إستشارة طبية

طريقه فيربر لتعليم النوم !
النوم و تعليمه وحده من أهداف كل ام و كل اب بهذه الدنيا
كتبتلكم تجربتي الشخصيه باتباع الروتين من اول يوم
هالمره راح اعلمكم طريقه اسمها طريقه فيربر ferber
دكتور فيربر هو طبيب اطفال و مسؤول قسم مشاكل النوم في مستشفى الأطفال ببوسطن
صاحب اكثر كتاب مبيعا بخصوص النوم
Solve your child's sleep problem
الطريقه راح اشرحها مفصلا هنا
و تتم بطريقه الإطفاء التدريجي
ممكن تشوفوها صعبه بس هي بسيطه اذا التزمت بالقواعد و الارقام بيها
يلا نبدي باسم الله
بعد ما علمت طفلك على روتين النوم اللي يشمل اطفاء الاضويه و الحمام و التغيير و الرضاعه و بعض اللعب
اترك طفلك في فراشه نعسان بس مو نايم
بعدين غادر الغرفه لمده ٣ دقايق
راح يبجي انتظر ٣ دقايق لا تدخل
اذا ما بجى انتظر بكل الحالات ٣ دقايق يلا تجيك
من يبجي و ترجع بعد ٣ دقايق طمن طفلك بتحريكه مثلا او الترييت على ظهره أو الغناء له
و غير مسموح ابدا ان ترفعه من فراشه او ترضعه او تفتح الضوء !
و لا تطول بالغرفه اكثر من دقيقه او اثنين
هسه اطلع من الغرفه
انتظر ٥ دقايق هالمره
اذا بجى ظل انتظر ٥ دقايق هالمره
و ارجع طمن هالمره بنفس الطريقه
وراها غادر الغرفه
هالمره ارجع بعد ١٠ دقايق و هالمره اكيد راح ينام
باليوم الثاني
نزيد الفتره
اترك الطفل ليبكي ٥ دقايق
ثم ١٠ دقايق
ثم ١٢ دقيقه
باليوم الثالث
اول شي ١٠ دقيقه
ثم ١٢ دقيقه
ثم ١٥ دقيقه
باليوم الرابع
اتركه ١٢ دقيقه
ثم ١٥ دقيقه
ثم ١٧ دقيقه
و هكذا
❤باي عمر أكدر اطبق طريقه فيربر؟
ممكن بعمر ٤ إلى ٦ اشهر
و ممكن لغايه سنتين
بس لا ننسى انه كلما كبر الطفل كلما الطريقه اصعب
❤ فيربر يكول اصعب ليله هي الثانيه او الثالثه وراها راح يبدي يقل و يقل و يقل بعد اليوم الرابع او الخامس
❤ بعض الآباء و الامهات و حتى اني اشوف انه بكاء الطفل للحظات غير مقبول بس طريقه فيربر ابدا ما اثبت انه تسوي اي مشاكل نفسيه على المدى الطويل او القصير !
❤ سر نجاح طريقه فيربر؟
هو ان تصمم على الاستمرار و زياده الاوقات كما في الجدول
بس تعزز الطريقه ب :
1. تحضير الطفل للنوم يبدأ من ٦ عصرا او ٨ ليلا بأن تقلل الاضاءه و يقرا له كتاب
2. تجنب طريقه فيربر من الطفل دا يسنن او مريض
3. اهم شي ان تترك طفلك نعسان مو نايم بفراشه
4. لا تربط الرضاعه بالنوم من البدايه
❤ مو شرط ابدا تترك الطفل بغير غرفه بس لازم يتعلم ينام وحده و بعدين ارجع بسريرك و هو او هي بسريرهم الخاص
❤ اخر كلمه مني اني دكتور سيف سمير البياتي اكول بيها
الاطلاع على تجارب الاخرين و بالأخص أراء اهل الاختصاص يخلينا نتنور بكم معلومه حلوه اتمنى احد يستفاد منها
د. سيف سمير البياتي اخصائي طب الاطفال

15 خطا تسويه بالتعامل ويه الطفل المولود حديثا

🔵مبدا اتركي طفلك يبجي حتى لا يتعود على الحضن !!!
من اكثر المباديء ظلما للطبيعه البشريه
الطفل كائن يحتاج للحب مثل ما يحتاج للرضاعه
و التجارب النفسيه و العلميه تكول كلما الطفل يكون مهدء اكثر بحضن امه كلما يكون اكثر استقرارا نفسيا
اي احملي طفلك كثيرا
بس لا راسا رضاعه
انتظري قليلا
و السبب بعد شويه :
🔵 عادة تقبيل المولود و بالاخص من الفم !!!
عادة سيئه تنقل البكتريا السيئه منك الى طفلك و ممكن جدا تصيب طفلك بتسمم الدم الناتج عن البكتريا المنتقلة

🔴 التأخير في تغيير حفاضات الطفل :
خطا شائع و يؤدي الى طفح الحفاظات المتكرر و الصحيح هو الاستعجال بتغيير الحفاظ كل فتره لنقل كل ٢ الى ٣ ساعات

🔴 هز الطفل بعنف :
و هذا قد يؤدي الى الاصابة بمتلازمه الطفل المهتز و هو سبب من اسباب الاصابة بنزف الدماغ

🌐 التكميط اللي يشمل الرجلين !!!
اني تعرفون رايي بالكماط اني لا مع و لا ضد بس ضد الكماط اللي يحبس الرجلين
الرجلين هي حره و تترك حره و نترك الطفل يسحبها على بطنه لان سحبها و جعلها مستقيمه يخليها عامل خطر للاصابة بخلع المفصل

🚫 تنظيف منطقه الحفاظه من الخلف الى الامام !!!
و بالتالي جلب المايكروبات الى فتحه الادرار و بالتالي الاصابة بالتهاب المسالك البولية

♾ النوم على البطن !!!
ممنوع و ممنوع جدا و خطر و لا احد ينصح به
النوم الامين يكون على الظهر و الراس جانبي مع الحرص على تقليب الراس يمين او يسار كل فترة حتى لا ياخذ قالب ثابت
بس النوم على البطن و انت كاعده يم الطفل ليش لا
يعني هذه النقطه مطاطه و تقوي الطفل اصلا بس شرط أن تكونين صاحيه لطفلك

🔵 تحديد مواعيد ثابته للرضاعه كل ساعتين او ٣ ساعات !!!
من الطرق السيئه لتنظيم نوم الطفل و رضاعته هو الرضاعه بمواعيد و الصحيح هو ترك الطفل يقرر متى يرضع و كمية الرضاعة و هذا الفعل اثبت فعاليته بالعديد من الدراسات
لا ننسى ان الرضاعه اكثر تعني مغص اكثر
شويه شويه نباعد بين الرضعات

