ئەدەبیاتی بێ سنوور

(جەللاد)

وەرە جەللاد!

وەرە گیانم هەموو لەت‌لەت بکە

تاکوو بزانی چۆنە ئیمانم.

ئەتۆ جەللاد!

ئەگەر دەربێنی ئێسکانم،

ئەگەر بێنی لەبەر چاوم بکووژی گشت عەزیزانم،

بە وەڵڵاهی،

بە خاکی پاکی کوردستان،

ئەمن کوردم، قەتیش ناڵێم پەشیمانم...

وەرە جەللاد!

وەرە ئەی خوێنمژی بەدکار!

دەتوانی بیخەیە ئەستۆم گوریسی دار

ئەوە شانازییە بۆ من،

بەوەی ناکووژی ئیمانم، ئەوە سەربەرزییە بۆ من...

وەرە جەللاد!

وەرە ئەی دوژمن، ئەی بێداد!

لەبەر چی مەعتەلی، ئەی بۆچی نامکووژی؟

بە زیندوویی لە گۆڕا بۆچی نامنێژی؟

قەسەم بەو کۆت و زەنجیرە،

بە هەرچی دیل و یەخسیرە،

بە ئاواتم،
بە ئیمانم،
بە ئامانجم،
بە پەیمانم،

بە خوێنی پاکی ئەو کوردەی لە ڕی ئاواتی کوژراوە،

قەسەم بەم خاکە خوێنینە،

قەسەم بەم ژینە شێواوە،

ئەگەر دەربێنی چاوانم،

ئەگەر بشکێنی ئێسکانم،

بەوەڵڵاهی،

بە خاکی پاکی کوردستان،

ئەمن کوردم، قەتیش ناڵێم پەشیمانم...


#عەلی_حەسەنیانی( هـــاوار )

🍂🍂🍂🍂🍂🍂🍂🍂🍂🍂🍂🍂🍂🍂🍂
@besnoor

(تیانووسی پاشای هیچ)

من بە یەك دەرگای ژیانا رۆیشتم،
كەچی لە هەموو دیوارەكان توڕەم
لە یەك پەنجەرەوە دنیام بینی‌ و
لە هەموو ڕوانینەكان بێزارم
یەك  ڕێگا لەسەر پشتی خۆی هەڵیگرتم‌ و
بێزم لە هەموو كاروانچییەكان ئەبێتەوە
من لە یەك ڕووباری ئەزموونم داو
توڕەم لەهەموو تەڕایی زیندەگی....
توڕەم لە خۆم لە جەستەم،
بڕوانە چەند بیمار و چەند ئازاردیدە و
چەندخەستەم.

      .......  ..... .......

توڕەشم لە ئێستا،
نە پیاسەی جادەكانی هی ئێمەن
نە تیری كەوانەكانی بە دەستی ئێمە ئەتەقن،
هەموو نیشانەكانی ڕەشن
هەموو زەنگەكانی هی مەترسیین،
گوێم لە قیڕەی بۆقێكە
هاوارئەكا:
"خەریكە بەرامەی نەعنا تیرۆر ئەكرێ‌".

      .......  ..... .......

بێزارم لە داهاتووش،
سبەی خۆر بەگومانەوە نیگامان بۆ ئەكا
سبەی "تی ئێن تی"  ئەبێتە یەكێك لە ژەمەكانی  رۆژانەمان.
سبەی گەر كچێك گوڵێكی پێشكەشكردین
دەبێت بەتكاوە پێی بڵێین
لە چ كۆگایەك ئەم گوڵەت كڕی؟
دڵنیایت بە ڤایرۆسێك ئالودە نییە؟
پێشتر سیاسییەك بە دیاریی نەیناردووە بۆ سیاسیەكی دیكە؟
سبەی گەر مناڵێك میزەڵانێكی پێداین بۆ فووتێكردن،
دەبێت لەخودا بپاڕێینەوە نەتەقێتەوە..
سبەی سبەینێی گومانە،
گومان لەخۆت
كە نەكا ئاگات لە خۆت نەبووبێت‌ و سەریان گۆڕیبیت،
گومان لەدڵت نەكا لە ساتێكی غەفڵەتا
قەسابەكانی مرۆڤ لێیاندزیبیت‌ و
دڵی شەمپانزییەكیان بۆ چێكردبی.

