موضوع إنك تتنازلي عن حاجة معينة (هو مبيصليش،بيشرب سجاير،عايزك تخلعي الحجاب ، بيتهم بيت مترابط وإيه يعني لو اخواته شافوكي من غير النقاب..)
ولو حطيتي ف دماغك إنك لما تتزوجي هتقنعيه بالصح ده شيء غلط خالص
ليه ؟
لان المرأة في الزواج هي التابعة وملهاش أبدا قدرة على فرض السلطة على الرجل وأغلب الوقت هو اللي بيسحبها لتفكيره إلا من رحم الله فأكيد هتعدي الأيام وهتلاقيكي إنتي اللي اقتنعتي بالغلط وبدأتي تتساهلي فيه

وعلى الصعيد الشخصي شفت كتير ملتزمات قبل الزواج وحافظات قرآن لما اتزوجوا بحد أقل منهم في التدين وقعوا و انتكسوا

طيب إيه اللي يخلي البنت تعمل في نفسها كدة؟
كلمة واحدة الحب أو الإعجاب المبالغ فيه

كان أحد المشايخ في محاضرات تأهيل الزواج بيقول إن الغلطة اللي بتخلي البنات تقع في الورطة دي انها تكون حابه الشخص فبالتالي مراية الحب عامية وهتخليكي متشوفيش كل الحاجات اللي عكس مبادئك لمجرد انك مش حابة تخسريه ولما تتجوزي بسلامتك الحب مش هيكون في كامل البريق و الجمال اللي كان فيه و الغشاوة اللي عنيكي هتبدأ تنزاح فهتاخدي بالك من الأخطاء اللي كنتي بتتجاهليها وهتحسي انك مش عارفة تعيشي مع حد بيعمل حاجات عكس مبادئك مع إنك انتي اللي موافقة عليه من الأول فصعب تيجي دلوقت تقولي انك رافضة الحاجات دي لانك هتبقي في وقت لا ينفع الندم ..

عشان كدة على أد ما تقدري متحبيش الشخص إلا بعد ما تتزوجيه عشان أولا تعرفي تقيمي الأمور كويس ثانيا متفنيش مشاعرك مع كل شخص تشوفيه وميحصلش نصيب ولما ييجي زوجك هتكوني خلاص مش قادرة تديله أي مشاعر لان مشاعرك عطيتيها لكل من هب ودب..

يارا عاطف