قصائد حسينيه

📜قصيدة : بشمس نايم مامش فياي
🎤الرادود : عباس عجيد العامري
🖋الشاعر : رائد الناشي
~
سمعت انه يون وتكربت ليه
لكيت الف وتسعمية جرح بيه
~~
شلونك كلتله وكال تعبان
زينب يخويه هواي عطشان
سمعت انه يون وتكربت ليه

طاح كالولي اعله وجهه ودمه يا زينب يخر
تحيرت ياصوب اروحن من رجع خالي المهر
اركض ودليني اصيحن خويه بيا كتر
عميه عيني الرمل يجوي وحاره الدنيه الضهر

بالشمس نايم مامش فياي
ومن الصبح ماضايك الماي
ولكيته اعله الرمل متوسد ايديه
سمعت انه يون وتكربت ليه
~~~
طاكينه بكل مجان وماخذ ابن امي النزف
مامبين وجهه ذاكه وعلى رسومه الدم نشف
موش ذاك حسبن اخيي من الطعن ماينعرف
حيرة من ياجرح يشكي العبرن جروحه الالف

جروح الولي كلهن غميجات
بس من كثرهن مامبينات
وهنه مو جرح واحد واداويه
سمعت انه يون وتكربت ليه
~~~
تكربت يمه ونشدته تريد اشدن ياجرح
جم سهم صابك يخويه وبيك جم طعنة رمح
يعينك الله شخله بيك الطعن من ذاك الصبح
ساحكاتك بالحوافر خيلهم كبل الذبح

خويه ارد اضمدك حايره منين
من كل مجان النزف يحسين
حرت ياجرح اشده وياهو اخليه
سمعت انه يون وتكربت ليه
~
لن اسمعه يكلي زينب عوفي كل هاي الجروح
بس جرح كلبي يزينب منه ماضلتلي روح
عاينت لن جبده طالع بالسهم والدم يفوح
صحت ياتالي العشيره خلاف عينك وين اروح

يابت ابوي جروحي هينات
لاتضمدين هواي طعنات
بس جرح البكلبي عينج عليه
سمعت انه يون وتكربت ليه
~~~~
الشمس مردت كلبي يختي هلبت تسويلي في
عطش وجروح وحوافر كلهن التمن علي
غير السهام التجيني وكمت اشاكفهن بدي
خويه زينب هذا حاله الينولي وماعنده خي

ميت عطش ماضايك الماي
بس الضهدني السهم بحشاي
ومعصبج يختي زينب شديه
سمعت انه يون وتكربت ليه
~~~
جنت عود اتنوع الجن والمخيم شفته طاح
ومدري ياهو بسيفه طكني على عيوني وشوفي راح
كلهم التمو عليه بالسيوف وبالرماح
منين ما التفت طعنه ومايخلوني استراح

شدي الجرح يازينب بساع
هلبت شويه يطول الوداع
وعلى كيفج يزينب لاتلجميه
سمعت انه يون وتكربت ليه
~~~
من الخدر ملهوفه اجيتك خايفه وكلي ارتعد
كلت اتجيلك بديه وللخيم تكدر ترد
مادري بسهم المثلث مارد كليبك مرد
من عساني وياك ميته حسين يابعد الولد

حسبالي تكدر ترجع وياي
للخيم وانسويلك فياي
واضمدنك واشوفن جرحك شبيه
سمعت انه يون وتكربت ليه
°°°°°°°°°°°°°°°°°°°°°°°°°°°°°°°°°°°°°°

#للوحشه

يحسين الوحدي مخليني
دخان اخيمكم عاميني

///////////////////////////////////
محتاره بنسوان وعيله
ماتخلص ياهاي الليله
شيغمضها اخلافك عيني
///////////////////////////////////

يالليل الوحشه وياضيمه
زينب محتاره ابلا خيمه
وماظل عباس ويحميني

///////////////////////////////////

يحسين اخيامك محروگه
واطفالك ماتت مخنوگه
يانارك هيه التچويني

///////////////////////////////////

وحشه وبنتك ماموجوده
اتنخيت المگطوعه ازنوده
يدركني وبيها ايدليني

///////////////////////////////////

ميتين وعفتوني بحيره
وين الكافل راعي الغيره
بس يگوم انطيه چفيني

///////////////////////////////////

بين اعداكم لتخلوني
الموطن جدكم رجعوني
هاي الگوم انوت تسبيني

///////////////////////////////////

للشام وللكوفه اخذوني
گومو الزينبكم ودعوني
عدوان اخلافك تحديني

///////////////////////////////////

ياماي عيوني ودللالي
اشكيلك يبن امي احوالي
عليك امي الزهره تحاچيني
///////////////////////////////////
الشاعر سيد حسين آل بو صلوات الأشبال الحسيني