      .......  ..... .......

كۆتاییش مەرگ سەمفۆنیای خۆی پێشكەشئەكا
ئیدی كە كۆتایی؛ تا ئەوسەر تەنیایی مانەوەیە
توڕەنەبوون لە "پێكەوەبوون" چ حیكمەتێكی تیایە ؟.

كەواتە:

توڕە لەئاسمان ‌و لە باران
توڕە لە عەشق و خیانەت
توڕەش لە ڕەقیب و لە یاران.


                                    
یاسین عومه‌ر

@besnoor

(شکان!)

سێ جار شکام لە پێناوتا،

ئەی بێ وێنە!

یەکەم؛

کە سوژدەم بۆ بردی

هەرچەند سوژدەم دڵ هەژێنە

دڵ تاوێنە!

دواتر کە شێعرەکانی من،

پێناسەت بوون،

لە چی شوێنە!

ئاخر جاریش؛

کاتێ بۆت بووم بە ئاوێنە!


#ک.د.ئازاد

🍂🍂🍂🍂🍂🍂🍂🍂🍂🍂🍂🍂🍂

@besnoor

(ستایش)

1.
دڵۆپێ سێبەر ڕژایە بەر پێم

فەزا دابەش بوو

شوێن بوو بە دوو کەرتەوە

سنوور ڕووا

من لە یەک کات لێرەم و لەودیو

بەڵام هەردەم لەگەڵ تۆم

2.
شوێنەکان پڕن لە نادڵنیایی

تەمی بێدەنگی لەسەر ڕوومەتی پێکەوەیی

دەستەکانم ئان پڕ لە شەونم

3.

تیشک لە ئێمە دەچێ

سیمای پڕە لە گومان

وەکو ئێمە ناسک

وەکو ئێمە بەهێز

هەر وەکو ئێمە بە بێدەنگی گریان

4.
لە چۆلایی دەستەکانت

بێ پایان ڕاکشاوم

هێشوویەک جوانی

لە ناو کۆشی ژیان

5.
پێکەوە بین یا بە جیا

یەکتری دەنووسینەوە

ئەوی دی کە ڕابردوو بوو

ئەوی تر کە هەرگیز لا داهاتوو دا نابێ

6.
سەدای مەنفا

کە بینین نەیتوانی پێی بگا

وەک نەرمە گیا

لە نێوان پەنجەکانم ڕوا

7.
سپێدەیەک نیوەڕۆیەک، یا پاش عەسرانێک

بە بێدەنگی دەکەوین

وەک نوستوو چاو لێک دەنێین

وەک مردوو هەناسە دەدەین


#نەزەند_بەگیخانی

🍂🍂🍂🍂🍂🍂🍂🍂🍂🍂🍂

@besnoor

لە نێوان تفەنگە سوورەکاندا

لە نێو دڵی سەربازاندا

کە بەردەوام

ڕووباری خوێنە دێت و دەچێ

لە هەڵمەتێکی دوور و درێژ دا:

خەونەکان دەست پێ دەکەن

لە نێوان زینی ئەو ئەسپانەدا

لە نێو مێشکی سەربازاندا

لە قورسایی ئازار و

لاشەی کوژراونی

شەڕێکی دەستەویەخە دا

خەونەکان دەست پێ دەکەن


#کاڕڵ_سەندبرگ
لە ئینگلیزییەوە
#عەتا_میرەکی

🍂🍂🍂🍂🍂🍂🍂🍂🍂🍂
@besnoor

فڕی بە نیشتمانەوە نەبوو
جامانەکەی،
نە گوڵێکی خۆماڵی تێ مردبوو
نە لە سەرە گێژەی کۆتایی
شەهیدێک کەوتبوو،
"با" ی بە کۆچەر نوسیبوو لە ئاڵا و
پێوەی ڕادەکشا پێش شەکین،
وەک گوڵە گەنمێ بێ
هەناوی دەتین مردبێ
جار نا جارێک
خۆری دەخوێندەوە
بۆ بوکەڵەی
ژێر ئاوینەی ماشێنەکەم،
پیاوێک کە
لە نیشتمانی ماشێنەکەم دا
دەمارگڕژی بە ئاوێنە دەفرۆشت
وێدەچوو لە یەکەم ڕووخاندا
سەرۆک بووبێ
لە چوار دا مابوومەوە
دەستم وانەی گۆڕینی نەدەزانی ،
بیکەم بە سێ
بیکەم بە دوو
بیکەم بە یەک،
بیوەستێنم
یان ڕاست لە ڕاست کەنارئاوێک چەپی کەم،
بەشکم خاڵ خاڵێک لە خوێنم
بە جامانەکەیەوە ببێ بە گوڵ
نەختێ خۆماڵی تر بنوێنێ،
نەمزانیبوو
لە وێستەگەی کۆمار تێپەڕیوم
بۆیان گێڕامەوە پێشەوایەک
دەستی لێهەڵێناوم و من
بە بەرامی  پرچی ئەوکچەی ئاوایی خۆمان
هۆشم ڕۆیشتبوو،
بووکەڵەی ژێر ئاوێنەکەم
لە "نانسی" عەڕەب  دەچێ
جار جار بۆ ڕابردووی چاوم دەلاژێتەوە ،
جامانەکەی لە کۆتا دیداری ئێمە و
مردن سپی تر بوو،
لەو شێعرەش،
کاتێ سانی گرتبوو بۆ وەستانەوە،
دەیکوت:
کە مێژوو شەق شەقێنی بە هزرت کردووە،
پێت وایە بەردەوامی بردنەوە دەزانی شاعیر،
من سەرەتای هەموو ئەوچیرۆکانەی
ڕابردووی تۆم
پێم وایە تۆ
گوڵەگەنمێ بە خۆر  قەرزداری،
پێم وایە تۆ
مەرگێک بە نیشتمان و
چارەیەک بە چیا قەرزداری و
سانێک به هەرچی شاعیری لیبڕاڵە،
ئاوێنەکەم خەریکە دەست بە سەرم دادێنێ
ئەو پاشەکشەیە تا وەستان گەڕانەوە نیە
داهێنانی ئایەتی خاکەلێوەیە بۆ گوڵ
گێڕانەوەی سەمای پرچە بۆ با
چیرۆکی خڕیەتی مەمکە به ناسنامەی شەماڵەوە،
ئاوێنەکان بە فیکەی سمێڵی سەرۆک دەنازن و
من سەرکەوتنێک بە بیرەوریەکانی باوکم قەرزدارم،
ماشێنەکەم لە کورد بوونم دەچێ
جارێک سەربەرزی و
جارێک دۆڕان لێدەخۆڕێ
من و سەرۆک
لە ڕابردووی ئاوێنەکەیدا
بەدارەوەین،
دەلاژێینەوە
بۆ بووکەڵەکان


#ئاوارە_حوسێنزادە

🍂🍂🍂🍂🍂🍂🍂🍂🍂🍂

@besnoor

@besnoor


عەرەقی گەردنی سڕی...
خۆی هەڵدایە ناو گۆمەکە;
گەڵای دار زەردەروەکە.

*****

لەپڕ بە رووتی
خۆی کرد بە باخچەکە دا،
پاییز.

****

لە نێو لقی درەختەکان، گیری خواردووە
دەترسم گەردنی بڕووشێت؛
مانگ.

**
تا ڕۆژ بوەوە
سەرقاڵی دەرهێنانی مانگ بووم،
لەنێو گۆمە قوووووووووووڵەکە دا!

***

لە ترسی هەتاو ئەژنۆی شکابوو...
لەسەر چیچکان، خۆی دابووە پەنا مورتکێک،
-سێبەر.

**

دەستی نەدەگەیشتە گەردنی قۆخ.
لەداخا،  زەرد زەرد هەڵگەڕا بوو،
قەیسی.



شەو لە لۆکەی تاریکی دوشەگی بۆ راخست.
باغ،
سەری خستە بن باڵی خۆیەوە و نوست.


