الرادود احمد الزوار

🔻أستشهاد الامام
موسى ابن جعفر عليه السلام 💔

شوية شمس 💔

ـــــــــــــــــ ❁ ❁ ❁ ــــــــــــــــــ

واسجيناه ............ واسجيناه

ـــــــــــــــــ ❁ ❁ ❁ ــــــــــــــــــ

حراس خلــو عالسجن وانه بظلم سجنوني
ما ادري ليلي من الصبح بس بظلام عيوني
والگيد بجفوفي يحــز شمسوي ويگيدوني
موسى امام الرافظه الكاظم انــه يسموني

يـاناس كل هـذا الضوه ماشوفه
عيني عله شوية شمس ملهوفه

محرومه عيني من ضوه دنيايه
تارك نفس وسط السجن ذكرايه

واسجيناه ............ واسجيناه

ـــــــــــــــــ ❁ ❁ ❁ ــــــــــــــــــ

طير انه مكسور الجنح وين اليضمد جروحي
صرخه بدليلي وتنسمع وهمومي تمرد روحي
ادعي بصلاتي للفرج وابچي وازيــد بنــوحي
الجمعه موعدنه گرب ياروحي ســرچ بوحي

الاحباب توكف عالجسر منتظره
يردون من ذاك الوجه بس نظره

بس جثه من راحولك ولاگينك
امگيــد وتنـــزف دمــه چفينك

واسجيناه ............ واسجيناه

ـــــــــــــــــ ❁ ❁ ❁ ــــــــــــــــــ

الليل يخلص بالدمع عالخـــد تسيــل دموعي
  وعظامي لو لاحت برد صلت عليه ظلوعي
ظيم وقهر انه احملت محــد يهـــدي بروعي
انــه ارهب وما انرهب شجرة امامه فروعي

انطيته علمي للرضا مـــن بعــدي
وانه ابقه بديار الغرب ظل لحدي

وصيتــه بالشيعــه يظل يرعاهم
ويتحمــل انــواع الظلم ويـــاهم

واسجيناه ............ واسجيناه

ـــــــــــــــــ ❁ ❁ ❁ ــــــــــــــــــ

ميت انـــه وگيد الظلم طابع اثر من دمي
ماواحد يفك جثتي بگيودي اظلـن مرمي
ماكفت سنين السجن وليل العذاب وهمي
عافوني جثه مگيد ومحد يمـر مـــن يمي

ظليــت وبحــر الشمس عافـوني
بحســرة ضوه ظليتي آ يعيــوني

ماشفتي كل هذا العمر بس ظلمه
چـــان الضوه بزنزانته كــل حلمه

واسجيناه ............ واسجيناه

ـــــــــــــــــ ❁ ❁ ❁ ــــــــــــــــــ

مات الحلم بيه اندفن وانـه اندفنت بگبــري
فروني من سجن لسجن ضلو حياره بصبري
مــن شحت ايـام العمر ودريت خلص عمري
كلتلهم الموعد گرب بموتي الفرج انــه ادري

من ابنعش فوگ الجسر شالوني
هاي الابد ماچانت اعله ضنوني

جثــه امــام الرافضـه يشيعونها
بظهر الحماميـل الظهر يـرمونها

واسجيناه ............ واسجيناه

ـــــــــــــــــ ❁ ❁ ❁ ــــــــــــــــــ

ياناس من حان الفرج بعدي السجن ظل خالي
كــل ظنكم الموعــد اجـه متانيـن جيت الغالي
رايح انــه ويبقـــه السجن يــردد صدى اقوالي
عنــدي علــم مــن النبــي واســم يظـل بالعالي

معروف مــن خيــر البشــر ابائي
بصبري وصمودي ارعبت اعدائي

غدروني بالسم وبسجن سجنوني
وحرموني من شم الهوه حرموني

واسجيناه ............ واسجيناه

ـــــــــــــــــ ❁ ❁ ❁ ــــــــــــــــــ

🖊️عباس فاضل الشمري

يازينب...خادم نذرت اسنيني
يازينب...والخدمتچ وفقيني

يابت علي وداعة علي تدريني
ماعندي أغله امن اللطم بسنيني
كل عمري سجلته وقف لحسيني
بس سامع سمع...واجريلچ دمع
شيصير الوضع...لو نورچ إجاني
ياهيبة علي...فدواتچ هلي
بالنسبه إلي...سلطانة زماني
يازينب...يالحبچ ايغذيني
يازينب...والخدمتچ وفقيني

