع كده وشي ماف ...
لا اله إلا الله ...صلحت ملابسي ورجعت بالشارع
والولد دا يبحلق ساي وافضيحتي يقول دي مجنونه اظنها رجعت بتسحب على البيت سحب ..
لحد ما وصلت تاني توبه امرق براي وبليل كمان ...
دقيت الباب وكالعادة مافتحو لي إلا بعد فقدت اعصابي خلاص ..
دخلت جوه وسألوني اتأخرت وين حكيت ليهم الحصل وروحهم دايره تمرق من الضحك ...
كان يوم مليان كوميديا وضحك ..
أطمنت على سندس وحكيت ليها الحصل بعدا صليت العشا واستسلمت للنوم لأني كان تعبانه من كترة الجري دا ...
#عباس
اها يا امي ما فاتحتيها في الموضوع ..
هههههه والله يا عباس كان حا تظبط معاك كان ما خفتك مع البنات دي ..
تاني قالت ليك نفس الكلام ..
سندس:وزيادة يا شاب قالت كمان تمسك شفعا ولا تمسكك من البنات ..ههههه
عباس:عليك الله قالت كده يعني هسي مافي اي فرصه لي
سندس:اي ولا تعشم نفسك ساي فتش ليك زوله تانيه
راحت عليك يا خفيف إنت ..
عاد ولد هدي ورضي وصفات جميله خربتا ليك الخفه

#يوماً_ما6
#هند_الهيباني.

#وصلت البيت وأنا منهكه من التعب سلمت على امي ودينا ورقدت في اقرب سرير في الهول بي ملابسي
ونمت نومة طويله ما صحيت منها إلا اذان العصر ..
صليت وغيرت ملابسي ورتبت وضعي وطلعت بره لقيت دينا وأمي شغالين في المطبخ جيت اساعد لقيتهم خلصو شلت المكنسه وبديت أكنس فيهو
سامعه صوت خفيف من الشارع وكان صوت عثمان
رخيت أضاني شويه وسمعتو بتكلم بي حنيه شديده عيوني ليك والله يا غاليه تعبك راحه ما تختي في بالك وأي حاجه تحتاجي ليها وريني طوالي يلا يا جميلتي ..
سمعت صوت رجليهو وهو جاااي على الباب عملت فيها ما مركزه في الاثناء دي هو دخل بقيت أكنس
وقف طوالي وهو بقول لي يا مرض ياخ ما تقومي الغبار دا قدر كده شرقتينا ياخ اتجاهلت كلامو
وتابعت كنسي دخل جوه وهو بنقنق هزيت راسي بأسى وأنا بفكر الواحد مع بنات الناس بقت*ل حيلو ويبقى حنييين وكلامو زي العسل من يجي البيت يقلب خلقتو ويفش غبينتو ويعمل مسيطر ..
يخسيي بس ..كملت كنسي واديت الحوش رشه
ومشيت جوه تميت فريش السراير جات دينا بالصينيه وقالت لي ارح ..
إتلمينا كلنا وبقينا ناكل وأكيد عثمان في معناته ونسه ماف تاكل لحد ما تقوم بس وخشمك عندك ..
بعد قام حتى أخيرا جرينا نفس وقلت لي أمي والله ولدك دا شوفي ليهو حلل ياخ بقى مكرهنا البيت دا ..
قالت لي أعمل ليهو شنو نصبر بس ...
اها الليله اول يوم كان كيف ..
قلت ليها الحمدلله كان يوم حلو لذيذ وخفيف بس خرب في آخرو حكيت ليهم قصة الولد اللاقاني في الحافله وعمل الحركات دي ودينا ميته بالضحك
قالت لي حرام عليك احرجتي الولد ..قلت ليها الزييك ديل هم البخلو الأولاد يتمادو في حركاتهم دي عشان كده يا أمي ابقى عشرة على البت دي وأوعه تخليها تركب مواصلات حا تفضحنا ..
خلصت أكلي دخلت الغرفه جاتني مكالمه ابتسمت ورفعت تلفوني وقلت سوسو يا سوسو قالت لي سوسة التخنقك دي جيتك القلتي حا تجيني ليها
يخسي عليك ضحكت وقلت ليها والله انشغلت انشغال شديد خبرك شنو قالت لي الحمدلله اها بتجيني قلت ليها الليله ما بقدر بجيك يوم تاني ها .. جديدك ...قالت لي الجديد شديد قلت ليها يلا أحكي قالت لي لالا يختي دي دايرة ليها استكانه و قعدة جبنه وفنكوش وحركات الشمارات تقيله ..
قلت ليها عايني 10 دقايق بالضبط واكون عندك افتحي لي الباب لبست ملابسي وكلمت أمي قلت ليها ساعه بس وبرجع ان شاء الله ماشه بيت ناس سندس قالت لي ساعه دي معناته 5 ساعات ...
قلت ليها بري ساعه بالكتير اها يلا ..
طلعت الشارع طوالي اتلقاني عثمان في وشي قال لي على وين قلت ليهو ماشه ناس سندس
قال لي اوعه تتأخري. ..
اتحركت بدون أرد ليهو ومشيت على الشارع
من قربت على شارعهم زهجت شارع ناس سندس دا كلو اولاد عشان جمبهم ميدان الكورة..
اليوم دا التقول في نهائي كأس العالم شدة ما متلمين
صرييخ وجري لا وكمان الناس بشاهدو ...
ماقدرت اهضم الكورة دي كلو كلو بقيت ماشه وماشه
وبقيت بسابق في خطواتي لحد ما وصلت نص المسافه تعالي يا الكورة جاريه من بداية الميدان ما اختارتني إلا انا ..
ولبعه في نص راسي حسيت جمجمتي اتكسرت
يادا الاحراج لا عارفه امسك راسي لا عارفه اقيف لا عارفه امشي ولا ارجع مغصة ساي شلت الكورة في يدي وبقيت ماشه بيها والاولاد بكوركو لي يابت يابت اصلي أبيت اقيف لقيت لي قزازة في نص الشارع شلتها وشرط الكورة فشيت سخانة الضربه كلها فيها وجدعتها ومشيت على بيت ناس سندس ماسكه راسي فتحت لي الباب قالت لي الشوق الشوق يا مجرمه ما قلتي ما بتقدري تجي جابك الشمار تجري ..
قلت ليها شوق في عينك كدي زحي لي كدي قالت لي بسم الله مالك يابت ماسكه راسك وشايله ليك قزازة ومالك نفسك قايم كده قلت ليها انا جايه هسي من كأس العالم الجمبكم دا شارطه ليهم كورتهم وكان اتكلمتي زيادة ووجعتي راسي اكتر منا موجعني راسك الحا يتشرط الدور دا ..
ضحكت وزحت لي من الباب ..
سلمت على خالتو لبنى وفكيت النقاب وحكيت ليها القصه قالت لي كرررر علييي جات بقت تعصر لي في راسي ومسجتو لي حسيت راسي بدا يخف ..
عاينت لي سندس قلت ليها اخر مره أجيك تاني
إلا كان ترحلو وبقيت أحكي ليهم في الحصل وسندس وخالتو لبنى ميتين بالضحك ..
خالتو لبنى قامت تعمل الجبنه وجاتني سندس قالت لي لولو ياقلبي قومي أعملي لينا الفنكوش لأنو ضقت حقك العملتي المرة الفاتت طعمو يجنن قلت ليها
فنكوش وطعمو يجنن كان ما جاهز يرمو في الزيت لا بتكبي ليهو ملح لا بهار امشي يا بكاشه .
قالت لي غايتو انتي لسانك دا ..
قلت ليها يلا يلا على المطبخ أعملي الفنكوش دا واعملي حسابك ما تحرقي قالت لي عشان خاطر عيونك صحن فنكوش كبير بنكهة الحريق ...