#قوباد_جەلیزادە
لە کتێبی:
#هایکۆکانی_قوباد
🍂🍂🍂🍂🍂🍂🍂🍂🍂🍂🍂🍂
@besnoor

@besnoor



کەوتنی کون دە شوێنی هەنگاوێک
ئەوسەر ئەوسەر کونی قەدەم‌لێدان
کون لە بن خاتراتی پێڵاوێک
کون لە نێو رازی خاووخێزاندا
کون لە نێو چوارچێوەدا ماوێک
کووچەیێ کون لە دەنگی ماڵەوماڵ
کۆمەڵێک و هەمیشە ڕووداوێک
کووچەیێ دەرک و دارتێل و کون
جار نا جار دەنگی قاڵاوێک......
ورکەنان!!!!! کۆنەلایلۆن!!!!!! فافۆن!!!!!
کووچەیێ کون لە جەرگی شارێدا
یەک هەواڵی هەتا هەتا خەمناک
کووچەیێ دێ بە مەرگی شارێدا
کووچەکانم کونن کونی هاوار
دەنگی دەردن بە دەرفەتی دیوار
کووچەکانم کونن کونی چۆلن
شوێنەواری گەلێکی گاحۆلن
کووچەکانم کونن کونی گیرفان
خاڵییەک مستی فەلسەفە و عیرفان
کووچەکانم کونن کونی باوەڕ
هاموشۆی میللەتێکی کوێر و کەڕ
کووچەکانم کونن کونی فیشەک
کون لە نێو کەوتنی گەلێ تەک تەک
کووچەکانم کونن کونی دەرزی
شوێنی دەرچوون لە بیری سەربەرزی
کووچەکانم کونن کونی جەرگن
کۆمەڵێ چاوەروانی تا مەرگن
ورکەنان!!!! کۆنەلایلۆن!!!! فافۆن!!!!
تۆ دەکووژرێ لە نێو کونی مندا
ئێمە دەمرێ لە کووچەیێ کوندا
یەک کونی تووڕە، پیاو مرچ و مۆن......

#عەبدوللا_گولابی
#هونەر

🍂🍂🍂🍂🍂🍂🍂🍂🍂🍂🍂🍂🍂
@besnoor

دەترسێم بمرم

دەترسێم بمرم و مەرگم نەبێ بە هۆنراوە

سەیری خۆت کە:

تارمایی خەمێکی ڕەش بووی

ئاوێنەکەت

لە نێو چرچە زبرەکانتا

ورد و خ ا ش

کرد

بڕیارت دا خۆت لە شەتاوێ هەڵکێشیت

کۆچت کرد و زەویش بە ترپەی نەزانیت!

#قۆباد_جەلیزادە

🍂🍂🍂🍂🍂🍂🍂🍂🍂🍂🍂🍂🍂
@besnoor

@besnoor


لە نێوان ئاو و گیادا

لە باڵندەیەک دەچم،

مەست بە خەیاڵی سەفەر

لە مرۆڤێک دەچم،

تینوو بە خیاڵی فڕین.

لە گەیشتن بە یەکەمین دارستانی دڵت

درەختێکم پێ ببەخشە.

سەوز وەک جەستەی بەهار،

لە گەڕانەوەی پاییزێکی چڵکندا

ئەم ڕستانە نابڕێنەوە

تا تۆ خوێنەری ژێر بارانی تاسە و ئەوین و خەمم بیت

ئەم وشانە هەر دەنووسرێن.

سەیر کە

دیکتاتۆرانە

تۆ داگیر دەکەم

لە دەقێکی نەنووسراو دا.


#جەمال_نەجاری
لە کتێبی
#نووسینەوەی_نیشتمان

🍂🍂🍂🍂🍂🍂🍂🍂🍂🍂🍂

@besnoor

@besnoor

بانگت دەکەم

دەم پڕ دەبێ

لە شیلەی گوڵ!

ئەوین هەتاوێکی گەرمە

هەنیەی تەنیاییم ماچ ئەکا!

بانگم دەکەی

ئاسمان دەبێ

به چارشێوی گوڵ ئەستێرە و

دارستانی کپی ژیان

پڕ دەبێ لە چریکەی بولبول


#جەلال_مەلەکشا
لە کتێبی
#زڕەی_زنجیری_وشە_دیلەکان

🍂🍂🍂🍂🍂🍂🍂🍂🍂🍂🍂🍂🍂
@besnoor

@besnoor



(کڕێوە)

کڕێوە بوو، دونیا بوڵێڵ...

