أسرتي سر سعادتي

✍🏻 ڮــل ما يخص يوم الجمعة 🔛

👇🏻 👇🏻 👇🏻

🕌 ليوم الجمعة(💌حالات واتساب ،، صور ،، مقاطع قصيرة💌) إليكم هذه القناة👌🏼👇🏻
https://t.me/fwayiid/18944

🍃 روائع الصوتيات والمرئيات ليوم الجمعة📟👇🏻
t.me/addlist/pDiVtgkdxvszM2Jk

البوست الصباحى 🌸🌸 بعنوان " دعم الأمهات "

خدو نفس عميق كده واعملو مشروب يهدي ويروق المزاج ♥️

ابدأو رتبو افكاركم ومش لازم بالورقة والقلم ابدأو بتخيل بسيط في دماغكم للمهام اللى عايزين تنجزوها النهاردة ..

يعني مثلاً أنا عايزة انضف الفريزر
عايزة انضف الشبابيك
عايزة اعمل أعادة ترتيب للأدراج والمكاتب
درج الادويه بقاله كتير محتاج فرز !
عايزة ارتب دولاب خزين الأكل وعلب المطبخ
فيه ناس لسه هتنزل شتوي وتطلع صيفي ومهمة الدولاب دي بتكون عايزه يوم لوحده

وهكذا ..

وطبعاً مع كل ده فيه غدا هيتعمل 😶 وفيه زوج وأولاد ليهم متطلبات 🙆🏻‍♀️
ولسه المهام المنزليه المعتادة زى الترويق والحاجات اليومية 🫠
ومتنسوش كمان الجانب الأنثوي واهتمامنا بنفسنا ♥️

طيب هل أنا هعمل كل اللى فوق ده ⁉️ لأ 🙂‍↔️

أنا برتب بس أفكاري وببدأ بالأولويه
باخد مهمه أو أتنين أو اللى أقدر عليه ..

مش ضروري خالص أخلص كل حاجه النهاردة
مش ضرورى كل حاجه تكون بيرفكت وبتلمع بشكل يومي
يكفي انى مهتمه وحريصه وبسعي وبجتهد في جانب من جوانب مسؤلياتي 👏🏻

🌸🌸 ترتيب الأولويات بيخفف عبأ المهام المنزلية بشكل كبير جداً جداً
وبعتبرها فرصة علشان نعيش في بيئة مرتبة ومريحة .

🌸🌸 كل يوم جديد بنجدد نيتنا فيه هو أجر وعداد حسنات شغال لينا فمتحبطوش ♥️

🌸🌸 كل تعب وجهد بنبذلة ربنا بيكافئنا عليها " أن الله لا يضيع أجر المحسنين "

متنسوش تقولو أذكار الصباح 🌤️ واعملو المشروب 😃 عايزة أشوفكم أخر النهار عملتو ايه وحققتو ايه من أولوياتكم 👏🏻👏🏻 هستنى مشاركتكم معايا

#نصائح

بنتك بتحب؟؟ 😨 تتصرفي ازاي؟
=========
كتير من الأمهات بتتخض لما تكتشف إن بنتها بقت تتكلم مع ولاد أو حتى ارتاحت في التعامل معاهم، والخضة دي طبيعي جدا.. احنا عندنا قيم ودين بيحكمنا..

أنا لما بكتب بوست عن الموضوع ده أصلا بتوتر جدا.. بخاف على بناتنا في السن ده لأن اندفاعهم بيخليهم سهل ينزلقوا في أي حاجة غلط😐.. ربنا يحفظهم جميعا يا رب..

البنات في سن المراهقة بتنضج عاطفياً أسرع من الولاد، وبيكون عندهم ميول طبيعية للتعامل مع الجنس الآخر. لكن القلق بيجي من خوفنا إن علاقتها تتطور أو إنها تجرّب حاجة ممكن تندم عليها🙈..

لما تعرفي حاجة زي كده، حاولي متتعصبيش😓.. أكيد صعب جدا إنك متتنرفزيش، وصعب إنك تمسكي نفسك إنك تضربيها كمان..
بس رد الفعل العنيف، زي الزعيق أو الضرب، أو حتى سحب الموبايل لفترات طويلة، بيدّي نتيجة عكسية.. لو انتي انفعلتي، بنتك هتبدأ تتجنبك وهتدور على طرق تانية تكلم بيها الولد ده من وراكي، وده مش في صالحك ولا صالحها للأسف😔..

دي خطوات هتساعدك تتعاملي بحكمة:

1. اسمعيها وحاولي تسأليها بلطف:
"إيه اللي بيريحك في الكلام معاه؟؟" أو "ليه حسيتي إنك محتاجة تحكي للولد ده عنك وعن حكاياتك؟".. الأسئلة دي تخليها تفتح معاكي قلبها، وتبدأ تفكر هي ليه لجأت لكده..