(ابو ذيه) الى زينب الحوراء عليها السلام

حزينه وتضل مثل أمها يسرها
وبعد بالشام مايخلص يسرها
راح الجان بجفوفه يسرها
اجفوفه اتكطعت وامست سبيه
*----------------------*---------------------*
راح الجان من تمشي لواها
الدهر من طيح اخوتها لواها
الجبال الصمم من تنشج لواها
اتحطم من هظم بنت الزجيه
*----------------------*---------------------*
خان الدهر والزهره لها ون
كل الكون من كالو لها ون ( وإن )
لزينب مو وان كالو لها ون ( وين)
غريبه لوحدج بالغاضريه
*--------------------*---------------------*
غريبه بلا أهل ضلت بلا حد
وبلاها البين بهمومه بلا حد
صفت زينب بلا والي بلا حد ( حادي)
حاديها الشمر حادي الرزيه
*--------------------*---------------------*
الشمر حداي يتشمت ولهلاي (.ولاني )
ولاني وماكو إخواني ولهلاي
أنه لحسين الي عبره ولهلاي ( وله اه )
والعباس الي ونه خفيه
*---------------------*----------------------*

محمد دعبل النوري

البارحه ݘانت اميره البارحه
والصبح زينب اسيره رايحه
******
البارحه ݘانت اميره مدللـه
اخت راعي العلم حامي العايله
بجاه اهلها مايمرها كل بله
ايامها وياهم گضت مرتاحه
البارحه ݘانت اميره البارحه
******
حالها تغير بوادي نينوى
شافت اعله الشاطي كافلها هوى
والݘفوف وياه طيحتهن سوى
بروحها احزان الاسى لواحه
البارحه ݘانت اميره البارحه
******
وين ݘانت زينب وهساعه وين
ݘان اخوها والگمر يحمي العرين
هسه شافت منگطع نحر الحسين
وينظر الها بكربله ذباحه
البارحه ݘانت اميره البارحه
******
راس اخوها نظرته فوگ الرمح
والعده حضروا مهازيل الصبح
وهذا عالحره صفى اعظم جرح
والعمر تگضيه بݘي ونياحه
البارحه ݘانت اميره البارحه
******
تگضي ايام العمر نوح وحزن
عالبقوا برض الطفوف بلادفن
يظل گلبها للاهل دومه يحن
وتنصبلهم بالخرابه الفاتحه
البارحه ݘانت اميره البارحه
******
بالخرابه تنصبلهم تعزيه
والدموع من المصايب جاريه
مصبية اخت الگمر كلش قاسيه
تكاسر الليل ابالم مصباحه
البارحه ݘانت اميره البارحه
******
وينه عنها ابوصالح مايجي
ينشف العماته دمعات البݘي
بجيته يسكت لسن اهل الحݘي
وراية الحگ ترفع بالساحه
******
خادم اهل البيت / ابومحمد العاشور

الشاعر ظاهر حبيب الهليجي

حركوا خيــام -------- تـاهــت ايتــام
يوم عاشر من محرم
---
يا مصيبــة عاشـر وذيــج اليتامه
من بعــد وليانهه تعيــش بظلامـه
تلمهـم بدمعتـه زينـب جن حمامه
عل الهواشم كربله صارت قيامـه
وحشة الليل ------------ تصهل الخيل
يوم عاشر من محرم
---
كبـــر اذان الحــزن بـالغاضــريـه
صاح حي اعله الوادع بهل مسيــــه
يـــا زمــان الخلــه زينــب بي سبيـــه
ويا وكت بي تنظرب سكنه ورقيـه
امذبحه ارجال ------------ فوك الارمال
يوم عاشر من محرم
---

هـاي رملـه تـودع القاسم ابنـهـه
والرباب تنــوح عبداللـه بحظنهه
وليله يـم الاكبــر بدمعــة حزنهه
بلمدامع هل هل الضحايه يودعنهه
تودع احباب -------- بديرت اغراب
يوم عاشر من محرم
---
طفلــه وكفــت يــم ابوهــه بدمعة العين
هـايـبـويــه انـــه سكنــه احنـــه ماشييــن
صرنه من عكبــك سبايـه ابلا صواويـن
تاهــت بهــل البــر رقيـه تصيــح يحسين
عشنه بهموم -------------- انهض وكوم
يوم عاشر من محرم
---
زينــب أعل التل تنـادي ياهظيمــه
وين عباس ويشاهـد هل الظليمـــه
ليل جلجل وانه وحـدي بلايه خيمه
جم يتيم بكتري خايــف جــم يتيمــه
خويه عباس ----------- هجمت ارجاس
يوم عاشر من محرم