.
🔴 استخدام المخدة باول ايام !!!
و هذا شيء لا يحتاجه الطفل ابدا و غير مريح اله و مقلق اله فما يحتاج
♾ التدخين سيء و يؤثر على الرئه الغير مكتمله النمو اصلا و بالتالي تعرض الطفل و رئته للخطورة
🌐 المبالغة بالتغطية و جعل الغرفة حمام ساخن للطفل و بالتالي يصاب المولود بحمى الجفاف
🔵 غسل الطفل بعد الولاده و وصول ماء للسرة !!!
لا ينصح ابدا بغسل السرة في اي ظرف لان يؤثر ذلك على سرعه سقوطها و تاخرها في حاله الغسل
🔴 عدم الاهتمام بتغذيه الام و بالتالي تقل كميه الحليب الناتج عن الرضاعة الطبيعيه
🔵 اعطاء الماء و السكر للطفل و هذا غير مثبت ابدا فائدته العلميه و لا ينصح به ابدا
كما يمنع ايضا اعطاء الماء للطفل و بالاخص اول ٤ اشهر و الالتزام بالحليب
⚫ اخر نقطة اذا كانت الام ترضع طبيعي لا تدخلين الملهيه باول شهر و بالتالي يقل إنتاج الحليب لا انتظر للشهر
و بس
د. سيف سمير البياتي
اخصائي طب الاطفال

شون اتعامل ويه الطفل العنيد ؟
جمعت مجموعه افكار
و خليتها على شكل نقاط صغيره تبدي بقلب صغير ❤
نبدي بمثال صغير
❤بديتي تجمعين العابه اللي بكل مكان و كلتيله اياك و اياك تمد ايدك على الالعاب و الا اكسر ايدك
او مره اللخ و الله اللي يطشر الالعاب بعد ما يشوفها
طفلك ما راح يصدك الموضوع و اصلا يعتبره مزحه
و راح يرجع يرمي الالعاب على الارض ببساطه
انت تجين تشوفين الموقف تبدين بالعياط و الصياح و احيانا الضرب
انت ببساطه لو معلمته انه الاغراض لازم يرجعهن ما كان وصل لهذا الحال ببساطه
و انه اذا ما جمع الالعاب راح يتعاقب او ينحرم من الالعاب لفتره ما صار اللي صار
❤مثال اخر
ابني اخذ جكليته وحده فقط لا تاخذ اكثر و انت مخليه ١٠ قطع حلوى كدامه
و لما يختار 5 قطع تبدين تكولين ابني ما يسمع كلام ابني عنادي و و و و
خلي ببالك شغله خصوصا للامهات اللي اطفالهم اعمارهم اقل من سنتين هذا العمر هو اللي يستكشف بيه كل شيء
هذا العمر اللي يلعب بيه باغراض المطبخ و غرفه نومك و كل مكان
ما معقوله احرم طفل من الاكتشاف و اكول هو عنيد
الطبيعي انه تفرجيه على محتويات الكنتور عادي و شنو يعني
هيجي راح يقل فضوله و يشبع
💖 الاطفال الاكبر من سنتين انطيهم الخيار
ابني تلبس التيشرت الاحمر لو الازرك ؟
تاكل تمن لو معكرونه ؟
هيجي اسئله ماكو جواب لا بيها
هيجي اسئله انت وياه ربحانين
💖 بوست كامل شامل عن العقوبات بالصفحه تلكوه و شون تعاقبون بعد عمر سنتين ما يصير يتعاقب قبله بس يتنبه
💖 احجي امثال و احجي قصص و وصلي الفكره لطفلك لا تعيشين طفلك كرئيس و مرؤوس او سيد و عبد
اطلعي من شرنقه انا اامر و انت تنفذ
💖 الاهل اللي العلاقه واصله بينهم مرحله انت تصيحين و هو يصيح و انت ترفعين صوتك و هو يرفع صوته اعلى
تعالي نراجع منو رفع صوته بالاول؟
اي انت
الام او الاب
انتوا اللي بديتوا
و اكيد النتيجه رد برد
و طفلك صار يقلدك
الف مبروك
و ما راح نوصل لصوره حل
💖 الطفل روح و امانه مو تعاركتي ويه زوجك و اهملتي طفلك و تضربيه و تعيطين عليه
ماله اي ذنب بوضعك و بظرفك و بتعاستك
مو طفلك اختارك تكونين امه او ابوه ببساطه خليك خياره الأفضل حبابه
💖 ماكو شي اسمه بنتي تتحداني و بنتي تعيط عليه
التربيه هي تفاهم بين الاثنين
انت و طفلك
ما يفهم ابدا طفلك لا تلعب بالطين يعني تتوسخ
لان هو بنظره هو ما كاعد يتوسخ
هو كاعد يلعب
هو ما يهمه مظهره كدام الضيوف لان ما يعرف يعني شنو مظهر اصلا
💖 الضرب اخر نقطه
اياكم و الضرب
الضرب حتى للحيوانات صار يحاسب عليه العالم
اياك و الضرب
الضرب راح يؤسس لشخصيه ضعيفه مهزوزه يستغلها العالم اجمع
بالاخير اكول
لملموا افكار من البوست
و انطلقوا لما هو الافضل لاطفالكم
دمتم بود
د. سيف سمير البياتي اخصائي طب الاطفال

☸️ تعالوا نتعرف على الاغذية الي تزيد القدرات العقلية وتحسن الذاكرة 🧠 لاطفالنا وحتى النا!

♻️ حتى نحسن قدرات الدماغ والذاكرة اكو بعض الاضافات الصحية المفيدة جداً لازم نضيفها لغذائنا وعاداتنا اليوميه :

✅ السمك على رأس القائمة لانها مصدر مهم جداً للاوميكا ٣ ولازم نعلم اطفالنا على اكل السمك من همه صغار لان اكل السمك تعويد

✅ البيض مهم جداً لصحة الدماغ غني بالفوائد والفيتامينات والمعادن والدهون

✅ الشوكولا الداكنه: مادة الفلاڤونويد الي بيها تحسن الذاكرة وتحمي الدماغ من الشيخوخة وتحسن المزاج

✅ البروكولي غني جدا بمضادات الالتهابات والاكسدة وفيتامين K

✅ المكسرات اثبتت الدراسات ان الدهون الصحية وفيتامين E واوميكا ٣ الي بالمكسرات تعطي مفعول رائع لذاكرة حادة و تحمي من شيخوخه خلايا الدماغ

✅ بذور القرع غنيه جدا بالكثير من الفيتامينات والمعادن المهمة لصحة الدماغ

✅ الكركم : مادة الكركمين الموجودة بالكركم تساعد على تجديد خلايا الدماغ وتحمي خلايا الدماغ من الضرر لهذا ممكن ندخلة كتوابل مع الطعام

✅ الحمضيات والفراولة والتوت والمشمش والطماطم غنيه جدا بمضادات الاكسدة الي الها دور فعال لصحة الدماغ

✅ الافوكادو وزيت الزيتون والدهون الصحية ايضا الها دور كبير لصحة الدماغ

🔆 بعض الملاحظات الاخرى الي لا تقل اهمية عن الغذاء:

🟢 الرياضه والحركة او اللعب سواء للكبار او الصغار واحدة من الامور المهمة جداااااااً لصحة الدماغ ونشاطه

🟢 النوم لساعات كافيه خلال الليل وتجنب السهر وممارسة التأمل والابتعاد (قدر الامكان) عن القلق والتفكير..

