يرخص طولهه الما لاحهه اللكاح
ما تحضه التشيص بحضنة الصاعود
وتدلل العاشت عــد فلح سنعين
تميل وتنعشك كلما حملهه يزود
من سحكة المسحه وصيحة الملاچ
العثك يكثر صفاره ويكبر العنكود
المسحه البيهه لمعه مبينه عد فلاح
يغبش ما يضل حد الضهر ممدود
احفر كاعك وطلع الزرعك ماي
لا تهتم صفت خنياب لو صيهود
الما لاحه التعب مالزم بيده عنان
ترى جني الشگر ما يغلى عالكادود
لا تحرم چفوفك من دلال الجيب
ترى المتروس جيبه بهالوكت محسود
الزلم صح بالفعل مو بالفلس تنقاس
بس المشترى السيف الفلس مريود
لوما للنفع ما حطلك الله چفوف
وما حط عشر اصابع فوكهن وزنود
عد اهل الخبز حلم الصبح ما صار
عمرهم مالكو باب الرزق مسدود
تطلع بارده الحيهم بليه طحين
الفشك يتخورس من يفارك البارود
سومر بالشمس خاطر بجية الليل
ما تبرد وتغفى ابين اديك خدود
صخم چفك وجيب العلوم البيض
ترى صار المدح بس للدلال السود
تحزم للتعب خاطر تصير عكال
ما ينكشخ بيه الضهره ما مشدود
احضر وين ما صح للفعل نيشان
واشمر دلوك بكل بير شايل جود
لا تتغيب وخليك مثل الريح
كون بكل مجان وكل وكت موجود
#مصطفى_حرب
https://t.me/mustf89