نعي لزينب بنت علي عليهما السلام

ضلت وحدها ضلت وحدها ..ما ضل بعد خوان ضلت وحدها
لاوالي عدها لاوالي عدها ..بين العساكر هاي لاوالي عدها
منهو اليردها منهو اليردها...لو هاجمتنا الخيل منهو اليردها
والعادي صدها والعادي صدها..توجهت صوب حسين والعادي صدها

مابين عدوان مابين عدوان..ركضت حرم وأطفال مابين عدوان
لاغيره لاشان لاغيره لاشان..عند العرب ياحيف لاغيره لاشان
وسطت الميدان وسطت الميدان..صرعى الزلم عالكاع وسطت الميدان
غطتها تربان غطتها تربان...الغيره والناموس غطتها تربان

بالهيمه ركضن بالهيمه ركضن...فرن بنات حسين بالهيمه ركضن
المن يفرن المن يفرن...بين الجمر والجيش المن يفرن
رادن يمرن رادن يمرن...للوالي والكفال رادن يمرن
من الخوف يبرن من الخوف يبرن...لبت فاطمه من الخوف يبرن

مابين ظلام مابين ظلام .عترة رسول الله مابين ظلام
من جمر الخيام من جمر الخيام..تتجوى هاي وهاي من جمر الخيام
كبعت بالالام كبعت بالالام..بت حيدر الكرار كبعت بالالام
الحره تنظام الحره تنظام...لو فكدت الخوان الحره تنظام

ضل الحرم مابين عدوان
ولاوالي عدها ولا كو خوان
اطفال تتراكض ونسوان
بالبيدا طش كل ظعن الحسين

العيال ضلو بين ظلام
وفرهدو بيته الجاب الإسلام
بالنار شعلو كل الخيام
وتفرهدت كل الصواوين

محمد النوري

وحشه هاليله المدينه. والله صارت يا نبينه
وحشه وحشه هالمدينه
==============
ليل وفراك وبواجي والدمع جمرة عيوني
ودعتهم غالي غالي ليش اهلي ما خذوني
سارة اضعون الحبايب خذو روحي اودعوني
كون ميته ولا اشوفن الاحبهم فاركوني
ارجع الى بيتي حزينه. والله صارت يا نبينه
وحشه وحشه هالمدينه
===============
ودعت زينب واحسه رايحه تشيع أهله
تنظر حسين بدمعه ساعه تنظر عالكفله
تكلي سلميلي علجدي روحي ميت امله
هالوصيه للوديعه العيله هل طفوا شمعه
رايحه لحيدر ولينه. والله صارت يا نبينه
وحشه وحشه هالمدينه
=================
ارد أوصيك على اخيك ياكمر ياكرت العين
فدوه لبن الزهره كلكم لاتقصرون ويلحسين
انه امك يبو فاضل كوم يمه انذرلي جفين
حكي اريدنه يغالي كون سالم هيبة الدين
ريت هالساعه تجينه. والله صارت يا نبينه
وحشه وحشه هالمدينه
===============
عالدرب انطر خبرهم طالت الغيبه عليه
وارجع البيتي حزينه تاكل بكلبي المسيه
بلصور عشت بذكرهم وينكم يهل الحميه
اه يا ليل الي يتاني صافنه وافرك بديه
لا خبر منهم يجينه. والله صارت يا نبينه
وحشه وحشه هالمدينه
================
مشتاكه روحي لو تشوفك اه يا خيرة اهلنه
اصبر انه بعد شصبر فاركت أهل المحنه
موتتي انه من اذكرك يلشوفتك شوفت الجنه
بدمعي اكصد للزجيه من الكبر اسمع الونه
وحشه البيوت علينه. والله صارت يا نبينه
وحشه وحشه هالمدينه
=================
بثواب ام البنين عليه السلام
الخادم نصير الخزعلي الكربلائي

وصتني امي بخدمتك وصتني
وبرايتك من الزغر لفتني

وانه طفل اسمع نعي الملايه
وربيت يحسين بأذاني اقرايه
خدمتك كبرت بالعمر ويايه
هالخدمة لوسام الشرف وصلتني

غذتني امي لخدمتك بالمرضع
وشديت عودي بصيتك اللي مرصع
ماعوف حبك حته لو اتكطع
مو صدفة هيج محبتك جمعتني

كالتلي يمه حسين ابد لاتعوفه
ينجيك من هذا الزمان وخوفه
يردد لسانك دوم كون احروفه
ياقصته بنار الكلب جوتني

تطبخ ثواب وانه اوزع اثوابك
ونوب ترجع تنتحب لمصابك
اشسويت يحسين بقلوب احبابك
هاي القضية اشكد صدگ حيرتني

اذكر الضامي بالعذب من تشرب
وبالعطش كلب المولى يبني تعذب
فوگ الجتل مسبيه راحت زينب
هاي المصيبة اللي، دهر، بچتني