🟢 نشغل الطفل بالالعاب الفكرية والقراءة والرسم والكتابه لانها تساعد على تنمية عقل الطفل وتنشط ذاكرته

❤️❤️ الكثير من الدراسات اثبتت ان الشخص (الاطفال و البالغين) لما يحصل الحب الكافي والمشاعر الايجابيه الكافية راح تتحسن قدراته الذهنيه لهذا اعطوا الحب لاطفالكم والاحضان والقبل حتى يصيرون اذكى واشطر بالدراسة..

❌ تقليل السكر والدهون المتحولة والاكلات السريعة قدر الامكان لانها تأذي الدماغ

❌ الخمول والجلوس امام التلفزيون والاجهزة اللوحية لفترات طويله يعمل على تدمير خلايا الدماغ

دمتم بصحة وعافيه ❤️❤️

د.محمد علي العبيدي
بورد اختصاص صيدلة سريرية

ماكو داعي للمضادات الحيويه
و ماكو داعي للفولتارين
و ماكو داعي لأي شي اخر عدا ما ذكر
الا اذا كان الطفل عنده مرض مزمن
و لا تنسون المشاركه
د. سيف سمير البياتي اخصائي طب الاطفال
الصوره تكول هاهيه سويتكم طبيبات ببوست

خلي ببالك بعض الادويه اللي ممكن تفيدك في حالات الطواريء بالبيت
و اكيد مو معناها هو بديل عن العلاجات و مراجعه طبيب الاطفال نبدي على بركه الله :
🧡 خوافض الحراره
و اشهرها الادول قطره
الجرعه هي شخط لكل كيلو !
يعني شون ؟
الادول مدرجه إلى
0.4
0.6
0.8
1 ml
فلما الطفل وزنه 8 كيلو تنطيه لغايه 0.8
و لما وزنه عشره تنطيه 1 مل
و لمة وزنه 4 كيلو تنطيه 0.4
مثلها
الانتي بايرول قطره
مؤشره إلى
0.25
0.5
0.75
1 ml
فلما الطفل وزنه 5 تنطيه 0.5 مل
و لما الطفل وزنه 7 تنطيه 0.75 مل
اي شخط لكل كيلو
💜 الادول و الانتي بايرول و البندول شراب ١٢٠ ملغرام
و اللي يكون لون الغلاف وردي
و انتبه الجرعه مكتوب عليها 120 ملغرام
و هذا جرعته نصف الوزن ٤ مرات باليوم
يعني وزنه ١٠ ننطيه ٥ سيسي
وزنه ٧ ننطيه ٣ او ٣.٥ سيسي
وزنه ٥ ننطيه ٢.٥ او ٢ سيسي
💜 ننتبه على الادول و البندول و شرابات الحراره اللي مكتوب عليها 250 ملغرام
اقروه #250ملغرام
هذه جرعتها ربع الوزن ٤ مرات باليوم
يعني وزنه 10 ننطيه 2.5 سيسي
وزنه 16 ننطيه 4 سيسي
💜 التحاميل
التحاميل اللي مكتوب عليها ١٢٥ ملغرام ممكن استخدامها من وزن 8 إلى 12 كيلوا
التحاميل اللي مكتوب عليها 150 ملغرام
من وزن 10 إلى 15 كيلو غرام
التحاميل اللي مكتوب عليها 250 ملغرام
من وزن 15 إلى 25 كجم
و اخيرا اللي مكتوب عليها 300 ملغرام
من 20 إلى 30 كيلوغرام
عداها و أقل من هذه الأوزان لا تزيدون الجرعه
الفكره مو بسرعه تنزيل الحراره
الفكره ان الطفل يرتاح
💙 بعدنا بخافض الحراره
البروفين ولو ما افضل دون وصفه طبيب
بس البروفين يعطى بجرعه ثلث الوزن ٣ مرات
يعني وزنه ٩ كيلو ننطي الطفل ٣ سيسي
وزنه ١٢ كيلو ننطي 4 سيسي
ممكن نصف الوزن
بس خليكم بالاكثر أمانا
🤎 خلصن خوافض الحراره ؟
اي خلصن
و الفولتارين ؟
انسوه لطفا لان أعراضه الجانبيه كثيره و لا يستخدم الا بوصفه طبيب
💚 نروح لخانه علاج الاسهال
و هذا سهل
محلول الارواء الفموي و ممكن تشتريه كباودر و تحضره او سائل جاهز
و تنطي للطفل ١٠ سيسي لكل كيلو بعد كل خروج
مثلا وزنه ٦ كجم و صار اسهال ننطيه ٦٠ سيسي محلول
ال ٦٠ سيسي يعادل رقمين بالمميه
ممكن استخدام أكياس اوبيتباك الزرقاء للاسهال مرتين يوميا لحين توقف الاسهال
💛 القيء
علاجه سهل مع شراب نوفومت العراقي
و الجرعه هي من ٨ إلى ١٥ كجم ننطي الطفل 2.5 سيسي
اكثر من 15 ننطي الطفل 5 سيسي
مصادر أخرى تكول هي 5 سيسي قطعي لكل الاطفال و هي فعلا جرعه جيده و فعاله
و مره وحده
ما فاد نراجع طبيب
💚 قطرات المغص مثل الكولك ايز و الدسفلاتيل و الانتي كاز مكتوبه الجرعه مالتها بالنشره المرفقه و هي ادويه امينه نوعا ما و ماكو اي داعي للخوف منها او تقليل استخدامها لان تخافين منها لان هي امينه
❤ قطره اوبتيباك البروبايوتك الجميل لحالات المغص لعمر اقل من ٣ سنوات تكفي شهر و تستخدم من اول يوم عادي
امينه و خاليه من الاعراض الجانبيه و تستخدم بجرعه ٨ قطرات مره باليوم
❤ قطرات كوليف المستخدمه للمغص كذلك هي 4 قطرات ويه كم قطره من حليبك وراها كملي رضعي طبيعي او 4 قطرات مع كل مميه و انطي المميه بعد نصف ساعه من وضع القطرات
ممكن خزن المميه بالثلاجه عادي ويه القطرات بس شرط ما تكون داخله لفم الطفل ( الخزن لمده ٢٤ ساعه مو اكثر )
💛 الإمساك و كعلاج منزلي بس أوصيك بكل الفواكه المجففه اذا كان طفلك ياكل مثل الزبيب و المشمش و الكشمش و الخوخ و الالو و البقوليات
و كعنصر علاجي تحميله كلسرين تكون خاليه من الاعراض الجانبيه
ممكن استخدام اوبتيباك أكياس الخضراء لحالات الإمساك شرط عبور عمر الطفل سنه
🧡 السعال استحاله وصف علاج للسعال دون فحص
بس كعلاج خفيف و بسيط يبرز العسل شرط عبور عمر الطفل السنه
اذا ما توفر العسل علاجات السعال اللي مصنوعه من العسل و جرعتها مكتوبه على الغلاف
❤ تحسس القصبات او الربو
و العلاج هو فنتولين بخاخ يعطى نصف سيسي فنتولين مع ١.٥ سيسي مغذي مالح ( نورمال سلاين ) في جهاز البخاخ و يعطى للطفل
💚 قطرات الماء و الملح امينه على الاطفال من اليوم الأول و ممكن اعطاؤها للطفل من اليوم الأول
و من أشهر هذه القطرات هي اوترفين بيبي او ابيسال
💜 البخاخ الملحي كذلك امين للأطفال مثل الساينومارين
💜 كريمات الحروق و اهمها الفلامازين اللي ممكن يوضع على الجسم عدا الوجه
💜 كريمات الحفاظات مهمه و ضروريه و ابسطها مرهم الزنك اذا الطفح عنيد ممكن اضافه عصاره هايدروكوتزون 1 بالميه مرتان يوميا مع تغيير الحفاظه مستمرا و المحافظه على التهويه
💔 ملطفات الجلد لحالات مثل جدري الماء او لسعات الحشرات ممكن استخدام كالامينا او كولد كريم او فقط ثلج