لەپم کردە لانەی کڵۆبەفرێکی وێڵ

وەک عاشقێک، تا توایەوە تێمڕوانی

کە بوو بە ئاو ناسیمەوە:

لە کوردستان

دڵۆپێک بوو... لە ناو کانی!!



#پەشێو
لە کتێبی
#هەسپم_هەورەو_ڕکێفم_چیا

🍂🍂🍂🍂🍂🍂🍂🍂🍂🍂

@besnoor

@besnoor
🍂🍂🍂🍂🍂

ئایەتی گۆپاڵ

بۆ سەفەر ئەچوو مەلای مەزموورە
دەشیگوت رێگام گوندێکی دوورە

ژنەکەی وتی ئایەتەلکورسی
بۆ تۆ زۆر باشە، لە سەگ دەترسی

ئەگەر بۆت هاتن، بۆیان بخوێنە
گوتی: ئافرەتێ بەسم بدوێنە

سەگەلی لادێ نەخوێندەوارە
لە قورعان ناگا چارە هەر دارە

سوورەی گۆپاڵیان لەسەر دەخوێنم
ئەگەر تێم نەگەن دەمیان دەشکێنم

#هەژار
#بۆ_کوردستان

🍂🍂🍂🍂🍂🍂🍂🍂🍂🍂
@besnoor

ئومێد

چاوەکانم ڵێڵ و وێڵ بوو، کوا ستارەم، دەرنەکەوت!?
دڵ لە تاوی دەردی، گڵپەی سەند وەکوو ئاور و نەوت

رۆژ هەڵات و زیندەگی دا، گشتی عالەم کەوتە ئیش
چاوەنۆڕی ئوفقی دوورم، رۆژی من کوا، دەرنەکەوت!

ئەی خودایە! تاریی نیگبەت کەی ئەبێ لاچێ، خودا!
تا بە کەی چەنگەچڕی من سا لەگەڵ تۆ، هەشت و حەوت!

بەسیەتی (دڵدار) ، زەمانی شێعری بێ مەعنا نەما
هەڵسە چارەی دەردەکەت کە، بێ تەفەککور، رێگە چەوت

بێت و ئەسپێ چەن ئەسیل بێ،سواری چالاکی نەبێ
قابیلە دەرچێ لە مەیدانی جیدال و جێگە ڕەوت?!

#دڵدار
لە کتێبی
#دیوانی_شێعری_دڵدار

🍂🍂🍂🍂🍂🍂🍂🍂🍂🍂🍂🍂🍂🍂

@besnoor

@besnoor

بە ڕەگی رەزاندا هەڵدەزنێ

تا من

منی هەمیشە مەست

دەسووڕێنێ بە دەوری بوونما

جیهان

کە سووڕ ماوە سەرم

لە سەبووریی خاک


چ دڵهایەک ناشاد

چ سەرهایەک سەرگەردان

بە سێحری بادەشەوە

لە سووڕی زەماندا

بەر باد


#فەریدوون_ئەرشەدی
لە کتێبی
#بەرد

🍂🍂🍂🍂🍂🍂🍂🍂🍂🍂🍂🍂
@besnoor

@besnoor

لە کوێ بووی...?

ماچ و بارانم بۆ هێنابووی

لەوبەری شەقامەوە کوڕێک هاوار دەکا

دەرکە کەم لێ بکەوە

ئەو بارانە تەڕم دەکا

بیر

لە تۆ دەکەمەوە

ماچەکانم

خووسابوون


ئاخ هێلیا

ئەو ئێوارەیە چەن حەز دەکەم

لە ماچەکانم دا

بتوێیەوە


لە سیگارێک دا

دووکەڵی یادت دەمبا و

منیش

خووساوی

خووساوم

لە گوێسوانی سەربانێکەوە


کۆترێک پێم دەڵێ :

هێلیا ... مژە

هێلیا ... هەڵمە


تکایە بڕۆ

خەونی ئەو بارانەم

لێ مەشەمزێنە

***


#قاسم_تاباک
لە کتێبی
#هێلیا
🍂🍂🍂🍂🍂🍂🍂🍂🍂🍂🍂🍂🍂🍂
@besnoor

@besnoor
🍂🍂🍂🍂🍂🍂🍂🍂🍂🍂🍂🍂🍂

(دیالکتیکی ژنێکی تەنیا)

پرچێکی سپی لە بادا
حەشارگەی هەزار باڵی ون.
پرچێکی سپی لە بادا
پڕ لە سەدان زستانی سڕ.
پرچێکی سپی لەبادا
کڕێوەیە و
ژنێکە چەماوە بەسەر خاک دا.