تفرح لون انه بخدمتك اقره
اتريد نخدم كلنه لابن الزهره
المايخدمك شنهي ينفع عمره
ابسجل خدامك ردت سجلني

لون الحياة ابخدمتك بس تحله
والصعبه يمك ندري تصبح سهله
للكرم يامولاي انتم اهله
خادمكم وجيت بگلب متعني

ابو علي الهويشم

اه يالخذو روحي ومشو همه ونسوني
امشي وباوع عالجثث بلكت تجوني
============
مالايك اعلينه العطش عبدالله مانام
يا خويه تدري بكربله ملتمه ظلام
شافوك طحت من الفرس هجمو عالخيام
وبحركت الخيمات يا خويه احركوني
============
واحد عله الهودج صعد وينك يعباس
اختك وحيده بكربله وماترحم الناس
داسو عله النعمه بعمد ماعدهم احساس
هسه يجي الكافل كلت ويرد ضعوني
============
راسك اجاني وامنت يمشي ويانه
لكن بجيت اتذكرت جسمك ورانه
جا هوه اليشيل الكمر شيحط مجانه
اذكر جسمكم عالرمل ويضيع لوني
============
يالطولك يخجل النخل صرت اعله عوده
ابن امي كلي بيا وكت واحد يكوده
والكون هذا الي انخلق كله اعلموده
يا خويه بس لمن طحت كلهم ولوني
============
ما اطول اعليك الحجي كلشي انت شفته
عبالي واصلها الذبح مذبوحه شفته
متوصل ابنص موزمه ابن امي عفته
من بين كل هذا الحدث شبت اعرفوني

(تراث نجفي)
خادم ال البيت ع
حسين جبار المختار

والله حيره يدنيا والله حيره
زينب تروح اسيره والله حيره
××××××××××××××××××××
ضلت اتنادي يخوتي ماتكعدون
كومو يسباع الهواشم ماتفزعون
انه اختكم وحيده وعميه العيون
بلغرب وبلا عشيره والله حيره
××××××××××××××××××××
عل نهر طايح لوائي والكفلني
والعده يا ابو فاضل ما رحمني
والهظم عنكم يخويه من سئلني
وين الحسين وعضيده والله حيره
×××××××××××××××××××
طبت الكوفه يا هلنه عذبتني
والمصيبه يبو فاضل من رمتني
انه زينب بت علي شو نستني
وانه جنت الاميره والله حيره
××××××××××××××××××
وين حماي الحمه اجيبه منين
بوسط تنور اندفن راس الحسين
وانه حرمه وحيده وتدمع العين
وانه وايتامي اسيره والله حيره
×××××××××××××××××××
عل هزل يابني هاشم ركبوني
اخوتي ظلت طريحه من سبوني
انه بحزاني بقيت ما تجوني
والنظر المن اديره والله حيره
××××××××××××××××××
شرد اجاوب يزيد.وذيج الاجناب
وانه بنت الصميده وداحي الباب
ويه راسه كفيلي يحله العتاب
واني بلشده الجبيره والله حيره
×××××××××××××××××××
نزولني بخرابه ويه الايتام
كله اهوال ومخاطر سفره الشام
كله ماعده حميه كله ظلام
وانه يسموني اسيره والله حيره
×××××××××××××××××
الخادم نصير الخزعلي الكربلائي

تمشي الضعينه ويهل علينه
عاشور الحسين والهمه بينه
.........
وي نصب الخيام ننصب مآتم
نحضر عزه حسين نبع المكارم
نزرعها رايات لبدر الهواشم
ولسبي العيال نلطم بدينه
........
عام باثر عام واحنه اعله دربه
ينادي لحسيين والشيعي لبه
حگهم یگولون جننا حبه
یمرنه عاشور نندب ولینه
.......
الجيت الهلال كلنه نناطر
نحسبها الايام حرا المشاعر
بهاي المجالس نحيي الشعائر
مشايه لحسين موكب مشينه
......
وبدمعة العين حشمنه عباس
نلطم عالصدور وندگ على الراس
نبقى احنا ننعاه ل,گطع الانفاس
یالچافل عیال باسمك نخينه
......
ياشهر الاحزان شهر العقيله
حرمه بالف حيد صارت جفيله
هاي اخت الحسين حره واصيله
ماننسه زينب الها بجينه
.......
بلوعة االام شاعرنه كاتب
نعي وقصيده ونزلت مواكب
والقاري ينعاه چن دمعه ساچب
های المراسیم مودودا بینه
......
یالمهدي وياك دمعه اعله دمعه
نطلبها ثارات والحگ نرجعه
بدروبك ارواح نعلگها شمعه
لیدك يموعود مدينه ادينه
عاشور الحسين والهمه بينه
.........