زحيت منو شديد وقف مسافه وتاني رجع لحركه طليع شي حاولت اتجاهلو بس كان زايد ..
اثناء ما انا في الموقف دا الراجل الكبير الكان مواجهني قال ليهو عيب منك البتعمل فيهو دا ..
قال ليهو هييي يا عمنا ماعندك شغله معاي ..
اوعه...لصق رجلو للمرة الدرشيون غمضت عيوني وأنا كلي غضب طقطقت وقلت للسواق أقيف لي هنا نزلني زح كدي ..
وقفت على حيلي عشان اقوم ..
الشاب الكان مواجهني مد يدو وقطع بيها طريق النزول وقال لي ليه تنزلي ..ينزل هو ..
يلا يا أبو الشباب اتفضل انزل .
قال ليهو شنو ..انزل ليه ؟! ..
قال ليهو انزل يا أخ قبل ما اتصرف تصرف تاني ما يعجبك ..رد الولد دا وقال ليهو من محلي دا ما نازل رجاله هي ..
رد ليهو الشاب دا وقال ليهو رجاله شنو المعاك إنت
إنت حاسب نفسك راجل يعني ..
تعالي يا بت اقعدي في محلي وأنا بقعد في محلك
إتبدلت معاهو واتحرك الهايس بعد كم دقيقه حسيت بي حركه في رجلي عاينت تحت لقيتو ماطيها من هناك ويلكزني ..كان بادي على الزهج وبان من وشي افعالو في نفس الدقيقه سمعت صوت الولد دا بقول اااه عاينت تحت لقيت الولد داك عصرو بي جزمتو وقال ليهو تحرك رجلك شبر قصاد البت دي حا اقطعا ليك واجدعا للكلاب الهناك ديل ..
كانت آخر مرة يعمل لي فيها حركه وتاني ما كررا لحد ما طقطق ووصل محطتو نزل ...
حتى اتنفست براحه ....
سكتا مسافه بعد دقيقتين بالضبط وقف العربيه الشاب دا وقال ليهو هنا يا معلم ...دخل تلفونو في جيبو واتحرك عشان ينزل والمكان ضيق قلت ليهو ثواني انزل ليك ..نزلت انا وهو بعديي نزل واتقاطعنا جمب الباب هو مشى وأنا طلعت العربيه راجعه واثناء ما احنا ماشين لقيت ....

#يتبع
#صلو_على_الرسول

#يوماً_ما5
#هند_الهيباني

#عثمان
تلفوني دق بي رقم غريب لما رديت لقيتو ياسر
قال لي اسمعني ممكن تجي تلاقيني قدام الميدان
قلت ليهو ياخ عليك الله ما تكرهني أنجز داير تقول شنو فترت من اعذارك الكتيره دي ..
قال لي لالا أطمن ماف اعذار تعال استلم قروشك .
ضحكت بسخرية وقلت ليهو خير جاي عليك ..
قفلت منو وفكرت واحد مجر*م الناس ما بجو إلا بالقوه أصلو الكلام البراحه دا ما بجيب فايده
قروش جابا من وين عليك الله عان البشر ديل ..
لبست واتحركت محل وصف لي وصلتو كده
طلع ظرف من جيبو وقال لي شكرا ليك كتير على الخدمه القدمتها لي دي وتاني وتالت مرة بعتزر ليك عن اني اتأخرت عليك غصبا عني ..قلت ليهو خير بس شينه منك تكضب تقول ماعندي وأنا اصلا عارفك عندك عشان كده انفعلت فيك ..
ابتسم لي وهو بقول لي والله يا أبو الشباب ما عندي ولا مليم احمر وحاولت لملمتها ليك يمين شمال يا صاحبي والعفو والعافيه ..
اتحرك من جمبي وانا بقيت متابع طريقي للبيت ضربت لي زولتي نبأ سلمت عليها وقلت ليها الليله لاقيني عشان اديك شوية مصاريف ..
قالت لي حاضر نتلاقى في مطعم شنو ..قلت ليها البعجبك بس اختاري وأنا تحت أمرك ..
وأنا ماشي لاقاني زميلنا تاج الدين سلمت عليهو
وقلت ليهو هسي كنت مع ياسر ..
قال لي بالله صاحبنا دا ظروفو صعبه مفترض نوقف معاه جاني قبيل برضو عاوز يستلف 300 الف قال لي في زول ادين منو هو والزول داك ما قادر يصبر عاصرو شديد في النهايه قال لي جيب لي زول ابيع ليهو تلفوني ..تلفون سمح اتفكى منو بي 320 بس والله لما حنيت عليهو تلفون زي دا بقى بي 500 مستعمل ما بتلقي غايتو ربنا يعينو ان شاء الله ما نقصر منو ونقيف معاهو الفتره دي ..
في اللحظه دي بالذات اتخنقت خنقه ما يعلم بيها إلا الله ...
باع تلفونو عشان يسدد دينو مني ..
اتحركت على بيتهم بسرعه
لقيتو قاعد جنب الباب وخاتي يدينو في رأسو ومدنقر في ألأرض ..
جيت عليهو وطلعت الظرف قلت ليهو كيف تبيع التلفون امسك القروش دي ملامحو اتقلب قال لي بكل احترام لا ورفض كتير يشيلا ولما اصريت علاا صوتو وقال لي والله اقعد بلا تلفون وبلا اكل وشراب لاكين بس كرامتي ما بهينا ..
بعد شلت منك القروش دي حسيت كأني ماعندي اي قيمه وانكسرت اكتر من كسرتي وقت كنت مفلس
أنا كده مرتاح والله كتر خيرك ...
دخل بيتو وخلاني ازجر نفسي عن التعامل السئ الاتعاملتو معاهو...

