قصيدة مولاتي فاطمة العليلة ص

عافوني . وحدي شو خلوني
بالضعن ما حسبو احسابي الاهل
عافوني . دم تصب عيوني
وكلبي جان ويالضعن باني الامل



من طوح الحادي وسرة شفت الضعن ضل يبعد
جان الامل بس يلتفت ليه الحسين ادري ايرد
الما يكسر بخاطر عدو كلبي برجعتة يبرد
ياخيمة لو عني رحت ما عندي غيرك احد

خلوني . خادمة حسبوني
خدمة اهلي وخدمتك خير العمل
عافوني . دم تصب عيوني
وكلبي جان ويالضعن باني الامل



محد عليه دار النظر غاب الظعن عن عيني
ضليت اعيش ويالامل بلكت خبر يلفيني
بلكت علي كالو يرد عن وحشتي ايسليني
وياخذني بلكي لكربله وهناك اواسي حسيني

يودوني . بلكي من يلفوني
واكعد بسد رايه الحيد الكفل
عافوني . دم تصب عيوني
وكلبي جان ويالضعن باني الامل



يومية من خيط الفجر حد ما يبين ليلي
بالباب اناطرلي خبر بلكي بضعن يلفيلي
وكل حرمة من يمي تمر تبجي وتضل تدعيلي
يالغبتو فركتكم جمر من عندي سلبت حيلي

ايحضروني . اهلي ويباروني
جفن عيني من البجي عليهم ذبل
عافوني . دم تصب عيوني
وكلبي جان ويالضعن باني الامل



ريح اليمر كمت اسئلة واشتم عطركم منه
خبرني ياريح بهلي بعطرك اشم الجنة
ضل يحجي ودموعي تصب كلبي انفطر من ونة
كلي اول جروحج علي سيوف العدة ايكطعنة

ايكطعوني . حتلو يسبوني
وتخلص اسنيني عله ظهور الابل
عافوني . دم تصب عيوني
وكلبي جان ويالضعن باني الامل



سولفلي ياريح الحزن كل الجرة بولياني
ياهو الاشد بيهم جرح من عندة ضل ايعاني
اكبر جرح بعد الذبح صاح انسبت نسواني
وشافوهن الناس الغرب وتشمتت عدواني

ايئذوني . الحدو بضعوني
اليمر يم زينب على الكافل سئل
عافوني . دم تصب عيوني
وكلبي جان ويالضعن باني الامل



جم شهر مر وجم ضعن واني اعله نفس احوالي
بأخر محطات العمر كرب ضعن يدنالي
زغير الضعن شايل حرم من الزلم شو خالي
من بعد صاحت عمتي ياعمه راح الغالي

عافوني . كل هلج عافوني
واني اجيتج عمه اسولف ما حصل
عافوني . دم تصب عيوني
وكلبي جان ويالضعن باني الامل


خادم خدام زينب صلوات الله وسلامه عليها
حميد كاظم الشمري