نحن لسنا مثاليين

ولا تطالب طفلك ان يكون مثالي

ان يتقبل الانسان نفسه ويعرف حدوده واستحقاقه هو افضل شئ تهديه لطفلك

ان يحسب نفسه شخص سوي، حتى وان اخطأ

فهناك الف طريقة وطريقة للتصحيح

ولايبقى في مهب اللوم

فاللوم لايصلح ولا يفلح كثير الملامه

وياريت ولعل ولو ،،، من الشيطان

في احدى جلسات النزاع المستمر بين طفلاي

صرح ولدي الاكبر وقال

انا افضل من (اخته)

قلت له لماذا؟

قال لانها (تخربط هوايه)

كتله ميخالف واذا؟ كلنا نخربط

انت هم تخربط

اني هم اخربط

بابا هم يخربط

كلنا نخربط

هو طبعا فتح عينه 😅 مستغربا

كتله حبيبي الانسان دائما يغلط بس لازم دائما يصلح غلطته ومايبقى يسوي غلط فوك غلط

كالت يعني عادي اغلط

كتله لا مو عادي

لان من تغلط لازم تعتذر وتصلح الغلط

ومو كل غلط تكدر تصلحه

فلازم ننتبه انه مانسوي اغلاط متصلح

ومو كل وقتنا نكضي نصلح الاخطاء

مو صح؟

كال اي

ومن ذاك اليوم

كلما يسوي خطا يكول اسف غلطت ويتجه نحو الاصلاح من ابسط شي لاعقد شي وطبعا اكيد صادفته اشياء ماكدر يصلحها، وذكرته انه لازم ننتبه لان مو كلشي يتصلح

مثلا وسخ الارضيه جاب الكلينكس وحاول ينظفه وطبعا شجعته

وعداها كسر بوري وابوه صلحه وهو اعتذر وكال غلطت

هذا يجرنا ان ننتبه لبعض الاطفال الي يتهربون من الحقيقه (ويكذب) ويعتبر نفسه لايخطا( كنوع من الغرور والنرجسية) او يبرر خطاه بشكل مبالغ بس حتى لايتعاقب

وهذا الشي غير سليم نهائيا

لان اكيد حيكبر وياه و من يرتكب الاخطاء ينهزم او يخلي الف مبرر ومبرر فقط حتى لايصلحها

اما العقوبه ف معناها الاصح هي (العواقب) من يعرف لكل فعل عواقب هو هذا المطلوب وليس المطلوب هو (الاذى)

بعض الاخطاء يدفع ثمنها بشكل اخر لانه لم يستطيع اصلاحها (ليست كل الاخطاء هي ماديه)

اما موضوع الاستحقاق وقيمه النفس نحجيها ببوست اخر ان شاء الله

شجعوا اطفالكم ان يحبون نفسهم بكل اخطاءهم

ميزاتهم

عيوبهم

فنحن لسنا ملائكه ورب العالمين ميزنا بعيوبنا

(كل ابن ادم خطاء وخير الخطائين التوابون )

د.اسماء

موضوعنا اليوم صادم للكثير وهو
هل تعلم ان الكمادات وحدها ما تنزل ارتفاع الحرارة نتيجة المرض بل تزيد الوضع سوء!!
.
خل نسولف بالعامية علمود توصل الفكرة
اكو مركز بالدماغ هو يحدد شكد لازم تكون حرارة الجسم فإذا كان محدد ٣٧ راح تكون حرارة جسمك ٣٧ واذا كان محدد ٤٠ فحرارة جسمك راح تصير ٤٠
هالمركز لمن يصيبك مرض راح يغير رقمه من ٣٧ الى ٤٠ مثلاً
تخيل وياي انت
هالمركز الي بالدماغ كال اريد حرارة الجسم بدل ٣٧ تسووها ٤٠
الجسم حرارته بعدها ٣٧ بس اجته اوامر انه يسويها أربعين لذلك جسمك راح يشتغل على زيادة انتاج الحرارة عن طريق زيادة معدل الايض
ويقلل معدل فقدان الحرارة من الجلد
بالطريقة هاي ( زيادة انتاج الحرارة وتقليل فقدان الحرارة) راح ترتفع حرارة جسمك وتصير ٤٠ مثل ما راد الدماغ
فلمن تجي وتسوي كمادات معناها انت دتزيد فقدان الحرارة والجسم ديحاول يقلل هالفقدان اصلا ، انت بهيج حالة راح تجبر جسمك يزيد انتاج الحرارة حتى ينفذ اوامر الدماغ
والحل شنو ؟
الحل انه تخلي الدماغ يتراجع عن اوامره ويرجع درجة حرارته الجديدة الى ٣٧ بدل ٤٠
وهالشي يتم بإعطاء خافضات الحرارة
بعد خافض الحرارة بنصف ساعة تقريباً راح ترجع حرارة الدماغ للرقم القديم ٣٧ وبوقتها تكدر تسوي كمادات وتساعد الجسم بالرجوع لدرجة حرارته الأصلية
اكو فرق بين ارتفاع درجة الحرارة نتيجة المرض وبين ارتفاع الحرارة نتيجة انه الجو المحيط حار
الاولى تتعالج بخافضات الحرارة وبعدها الكمادات
والثانية بس بالكمادات لان خافضات الحرارة متشتغل بيها