#ساره
الووو ايوه معاك ..
حماد:كيفك ان شاء الله طيبه
سارة:تمام الحمدلله إنت كيفك
حماد:الحمدلله ..
معليش الليله ما دخلت من بدري أسلم عليك
حماد :ما لاحظت ليك زاتو ما تشيلي هم كدي خلينا هسي من الكلام دا انا عاوزة اسألك ..انتي شفتي حلا بت بخيته صاح ..
ممكن توريني عامله كيف لو عندك ليها صورة أو حاجه بالشكل دا ...

#حلا
اتلفتا وراي لقيتو نفس الولد الكان سألني عن عمري قلت ليهو خير يا طالب قال لي اعفي لي يا استاذه لو السوال ضايقك ما كان عندي قصد ..
قلت ليهو قبلت اعتزارك وأنا بعتزر لو احرجتك بس ما عاوزه خارجيات في الفصل تاني عشان كده وقفتك عشان ما يتطاول علي طالب تاني ..
قال لي آسف مره تانيه ومشى ..
دخلت مكتب العميد واتكلمتا عن عدة تفاصيل وبعدا طلعت من الجامعه واتحركت على البيت ..
ركبت في المواصلات كان هايس ..على جانب الشباك زي ما بحب دايماً بقيت اعاين للشوارع واليافطات .أسماء المحلات العربات ومغرمه بكل التفاصيل دي ...كنت قاعده في الكراسي البتكون مقابله لبعض مقابلاني مره شايله طفله ..وجمبها شاب وراجل كبير بعد شويه ..
حسيت بي ضيق عاينت بي قدامي لقيت في ولد قعد ..زحيت شويه وتابعت تأملي تاني جى علييي
قلت يمكن بتهيأ لي ما اركز ..
بس اتغظت لما لقيتو لصق رجلو مع رجلي لحد ما بقى ماف مكان ..
قلت ليهو بصوت أقرب للهمس عن اذنك ممكن تزح رجلك دي .عمل كأنو ما سمعني ..
دخل يدو جوه جيبيو على اساس حا يطلع حاجه وبقى يهبشني بيها مره في كتفي مره في راسي مره يمط يديهو ويتمدد ويعمل ما قاصد ويختها في كتفي . زحيت منو لحد ما مافضل منفذ إلا انط بالشباك ..ولت جاب خبري تاني رفع رجلو ومداها عليي .اعصابي تلفت شديد وماقدرت امسك نفسي اكتر قبلت عليهو وبي لهجه كلها سخريه واشمئزاز قلت ليهو لا عليك الله تعال بعدا اقعد فيني ...
إنت ما بتخجل ولا مالك نعسان طير نوم عند أهلك جايي تتمقى فيني انا ياخ احترم الحته الأنت قاعد فيها دي حتى ابتسم لي كأنو ما قاعده اصرخ فيهو..
قال لي وتبسمت ذات النقاب كأنها بدر أضاء الكون نورا يا ساتر على جمال العيون ..بقى يوصف فيني .
اتمالكت نفسي وبقيت أهدي في نفسي حلا اسكتي مجاراتك مع الولد دا في حد زاتو حا يكون عدم احترام لي نفسي ...