للخادمه ام عباس الخفاجي

ردلي المهر خالي و.دموعه بالعين
يبجي وينادي بصوت لحكولي لحسين
طاح فوك الثره طاح
راح ياام الخدر. راح
لحكولي لحسين. لحكولي لحسين
===============
رجعلي والوجهه مصبوغ من حسين
سرج مكلوب والفزعة غدة صوبين
جا. وينه ابو السجادحاجيني كلي وين
اشوف الخيل بالميدان غدت صوبين
ردلي السرج مكلوب. عذب دليلي
بين الحوافر خيل. . طايح خليلي
طاح فوك الثره. طاح
راح ياام الخدر. راح
لحكولي لحسين. لحكولي لحسين
================
ردلي بحزنه وبلوعة ينادي طاح واليكم
يزينب حشمي رجالج لبو اليمه اوديكم
عفته هالفزع صوبين بنار وكصد ليكم
بكل صوتي للخيم ناديت احشم بيكم
من طاح أبو السجاد ما ترحم الناس
وعلى النهر ناديت حشمته عباس
طاح فوك الثره طاح
راح ياام الخدر راح
لحكولي لحسين. لحكولي لحسين
===============
يصيح بصوت يازينب وكع مضلوم
وكع على الكاع ومخضب شيبه دموم
ذاك الفرات من عنده السبط محروم
جروحه هواي ينزف راسه ومهشوم
من الجبهه يازينب. ينزف دمه حسين
لو حاضر العباس. ويشوفه بالعين
طاح فوك الثره طاح
راح ياام الخدر راح
لحكولي لحسين. لحكولي لحسين
==============
يالميمون دليني بخونه بياكتر طايح
اسمع من عج الخييل بده صايح
دم ذاك اويلي على الترب سايح
ذاك الطول اشوفه بالدمه سابح
بسيفه الشمر شفته هالكاصد عليه
يكعد يودع اخته كل حييل مابيه
طاح فوك الثره طاح
راح ياام الخدر راح
لحكولي لحسين. لحكولي لحسين
===============
الخادم نصير الخزعلي الكربلائي

مسلم يواليها ---الكوفه تدريها
حكم الغدر بيك انصدر
چنك حسين بلا ظهر
١--------------------------
سفير حسين مسلم ظل بلا ناصر
أمس چان العدد مو نفسه بالحاضر
بغربه ووحده من يكسر الخاطر
چنه حسين ينطر دوست الحافر

بالغربه يگظيها--مچتول تاليها
من الغدر هو أنقهر
چنك حسين بلا ظهر
٢---------------------------
قرر يمشي وحده وهو بالغربه
وچان حسين باله وفكره كل دربه
ولنه بدار حرمه يگلها بس شربه
شرب والحرمه گالت ظلتك صعبه

گالتله ما ترحل--شعطلك تسئل
عن أسمه خبرها وجهر
چنك حسين بلا ظهر
٣--------------------------
طوعه ترحب بمسلم ينور العين
شرف جيتك تگله يا سفير حسين
تظل الليله يمي وروحتك ليوين
من كل هالغدر لو ترحل انت منين

يامسلم أنطي الراي--هاليله تبقى وياي
من غبشه تطلع للنهر
چنك حسين بلا ظهر
٤--------------------------
مثل حسين مسلم حاوطوا داره
فقط بس طوعه ظلت هيه انصاره
تحشمه تگله مسلم سوي الك غاره
مثل حيدر برز والسيف فقاره

وبحيدر أخبرهم--لو هد يطشرهم
مسلم علي وسيفه أنشهر
چنك حسين بلا ظهر
٥---------------------------
بغدر وبحيله مسلم من يأسرونه
وفشله بس مره محد ينصرونه
من سطح القصر مسلم يشمرونه
أبين الكوفه جسمه من يجرونه

جسمك يأذونه--لمن يجرونه
كل عظمه من جسمه أنكسر
چنك حسين بلا ظهر
٦---------------------------
من سطح القصر يحسين صاح أرجع
وسلم من بعد وبعينه هل مدمع
نفسه الكاتبك يحسين ألك يمنع
چثه مسلم من الكوفه ألك تطلع

للكوفه لا تطبون--بيكم ترى يغدرون
الكاتبك مرساله إنكر
چنك حسين بلا ظهر
٧---------------------------
مثل حسين چثته هيه بالنظره
واحد خيل رضت واحد تجره
جسمه من فعلها الخيل التوذره
مو مره التجره لا الف مره

عالارض عافوها--متگطعه شافوها
من جسمك شظل من أثر
چنك حسين بلا ظهر
----------------------------
تمت بعون لله تعالى
خادم اهل البيت ع
علي الاسدي

فاطمة العليله وابيها الحسين عليهما السلام

بويه وياك. يصعب اجفاك. يالغالي
شيحمل النوح. شيحمل جروح. دلالي

يابويه يالمثل الهوى لمن تجيني