منقول عن د سلمان داود

صدك لو جذب الكلينس المرطب مو زين لو زين؟
الكلينس المرطب صار جزء من حياتنا سواء عدنا اطفال او ما عدنا اطفال
صار ملازم لحقائب النساء
صار مهم لتغيير الحفاظ
صار مهم بعد العشاء و بعد الغداء
🔷️ هو شنو هذا الكلينس المرطب ؟
عبارة عن محارم من القطن الناعم اللمبلل بالماء و العطور و الكحول و المواد الحافظة و يعود تاريخ صناعتها الى عام ١٩٥٦ حيث تم انتاج اول محارم معطرة من قبل شركة Nice-Pac الأمريكية و لم تلاقي هذا الرواج الكبير حتى عام ١٩٩٠ حيث قامت شركة Kimberly-Clark الأمريكية المتخصصة بصناعة حفاضات الأطفال بإضافة علبة محارم لكل عبوة حفاضات فلاقى إستخدامها رواجاً كبيراً
🔷️ هل فعلا هي خطره لو امينه على الاطفال؟
حقيقةً بحثت كثيراً من المراجع للوصول الى كتابة هذه المقالة و سأذكر لكم أهم الملاحظات و التوصيات فيما يخص المحارم المعطرة :-
١- تحوي المحارم المعطرة على المواد الحافظة مثل مادة Methylisothiazolinon و هي مادة تسبب تفاعلات تحسسية و اكزيما للوجه و منطقة الحفاض خصوصاً لكون الجلد رقيق و حساس فيهما .
٢- تحوي المحارم المعطرة على الكحول الذي يسبب جفاف جلد الطفل لكون الطبقة الدهنية التي تفرز و تغطي الجلد رقيقة و هشه مما يسبب زوالها بسهولة و بالتالي تحسس الجلد بسهولة لأي عامل مخرش .
٣- تحوي بعض أنواع المحارم المعطرة على مادة Phenoxyethanol و هي مادة حافظة سامة للكبد و الدم و قد أوعزت هيئة الدواء و الغذاء الأمريكية FDA على أن لا تتجاوز نسبتها ٠.٤ ٪ لخطورتها .
٤- قامت شركات راقية مثل شركة بايولاين بإنتاج أنواع من المحارم لا تحوي على الكحول و المواد الحافظة و مكتوب عليها تستخدم منذ الأيام الأولى
مما سبق توصي الأكاديمية الأمريكية لطب الأطفال بما يلي :-
١- عدم إستخدام المحارم المعطرة للأطفال قبل الشهر الأول من العمر إطلاقاً .
٢- يفضّل إستخدام المحارم العادية و الماء الفاتر لمسح الوجه و منطقة الحفاض .
٣- قراءة مكونات المحارم المعطرة جيداً قبل شرائها و الإبتعاد عن الأنواع الحاوية على الكحول و المواد الحافظة .
٤- عدم تعريض العلبة للشمس خوفاً من حدوث أي تفاعلات كيميائية قد تؤذي الطفل بعد إستخدامها .
٥. هذه هي بايولاين الخاليه من الكحول و من مثلها

منقول من صفحة pediatrics skin care ع الفيسبوك

الحمد لله الجو للان لطيف و امراض الشتاء الفايروسيه لاعبه بينا طوبه من الانفلونزا لالتهاب القصيبات للاسهال الشتوي للكورونا للدزنتري
نراجع كم شغله خاف مقصرين بيها و ما مسويها
💖 السعال و الرشح ( النشله ) مرض فايروسي خفيف يطول ١٤ يوم اهم شي بيه تنظيف الانف و ترطيب جو الغرفه باستخدام المبخره و وضع الماء فقط فيها و شويه عسل اذا بدا السعال و عمر الطفل اكثر من سنه
المبخره غير مفيده للاطفال اللي عدهم تحسس قصبات
💖 اذا استمر الرشح مستمرا اكثر من ١٤ يوم مستمرا مو يقطع يوم واحد لا مستمرا يوميا اكثر من ١٤ يوم و عمر الطفل اكثر من سنتين نراجع طبيب و راح يكتب بخاخات انفيه جدا تقلل الرشح لان هذه حساسيه انف
💖 جماعة ضيق النفس و تحسس القصبات و الربو فحان الان الوقت لتغيير العلاجات من الشرابات و الابر الى البخاخات اليدويه او اجهزه التبخير ( النبيولازر ) بعد مراجعه طبيبك و الاستعلام منه عن الافضل لك او لطفلك ( جماعه يتعود عليه شكرا لمجهودكم تكفينا خرافاتكم )
💖 شرابات السعال اللي بيها عسل هي الافضل و هي الامن اذا طفلك ما عنده تحسس
💖 شراب الالتهابات ما يفيد للنشله و لا راح يفيد و الافضل ما تنطيه انت الا بوصفه طبيب
💖 النشله او اي سعال عند طفلك بدت اليوم لا تودي طفلك للمدرسه بهذا اليوم
💖 اي سعال مرافق لحراره شديده او ضيق نفس او ازرقاق او صوت صفير او عدم القدره على الكلام للمستشفى الان و من دون انتظار
💖 ماكو اي فايده من شراء البخاخ او جهاز التبخير المنزلي و انت تدخن
شنو الفايده الجهاز يفتح القصبات و انت تسدهن
و انت كذلك عزيزتي باستخدامك للبودره
💖 اذا طفلك عنده تحسس ابتعدي عن الفرو و الصوف و الياقات اللي بيها فراء
💖 استمروا بالتباعد اذا تكدرون بالأخص اذا طفلك عنده ربو قصبي او عندك طفل اقل من ٣ اشهر عمره
💖 الاطفال اللي ياخذون البروبايوتك تكون عدهم الأمراض التنفسيه اخف فإذا امكانيتك زينه اشتري لطفلك بروبايوتك زين و خليه عليه وقائيا الشتاء كله بس تأكد انه امين للاستخدام المطول
💖 ادعم فيتامين دي اما بالشمس او قطرات فيتامين دي