لێی دەپرسم:
بۆ ئاڵۆزیی دەریات لە خۆت شەکەت داوە؟
کام هەواڵی کوت و پڕت بە بەفرەوە
بۆو دارانەی سەرشەقامی تەنیایی من
بە دیاری هێناوە؟

کڕێوەیە لەو ژنەوە کە هەر سپی دەچێتەوە
سەر رادەوەشێنێ و باڵندە
لە بادەوەی بسکی را پەڕەوازەی من دەبن.

لێی دەپرسم:
چت بینیوە لە تەنیاییم؟
وا بێدەنگ دادەباری
بە ئێوارەی من و شەقام دا.
مەگەر نەتدیت هەزاران پەیکەرەی سەهۆڵ
دەستیان راداشتووە بەرەو کۆڵانەکان؟
چما ئاگات لە زمانی بەستەڵەک نییە؟
بە بێ ژمار راوێژەوە دەمڵێتەوە!

شەپۆل دەکەوێتە بسکێک؛
سپی دەکاتەوە بە کاتی تاریکان.
ژنيک کە کۆتەڵێکە لە گریان
تێم دەڕوانی بە زمانێک
کە هەر باو بۆران دەیزانێ.

لێی دەپرسم:
چت بیستووە لە ئوستوورەکانی زامم؟
وا سوور دەکاتەوە چاوت
لە گێژەنی سپی باڕنی زمان دا
مەگین گوێت بۆ دەستەکانم رانەگرت؟
شەکەتی سەد بەهاریان تێدا مەییوە
چاوەکانمت نەبیست بە مەزەندەی دەریاکان؟
لە قەڵافەتی نەبەدی ژنیان روانیوە!
هەنگاوەکانمت هەست نەکرد؟
رێگا بە رێگای هەڵەمووتیان بڕیوە!

سەر رادەوەشێنی بەفرێکی
کە هەر مێوینەیی کاتە
لە هەر تاڵێک لە بسکییەوە
کیژێک دادەبارێ سپی
و
لە باڵی خۆی دا ون دەبێ.

لێی دەپرسم:
چت چەشتووە لە تاریکان؟
لە تەنیایی من
لە نێو دیوارە ئەنگوستە چاوەکان دا؟
کە وا رووناک سارد دەبییەوە.

ئەی تامی ئاوارەییمت نەکردووە یەستا؟
تاڵ و لێڵە!
وەک کاتژمێری سەردیواری بەندییەک
کە هیچ کاتێک ناناسێتەوە
و
بێدەنگە.

ژنێک سەرتاپا زستانە و دەحیلێنێ!
لەپرسیاری ترساوی من رادەمێنێ و
تەنیایی خۆی لەو سەرمایە دا دادەگیرسێنێ.

لێی دەپرسم
بۆنی کام شارت ون کرد بەیانی؟
بەرامەی کام شەقام نامۆ بوو بۆ دەستت؟
ئەی ئەو هەمووە گۆرانییەت بەسەردا نەچوو شەوانە؟
ئەی نەپشکووت لە زەمانت دا
ئەو گشتە حەیرانە؟
کە کچی عاشق تێی دا دەگرین و
لاوان تێیان دا دەکەن جۆلانە

بۆ بێدەنگی؟
ناوت چییە ئەی بسکی ئاڵۆزی کاتم؟

ژنێک لە بەفرا داگیرسا!
بەرە بەرە دێتەدەر لە تەمی پرچی و دەڵێ:

لاڤۆ!
ناوم نیشتمانە.

تا هەتەر دەکا زمانم
دەدوێم
لەو سنوورانەی بە لەشم دا برینن
و
ئێوەش دەیانکولێننەوە

بەسەرهاتی ئەو کێوانەتان بۆ دەڵێم
زستان و بەهاریان لە یەک گرێ دابوو
و
ئێوە تەنیاتان جێهێشتن

باسی ئەو بارانەش دەکەم
ناسیاوی پەنجەرەکان بوو
بەڵام پەژیوان بۆوە لە بارین.