تدريها بويه بفركتك ماترضى عيني
عله وألم ويه الهجر يكثر ونيني
وياك أخذني يالولي وارحم حنيني

بويه ارجاك. خذني بحماك. .يالوالي
شيحمل النوح. شيحمل جروح. دلالي

*------------*------------*---------*

يابويه يالكلك محنه وتدري بيه
مكدر على فراكك انا يبن الزجيه
لو رحتو ابقى لوحدي وداري خليه
لا لا تخلوني ترى وحشه عليه

بويه وشلون. حين ترحون. بحوالي
شيحمل النوح....شيحمل جروح. .دلالي

*------------*-------------*------------*

ها يالعليله ظلي بنوحج وحيده
راح الابو وياه و أخذ ضعن الصميده
ماينفع النوح ومشو أهل العقيده
الفارك هله بعد البجي ماظن يفيده

ليل البعاد. حزنه يزداد. متوالي
شيحمل النوح. شيحمل جروح. دلالي
*-------------*---------*---------*

بدياركم ظلت تون طفله عليله
والفاكد احبابه منو يطيب دليله
يحسين بنتك فاطمه بعدك ذليله
حزن القلب بس شوفتك عنه تزيله

ذل الفراك. لمن اشتاك. يبرالي
شيحمل النوح. ...شيحمل جروح. ...دلالي
*--------*---------*--------*
غالي يبويه وبالقلب تدري مكانك
أنت الحياة اتنفسك والمس حنانك
حيف أعلى طف الفاجعه حول زمانك
ويحرمنا منك يالولي ويأخذ امانك

يصعب الليل. ويلفي الويل. لا امالي
شيحمل النوح. شيحمل جروح دلالي
*

محمد دعبل النوري

طفله وفاگــــده الوليان والدمعه تسليهه
تربي اعالدرب وتنوح ولاطارش يمربيهه
واويلي.على الوليان==
. ـــــــــــــــــــــــــــــ
يوم الآمـــــر الحداي ظنهه وي الظعن تطلع
فرحت فاطمه وكامت كـــــل ثيابهه تجمع
ولن حسين ناده بصوت كلوا الفاطمه ترجع
ردت ولدموع تسيل على خد ينزف المدمع
مهمومه ودمع سجاب. حالتها تشيب الشاب
تركض والظعون تسير*اولا واحد يحاچيهه
واويلي على الوليان==
. ـــــــــــــــــــــــــــــــــــــ
صاحت علظعن بهداي ريضلي ارد اودعنه
تركض ساعه ساعه تكوم اخرلحظه اشوفنه
وعبدالله اخوي شلون بس هل مره احظننه
وارد. اشبگ ابـــــوي حسين وبنحره.اشمنه
ادري حسين مايرجع. وباجر جسمه يتگطع
وخيامه تصير ارمــــاد*اوما واحد يطفيهه
واويلي على الوليان==
ـــــــــــــــــــــــــــــــــــــــــــــــ
تگعد عالدرب وتنوح اتفطر صخــور ونتهه
مره تصيح بويه حسين ومره تحن لعمتهه
تبچي عللمهد مرات تشيب الراس بچيتهه
وچم حسبه التمر علباال من اتصد ثنيتهه
لاطارش ولامرسال. يلفيها من ابوها الشال
طفله ولو بچت ياناس*من ايسكت بواچيهه
واويلي على الوليان==
ـــــــــــــــــــــــــــــــــــــــــ
تعتب والعتب شيفيد مـــــاظن للمشوا رده
مــــن يلفي عليهه الليل باب الدار ما تسده
تترجى يجي مرسول بلكي اعله الابوتنشده
الساعه اللي تمر كالعام راح وطالت المده
تحسب واليالي شهود*بلچن يرجعلها ردود
لاطارش لفه ولاطيف گلي شلون تاليهه
واويلي على الوليان
ـــــــــــــــــــــــــــــــــــــــــ
لاطيف الفــــــاهه بليل ولاباب البعد يندگ
خدهه من البچي مجروح يوميه بدمع يغرگ
حالتهاتشيب الراس وجها من البچي اتشگگ
اليفارگ عزيز شلـــــــون بالفرگه فلا. صدگ
ظلت تنخا كل غروب يلفي من الاهل مكتوب
جفت دمعتي ياحسين روحي تريد غاليهه
واويلي على الوليان
ــــــــــــــــــــــــــــــــــــــــــــــ
بقلمي خادمكم ابوباقر الصالحي
علطور (ويلي من لفت ليله)
طور اهوازي

نزله اوشورللعليله ع نفس طور شالو جنازتهه للحاج باسم الكربلائي
***
وياكم اخذوني لالا تخلوني
دمعاتي بعيوني آنه العليله
****
آنه العليله والأهل عافوهه
للأنتظار وللصبر سلموهه
لاميته وجنازه بكبر دفنوهه
لاحيه وبشوفتهم يهنوهه
متكدره ايامي ومصابي كدامي