د. سيف سمير البياتي اخصائي طب الاطفال

شنو يريد منك طفلك؟
1. شوفني احسن مما تعلمني : شوفني شنو الصح و اني اسويه
مو تشرب بيبسي و تكولي ممنوع
مو تدخن و تكولي لا تدخن
مو تكذب كدامه و تكوله لا تكذب
2. بينلي حبك !
الحضنه و القبله ما راح تاخذ منك وقت بس فهمني انه انت تحبني
3. عاقبني بلطف
بعدني دماغي بتطور و ما افهم الامور جيدا
4. دائما حسسني بالامان
دائما خليني اعرف انه انت موجود لاجلي و اني اهم من كل مهم
5. احجي ويايه مو تحجي عليه
6. اسمعني
7. تقبلني مثل ما انا لا تقارني باي احد مهما يكن
8. خليني العب لان احب العب
9. ثق بي بخياراتي بحياتي
10. شجعني قدر الامكان احب المدح
11. انطيني اكل صحي ما اريد اكل سكريات و حلويات


د. سيف سمير البياتي اخصائي طب الاطفال

نسمع و نقرأ و الاطباء ينصحون
لا شاشه قبل ال ١٨ شهر
لا تلفون او آيباد او تلفزيون او اي شي قبل ١٨ شهر
طيب ليش؟
ليش ممنوع ؟
زين اني ابني ما ياكل الا كدام التلفزيون
قابل يموت من الجوع احسن لو يشوف تلفزيون او موبايل احسن؟
خليني احجيلك عن دماغ الطفل
دماغ الطفل لا يكتمل إلا بعمر سنتين
يعني اول سنتين مهم جدا للتطور العقلي و الذهني
ما يخالف نحجي بالدراسات شنو تكول؟
تكول انه مشاهده التلفزيون قبل ١٨ شهر تؤثر على تطور لغه الطفل و قراءته في المستقبل و الذاكره قصيره المدى
و حتى تؤثر على الانتباه و تؤدي إلى مشاكل في النوم
.
.
حتى اقربها الكم الطفل يتعلم من منو الحجي و حركات الشفه و حركات اليد للتعبير ؟
من امه و ابوه و المحيطين
انت تجي تنطيه مجموعه الوان و صخب و بدون اي مشاعر انسانيه و تعرضها كدامه و تخيل صدمه الدماغ
.
.
مجرد وجود التلفزيون في مكان لعب الطفل راح يقلل التواصل
احجيلكم هاي الدراسه
من الاب او الام موجود مع الطفل راح يحجي مع الطفل معدل ٩٦٠ كلمه بالساعه
بس من يكون اكو تلفزيون مفتوح راح تقل الكلمات إلى ٧٧٠ كلمه بالساعه
و هسه شون راح يتعلم الكلام بهذا العدد الاقل؟
طبعا هاي الدراسه كانت تحجي على التلفزيون فكيف الحال هسه
و كل ام و اب داخلين بتلفوناتهم و اصلا ما يتكلمون مع الطفل ؟
و تكول ابني ما يحجي ؟
.
.
دراسه أخرى اجريت على الأطفال اللي يشوفون تلفزيون بعمر اقل من ٤ سنين
انه من اختبروهم بعمر ٤ سنين
انه كلما يشوفون تلفزيون أكثر
كلما الكلمات اللي يحجوها اقل !!!
.
.
التفاعل الاجتماعي و العاطفي
وجدوا انه يقل مع وجود اب او ام مع جهاز لوحي و بهذا منين يتعلم يعبر عن نفسه ؟
.
.
السمنه
ببساطه دراسه ممتعه تكول كلما يزداد معدل مشاهده الأطفال اللي عمرهم من سنه إلى ٣ سنين للشاشات تزداد سمنتهم
و السبب معروف بسبب قله الحركه
.
.
مشاكل النوم و بالأخص اذا شافوا تلفزيون العصر و المغرب راح يقل وقت النوم
.
.
زين دكتور مو ابني يبجي من ما انطيه التلفون او من يزعل انطيه التلفون و أسكته شاسوي؟
المعلومه أردها عليك بدراسه تكول انه الأمهات و الآباء اللي يعتمدون هذا الأسلوب اسوء مما لو تركوه وحده يزعل و يرضى لوحده
و ذلك بسبب ان التعرض للتلفزيون بمثل هاي الظروف راح يؤدي إلى اضطرابات سلوكية في المستقبل القريب و نوبات غضب صعبه السيطره
.
.
بالأخير دوختنا دكتور سيف شنو توصياتك؟
لا شاشات قبل ١٨ شهر
و من بعدها من عمر ٢ سنه إلى ٥ سنين
ساعه واحده فقط فقط فقط
شكرا الكم
د. سيف سمير البياتي
اخصائي طب الأطفال