لاڤۆ
ناوم نیشتمانە

ژ نێکم وەرزەکانم پێواوە
دانە دانە
لە بەهار دا چاوم کردەوە بە رووی ئینسان دا.
دەستم راداشتە بەیانیی
هەموو ئەو کەسانەی تامەزرۆی گەڵا بوون
دار لە سەر دار
چینەیان کرد بە پێستمەوە.

لە هاوین دا بوومە نسێ
میوانی هەموو رێبوارێک
هەر چڵێک لە دەستم ئاوسی جوانییەک.

پاییزان شێتیی شەقامم کردە ناسنامە
خشپەی رەنگ و
سرتەی ئەوین و
سروودی بایەک
کە بەردەوام بوو لە باخ
و
لە ئاوەدانی پێکەنین

زستانانیش هەزار و یەک شەو دەبوو دانیشم
بە دیار چیرۆکی جوانییەوە.

ئێستاش لە خۆرنشینی بەفردام.
دڵتەنگی هێلانەی کۆترە باریکەم
و
خەمۆکی رێگای کۆڵبەرێک
تەنیایی خۆی لە کۆڵ ناوە.

ئێستا لە دەمە دەمی ئاوابوونی بزەدام.
شار لە توێی کام نۆت دا خەوی لێکەتووە
کە وا بێدەنگی حەشر دەکا لە بڵواری سبەینێی؟

رێ بە کام پرسیار گەمارۆ درا؟
کە رێبوارەکان ونیان کردووە ناونیشانی بەیانیی.

لاڤۆ!
ناوم نیشتمانە

دوو باڵ دەبینم بە تەنیا
هەر کام ئاوارەی ئاسمانێک.
من باڵندەم رانەهێنا
واتای ئاسمانەکان بە تەنیایی تەعبیر بکا.

بسکم هێلانەی هەمووتان!
لەو زستانە تێدەپەڕم.

باڵ لە باڵی یەک بدەن
و
سنوورەکانم بپێون!

شیرم حەرامی شارێک بێ
ئاوێنەکانی شەقامی
هەموو کچانی باخ نەبن

بێ بەری بێ لە ئامێزم ئەو چیایەش
دەنگدانەوەی رووبار نەبێ.


# وێنس_ڕەزایی
@besnoor

@besnoor

غەزەل.... سامڕەند ئەحمەدزادە(شپڕێو)


بە موو هاڵۆزترین داوی مەمک شیک
کە تووشت دێن لقی تەیری ڕۆمانتیک

کە پێوەم دێی مەرامت پێوە بوونمە
بە لەبزی ڕۆشن و مەعنایی تاریک

تەعامی کەسک و سوور قەت بێ بەڵا نێ
بەدی دێنی لە کۆمێدی، تڕاژیک

ئەلەو نامەی کە لێوت پیێ لکا بوو
بە سەر مۆر کردنی پاکەت بە ماتیک

وڵامت نارد کە شپڕێو" بین بە لایێک"
کە چی حەوتت کەواندو بووم بە لاییک

خەتای خۆتە کوڕەگوێ بووم، تەریکم
دەدەی لێک گەر بە ڕووگڕژی تف و لیک

خڵاس بوو ئەو زەمانەی کە لە کوچەت
بە بۆنەت ساز دەبوو کێشەی تڕافیک

خڵاس بوو گەر بە قەتڵی مەت دەفەرموو
لە عەڕشێ ڕا دەهات فیکەی مەلاییک

ئەتۆش کەوتی دە خانی ئەو کچانە:
کەپۆ چاو جوان بە بنچینە، پلاستیک

دەڵێی: شپڕێو! ئەگەرچی نوکتە سەنجی
وەها کارت گەیاندە ئاستی باریک

نەگونجێ قەت لە بووتیقای من و هەم
شعووری لاپەڕە، شێعری کلاسیک!

#شپڕێو

🍂🍂🍂🍂🍂🍂🍂🍂🍂🍂🍂🍂
@besnoor