صحباتي عارفات أني في الفترات الصعبة نختفي و نفضّل في الصمت رغم أني أكتڤ فاهمات أني مش قاعدة في الدنيا يعطن فيا وقتي لكن ما يتخلّنش يقعدن ورايا و ما نسمعش منهن في جملة ليش ما جيتي حكيتي؟ هنا عارفات أني محتاجة من يكرّني عنده و يعطيني دافع نحكي بيه، صحباتي ما يزعلنش من السين متاعي ولا تأخّر ردودي و صانعات من حالاتي النفسيّة نكتة يضحكن بيها بدون تحامل.. صحباتي مش مدققات على قلّة سؤالي اللي يكون عندها خبر سمح ما تحرمنيش من مشاركتها له تخش تقوله بغض النظر عن كلّ حاجة في الدنيا، صحباتي ما يعاتبنش عشان عارفات أنّ نحن أكبر و أقدم من هك، رفقتنا الخفيفة الصادقة تجيب واجد من طبع الرجالة اللي هوّ ما فيش كلام زايد ما فيش نوايا سيّئة ما فيش صدمات ولا مواقف ركيكة صحباتي طموحات عندهن قرايتهن و شغلهن و أستقلاليتهن و أهدافهن صحباتي مطوّرات مني مستفيدة منهن و حاسّة بأهمّيتهن و وجودهن عمره ما كان عبث يسمعن يحتون يعطن في وقتهن بارزات و وجودهن مُثبت و في كلّ مرة أنا حنقول محظوظة و فيّا حاجة لله و ربي مفضّلني عشان عاطيني ناس تعطي فيّا بدون مقابل و مش مراجية منّي غير وجودي..
كلّنا محتاجين من يطبطب و يهوّن مرارة الأيّام و أنا من غير سعي مني خذيت نصيبي السمح هذ كلّه 💙.