Histology47

نبو فصيلة دم o- ضروري بالله طالبين ع الحالة 5 اكياس في مصرف الدم يبو اقل شي منهن 3 o- الي يقدر يتبرع يتواصل معايا ضروري

السلام عليكم
دكاترتنا الأفاضل زملائنا الأعزاء #ناجحين والا #راسبين {اولي - ثانيه - ثالثه } ياريت ماتكونوش سلبيين واتجوا بكرا ع الساعه 9 للاعتصام والمطالبة بحقوقنا بالقانون..
الناجحين يحطوا انفسهم مكان الراسبين و يحسوا بمعانانتهم و ظلمهم يوم واحد نكونوا فيه يد وحده نقدروا ناخذوا حقنا فيه بكرا حيكون يوم حازم ﻓ ارجوكم حاولوا تجوا و كلموا بعضكم وبإذن الله حنقدروا ناخذوا حقنا محد يخاف واللّــھہ مافي حد يقدر ايجي شور حد لانه وقفتنا بإذن الله حتكون بالأدب وعدم التعامل بالعصبيه..
علماً بأن مجيىء الناجحين تأييد لصوت المظلومين ياريت تجوا تساندونا فضلًا وليس امراً 🙏🏼

بكرا حيكون في اجتماع كيف م بلغنا دكتور عز الدين ان شاء الله لي حاب يجي بكرا حبيت نبلغكم ولعلمكم لعند توا مفش اجتماع ااتفقو فيه يعني ممكن بكرا اجتماع الاخير وعلي حسب كلامه ان يعطينا زبدة الموضوع وان شاء الله خير موفقين ي رب ♥

السلام عليكم
توضيح للي صار اليوم بأمانه ومن غير زيادة حرف واحد
لان حتي لو انتم خفتوا ووخرتوا نحنا مستمرين لعند المطالب ايتحققن
وبكرا بنمشوا نسكنولهم اخرا
الي صار اليوم ونحاول نختصر ....
جبنا ورقة الصيدله الي طلبها دكتور عزالدين وشلناله نسخه وشلنا نسخه للمدير الاداري كلية الطب والطلبه مشوا للعميد في مكتبه بس كان رده حازم وقال جميع المقترحات مرفوضه
وبالنسبه لطلبة سنه اولي ماده وحده فقط لا غير
وتقدروا اتأكدوا من ولي امر عائشه
طالبه معاكم في اولي ووالدها كان متواجد وتكلم مع العميد وقاله ماده بس
وقال تبوا الزياده امشوا جيبوا موافقه من رؤساء الاقسام
رؤساء الاقسام قالوا ... نحنا مانوقعوش الموضوع عند دكتور ادم يجتمع بينا وياخذ راينا ونحنا نوافقوا
وماكانش في حل قدام الطلبه الي ماعطوهمش حل ولا بوا يسمعوهم الا التسكير مع ان كنا معارضين وكان اخر حل اضطررنا انديروه

انا حكيت معاكم بجميع الاساليب ومافيش حد يجي الا الناس الي نشوف فيها تجي كل مره مافيش وجوه جديده
كلنا عندنا مشاغل كلنا بشر ونحسوا راهو مش حجر نحنا وحاطينا في المقدمه نحنا الي بننضروا لو صدر اي قرار

وصلنا لنهاية المشوار محد يخاف ويذل تعالو بكرى

دكاترتنا الافاضل زملائنا الاعزاء ناجحين ولا راسبين اولي او ثانيه او ثالثه مايهمش
المهم انت معانا ياريت تجو تساندونا بكرا
بكرا اخر يوم نكلموكم فيه
بكرا الاجتماع الي بيحدد مصيري ومصيرك ومصير دفعه مظلومه
ياريت ماتكون سلبي واتجينا ع الساعه 9

