اختراق حسابات الانستكرام والتليكرام والفيس بوك 🤔 !!
البوست ممكن يطول لكن بي معلومات تفيدكم ،
بين كل فترة هواي من اصدقائي ومن أعضاء القناة يكلولي حساباتنا اخترقوها او حساب شخص قريب عليهم وتصير مشاكل وتهديد ... وهواي امور .
➖➖
خل نجي خطوة خطوة
شلون تُخترق الحسابات؟
➖➖
كل الي يصير هو بسبب عدم الاهتمام بحماية الحساب على سبيل المثال:
• شخص مأكد حسابه برقم أمريكي
او اي رقم ثاني غير رقمه الخاص ياعزيزي هاي الارقام بين كل فترة تروح لشخص ثاني ف ممكن يفتح حسابك يمه
• السبب الثاني تسجل خروج من حسابك وتنسى الباسوورد ومن تسوي استعادة لكلمة السر ماتتذكر البريد الالكتروني الي رابطه عليه او مايكون مفتوح حتى توصلك عليه رسالة تعيين كلمة سر جديده
• سبب ثالث ممكن يصير عن طريق التخمين ، يعني اذا جان باسووردك ضعيف مثل جماعة (2018 مرتين)
•السبب الرابع بسرقة حسابات الانستا هو برامج ومواقع زيادة المتابعين 🤦🏻♂
وهواي اسباب و اساليب وخدع تخلي حسابك اختراقه يكون سهل
➖➖
شلون تحمي حساباتك؟
كلامي هنا يخص كل حسابات التواصل الاجتماعي (انستا/ فيس/ تليكرام/تويتر ...الخ) الخطوات الي راح اذكرها مو من جيبي ، وانما كل تطبيق تواصل يوجب عليك تسويهن حتى تحمي حسابك .
مادام انت حالياً تقرة هذا البوست وحساباتك مابيها اي شي وكلشي تمام اتبع هاي الخطوات الي تساعدك بتأمين حسابك
|| قبل لا يوكع الفاس بالراس 🙃 ||
الخطوات :
١- تأكد من البريد الالكتروني الي رابط عليه حسابك يعني لازم مفتوح بجهازك وتكدر تستقبل عليه رسائل ولازم تعرف كلمه السر لبريدك ولازم يكون بريد موثوق يعني مو تسوي وهمي هيج ماينفع استخدم مثلا gmail او Outlook وغيرهم .
٢- تأكد من رقم الهاتف الي رابط عليه حسابك يعني لازم يكون خطك موجود تكدر تستلم عليه رسائل واتصالات مو (ضايع) وارجع واكول لا تستخدم ارقام امريكية مال برامج بالإضافة الى رقمك لا تسوي عليه اكثر من حساب خلي مربوط بحساب واحد فقط .
٣- استخدام كلمة سر قوية وصعبة التخمين .
٤- وهاي اهم خطوة الي هي تشغيل المصادقة الثنائية او التحقق بخطوتين
(tow factor authentication)
يعني اي شخص حتى لو كان يمتلك باسوورد حسابك ماراح يفتح الحساب الا يدخل الكود الي يوصل برساله
(على رقم هاتفك الي رابطه وي حسابك)
➖➖
طريقة تشغيل المصادقة الثنائية على الانستا كالاتي : الاعدادات > المصادقة الثنائية > تشغيل
وراها راح يدزلكم كود على رقمكم تكتبونه بالخانه الخاص بي وهاي هي بهيج حالة تفعلت عدكم المصادقة الثنائية
➖➖
طريقه التحقق بخطوتين على التليكرام
والي هي أيضاً حتى لو جان الشخص عنده رقمك وودخل الكود ماراح يكدر يفتح الحساب الا يدخل كلمه سر
"صراحه هل ميزة نقذتني شخصياً من كارثة جبيرة 🙂 "
تشغيل هل خاصية كالآتي: الاعدادات > التحقق بخطوتين > اكتب كلمه سر خاصة بحسابك > وراح يطلب منك بريد الكتروني حتى اذا صار شي او نسيت كلمه السر ممكن تستعين بالبريد الالكتروني ، وخلص هل خطوات البسيطة تأمن حسابك على التليكرام
➖➖
تأمين حساب الفيسبوك بميزة المصادقة الثنائية :
الاعدادات والخصوصية > الاعدادات >الأمان وتسجيل الدخول > المصادقة الثنائية > تشغيل
وراها راح يدز كود لرقم هاتفك الي رابطه وي الفيس تكتب الكود بالحقل المخصص وهاي هي بعد اي شخص مايكدر يدخل على حسابك حتى لو كان يمتلك الباسوورد والاميل الا بموافقة منك .
شرحت الطريقة للفيس والانستا والتليكرام لان الاغلب يستخدمهن اما بقية مواقع التواصل كلها نفس الطريقة ونفس الآلية .
"""بالنهاية """
ماكو امان بنسبة 100% ، لا تخلون معلومات حساسة بأي حساب الكم .
و ياجماعه احتفظوا بالبريد الالكتروني والرقم مالتكم لا تنسوهن .....
وهاي معلومات بسيطة لكن مااعرف ليش هواي ناس غافله عنها ، اتمنى تفيدكم وتكونون اكثر وعي بهيج امور
➖➖➖➖
أعادة توجيه لغيركم حتى يستفاد
@pro_kj