2. اشرحيلها قيمتها وقدرها:
خليها تحس إن ليها قيمة كبيرة عندك، وإنها تستاهل تعامل محترم.. احكيلها إن في الوقت المناسب ربنا هيكرمها بشخص يستحقها لما تكبر وتكون قادرة تقيم الناس بشكل ناضج..

3. فهميها إن المشاعر دي فيها مخاطر:
اتكلمي معاها عن إن المشاعر جميلة، بس أوقات بتكون خطر، لأن التصرفات في السن ده ساعات بتكون غير محسوبة.. وضحيلها إن أي علاقة في سن صغير ممكن تجيب مشاكل نفسية وعاطفية صعب تتجاوزها لو حصلت حاجات مش محسوبة..

4. ركزي على علاقتكم وادعميها:
خليكي قريبة منها واخرجي معاها، اعملي معاها حاجات بتحبها زي الشوبينج أو الكافيهات.. كلميها كأنك بتحكي عن نفسك وانتي صغيرة، دايماً خليكي مصدر للأمان والحب..

5. اشغلي يومها:
خليها تشتغل على أنشطة جديدة، رياضة، دروس، أو نشاطات اجتماعية. لما وقتها يبقى مليان، تركيزها هيقل على الولاد..

6. مهم إن الأب أو الأخ يكونوا جزء من حياتها:
لو الأب موجود في حياتها، خليه يشجعها، ويديها إحساس بالأمان، وتحس إنها مميزة.. لو الأب مش موجود، يبقى ممكن أخوها، أو عمها أو خالها يساعد في ده، ويديها الإحساس إن فيه ذكور بيحترموها ويقدروها..

7. التدرج في العقاب:
لو استمرت في نفس الطريق، هنا ممكن تلجئب للعقاب، بس بهدوء.. خدي الموبايل مثلاً ليومين لو كلمته تاني، وبعدين زودي المدة لو استمرت.. متكونيش عنيفة عشان تديها فرصة إنها تتراجع بنفسها من غير ما تعند معاكي..

8. اتكلمي عن حدود ربنا:
وضحيلها آية "وقل للمؤمنات يغضضن من أبصارهن." واشرحيلها أد إيه الدين بيحط قواعد لحمايتها.. وأد إيه ربنا رحيم بينا..

كل اللي بتحسيه من قلق عليها طبيعي، وخوفك عليها مش غلط، لكن خليكي معاها بتدعميها وتفهميها بهدوء، ده هيساعدها تفضل قريبة منك وتعرف تختار أحسن قدام..
.

✅️

#افهميني_يا_ماما
#د_ياسمين_المهدي #تربية_البنات #تربية #مراهقة
#parent #parenting
#رسالة

عشر مفاتيح للتربيه الناجحة

1️⃣🔑 تقدير قيمة اللعب
شُغلة أولادنا هي اللعب فلازم تبقى مُقدر وقت اللعب عندهم علشان مايبقاش هما ماشين في اتجاه وأنت ماشي في اتجاه تاني

(لاعب ابنك سبعًا، وأدبه سبعًا، وآخه سبعًا) عمر بن الخطاب رضي الله عنه

2️⃣🔑 لحظات من المقابلة الحقيقية GEM's
Genuine encounter moment

وقت تسبهم فيه يتكلموا براحتهم وأنت بس بتسمعلهم ومركّز معاهم تمامًا
كل ما بتدي الوقت ده لأولادك كل ما بتعمل طريقة من طرق التربية الناجحة جدًا
الأطفال بيتلقوا الحب و الإهتمام في الصغر بتخصيص وقت ليهم كل ما قدمتلهم وقت كنت أقرب ليهم وتشبّعوا بالمحبة و الإهتمام

3️⃣🔑 تقبّل أخطائك وإنك مش كامل ووارد يحصل منك غلط
وارد إن قدام كل 5 أفعال إيجابية تعمل فعل سلبي
إنك ماسمعتش بإنصات أو ماكنتش مُهتم بالقدر الكافي
لإن أحد الأسباب اللي بتخليك تحس بالفشل إنك تسعى للكمال فأول ما بتغلط بتحس إنك مش كويس ومش عارف تطبق طرق التربية

4️⃣🔑 تجنب أساليب التدمير
الانتقاد، المقارنة، الضرب، الإنفعال والزعيق الزايد
الانتقاد المستمر للأولاد أو مقارنته بأصحابه أو أخواته
التعدي الجسدي والإهانة والتقليل منه
دي أساليب تدميريه للأولاد
لو بتعمل الحاجات دي حاول تقللها

5️⃣🔑 تجنب أسلوب الحوار القائم على الطلبات والأوامر
تبع لدراسات اتعملت احنا بنطلب من أولادنا أكتر من 2000 طلب في اليوم
شيل كذا، امسك الكوبايه كويس، افرد ضهرك، ماتعملش كذا
ده بيخلى الأولاد يفقدوا الإهتمام بسماع كلام الأب والأم

#الحل
🔹حاول تقلل من الطلبات
🔹اسألهم عن رأيهم أنت رأيك نعمل إيه في كذا
🔹كن قدوة ليهم في الأفعال
الأولاد بحاجة إلى نماذج أكثر منهم إلى نُقّاد...