خادم إلچ يابنت الانسانيه
وبنت الزچيه الراضيه المرضيه
منچ ثلث تنعام ياعلويه
ياأخت الگمر...بيچ الله افتخر
قدمتي نحر...برض الغاضريه
وبوجه العده...زينب صامده
ضلت خالده...ماتت آل اميه
يازينب...عالموقف اتعلميني
يازينب...والخدمتچ وفقيني

يازينب وفضلچ فلا ناسينه
مانبرد اعله حسين خليتينه
چا تهنه لوما إنتي دليتنه
ياعزة نفس...كل عمرچ درس
نحچيلچ همس...واحچايتنه دمعه
ياصبر السمه...يابت فاطمه
شنهي اللايمه...بس حچيچ نسمعه
يازينب....ياچلمة التهديني
يازينب...والخدمتچ وفقيني

مهمومه وحدچ بالحزن منعوفچ
أم المجالس والعزاء أنشوفچ
يازينب اللطامه هايه اضيوفچ
نلطم واللطم...يوصل للعظم
نبچي وننهظم...عالحرگو خيامه
والله الصمد...منعوفچ أبد
يوصلچ مدد...كل عاشگ سلامه
يازينب...نار البعد تچويني
يازينب...والخدمتچ وفقيني

يازينب الخاطرنه دم ضحيتي
ياسيده وحاشاچ ماذليتي
ماأنسه فضلچ يابعد عافيتي
يانبض الگلب...يادمعة غرب
نسيانچ صعب...غير انتي اويه روحي
كل عمري أون...عايش بالحزن
والگبرچ أحن...تمشيلچ جروحي
يازينب...لزيارتچ وديني
يازينب...والخدمتچ وفقيني

سيد علي الموسوي

سيد علي الموسوي
يازينب خدمكم يازينب
ــــــــــــــــــــــــــــــــــــــــــــ
وعدنه يزينب...واجينه...ابمواكبنه اعله هذا الوعـد
خدمكم... نصيح وننادي...تعاهدنه ونضل عالعهــد
طلعنه...ابمشاعر عشگنه...وضمايرنه عله المعتقد
يزينب...أبد مانسينــــه...وله انعوفچ يزينب أبــــــد
يازينب خدمكم يازينب
ــــــــــــــــــــــــــــــــــــــــــــ
وحگــــچ...يبنت الزچيــــه...خدم وانتي تأمرين أمـــر
مشينه...ابدربكم يحـــــره...عله الدنيه نضل نفتخــــــر
ميمحون...ذكركم والاشهود...خطابچ كل وكت ينتصر
لگينه...خدمتـــچ يزينـــــب...أعز من الهوه والعمـــــر
يازينب خدمكم يازينب
ــــــــــــــــــــــــــــــــــــــــــــ
مواكب...مجالس مئاتم...مثل صرخه او تضل تعتلــي
فخرنه...ابشعائرنه هايه...نعاند بيهه كل عاذلــــــــــي
هتفنه...ابشرف رافضيه...علي مانرضه غيره ولـــي
تعبنه...التعب عدنه راحه...وحگ الزهره فدوه العلي
يازينب خدمكم يازينب
ــــــــــــــــــــــــــــــــــــــــــــ
لجلكم...يحره انخلقنه...ابولاكم حتى گلب اليـــــدگ
نحبكم...نموت اعلى حبكم...بعد عنكم چذب نفترگ
خطيه...تره الما هواكم...هواكم هو أصل العشــگ
تره الحب...وهم أغلبيته...فقط حبكم يزينب صـدگ
يازينب خدمكم يازينب
ــــــــــــــــــــــــــــــــــــــــــــ
أملنه...وسندنه بالاحساب...چبير وداعة الله الامل
وجهنه...تبيضه الموده...نودكم أكثر امن الاهـــل
دربكم...هدى وكله رحمه...بلياه العقل ماقبـــــــل
يزينب...هويتنه باچر...ختم خاتمهه خير العمـــل
يازينب خدمكم يازينب