أنحب عله الضامي آنه العليله
**
رايح الغالي لكربله وناسيني
يالماخذ وياك النظر من عيني
يابويه ماريد العمر وسنيني
هد حيلي يحسين المرض تدريني
ماأحمل الفركه والعله والشهكه
اتنطر الملكه آنه العليله
***
اذكر وياكم كعدتي وضحكاتي
تسمع النجمه الباسمه حسراتي
هاي الليالي تشهد لوناتي
تبجي عليه وتمسح بدمعاتي
كل دمعه ابجيهه بمكتوب اخليهه
لحسين اوديهه آنه العليله
****
نار الهجر تطفه وتشب يالوالي
يامن عفتني ومادريت بحالي
مو واحد الفاركني وشكم غالي
إحسب يبويه جروحي البدلالي
جم غالي فاركته سافر اودعته
بويه احترك سكته آنه العليله
*****
بالباب اناطر جيتك كل ليله
ظل المهد يسمعني وآنه احجيله
من يبجي عبد الله جنت ابجيله
واختي رقيه جانت تلوليله
وسفه تألمنه والدهر فاركته
مابعد يجمعنه آنه العليله
*****
كلمات خادمة الحسين عليه السلام

أم علي

قصيده نسائيه (فاتحته عزيزه)

زينب وين چادرها تنصبينه
فاتحته عزيزه وحيل تاذينه

***
فاتحته يزينب من يعزيها
ردت هليتامه وحيل مابيها
عادات العرب تشيّع تلفيها

ضل عالتراب حسين يسكينه

***
ياهو ينحب ويلطم على ادامي
يا نسوان حزو راسه جدامي
وفوگ ارماحهم سبولي اسلامي

يزينب ما هو ضنچ راح تنسينه

***
اجيتي عالهزل رديتي مچتوفه
وهذا اعلامهم وصلها للكوفه
ومن طبيتي ليهم ناس مخيوفه

يومي حسين كل الدرب ابعينه

***
يا نسوان الطمن حيل وبونه
طاح البيت واهل البيت يحزنه
مجلسنه تحضره الزهره وتسنه

بدفتر الخدام يأم حسين سجلينه

***
شاب الراس زينب فگدت اخوتها
من هو مار من عدنه بمصيبتها
حسرته بگلبها و تچوي دمعتها

و رك شوف بيچ وما توجدينه

كلمات
حسين علي السعدي

يمته ترجعلي وعلي اشتاكيتلك
الليل اجاني واشكثر حنيتلك
كمت اتانيك وين الاكيك
*****
ليش ترحل ياهوه غير امس جنه سوه البارحه حيلي انهد امن اتذكريتك
يالخذت كلبي ورحت ردلي عافيتي صحت طلع شيب برمشي احس من فاركيتك
الياوكت بله انتظر اشحصلت من هالعمر انه ندمة عمري جانت ودعيتك
شنسه وبطولي الجرح وفركتك مثل الملح وداعت عيونك حبيبي ما نسيتك

انه لجلك عايشه تدريني
ليش هيجي اتروح وتخليني
بدمعي احاجيك وين الاكيك
******
عيني ضلت عالدرب ودمعي فوك الخد يصب صحت بويه حسين ليش اتاخريتو
الباب مل من كعدتي وسجن صارت دنيتي اهواي منتظرتكم وجنكم بطيتو
ضيعتكم يا هلي ليش محد ضل الي امنيتي اشمن بس عطركم يالمشيتو
عندي ما ضلت اخت ولا اخو ايسير شفت هم اجيت ابالكم وتذكريتو

الليله خليتو العليله اشحالها
بويه والعدها اهل هنيالها
اعتب اعليك وين الاكيك
*****





خنكت المغرب تره جنها كاع المكبره ليش تنساني وتخليني بعذابي
بيك افكر كل وكت ازغير عمري وشيبت انته هم ترتاح حاجيني بغيابي
من يجي ابالي الحجي تشبع عيوني بجي جم تعال بدمعي خطيت اعله بابي
الصور تعرك من اون راح اموت امن الحزن بيت مهجور اصبحت وشتد مصابي

ليش كل ماريد اغمض عيني
صورتك تندهني وتصحيني
اتعلكت بيك وين الاكيك
*****
يا عذاب اتحمله انه تدري امدلله والبنيه العدها ابو تفرح ببوها
كل وكت بيها يمر وينشد اعليها اشكثر ويزعل اعله ابنيته لو زعلوها
والعليله ابلا ابو ويجبر الخاطر منو ليش وياهم اهلها ماخذوها
مرو بصفها وجزو وكلشي وياهم خذو ليش من كالت اروح اتعذروها

ليش طفلتكم صحت تنسوها
وتاخذوني عيوني وتبجوها
باوعت ليك وين الاكيك
******









تدري بيه استاهلك وكلشي بيه ايحن الك من كثر ما حبك امجانك شبكته
عطشتني الشوفتك ويبستي بفكرتك انه اول واحد بهجرك ذبحته
من يجي الليل اختنك شمعه اصيرن واحترك انه صح بيه نفس بس روحي ميته