هنا بالذات بدت نظرتي للغه تتغير
من اليوم داك ولحد آخر سنه بقيت اجي البروف ..
لحد ما اتخرجت بامتياز وشالوني معيده ..
بعدا بفترة قررت أعمل الماجستير في اللغه
بقيت من حلا اللي ما فاهمه في الانجليزي غير
What is your name ...
My name,s ......
لي حلا بروف الدفعه متقنه للغه الانجليزيه
بتكلم بيها بالاكسنت البريطاني والامريكي .
والأن حاصله على الماجستير في اللغه وقريبا الدكتوراة ..
صفقو لي كل المتواجدين وعيونهم مليانه إعجاب
شفت في عيون كان ماليها الملل لي ناس دبت فيهم مشاعر الحماس وبقى في بصيص أمل
فتحت موضوع نقاش مع الكل اي واحد يوريني مستواه في اللغه .بعرف شنو ..وبواجه صعوبه في شنو ..
بعد ما كانت القاعه جايطه والناس مشتتين
بقت في دقائق وبكلمات معدوده كل الطلاب بستمعو لي بكل تركيز ..
رفع واحد من الطلاب يدو وهو بقول لي ..
بصراحه يا استاذه احنا ماعندنا مشكله مع اللغه
احنا بس عندنا مشكله مع الزول البوصل المعلومه ..
كل استاذ جانا هنا بتكلم معانا على اساس كأننا امريكان ف احنا تلقائيا كرهنا اللغه لأنها حسستنا اننا عاجزين .
قلت ليهو لمحه جميله منك ..
دي أكتر حاجه هي السبب الوحيد للعجز المقابل الطلاب لفهم اللغه ..
عاوزاكم تعرفو اني الاسبوع الأول دا حا ادرسكم الأساسيات من الصفر واركز على الحته الأنتو تعبانين فيها وبعداك ممكن نخش على مقرر السمستر دا
عندي معاكم محاضرتين في الاسبوع
رفعت طالبه يدها وهي بتقول لي عليك الله حاولي كتري لينا أيام محاضراتك لو بتقدري تجي كم يوم
قلت ليها ما حا تحتاجو اجيكم كتير لأن مجرد ما ابدا بإذن الله حا تفهمو قصدي كل مره كنت بجاوب على سؤال بعدا رفع واحد يدو وقال لي آسف على السوال بس شكلك بدل على انك طالبه معانا ما استاذتنا ..دخلت اللابتوب في الشنطه ورديت بحزم
لأنو مجرد اني اتهاون في القصه دي حا يخلي الطلاب يتجرأو علييي ما رديت على السوال واردفت بصورة صارمه انا حا أجاوب على اي سوال داخل الماده أو بخصوص التخصص خلاف ذلك غير مسموح بأي سوال ..بعد كده ممكن تنصرفو ونتلاقى يوم الخميس ...يلا
see you soon
اراكم قريبا ..
طلعت من القاعه واتحركت على مكتب العميد .
عشان اوريهو التفاصيل ..
سمعت صوت زول بنادي علييي يا حلا...
اتلفتا على مصدر الصوت واستغربت اكتر بعد ما شفتو.....
#يتبع...

#يوماً_ما4
#هند_الهيباني

أسمعني هنا يا صاحبي أنا أديتك القروش دي على أساس انك حا ترجعا لي بعد أسبوع ..هسي احنا قربنا نتم الشهر عديل وما رجعتها كلامك دا والله اصلو ما جايي ..
أسمعني يا عثمان وحاول حن عليي شويه والله العظيم القروش دي شلتها منك عشان أعالج أمي ..
عثمان:أسمعني هنا .يا ياسر أنا ما الزول البتغشو بالكلام دا تلقاك صارفا جبنات وطلعات وبتماطل وبتماطل وتتزاوغ ..
ياسر: ياتو يوم ادسيت منك ولا عملت حركات بالعكس أنا كل ما الاقيك بقول ليك أصبر عليي حبه
مالاقي شغل ولا عارف أعمل شنو يا عثمان والله أول ما تجيني قروش اسلما ليك
عثمان: يا زول انت بس لو خليت الكضب واعترفت انك زول مراوغ يكون أخير لأنو كده بتخليني ازعل منك اكتر ياخ قبل يومين شايفك مارق من الدكان شايل ليك كيس كبير ماليهو مواد تموينيه ياخ والله زي كذبك دا ما لقيت كلو كلو ياخ غلطان زاتو أنا البديك قروش ياخ كرهتونا زاتو ..
#ياسر
حسيت بالاحراج الشديد وانا في الموقف دا
عثمان بالنسبه لي الصديق المقرب احنا مع بعض من كنا في الأساس حتى قرينا نفس التخصص للجامعه
ما قاعد أتعامل مع انسان غيرو ..
ضاقت بي الحال واحتجت شوية مصاريف ولأول مره في حياتي كلها يحصل بيني وبينو تعامل في القروش ..
أدينت منو 300 الف على أساس حا ارجعا بعد أسبوع من شغلي شاء ربنا انو بتاع الشغل يستبدلني بي قريبو وبقيت قاعد بدون اي مصدر رزق
كتير فتشت وما لقيت شغل الا في السوق اجيب الزباين لبتاعين المحلات .البطلعو في اليوم يادوب بجيب لينا حق الأكل مشيت من المكان دا وأنا في غصة في قلبي وقهر .. .....

#دينا
الووو كيفك يا صلاح ..
ايوه معاك
كيف مع الشغل ان شاء الله امورك طيبه
ردد الحمدلله كلو تمام
اتكلمنا مسافه وقال لي بعد أسبوعين حا اجي اسوقك وما تقولي قاعده اكتر ..
حاولت احنسو بس دون جدوى
استعدلت في قعدتي وامي عاينت لي مسافة وبقت تقول لي جاييك متين
قلت ليها بعد أسبوعين ..
قالت لي وريتك يا دينا ابقي عشرة علي راجلك وبيتك اعقلي واقعدي في البيت وما تكتري الحوامه
الراجل جنو وجن البت البتلف كتير
اهبطي ونضفي ورتبي واعقلي شويه أنتي ما صغيره
ماشاء الله وصلتي الكم وتلتين بس لسه تصرفاتك غير مسؤله ..
رددت ليها ان شاء الله يا امي خير ..
قالت لي خير ..
تابعت لو كان عندي اولاد يمكن كان هبطت لاكين البيت كئيب وهادي وهو مشغول طول الوقت عشان كده بحاول اخفف عن نفسي بالطلعات ..
قالت لي ربنا يرزقك بيهم قريب ان شاء الله ما تيأسي يا دينا بتي عارفه الوحده صعبه لاكين برضو ما صاح اللف الكتير ..
قلت ليها تمام يا امي
قالت لي ان شاء الله يكون كلامي دا اتفهم ما تكوني دخلتي بي جاي ومرقتيهو بهناك
ضحكت على كلام أمي وتمينا ونستنا اللي لازم نجيب فيها سيرة حلا وتصرفاتا وتفاصيلا ...

