شركة Mozilla المشرفة على تطوير متصفح فايرفوكس، حذفت الوعد اللي كان موجود في سياسة الخصوصية بتاعتها وبيقول إنها "عمرها ما باعت ومش هتبيع بيانات المستخدمين الشخصية"!
الخطوة دي خلت ناس كتير تقلق وتتهم الشركة إنها ممكن تكون ناوية تبدأ تبيع بيانات المستخدمين.

موزيلا بتقول إن السبب إن تعريف "بيع البيانات" بقى واسع جدًا في بعض القوانين، فقرروا يشيلوا الجملة عشان يكونوا أكتر شفافية. بس هم أكدوا إنهم لسه مش بيبيعوا بيانات المستخدمين بالشكل اللي الناس متخيلة، وإن أي بيانات بتتشارك مع الشركاء بتكون مجهولة الهوية أو معمولة في شكل بيانات مجمعة.

فيه جزء تاني من سياسة الاستخدام الجديدة بيقول إن لما المستخدم يكتب أو يدخل أي حاجة في فايرفوكس، فهو بيدي ترخيص للشركة باستخدام المعلومات دي عشان تحسن تجربة التصفح. الناس شافوا إن الجملة دي غريبة ومبهمة، واتهموا الشركة إنها بتاخد صلاحيات واسعة جدًا على بياناتهم.