مرني يالما تنشبع اصحه واغفه اعله الدمع فاركتني وحبل المواصل كطعته

والرساله التنكتب معناها
تموت اذا محد يجي ويقراها
بشوكي اناديك وين الاكيك
***
تمت
تحسين الخفاجي

ام البنين توصي اولادها قبل الذهاب الى كربلاء
طريقه قرائه القصيده مقطع صوت مسجل موجود بالقناة اليحب يسمعه
المستهل
---------------------------
جمعتهم ولدها أم البنين
ورسمت عالارض خيمه للحسين
يايمه ياعباس--بيكم ارفع راس
١-------------------------
جمعتهم تگلهم ولدي عالفات
علي من أخذ أمكم لاجله بذات
أنتوا اربع ولد صيروله جبهات
شنو طعم الحياة حسين لو مات

يمه أوصيكم حسين--خلو چوه بالعين
٢-------------------------
رسمت عالارض موقف للحسين
وتشرح عالرسم هاي أم البنين
خيال حسين گالت للكمر زين
بالطف موقفك لو شافت العين

كل خطوه انت وياه--مثل النفس معناه
ظله الكمر نلگاه
٣------------------------
تحچي ويه الكمر يايمه عباس
أريد الطف يسولف بيك والناس
زينب هيه أمك عندي الاحساس
بگفالتها العقيله ترفع الراس

حيدر هو سماك--زينب خلها بحماك
٤------------------------
أنطو حسين گلشي مو فقط روح
گون أسمع جسمكم ترسته جروح
چفوف وعين جسمك وانت مذبوح
أذا متسوي يمه حتى متروح

عالمشرعه يناديك--گون اسمع موذريك
٥-------------------------
عالطف اليعاين خل يعرفون
گلشي للحسين اولادي ينطون
من تنطي الچفوف وانت ممنون
لو جاك السهم قدمله العيون

يصيب بوحده يعميك--گله الاخره انطيك
٦--------------------------
الخبر يوصلني عنكم گون والراي
وگفت خوه وگفو والنعم هاي
ثلث تنعام من الكمر وفاي
ومنهم گون انتي مخلفه هواي

صاحوا يالي تمشين--هاي الضحت أبنين
٧---------------------------
اريد يگول عد حسين خوان
ويعجز من وصفكم گون اللسان
أسمع عالشريعه جيش أگو چان
وما تشرب الماي وانت عطشان

شيل ألمي بالچفوف--حسين أذكره وتعوف
٨---------------------------
حلال الكم حليبي وكل تعبكم
اريدن گبله گون يسيل دمكم
فدوه للحسين اولادي كلكم
يم الزهره ارفعوا راس أمكم
اريدن ام الحسين--من تطلع بچفين
----------------------------
تمت بعون الله تعالى
خادم الحسين ع
علي الاسدي

شور
------------------------------------------------------
ضاعوا اولادي / من حده الحادي
يزهراء
كومي دليني /يمه عينيني
يزهراء
------------------------------------------------------
يمه عگب اخواني ماضلالي معين
يمه احشم بالكفل واتعنه لحسين
كومي يمه وياي ضاعولي انا اثنين
مدري من الخيل خافوا مدري ميتين

يمه دوريهم /وياي شوفيهم /يزهراء
كومي دليني /يمه عينيني /يزهراء
------------------------------------------------------
انه وياج انتعنه وننشد الراس
ادري بيه عينه علينه وينظر الناس
النوب نتعنه الشريعه لبو النوماس
خويه ماشفت اليتامى ها يعباس

لاذو بجسمك / لو اجو يمك / يزهراء
كومي دليني /يمه عينيني / يزهراء
------------------------------------------------------
يمه هاموا بالبراري وهلأجه الليل
يمه ذولي اطفال وايتام ومداليل
كومي خنحشم علي حماي الدخيل
ياعلي يابو اليتامى دخيلك دخيل

العطش كاظيهم /عينج عليهم /يزهراء
كومي دليني / يمه عينيني / يزهراء
------------------------------------------------------
اه لو تدري الوديعه شصار بيهم
ولو تصد ذباحهم يزمخ عليهم
مدداهم علنهر مارحم بيهم
اه واويلي لونهم ولبجيهم

اذبحني انه يكله /الموت الي يحله / يزهراء
كومي دليني / يمه عينيني / يزهراء
------------------------------------------------------

تمت بحمد الله
اللهم صل على محمد وال محمد
خادمة الحسين ....