#حلا
اتلفت على الكانو متواجدين كلهم وقلت ليهم
أكيد مستغربين أو يمكن ما عارفين انا منو ..
طيب انا اسمي حلا حا اكون مدرستكم البديله عن استاذه تماضر لمادة اللغه الانجليزيه ..
قلت ليهم أكيد مستغربين صح ..
كيف دخلت بصورة غريبه وجيت سألت واستفسرت من كم واحد هنا ..
ساد صمت وفي ناس اتحرجو أكيد من طريقه كبامهم معاي قبيل ومن ضحكهم وناس بكون اتحرجو من منظرهم وهم قاعدين بتونسو وأنا جيت دخلت بالطريقة دي ..قلت ليهم في شنو مالكم سكتو خايفين مني ؟! ضحكت وقلت ليهم فكو عن نفسكم اليوم ماف محاضره اعتبروني طالبه زيكم
حتى شوفو انا قاعده معاكم في نفس مقاعدكم
وقفت على حيلي وقلت ليهم رايكم شنو أحكي ليكم قصتي ...
طيب انا يوم من الأيام كنت طالبه هنا درست زيكم شاغبت ولعبت هنا وبكيت وصادقت وكل تفصيله انتو عشتوها انا عشتها ..
ما كان رغبتي نفس التخصص دا كنت متمنيه أخش علم نفس لأني بحب المجال دا جدا جدا ولاقيه نفسي فيهو ..بس احيانا احنا بنقول حاجه وربنا بقول حاجه تانيه لما طلعت النتيجه حقتي وقدمت في عده جامعات عن رغباتي ..ما كانت اللغات إلا رغبه اخيره اكتبا عشان املا بيها الورقه بس
بعد طلعت نتيجة القبول ..
لقيت شالوني وين ؟! لغات اتخيلو
قلت حا اكنسل واخش رغبتي بتزكر أبوي الله يرحمو قال لي ما تستعجلي كدي استخيري ربنا وبعداك اختاري استخرت وما بعرف حصل شنو بالضبط لحد ما بقيت اماطل في التحويل لحد ما لقيت اتسهلت ودخلت لغات رضخت للأمر الواقع وإتقلبت وقررت اخش انجليزي ..بكرهو كنت وما بحبو ولا بعرف لي شي وبحس كأنها طلاسم ..
لحد ما قابلت دكتور اسمو خالد في جامعتكم دي كان بدرس ..قال جمله عمري ما حا انساها كانت الجمله اللي غيرت حياتي ..
طول ما انتو بتعتبرو الانجليزي كعدو مستحيل يجي يوم وتفهمو ...عشان تفهمو ويسهل ليكم لازم تعاملو ك صديق ...ك حاجه عاديه مش الواحد كأنو بنطعن بي سكي*ن ..

عدا اليوم عادي..بتفاصيلو الصغيره والروتين اليومي المعتاد ..
حل الليل واستسلمت للنوم وانا بفكر في تفاصيل اول يوم دوام لي...
أذان الفجر ..قمت بصوتو وبقيت بتنصت عشان اعرفو دا الأذان الأول ولا التاني ..
من سمعت الصلاة خير من النوم .(الأذان الثاني )
قمت مباشرة الحمام اخدت لي دش واتوضيت
طلعت صلاة الرغيبه حتى الصبح وقعدت في مصلايتي قريت سورة البقرة وبعدها اتحصنت كانت الساعه بالضبط بقت 6 مشيت على المطبخ عملت الشاي كبيتو في السيرمس وجمبو الكبابي مليت كبايتي شربتها قبلي في المطبخ واتحركت من هناك على الغرفه ...
لبست لي ادناءة باللون الزيتي طرحه سودا نقاب اسود اسبورت والشنطه فيها اللابتوب وطلعت بره
لقيت أمي صحت قالت لي طلعتي ..
قلت ليها ايوه دعواتك لي ..
قالت لي ربنا يوفقك وينور دربك ويحببك في عيون خلقو ..
ابتسمت للدعوات دي وحسيتا لامست اعماقي مستعده أدفع عمري كلو للكائنه المريحه دي
الأم دي حاجه كده تفوق الوصف ..
طلعت وركبت المواصلات وعلى الجامعه ..
وقفت جمب البوابة وانا بعاين للمبنى الضخم دا ..
دخلتو هنا قبل 8 سنه وانا مبهورة ونفسي أجرب الجامعه لأول مرة ..
مجتمع جديد وبيئة جديده عشت تفاصيل اربعه سنه مع زميلات ودكاترة ما بتنسو قعدت على بينشات القاعات ضحكت هناك وبكيت من امتحان في ديك الحته ..ابتسمت وانا بتراودني الزكرى الجميله دي
الان وبعد كل السنوات دي أنا بخش الجامعه كمحاضرة ودكتورة لمادة ما كطالبه ...
خطوة ورا خطوة دخلت ..وصلت المكتب قابلت العميد عرفت محاضراتي متين وحفظت اماكن القاعه الحا أدرس فيها خبطت على الباب ببطء ودخلت
كانت القاعه جايطه شديد واي كوم براهم قاعدين ويتونسو وفي هرجه مزعجه ..
لقيت واحدة من الطالبات سألتها محاضرتكم الجايه شنو ..قالت لي الانجليزي الممل . ...
ردت ليها صاحبتا وهي بتقول ليها بقيت اكره اجي الجامعه يوم الأحد عشان فيهو انجليزي الجدول ..
زحيت من قدامهم وبقيت كل مره امشي على مجموعه من المتواجدين واسألهم عن الحصه الجايه شنو لحد ما خلصت اسئلتي للقاعه كلها ..
اتحركت بتمهل بعد ما لميت عشرات المعلومات المحتاجه ليها عشان ابدأ..
وقفت في نص القاعه وقلت ...