الساعه 9 بإذن الله عشان الإجتماع بكره هذه الفرصه الأخيرة 💙💙

السلام عليكم..
طلبة الدفعة 46 الكرام..
انتمني منكم انكم اتصبوا مع بعضكم.. اللي ناجح يمشي قبل الناس اللي محتاجة مساعدة.. الظروف السنة اللي فاتت كانت سيئة جدا و ما اتساعدش عالقراية.. قطع ضي و نت ضعيف و سنة توقفت عدة مرات و استنزف فيها الطالب بالتأخير و القرارات الغير مدروسة..
المفروض يكون فيها قرارات استثنائية و حلول للناس المتضررة..
الضغط السلمي وبالطرق المؤدبة حقكم و في اعتقادي الشخصي انه حيجيب نتيجة..
فأنا شخصيا نتمني منكم المشاركة مع زملائكم وبالتوفيق للجميع
د.محمد العماري

د.محمد البرعصي

السنه اللي فاتت يعلم الله بظروف الطلبه كيف كانن في ظل العطله اللي صارت و نظام الدراسه عن بعد ، وهذينا عوامل كيف ما نحنا عارفين عمرهن ما يساعدن حد عالقرايه ومن الطبيعي إن أداء الطالب حيضعف نظراً لغياب التدريس داخل المؤسسه التعليميه وعدم تواصل الطالب بالدكتور أو الأستاذ متاعه ، وفي نفس الوقت كلنا عارفين إن مهما كان نظام الدراسه عن بعد قوي ، مش كيف التواصل المباشر في المحاضره ،

طلباُ وليس أمراً ومراعاة لظروف طلبتنا وعيالنا ، مؤسستنا التعليميه الموقره نرجوا منكم إنكم اتصبوا مع طلبتكم اللي هما أساس الجامعه وتفعيل القرارات اللي فيهن مصلحة الطلبة في الدفعتين ال 46 وال 47 🙏🙏🙏🙏

فياريت الكل يشارك عشان بكرة الأحد في اجتماع حيقررو فيه مصير زملائكم وكل ما يكون عددكم كبير كل ما يكون تأثيركم اكبر 😊😊

السلام عليكم جميعا:- بعد التحيه...

رسالتي للجميع بيش تكون الصورة واضحه وكلكم تقعدوا في الصوره ،اكيده اغلب اللي يهمهم موضوع حسوا ان مفيش فايده وان جري هك وخلاص، بس مفيش حاجه تجي هك وخلاص اي شي في الحياه يبي تعب وكفاح واجتهاد وهذن مقومات نجاح اي حاجه،جرينا عالموضوع من جميع الاتجاهات وقدمنا طلبات واجد وكلهن جن بالرفض،لذلك قررنا الاتجاه نحو الاعتصام عشان صوتنا يوصل،وأول يوم كان عدد بسيط جدا، وثاني يوم اللي هو اليوم اقل بواجد بكل،شباب شويه ونا لي مستغرب فيه ليش العدد بسيط ليش كمية السلبية هذه، معقوله واحل في جيه تي كلنا عندنا اشغالنا الخاصه وعارفين حنتعطلوا بس شن فيها كان شويه ساعات أجلت أشغالك فيهن،والله حرام ،والبنات اللي شفته اكثر عدد من شباب بس مزال فيه تقدري تضغطي علي هلك وتقدري تجي عارف في ناس بظرفها سوا شباب او بنات،بس لو تبو حتقدروا لي ماسكم شنو مش عارف، توا نقوللكم نتائج لي وصلنالهن لحد الأن وبالعدد بسيط هذ شوفو لو جيتوا كلكم ،
1-بإذن الله الموضوع وصل لوزارة التعليم وكلام مضمون
2-اجتمعنا مع دكتور عز الدين وفيه اوراق طلبهن نجروا عليهن وباذن الله حنتحصلوا عليهن حيقون موقفنا وكان متعاون معانا وباذن الله خير
3- طلب منا مسجل عام الجامعه في حميضه نقدموله طلب وحيجتمع مع الوكيل ويناقشه معاه وحينظر في مطالبنا
4- حكينا مع دكتور بشير وقال باذن الله خير
وبكرة حيجتمعوا والعدد مهم والله ماتضيعوا تعب لي تعبناه والجري هنا وغادي تعال بس متدير شي كل ما كان عدد اكثر كل ماحيساعد
شوفوا اولي شن صار سمعوهم يعني مفيش شي مستحيل كلهن دلائل خير وكل شي كاين مصكر وحده وحده يتيسر الموضوع بالله ماتقصروا والله الواحد تعب بس كله ينتسي لما توصل لنتيجة مرضيه ياريت تجوا عد الله صورة بتاع الدفعه تلبس في بالطو وتصور وانت حتي مرات مش حال كويس، ياسي تعال وصبي وانت عارف مش حيسير بس هو باذن الله ساير،ياريت يكون فيه جديه في موضوع وراهو زي ماقلتلكم نتائج قريبه وباذن الله مرضيه والله هانت العدد رحمة علي والديكم