6️⃣🔑 ركّز على الحل مش على المشكلة
لو حصل غلط منهم بلاش تحكي وتتكلم وتكرر في تفاصيل المشكلة
احنا طبيعتنا كلنا مفتورين على التركيز على الجانب السلبي بنسبة 80%
ده بيخليك مش عارف تشوف الإيجابيات

#الحل
لو حصل موقف ابنك غلط فيه
🔸ركّز على الحل
🔸اعزل الفعل عن الفاعل
أرفض الخطأ وليس المخطئ
🔸شاركه الرأي وافهم منه عمل كده ليه وعرّفه عواقب التصرفات
مثلًا قوله التصرف ده ماكنش أحسن حاجة من رأي ولا أنت شايف إنه كان تصرف كويس؟!
🔸ركّز على الإيجابيات اللي موجود فيه وعلى تصرفاته الكويسه

7️⃣🔑 معرفة لغة الحب
كل حد مننا الطريقة اللي بيحب يتحب بيها مُختلفه
مهم تحب أولادك بطريقتهم لو بنتك مثلًا لغة الحب بتاعتها الكلام الكويس فهي بتحتاج تسمع كلام كويس والكلام الحلو ده وقعه عليه بيكون أكبر من وقعه على أي حد تاني وكذلك لو قولت كلام سلبي بيأثر فيها أكتر بكتير

أو لو ابنك لغة الحب بتاعته
physical touch
فهو بيحب تطبطب عليه أو تحضنه وتخليه في حضنك شويه

لما تحبهم بالشكل اللي محتاجينه ده بيسهل عليك كتير و بيزيد من تأثيرك عليهم بشكل كبير 🤍

8️⃣🔑 اجتماع عائلي
معاد مُحدد بتتجمعوا فيه كأسرة
بتقعد معاهم تسمع لو عندهم مشكلة أو تحكلهم أنت حاجة عندك وتاخد رأيهم في مشكلة بتمر بيها
الإجتماع ده بيعزز عندهم شعور الطمأنينة و الإنتماء للبيت وبيقوي الصلة بين الأولاد والأب والأم

9️⃣🔑 الإكثار من الكلام حلو والثناء
تبع لدراسات اتعملت في جامعة أمريكية إن كلنا من أول ما أتولدنا لحد عمر ال 18 سنة
بنسمع كلام سلبي عن نفسنا يعادل من 50 الف ل مليون ونص كلمة سلبية مُقابل 600 كلمة إيجابية

#الحل
مُهم تقول لأولادك كلام حلو وتشكر في التصرفات اللي عملوها

🔟🔑 محتاج تتأكد طبيعة حبك لأولادك حب حقيقي ولا حب نرجسي ‼️

مافيش أب أو أم بيكرهوا أولادهم بس بيحبوهم حب إمتلاك
بتتعانل مع أولادك على إنهم بتوعك
إنك حاطط شرط لأولادك إنهم لازم يكونوا بمقايس معينة ويدخلوا كليات معينة علشان ترضى عنهم ده حب لنفسك مش ليهم
لإنك كده بتلغي شخصياتهم ورغباتهم

الحب الحقيقي:
❣️ بتقدم لأولادك الحب اللي محتاجينه ومتقبّل شخصياتهم وإختلافاتهم وبتحبهم بكل ما فيهم
❣️بتعمل اللي هما عايزينه حتى لو اللي هما عايزينه ده ممكن يكون بيضايقك شوية وبيبان قوي في الثانوية لما يكون ابنك جايب مجموع بس مش عايز يدخل كلية معينة
❣️ العطاء الدائم والحب تحت أي ظروف وبدون أي شروط
❣️الحب الحقيقي الهدف في مصلحة المحبوب

الحب النرجسي :
❌ بتحبهم علشان تابعين ليك
❌ بتحبهم بشروطك وحسب احتياجاتك ورغباتك أنت وكلامك لازم يتسمع حتى لو مش مناسب ليهم
❌عطاء مشروط يعني هحبك لو عملت كذا ومش هحبك لو ما عملتش
❌ الحب النرجسي الهدف فيه مصلحة المُحب

إذا عاش الطفل في جو من الرضا، تعلّم أن يرضى بذاته..
أعلم أن ما تغرسه اليوم سيحصد نتاجه أولادك أولًا ثم أنت وكل من في مُحيطهم
فأغرس ما ترغب أن يُثمر في قلوبهم وحياتهم..

بتسعوا إزاي للإستثمار في علاقتكم بأولادكم؟

#التربية
#منصّة_إنسان
#إنسان_بلس
#noha_zahra
رسالة