Hello everyone, I'm glad you're all here today
-
مرحباً بالجميع يسرني وجودكم جميعا هنا اليوم
في اللحظه دي بقو كل الطلاب بعاينو لي في نظرات استفهام ..في نظرات استنكار ..وفي نظرات سخريه وفي بعض منهم بضحك والتانين مشغولين ..
فتحت اللابتوب والبروجكتر ..
اتحركت من مكاني وقعدت في البينش الأخير وبقيت ساكته مسافة وكل مرة واحد من الطلاب يلتفت بعاين لي ويرجعو تاني يعاينو قدام ..
لحد ما نطقت وقلت ليهم....
#يتبع
#صلو_على_الرسول

#يوماً_ما3
#هند_الهيباني

ما قدرت امسك اعصابي أكتر من كده
واتلفت عليها ويدي في نصي قلت ليها
انتو سكرا*نين ولا شنو شابكني شلبتو وعجبتو وعقده وزفت ..حبيبه استكيني وروقي المنقه الخطيب الكان جاييني دا وشي مافتحتو جمبو ولا قعدت جمبو من الاساس ولو وصلكم الخبر ناقص
بتمو ليك حبيبه انا الرفضتو ما هو ..
ضحكت بسخرية وقلت ليها لو كان فتحت ليهو وشيي كان دق صيوان في بيتنا إلا يدوني ليهو
وبعدين العقده البتتكلمو عنها دي اخير تركزو على نفسكم شويه وتمشو تشربوا كباية مويه بارده تروقو اعصابكم ..عشان ما اخلي عندكم عقد جد جد ..
ردت علي المره حقت قبيل قالت لي كبيره كده وترفضي في العرسان قلت ليها خالتو نصيحتك القلتيها لي قبيل ديك أعملي حسابك كان دخلت راسي شيلي هم راجلك وبقيت أغني ساي راجل المرة دا حلو حلا خليت خشمهم ملح ملح ومرقت وأي واحده منططه عيونا ولسانن التقول اتبلع جاتني دينا وقالت لي ارح البيت بعدا ما ناقصين وجع راس واهانات قلت ليها بيت منو ياقلبي دايره احضر الخطوبه كامله انا قبيل كنت زهجانه لاكين هسي مسكني الحماس اكمل..
قالت لي والله ماك نصيحه ضحكت وتميت قعدتي ووصلو بعد المغرب اهل حماد ويعاينو يحمرو لي ساي قعدت مقابلا لي في الكراسي أمو
شلت لي صحن ضربت زيين وشربت استيم واتفرجت على الحاجات وتلبيس الدبل حسيت بالاشمئزاز اصحابو زاتهم واقفين ويصورو راجل ما عندو ولا ربع رجوله دا البكاووني بيهو الله يهديهم بس ..بعد ساعه رجعنا البيت صليت وطوالي اتمددت في السرير بفكر في يوم الاحد الجاي والراجيني
فيهو ...
#صباح_يوم_السبت
حلا:قومي يا مره عليك الله عان البيت دا وسخان كيف ..
الساعه 10 جات يابت قومي ..
دينا:حبه بس يا محمد ود سعاد وبقوم
اجيييي
بقت تردد في كلاما كلو مره ..شلت تلفوني وسجلتو فديو ..
من صحت مهجومه قالت لي بسم الله مالك
ضحكت زيين قلت ليها اب قميص ليموني دا جننك شكلو فتحت الفديو وميته بالضحك قلت ليها لا والله جنيتي رسمي وشعبي قالت لي والله ما واعيه بي نفسي قلت ليها اكعب شي دا معناته كلام قلبك
يا خاينة العشرة تبدلي صلاح بي اب قميص ليموني دا كمان معاها محمد ود سعاد ..سعاد التخنقك
الليله إلا ما ارسلو لي صلاح انا مابرضى الخيانه
بقت تحنس فيني بقيت اغلب في التلفون يمين وشمال قلت ليها اممم بمسحو بس بي شرط تنضفي الليله البيت براك وتغسلي العده والملابس ..
قالت لي يا سلام احلفي بس ما لي شغاله تحتك
قلت ليها بي كيفك يلا ماشه اشوف درب صلاح وين
قالت لي اقيفي يا سجم خلاص
قلت ليها يا شنو ؟....
قالت لي قلت ليك يا عسل
ضحكت وقلت ليها مرة ..يلا على شغلك
دخلت المطبخ عملت الشاي وجيت كبيت كباية كبيره ومعاها كيكه وقعدت في الهول ..
جى عثمان ماري بي جمبي صاري وشوو قلت ليهو بقع منك ..
قبل عليي وقال لي شنو ؟!
قلت ليهو ما معاك مع الصحن حق الكيك دا ..قلت ليهو القطع دي ما يقعن منك .اجيي
قال لي هييي يا حلا لسانك طال وداير ليهو قص
ولا قلت ليهو بتقول في شنو أكلت زين ومشيت اتمددت في سريري بعد مسافه طلعت ملابسي كلها من الدولاب واشتغلت فيها مكوة عشان بكرا اول يوم دوام لي ...
حضرت اللابتوب وراجعت البي دي اف الموجوده وظبطت اموري كلها وقررت أخد لي نومه....
صحيت بي اذان الضهر صليت وعملت الفطور الوقت دا كان دينا انتهت من النضافه والعدة وبدت في الملابس ..قلت ليها مهروشتنا يا ..
قالت لي فضل لي بسيط وإلا ما اردها ليك يا غياظه ضحكت ومشيت من جمبها ..
بعد ساعتين خلصت وجاتني قالت لي يلا تمسحي
مديت ليها التلفون مسحتو وقالت لي بكرا البيت دا كلو عليك انتي قلت ليها وين يا بكرا ارتاحي زاتو عندي دوام يعني النضافه بقت معلقه فيك ..
كدي خلينا من النضافه الليموني داك قصتك معاهو شنو ..
قالت لي بري والله ما عندي اي قصه لاكين حلمت سكتني كلبه وبقيت راقده في مكاني خايفه منها
وشفتو بقيت انادي محمد ود سعاد محمد ود سعاد
ضحكت فيها ودردشنا شويتين واي واحده مسكت تلفونا وقعدت على ركن ..
#في_بيت_انتصار
انتصار:شفتيها بري بت بخيته لسانا متبري منها كلاما بتقولو حبه لاكين زي السم ..
سارة :سم اليهراها شاحدة ربي ..
شايفه نفسا الكرور .لكن إلا ما اوريها الطفى النور منو
التصبر لي ..