سامحوني عالاطالة بس راهو لو موصلنش للحاجات هذن راهو الأمل مازادش عندنا ومقلنلكمش تعالوا راهو حتي نحن نفسكم بشر ونتعبوا ونملوا بس لما كاين عندك خيط بس وتوا قعد فيه حاجات ملموسه وتساعدك مش حتوقف

بارك الله في الجميع وحفظكم الله ورعاكم

شاركوها في قروبات وعلي اوسع نطاق وتعالوا
كلكم هاااانت والله هاانت

بكرى بأذن الله نفس اليوم الساعه 10 عند الادارة

وماتقولش نجو ونصبو مافش فايدة انتو تجو مصبيين ونحن مجرو جاي وغادي زي اليوم مشينا لأستاذ بشير والمسجل العام طلب منا نقدموله طلب بيجتمع بيه وقابلنا رئيس الجامعه وطلب منا اوراق يعني وجودكم برا مصبيين فالادارة يدعم في موفقنا ويضغط عليهم عشان يحكو معانا ويخاطبونا قريب نوصلو لنتيجة باذن الله وماتسمعوش لأي اشاعة مافش ولا اي طلب تقرر يعني نحن كتبنا جميع الخيارات بحيث يختارو الطلب اللي في صالح اكبر عدد ممكن من الطلبة يعني جيتكم مش ع الفاضي انتو بتصبايتكم هذي مسببين ضغط كبيرررر وتقوو في موقفنا

كليه الطب البشري بنغازي
غدا هناك اجتماع مجلس الكليه مع رووساء الاقسام لتحديد مصيركم
نرجو منكم الحظور غدا في وفقه مع بعضكم
تعال ومش حتخسر شي فرصتك
تعال وماتكونش سلبي

نرجو المشارررركه

زملائي 💕
الحمد الله العدد كويس لكن مازال شوية عشان نوصلوا لعدد المطلوب ، اللي ديرين مش قادرين يجو حاولوا انكم تجو اعطو روحكم فرصة بالمحاولة ، نحنا اعتصامنا بيكون بشكل حضاري جدٱ مفش فيه اي مشاكل ومفش اساءة لحد نحنا نبو نطالبوا بحقنا وانه نحنا طلبة لنا حقوق وتعبنا ونفذ صبرنا من الأنتظار ، مفش شي يستدعى الخوف هذي فرصة دفاع عن حلمنا ومستقبلنا نحنا مانديروش في شي غلط نحن نسعو وراء العلم وربي كريم ....

شروط الأعتصام : ⛔
ارتداء بالطو وكمامة واهم شي نظام عشان صورة تكون لائقة بطلبة كلية الطب بشري من فضلكم ⚠

وللعلم تم أخذ موافقة امنية ✅✅✋

الرجاء التعاون من الجميع 💙🙏

السلام عليكم:-دكاترة المستقبل أما بعد....

رسالتي إليكم ونداء للجميع متمنيا من جميع التعاون، إلي كل من يهمه الأمر ومن يريد أن يقف وقفة جدية غدا معنا في اليوم المصيري للجميع أن يرسل لي عالخاص لكي اقوم بحصر العدد الكلي، بشكل ادق، ارجوكم رجاء خاص جدية لايوجد لدينا الكثير من الوقت

#دمتم_برعاية_ الله_ وحفظه