كلنا كدا بنمر بالفشل في حياتنا سواء في وظيفة أو علاقة أو خلاف ذلك
بس في ناس بتقدر تتجاوز الفشل بصورة عادية وبتعتبره مرحلة وأنتهت وخلاص .
لكن في نوع من الناس شعور الفشل قادر يتمكن منهم ، فتلقائياً كدا بتلقي كسر الحنك لانه بحس إنو مافي سبب كافي يخليهو يستمر طالما هو (فاشل) بتعريفة هو للفشل .
طيب ركزو معاي شوية
نحن لازم نفهم إنو الفشل مابعني النهاية و إنك خلاص ما تحاول ..
بل بالعكس
الفشل هو رسالة محتواها إنك لازم تستمر بس دي ما الطريقة المناسبه وإنو في طرق تانيه للنجاح غير دي
و الفشل يا حلوين ذي ما بقول و يطلس (بطيخة) الفشل هو بهار بدي نكهة خاصة للنجاح 😂
طيب خلونا من الفشل و الكلام المحبط من الصباح ، طيب ممكن واحد يسأل
"و أنا اقدر اتجاوز مرحله الفشل دي كيف ؟"
سؤال جميل و الاجابة كألاتي
نحن لازم نفهم كيف نتجاوز الفشل أو اقلها نفهم وضعنا ✓ و نعرف أسباب فشلنا - ولو ركزت شوية حتشوفها - و نستغلها لصالحنا.
و عشان ننجح في أي مشروع او بزنس لازم نخت فكرة الفشل في راسنا لانه في البدايات حتمر بمطبات وإذا اتجاوزتها حتلقي النجاح في أول محطه قدامك ( تشبية سواقين مش😆)
أهم حاجة في خط النجاح اننا لازم نتقبل فكرة الفشل ونبطل نرمي المسؤولية علي الظروف - الحرب ، ما خلصت جامعة ، فقد شهاداتي ، ما قادر اتاقلم مع المحيط الحولي و غيرها من الاعذار - أو الأشخاص و نفهم إنو
تقبلنا للفشل هو ميزة حتساعدنا نتخلص من الآثار النفسية البتجي بسبب الألم ، الحزن ، الإكتئاب و كتمان المشاعر السلبية
وفي الأخير
ما تحكم علي نفسك إنك أنسان فاشل لمجرد فشلك في حاجة معينه لمرة أو اتنين .
و اتأكد تماماً إنك حتتعلم من تجارب فشلك ، و اتعلم انك تراجع نفسك و تعرف شنو الأسباب الكانت وراء فشلك و تضع ليها حلول و برضو تركز في الحاجات الانت محتاج ليها المرة الجاية حتي تقودك للنجاح الانت بتتمني 🎉.
و برضو الناس الانت شايفهم ناجحين في حياتهم لو يوم سألت واحد منهم قبل يصل للنجاح الباهر الوصل ليه هو مر بشنو صدقني والله حتتصدم جداً ..
لانو في سبيل وصولهم للنجاح اتعرضو لمرات لا تحصي من الفشل ، الاحباط و الضغوطات دا غير الإنتقادات و تفاصيل كتيرة شديد هم عانو منها ..
بس رغم المصاعب دي الإستسلام ما كان موجود في قاموسهم ..
فتش عن الإلهام والتحفيز في قصص غيرك واستفيد من التجارب المرو بيها وعن الكتب الممكن تحفزك وعن كل حاجة ممكن تشكل ليك دعم في حياتك
ثق في نفسك وأعرف انو الفشل جزء من الحياة وأنها مابتمشي علي وتيرة واحدة فلازم تتعتر مرة و إتنين وتقوم تواصل من جديد.
#MU_ALFATIH