#عودة
بس أنتي يا حلا حاولي ختي الدراسة على جنب
البت في النهاية ما ليها الا بيتا وعارفه أنا ما دايره اخليكن وراي مع عثمان دا عارفاه متهور ويدو اقرب من لسانو وخايفه عليكن منوو ابوكم لو كان في كان أخف قدراً لكن هسي بقيت براي وما في يدي حيله
حلا: يمه بعد عمر طويل ان شاء الله ما تشيلي هم ان شاء الله خير ..
خير يا بتي الله كريم ...

دخلت في الغرفه الفيها سارة تشيل وتتبسم لي من غير عادتا وكاتله حسها جيت أسلم عليها قلت ليها الف مبروك ليك وإن شاء الله ربنا يتم على خير قالت لي اميييين وربنا يعوضك ان شاء الله ومعاها ضحكه مافهمتها جات عفواً ولا صامولتا فكت ..
قعدت في السرير وفكيت نقابي لقيت بنات قاعدات قلت ليهم النساعدكم بقينا نغلف ونحضر في صحانة التقديم بعد ربع ساعه كده جات داخله المرة حقت قبيل عاينت لي ومسكت سارة قالت ليها ربنا يغطيك ويحفظك من شر خلقو ويبعد عنكم العين والحسد ..
وقالت ليها كلام كتيير قربت استفرغ من تخلفهم
جاتني وقعدت جمبي وقالت لي أها قلتي لي اسمك حلق مش وفكتا ضحكه قربت أرد ليها بي ضحكة الرقاصات ديك واقول ليها لا سلسل لاكين عشان عمرا بس مسكت نفسي منها العجوز الشمطاء دي
قلت ليها ايوه قالت لي معليش يادوب اتزكرت حلا..طبعا حكو لي بي قصتك أصلو اي شي في الدنيا دي قسمه ونصيب بجيك غيرو بس دايره اقول ليك ما تعزلي لأنو انتي ما صغيره يا بتي وعارفه المره عمرا محسوب اي سنه بالنسبه ليها ضياع وفرصا بتقل دحين أعملي حسابك والبجي ليك تاني طوالي وافقي الزمن دا حتى كان راجل مره الواحده ما تضيع حياتا كده ساي أهم شي البيت والجنى يا بتي ولا شنو بعدين عمرك انتي 30 يعني خلاص يابت قطرك قررب يقوم ..
ولا قلت ليها بتقولي في شنو ولا عقبت على كلاما ولا صححت ليها.
في الاثناء دي كان في صوت راجل صفق وجايي داخل لفيت وشي بالطرحه دخل اتكلم مع المره دي كم كلمه ومن الكلام الكان بقولو الظاهر انو دا راجلا.
بعد دقائق طلع عدلت الطرحه اتلفتت عليي وهي بتقول لي ما تنسي كلامي دا يا بتي لي مصلحتك والبنات الفي الغرفه بدو يضحكو وسارة اتكلمت تحت تحت وهي بتقول انا ما شلبتو انا عجبتو والبنات يضحكن جاتني دينا وبصوت همس قالت لي هييي انا يادوب فهمتهم دايرين يجيبوك هنا مسخره وشماته ارح نبقى مارقين ولا امشي انتي البيت وأنا بساعد أمي شويه وبجي راجعه لأنو شكلو بدو يزيدو شماته عايني يعاينو ليك كيف ومتفقين عليك شكلهم كبارهم على صغارهم واحده تانيه الكانت بتمكيج في سارة قالت ليها براحه على البت ما تجيبو ليها عقدة كمان ههههه.. ...........

#يتبع...