سيد علي الموسوي

آ يزينب آ يزينب

باول اسنينچ يزينب..تبتدي الرحله الطويله
ومن بعد موت الزچيه..شِلتي الهموم الثجيله
والله صعبه انگول عَنِّچ..بت علي حامي دخيله
تالي ماتالي سِبِيَّه..وتركب النَّاگه الهزيله
آ يزينب...آ يزينب

إسمچ المعروف زينب...واسمچ الثاني الحبيبه
ويلي تالي اتبدَّل اسمچ...من حبيبه للغريبه
مو عجيبه ايموت گلبچ...لاكن اتحمَّل عجيبه
جبتي كل عمرچ مصايب...امصيبه اصعب من مصيبه
آ يزينب...آ يزينب

بعد اخوتچ زين عشتي...فتره ياروح الزچيه
عشتي لاچن عشتي ميته...من مصاب الغاضريه
خلصت انفاسچ يزينب...امن السبي وديوان اميَّه
اصعب اثنين اعله اخوتچ...جرحچ وموتت رقيه
آ يزينب....آ يزينب

ياهو مثلچ يالحزينه...ذبحو اهله وكل حياته
وگلبچ المكسور شَيَّب...من عذابه ونايباته
عادت التگرب منيته...تحظر احبابه ابمماته
صعبه من انگول زينب...ماتت ابديرة شماته
آ يزينب...آ يزينب

سيد علي الموسوي

وازينباه....وازينباه

ابچي وله اتبطلين ياعين
مو دمع من دم كون تبچين
هالليله ماتت اخت الحسين
ماتت غريبه ام المصايب

مهظومه والدمعه تهلهه
ماتت بعيده عن اهلهه
وليان ماكو تحظر الهه
لاكو عشيره ولاگرايب

لحسين مامگطوع ونهه
واتريده الخفِّف حزنهه
وكفَّالهه ايغمّض جِفنهه
وابعيد يادرب الحبايب

وحشه الجنازة ابغير وليان
واشهل هظيمه يم الاحزان
زينب غريبه ابعازة اخوان
ويلاه يادهر النوايب

مكسوره والناظر تديره
وين الاهل وين العشيره
يابت علي الحيرتهه حيره
والمَن بعد تشكي وتعاتب

من النبي للضلع للهام
الچبد الحسن للطف والخيام
ومن كربله للكوفه للشام
عدهه گلب بركان لاهب ؟؟


سيد علي الموسوي

وحشه مرقدچ ما يَمَّه مشايه
لا موكب عزاء السنه ولا رايه

شيريد الدهر منچ یعلویه
تره مره انسبیتي وماهي يوميه
ابگبرچ والعِدَه ايريدوچ مَسبیه
مو هايه التلوگ اعليچ مو هايه

ذكرى ومن تمر چانت يبت حيدر
زوار ومواكب كلهه تتحظر
يامَحله الخَدَم يم مرقدچ تفتر
وابصوت النحيب اتضج الولايه

يامَحله المواكب من تطب الشام
هلا ابزوار زينب تصرخ الخِدَّام
صدگ رَدِّينه نقره الدنيه هاي ايام
واحنه اهل الجرح تلچمنه الحچايه

إلچ لا ما تجف دمعة بواچينه
ومن هذا الجرح مايوم مَلِّينه
تضل طول الوكت هالجمره تچوينه
وحگ العالفرات وماشرب مايه

وحگ حيدر أبوچ وفاطمه أمِّچ
عليچ ابعاد بس اگلوبنه يَمِّچ
يالحزنچ حِزِنَّه وهمنه من هَمِّچ
ذكرچ حاظر ابكل عَزَه واقرايه

مادام النَفَس بينه نضل اوياچ
ننسه الدنيا كلهه وإنتي ماننساچ
عاهدناچ يابت علي عاهدناچ
وخدامچ تضل مولاتي وفايه..