طعام الاطفال للمره الالف
كلاكيت عاشر لقطه
كل الاسئله جوابها بهذا البوست تقريبا
😜 شوكت ابدي اوكل ٤ اشهر لو ٦ اشهر ؟
منظمه الصحه العالميه تكول ٦ اشهر
بس غير منظمات تكول علامات الاستعداد للاكل يكون من عمر ٤ الى ٦ اشهر
بحوث جديده قديمه تسمي فتره من ٤ الى ٦ اشهر فتره ال
Window period
اي فتره الشباك
لذلك من نوكل بيها يقل التحسس الغذائي !
😜 قررت ابدي اوكل شنو اسوي؟
اكو شروط معينه؟
طبعا
1. طفلك ضاعف وزن الولاده
2. طفلك عبر عمره ١٢٠ يوم
3. طفلك مسيطر على راسه
4. من تضعين طفلك على بطنه يرفع راسه و اعلى صدره
5. يستمتع بالنظر للطعام و ما يرفض الملعقه تروح لفمه
🙄 شنو اول وكله انطيها؟
براحتك بس اني افضل الرز و تسويه كمحلول مو مي الرز و انما الرز و كانما محلول بسيط
🙄 ليش مو سيريلاك؟
نريد نبدي صح و ما نعوده على طعم حلو السريلاك ناجله قدر الامكان
🙄 شون ابدي و الكميه ؟
ابدي بكميه صغيره مثل ملعقة طعام او نصفها و رضعيه قبلها و كملي وراها رضاعه
😀 شنو رايك اخليها بالمميه؟
لعد شسوينا؟
الغرض من اكل الطفل هو تعليمه على الاستقلاليه حتى نغادر المميه مبكرا بعمر السنة او قبلها
المميه للحليب فقط
حتى ماء ممنوع ننطي بيها
😀 على شنو اكمل بعدين ؟
يعني خلص الرز شنو ادخل الان؟
براحتك عادي وجبه اثنين من اختيارك
موز تفاح شوفان براحتك
☺ زين انطيني جدول ؟
ماكو شي اسمه جدول انت ابدعي و نوعي قدر الامكان
☺ كل شكد اضيف شي جديد ؟
كل ٣ ايام
☺ اكلات اؤجلها بعد ٦ اشهر ؟
البيض و السمك و اللبن علمود التحسس
و الموز؟ لا ممكن من عمر ٥ اشهر عادي
☺ شنو بعد ممنوع الى عمر سنه ؟
عسل
عصير
ملح
شكر
☺ اكدر اجرب اخليه يوكل نفسه بنفسه ؟
يا ريت حتى يكون طفل مستقل يعرف الجوع و الشبع
🙄 تغييرات متوقعه ؟
1. استهلاكه للحليب يقل
2. اهلا بالامساك
3. لون الخروج و قوامه يتغير
☺ شوكت اوكل الطفل؟
العادات الجيده تبدا مبكرا
وقت غداء او عشاء ثابت
مكان طعام ثابت مثلا كرسي الطعام
☺ البيض اللبن الجبن السمك شوكت؟
البيض و اللبن ٦ اشهر
السمك ٨ اشهر الى سنه
الجبن ٨ اشهر
🙄 العصير؟
سيء و ما انصح بيه و مانعته الجمعية الأمريكيه لطب الاطفال لان ما بيه محتوى غذائي مهم
🙄 و بعد السنه شنو ياكل ؟
حاله حالك اشجعك على انه ياكل اكل بيت بعمر السنه
🙄 ليش تكتب هوايه بوستات عن الاكل ؟
لان تعبني منظر الاطفال الاصفر و شحوبهم بعد عمر السنه بسبب نظريه مغلوطه تكول ان الحليب غذاء كامل
في الحين بعد عمر السنه الحليب فقط مرتين و بالكوب
بسبب نظريه مغلوطه ان العصير زين في حين كل العالم يقلل العصير
بسبب اهمال الاباء و الامهات لتغذيه اولادهم بحيث اصبحنا من اكثر الدول اصابه بفقر الدم و تسوس الاسنان و و و للحديث تتمه
اتمنى هذا البوست يفيدكم
صحتهم اهم من تكاسلنا
د. سيف سمير البياتي اخصائي طب الاطفال

من يصير عندك طفل لاول مره

حتعرفين انتي شكد قويه
عمرك ماتخيلتي ممكن تتحملين الم الولادة
سواء الطلق الطبيعي
او الم جرح القيصيرية

حتعرفين انك انسان عنده طاقة صبر جباره
وانك مصدر لتغذيه انسان ثاني لاحول ولاقوه

التغذيه هايه مو فقط بالمعنى الحرفي كالرضاعه
وانما ايضا تغذيه روحيه بالحب والاحتواء

حتعرفين انك تكدرين تسوين هوايه اشياء عمرك ماتصورتي انك ممكن تسويها
حتشوفين نفسك تعتنين بطفل، وتسوين اكل، وتنظفين، وترتبين ، وتخططين ، وتقرين
وتحضنين
وتطبطبين
وتواسين
وتفكرين لامور بالبعيد
وتباعين للامور بغير منظار

حتصير عندك قوى خارقه
مثلا
استخدام الاقدام لسد الابواب
استخدام اصابع اليد ال5 لحمل الاكواب
اصدار اصوات الوشه لتهدئه الطفل لساعات
كتم رغبتك بالبكاء والصراخ
تتحملين الم انتزاع خصله شعر من رأسك
تسوين كل مهامك حتى وانتي مريضه
تسهرين بشكل يومي ومتواصل وتبقين على مستوى عالي من العطاء
القدره على الاحساس بالخطر قبل وقوعه
الاحساس بحاجات الطفل حتى وانتي نايمه
القدره على استخدام ايد وحده بهواي مهمات خصوصا قبل ما تكتشفين شياله الاطفال

من يكون عندك طفل تحسين كل لحضه هي مهمه وكل ثانيه هي وقت مهم

ايامك ماتكون فارغه
ابدا
ايامك حتكون ممتلئه جدا جدا حد الاختناق 😂
ماحتكون عندك رفاهيه انك تشكين من الفراغ 🤪

من يكون عندك طفل مجرد تباوعين عليه وهو نائم وصحته زينه ومرتاح انتي ترتاحين
من يكون شبعان انتي تشبعين

حتترفعين عن الانانيه
حتكونين شخص بمرتبه عاليه

وبالحقيقه هواي بعد كلام
لكن اذكر واكول
ما يمكن تحصلين هاي الامور اذا ماتنازلتي عن ماسبق

لان الدنيا اخذ وعطاء
ماكو واحد ياخذ كلشي بنفس الوقت

ننطي من صحتنا وعمرنا ووقتنا
حتى الله يوفقنا مع اطفالنا

من يكون عندك طفل
حتكونين ام

ومو كل وحده ولدت
هي
ام ♥️

الله يرزق كل محروم بما يتمنى 💕

د.اسماء

35 طريقه حتى تعززين الحب بينك و بين ابنك !!!
1. دائما اخبريه انه انت راح تحبيه مهما صار و لو شنو صار
دائما كوني انت من أكبر فانزاته.
2. علميه على احترام والده حتى لو كنت منفصله عن والده و حتى لو كنت ما تحبين والده
3. ابدا لا تحرجين طفلك أمام الاخرين و لا تعاقبيه كدام اي احد
4. دائما اسمعيه حتى لو كان ما مهم اللي يحجيه
5. كوني طالبته و تعلمي منه شنو يحب و شنو يكره
6. دعيه يحلم بما سيكون و كيف سيكون
لا تخططين حياته دعيه يحلم
7. الله يخليك خليه يتصرف كولد يعني يقفز و يكسر و يلعب و يضحك و يتطين و يتوسخ
8. ثقي به و بانجازاته
9. يوميه كوليله انت ذكي انت قوي انت لطيف
10. ادعي مواهبه مهما كانت بسيطه
11. احضنيه حتى لو ١٠ مرات بالساعه اي عادي احضنيه
12. صلي لاجله و ادعيله
13. علميه كيف يحب و يكون محبوب
14. كوني بجانبه يوميا
15. اسمعيه من يكول وين وصل بالليكو مثلا او وين وصل من لعب شطرنج او وين وصل بحل الحزوره
16. خلي هو ينظف غرفته بنفسه و هنا اني اكولك زوجته راح تشكرك بالمستقبل
17. العبي وياه مصارعه
18. العبي وياه طاولي او شطرنج او اونو او اي لعبه يحبها
19. علميه كيف يعامل البنات بحب و احترام
20. احجيله عن لطافه و جمال وجهه و كيف ان الخالق احسن صنعه
21. علميه كيف يساعد الاخرين و دائما كوني له مثال
22. ابدا لا تكسري روحه القويه
يحب اللعب بالطين خليه يلعب بالطين
23. دعيه يكون قوي و ما يخاف
24. احبي زوجك اكثر مما تحبين ابنك
25. دعيه يحميك و يخاف عليك
26. دائما خليه يسمع شكد انت مقدره افعاله و حسن تصرفه
27. اعتذري له اذا بدر منك خطأ
راح يتعلم انه من العادي ان يخطأ
28. تحملي الهوسه و الضوضاء اللي يسببها عادي
29. اخبريه دائما قصصا عن والدك او اخوك او زوجك و كيف هم رجال جيدين
30. اضحكي معه او على نكاته
31. دعيه يقع راح يتاذى اي بس راح ينهض و يكمل طريقه
32. شبهيه بابوه اذا اعتبرتي ابوه مثال جيد طبعا
33. خليه يتحمل نتيجه افعاله لا تبالغين بالحمايه
34. اقراءي له كتبا عن الرجال الجيدين
35. لا تبالغين بسقف طموحاتك و تبالغين بالتوقعات فالله وحده يعلم كيف تدار الامور و كيف سيصبح هذا الولد فيما بعد
د. سيف سمير البياتي اخصائي طب الاطفال