#يوماً_ما2
#هند_الهيباني
شفتي أمس عملت شنو بت قليلة أدب وماعندها أي ادب هي زاتا مفترض تفرح انو جيناها بي كبرا دا ووافقنا بيها لي ولدي
ولد هدي ورضي مية بت تتمنى إشارة منو ساي
تخلينا قاعدين ساعتين وتلاته راجين حضرة سيادتا عشان تفتح وشها التقول من سماحتا واحده متكبرة وعديمة حيا افووو علي دي تربيه عاد بخيته ما ربت
تهاني:.اصلك ما تزعلي ياعوضيه بكرا دي نمش نشوف لي حماد بت انتصار مرت الحاج الساكنين قريبين ليهم ..أكيد حا يجو وبوصي بعدين انتصار تعزمهم كيه ليها هي وامها الما عرفت تربيها دي ...
باكر ليه ؟! هسي من صباح الرحمن دا نتحرك
تأجيل شنو البنأجلو ...
#حماد
يا أمي ماشه على وين ..
ماشه أطلب ليك سارة بت انتصار يا ولدي قايلننا هينين ولا لينين إنت بس خليك قاعد هنا بديك بعدين خبرهم
وتتحركو عليهم المغرب إنت والرجال ونتم التعارف .
...خلاص يمه ..
ايوه خليك كده تسمع كلامي إلا ما أجيب ليك بت السرور بلا حلا بلا قرف ....
#بعد_مرور_اسبوع ...
الحقي ياحلا الليله خطوبة سارة بت خالتو انتصار
حلا:والله ماشاء الله ربنا يتم ليها على خير ..
اتخيلي على منو !! ؟
اها
على حماد ود عوضيه ..
أيوااا والله ماشاء الله
دينا: انتي يا بت مالك باردة كده اقول ليك على حماد الكان جى هنا دا وتقولي والله ماشاء الله
حلا :لا أرجيني النعزي ليك هنا وافتح بيت بكى
مالي ومالا انا حماد ولا نكار ..اجييي
دينا :بِس عليك مسيخه ولتيخه..
السلام عليكم ناس البيت ..
قومي النشوف الجى منو ..
السلام عليكم حبابك اتفضلي ..
لا والله شكرا ليكم بس مستعجله شديد
ما اوصيكن لازم تجن خطوبة بتي ضروري وإن ما جيتن والله بزعل منكن..
دينا : لا ياخالتو اطمني أكيد حا نجي
التفتت عليي وهي بتقول لي عارفه ما ساهل عليك لاكين بتمنى انتي برضو تجي يا حلا
استغربت من كلماتا دي وقلت ليها أكيد اول الحاضرين كمان ..
مشت وبعد أمي جات راجعه قالت لي انا بمش عليهم من هسي ..
تكون براها وبتحتاج مساعده وأنتن من العصر يأذن تعالن.
دخلت الغرفه اتمددت في السرير وبقيت اتصفح في التلفون مشى الوقت سريع وجاتني دينا من الأذان قال الله. اكبر .قالت لي قومي ارح ..
قلت ليها بسم الله خلي اليتمو الأذان ان شاء الله
بت جنك حوامه أريتو راجلك يجي من السفر سريع عشان يحرم عليك الشارع ..
قالت لي بِس منك يا الحسيدة مالك عليي يادوب شميت لي هوا محيراني زاتو مقفوله كده وسط الاربعه حيطان دي طول الاجازة قريب 4 شهور ما بتزهجي انتي ...
قلت ليها البزهجني شنو كمان
قالت لي ارح استعجلي عشان ما دايرة حدث يفوتني
قلت ليها خلاص يا الأخت امشي قدامي وبجي وراك
قالت لي ما دي المصيبه أخليك هنا ما بتجي زاتو قومي اتحركي ..
قمت وأنا زهجت من نقتا الكتيره دي قلت ليها ارح النصلي ..
بعد خلصنا ..
طلعت عبايتي وطرحتي والنقاب كويتهم وسرحت وعملت لي مكياج على خفيف وقلت ليها يلا يا النباحه ارح ..
طلعنا من البيت وبقينا ماشين بيت خالتو انتصار ما بعيد شديد بقينا ماشين وكل مسطبه في الشارع جمبها كوم اولاد وسيييك من نقرب نصلهم صوت ماف ليهم اظن يتفرجو عشان بعد نمشي يعلقو ..
يابت يا حلا قرصتني قرصه حاره وقالت لي عايني هناك دا ما محمد ولد سعاد ...
قلت ليها سعاد منو ما تقرصي ياخ تاني أدتني قرصه وقالت لي عايني سريع يابت اللابس قميص ليموني داك ..قلت ليها من ليموني دي ما بعاين وغضي بصرك يا مرض عشان ما تفضحينا ..
قالت لي ووووب جاي علينا ..
وقفت طوالي ومن جى قال السلام عليكم كيف اخباركم ردت ليهو دينا تمامين الحمدلله كيف خالتو سعاد ان شاء الله كويسة ..
طوالي عملت انسحاب تكتيكي واتقدمت وأنا بطني فايرة على دينا فورة جد ..
جات تبرطع زي الشفع وهي بتكورك حلا يا حلا أقيفي لي ..قلت ليها يا دينا بي حليفتا والله تاني ما امرق معاك ياخ فضحتينا فضيحه اتلمي عشان ما اوصل وقفتك في الشارع دي لي صلاح يجي يرمي ليك الورقه عارفاه جنو وجن الحركات البايخه دي
قالت لي عارفاك حنينه وما بتعمليها لكن حركتك شينه كان على الاقل تقيفي تسلمي سلام الله ساي مافيهو شي هسي جبتي لي نفسك الكلام قال لي أختك دي مفتريه ..
دينا أسمعي هنا نحن وصلنا بيت ناس انتصار ختي الكلام دا حلقه في اضنيك الكبار ديل بعدين انتي بي درب وأنا بي درب وإن اتصادفنا ماشين في نفس الشارع أعملي كأنو ما بتعرفيني ..
قالت لي قاسيه يا ..
دخلنا وسلمنا على الكانو في اخدنا قعده بسيطه وجات خالتو انتصار تتقدل ساي وتتبسم قالت لي قومي سلمي على سارة ..
قمت على حيلي ماشه في واحده من النسوان القاعدات قبلت عليها انتصار وقالت ليها هدي الكنت بتكلم ليك عنها قبيل دي ياها حلا .عاينن لي بعضن زيين وما فهمت شي ..

غييرت ملامحي من الحزن وفرجت ملامح وشي وبقيت اضحك بصوت عالي وقلت ليها بريئة انتي يا دينا ..كيف صدقتي الكلمات الكنت بقولا دي
ههههههه مين دي التقول كده وتابعت بضحك اكبر وأنا بقول ليها دي كلمات أخوك المجنون البره دا
مفتكر هاميني العرس من أساسو ضربتتني دينا في كتفي وهي بتقول لي والله جد يادوب اتأكدت إنك جنيتي رسمي ...
تابعت بمرح وأنا بقول ليها انتي ساذجه بس
آخر زول ممكن يقول الكلام دا انا ..
قالت لي وهي بتردد بجد يا حلا ما فارق معاك ؟!
رجعت شعري لي ورا وانا بردد يا استاذه لو ما متزكرة ازكرك انا الرفضتو قبل اعرفو حتى !
انتو جادين ؟! في شنو بالضبط
قالت لي انا بصراحه مستغربه فيك انتي من وين جايبه البرود دا لدرجه تنومي في يوم زي دا ولا يرف ليك جفن بجد انا بقيت أخاف منك ...
قلت ليها من حقك تخافي لأني في الحقيقه ما بشر عادي انا جاية من عالم الاشباح ...في نفس الوقت القلت فيهو الكلمه دي الكهربا كان قطعت والنور طفى وبعدا بسمع في صرخات دينا بكل قوة ..الحقوني يمه الحقوني ...
اتحسست المكان جمبي لحد ما وصلت السرير شلت التلفون وضويت الفلاش فيني ..وزدت الطين بله
لما سمعت صوت دينا بتبكي بطول حسها وتصرخ شبببح .
كان البيت كلو معانا في الغرفه وهم برددو في شنو في شنو ..
الكهربا جات في الاثناء دي وكنت بضحك وميته من الضحك على منظر دينا ..
نقاشات ودرامات حصلت لحد ما طلعو بره ...
قفلت التلفون دخلت اتوضيت وصليت بعدو العشا وقررت اتم نومي الاتقطع بي سبب عثمان .

#يتبع....