سيد علي الموسوي

مولد الامام علي ع👇


ياهله ابميلادك يحيدر
اشرقت اعيادك يحيدر
گلبي احس ناداني
انولد طــه الثاني
ـ🌷🌷🌷🌷🌷🌷🌷ـ

ياحبيب المصطفى شعشع ضياء انوارك
والملاك اتعنــــــتك كلهه انزلت يم دارك
اتنهي طه ابمولدك يا سيـــــدي وتتبارك
ماكو واحد بالعرش ضل بالفرح ماشارك

هل فرح موعادي يحيدر
يا حبيب الهادي يحيدر
هل فرح رباني
انولد طه الثاني
ـ🌷🌷🌷🌷🌷🌷🌷ـ

انشق جدار الكعبه الك صارت مهد بصيارك
وحدك الهذا الشـــــرف رب السماء اختارك
لا فتى ألا علي ولاصـــــــــــح مثل فقارك
غير بس رب العرش محد يعــرف اسرارك

اشگد عزيز وغالي يحيدر
ولي ونعم الوالي يحيدر
بصوتي اهتف آني
انولد طه الثاني
ـ🌷🌷🌷🌷🌷🌷🌷ـ

ياحلات احروف اسمك لو لفضهه الساني
علي يااجمل قصيده انزمجت اويه الحاني
گلبي بس وحدك يحبك ما شغلته ابثاني
اني مجنون وهواك ابلا عگل خــــــلاني

من الزغر حبيتك يحيدر
وبلگلب ضميتك يحيدر
احجي من وجداني
انولد طـــــه الثاني
ـ🌷🌷🌷🌷🌷🌷🌷ـ

اني مجنون ابهواك وافتـــــخر بجنوني
انته روحي ونبض گلبي ونته نور عيوني
افتخر خادم الك يا سيـــــــدي ايسموني
ياعلي ابكل محفل احظر رغم اليعادوني

ياطبيب اجروحي يحيدر
يلي ساكن روحي يحيدر
اترددت بلساني
انولد طه الثاني
ـ🌷🌷🌷🌷🌷🌷🌷ـ

    الخادم
كامل السعيدي

مقدمه للامام علي ع…

البت أســد رب العرش شق الجدار
ودخلت وحيـــــدر علي ابيته نولد
الكعبه مهده ومو الكل واحد تصير
لغير ابوالحســـــنين ما تلصح مهد


وحــق العل فواطم بات ينطار
لحد ماشاف نجم الفجر ينطار
جـدار الكعبة بس العلي ينطار
منو غيره استحق هاي الهدية

كامل السعيدي

مولد الامام علي ع

گلبـي شمسويله ـ ياعلي
اوياك يسهر ليله ـ ياعلي
گلبي مجنون بغرامك وأنت جننته
🌷🌷🌷🌷🌷

يالملكت اگليبي كله وصـــــــرت نبضه
اســــــــــمك اتوضـه وجـوباً يله الفضه
انتــه قــرأن الحكــــــــيم وانتــه فرضه
كل حديث ايخص حياتك گمت احفظه
يالشغلت اذهاني ـ ياعلي
مذهـبي وقرئآني ـ ياعلي
گلبي مجنون بغرامك ونته جننته
🌷🌷🌷🌷🌷

انته ممـــلكة العواطف والمشـــاعر
كثر مابيك انه مغرم صرت شاعـــر
صـــورتك مرسوه بعماق النواضــر
عالمنـصه اتباهه بيـــك وعالمنـــابر
فرحتك نحييها ـ ياعلي
الفاطمه نهديها ـ ياعلي
گلبي مجنون بغرامك ونته جننته
🌷🌷🌷🌷🌷

استبشرت بيــك الانس والجـان كلها
مـولدك فـرحه وابـد ما صــــح مثلها
لايگــه الكعـــــــبه عليــك ولايگ الها
هالكـــــــرامه بس الك ربـك جعـــلها
وحدك انته اختارك ـ ياعلي
وبـارك  بـأنـــــوارك ـ ياعلي
گلبي مجنون بغرامك ونته جننته
🌷🌷🌷🌷🌷