ما اريد يوكع شعري من جديد دكتور !!!
دكتور اريد اعيش مثل الناس مابيه شي !!!

تنعاد هاي الجمل عليه بشكل يومي من المرضى واني عاذرهم والله يعينهم ،،،
بس اكوللهم انتو احباب الله ، وانتو باختبار صعب انتو واهاليكم وعوائلكم واحبابكم ،، ميصير تفشلون بهذا الاختبار، تحتاجون الصبر ، تحتاجون تحافظون على تفاؤلكم ، ياما ويا ما احنة نشوف حالات صعبة وبعدين الله يزرع بيهة الشفاء ...

بعدين انت اذا تركت علاجك وين تريد توصل ؟ ترى المرض ما ينتظر وما يرحم وما راح يجاملك ، بالعكس راح ينتشر ويتحرك ويصير اقوى واقوى ،، خليك قوي ، خليك بطل ومحارب حقيقي ، وبالنهاية الله يحب المؤمن القوي ،،

واذكرك بقول الامام علي ع
لاتكثر من الشكوى فيأتيك الهم
ولكن اكثر من الحمد تأتيك السعادة

وصلوا المنشور اكل المرضى
دزولهمياه بالواتس اب او شاركوه


د.فرات يحيى محسن أخصائي الاورام والغدد

حتى تفهم طفلك صح
تخلي نفسك بمكانه بكل مره
شوفولي هالامثله
❤ تريد الطفل لا يتحرك و لا يلعب و لا يكمز و لا يكسر و لا يخرب و لا كلشي يسوي و عفيه ابني بيه فرط حركه
يمه انت بعمره كنت لابسه روب ستن و تحتسين القهوه و تقرأين الجريده
اي طبعا كلنا ضد العبثيه و تكسير الالعاب
بس يعني طفل غير يتحرك ؟
و لما يتجاوز الحدود يتأدب
❤ لو سمحتي لطفلك ياخذ العاب ابن عمته من راح لبيت عمته
شنو راح يصير ؟
و هم اصلا كالولي عادي خل ياخذهن
و قابل هي شنيه
مو هيجي تقاس الامور يا عيوني
السماح للطفل بأخذ ألعاب الأطفال الأخرين عند زيارتهم بدون إذن أو إفسادها وعدم تعليمه إحترام البيوت راح يخليه كلشي يريده ياخذه حلالا أو حراما
❤ طفل مراهق أو قريب المراهقه محد يسمع رأيه و ترديه يطلع مهندس أو قاضي أو طبيب ؟
كيف ذلك و انت حددتي تفكيره
❤ احترامك لجسدك ابا أو اما راح يخلي الطفل يحترم جسده فابدي من عمر سنه و نصف و سنتين ما تبدل أمام طفلك و طفلك ما تغيرله حفاظه او ملابسه الداخليه كدام اخرين من عمر سنتين .
❤ اذا شافك انت ع الموبايل ٢٤ ساعه عادي هو هم راح يباوع موبايل ٢٤ ساعه
اذا انت ما تصلي و تريده يصلي مثلا !
اذا انت تكذب و تريده ما يكذب مثلا !
التربيه بالقدوه احسن و اسلم طرق التربيه
من تشوفين اكو خلل باطفالك راجعي تصرفاتك ممكن منك الخلل
❤ قبل فتره انتشر فيديو لاطفال اثنين واحد يكول لابو الحانوت استاذ و الاخر يكوله يا ...... هذا هذا مو استاذ هذا
زين هو الطفل منين يتعلم الكلام اللطيف و الكلام السيء ؟
صاير عدنا ترند عدم تعليمهم إحترام الكبير والكلام الطيب والإستئذان عند دخول البيت وإلقاء السلام علي الناس
و نكملها بعدم تحذيريهم من الشتائم والألفاظ الخبيثه او البصق علي الناس او قذفهم بالحجاره
❤ الاولاد اللي دخلوا مراهقه و بدوا بالتدخين و النركيله
الولد ما تعلمها وحده
أما تعلمها منك أو من صديق السوء
و خوفك من صديق السوء لا يدليه على درب المخدرات و السرقه
كلها تكدر تعرف منين جتي لو بس تخلي نفسك بمكان طفلك
❤ قله تواصلنا وبه اهلنا و تعريف أولادنا بأقاربهم و متخيلين كل الناس تغار منكم و كل الناس عينهم عليكم
راح ينشأ طفل ما يحترم اي أقارب
❤ كلامك على الناس بصوره سيئه راح ينطبع بمخه ان كل الناس سيئين و انه فقط هو الصح
❤ مبدأ ما اطلعهم اخاف عليهم
أو ما اوديهم مدرسه اخاف عليهم
راح ينتج عنه طفل صعب الاندماج بالمجتمع
المجتمع اللي راح يكون مسؤول عن اطعامه و تكوين شخصيته و تكوين نفسه
❤ مبدأ اخر كاعد يصير ترند و الله ما احاسبه و اني كلشي اسوي و اني انظف غرفته و اني ألم العابه و عادي لا يغسل ايده قبل الطعام و عادي يأكل بغرفته
اشياء و أشياء تعلمه على عدم احترام الروتين و الأدب العام
❤ لما تخلين طفلك يكسر كرسي عام
توقعي جدا بعد كم يوم يكسر كرسي ببيتك
او بالعكس
دوم اكول الأطفال سهلين جدا
بس خلي نفسك بمكانهم
و راح تعرف ليش هيجي يسوون
دمتم بود
د. سيف سمير البياتي اخصائي طب الاطفال