والله احلى امن الشهد اسمك قريته
مــركز اگلوب البشــــر حبــك لكيته
مولدك شع بالســــمه وبالگاع صيته
العلي حبـــك يا علي ونطــــاك بيته
الك فاتــح بابه ـ ياعلي
انته اعز احبابه ـ ياعلي
گلبي مجنون بغرامك ونته جننته
🌷🌷🌷🌷🌷

الك بيت الله انفتح ونشق جداره
وبقــدومك رحب وســرفن ستاره
هلهلن بالفرحه اجن مريم وسـاره
يا وليد الكعبه انته اجمل بشــاره
اتشـرفت بقدومك ـ ياعلي
يالعظيمه اعلومك ـ ياعلي
گلبي مجنون بغرامك ونته جننته
🌷🌷🌷🌷🌷

ياهو قبــلك لقبوه ابحـــامي جـاره
ومــــــن يقــرر ربك يأيــد قـــراره
ياهو غيـــــرك ثبـت الديـن ابفقاره
ابكلهن اول يا علي ونلت الصـداره
انته آيه ورايه ـ ياعلي
والامل والغايه ـ ياعلي
گلبي مجنون بغرامك ونته جننته
🌷🌷🌷🌷🌷

    الخادم
كامل السعيدي

يانور نازل عل أرض هاليله
يانور نازل عل أرض هاليله
......
متصدره أخباره ... من السمه ابشاره
بجوف بيت الله نزل نوره الإهي
انولد حيدرنه ... محفله اليجمعنه
حيدر علي انته الولي ومحله التباهي
نتباهه بحروفه ... ارواحنه اطوفه
يابسملة عشاگ محله إسمه بشفاهي
يامحله هالفرحه ... الهايم ترك جرحه
وملتهي ابالفرحه المثلها مايضاهي

اشواگ عاشگ للحبيب اهديله
يانور نازل عل أرض هاليله
......
طيور الفرح نزلت ... أجمل لحن غنت
علي علي علي علي حيدر يغالي
أبيت ابو طالب ... جاء الفتى الغالب
بالكعبة مولود إو فرح گلب الموالي
اشعار نهديله ... نسهرله هاليله
سهران گاعد للصبح وانته اعله بالي
كل بيت كتبيته ... لحب حيدر اهديته
ياشيخ گلبي وسيدي وهيبة دلالي

يطيور أجمل تهنئه وديله
يانور نازل عل أرض هاليله
......

ياگلبي المجِرح ... بمولد علي افرح
الدنيا كلها انساها إو أمشي الأمامي
ويه الكمر اسهر ... وبحبك اتسمر
ماعندي غيرك سيدي انته غرامي
انثر ورد دربك ... ماجوز من حبك
يابو الحسن انته تصل حبي وهيامي
طير الفرح غنه ... للحضره يتعنه
يابو الحسن أسمك يظل أحلى الأسامي

ياغزل حيدر ياقصيده احجيله
يانور نازل عل أرض هاليله
......

بالبوب دگينه ... ندعو اهالينه
احضر حفلنه يالتحب هيم بهوانه
الخير بوجوده ... يمطر على زنوده
الخير كل الخير بالمولد اجانه
أنولد حيدرنه ... والفرح بالجنه
هالليله أملاك السمه تفرح معانه
كتبو اساميكم ... حيدره اليحميكم
بعونه الله مايوگع يضل عالي لوانه

الليله الموالي لازم يشد حيله
يانور نازل عل أرض هاليله
......
امساهره عيوني ... وماترمش جفوني
اكتب شعر وتغزل بأجمل قصيده
بياعلي مطلعها ... ابياتي تسمعها
ياشيعي افرح والفرح لجل الصميده
اكتب مواويلي ... ويشع بدر ليلي
كل بيت بسمك حيدره لازم اعيده
مجنون أنه بحبك ... من صغري بدربك
بيقضتي وأحلامي عشگ حيدر أريده

وين اليحب حيدر شعر انطيله
يانور نازل عل أرض هاليله
......
علي محسن الفرطوسي