قصيدة مولاتي ام البنين ص


حلم جان بخيالي - اروح ويالضعينة
ولا جان اعله بالي - اضلن بالمدينة
اذا رحتو - اروحن وين
اعيش المن - بغياب حسين



حمل من الليل الضعن والفجر يطلع نورة
من ما شفت هودج الي روحي ارجعت مكسورة
لو عله جانت بيه اضل وبعلتي مجبورة
بس وحك كل شارب يرف امكم تضل مقهورة

اذا عفتوني اموتن حسرة
احلفك يمه بعيون الزهرة
ترة الفركة بحساب البين
اعيش المن بغياب حسين



عادة الابن وكت السفر يحتاج امه كبالة
وحشتهه ما تنسد ابد لو يمه كل عيالة
باجر يناديني شكثر من تهجم الخيالة
ما بيه احضر كربله ويلكه الشماتة كبالة

الشماتة هوايه وعزيزي لوحدة
اليمر من يمه يطعنه بجبدة
اخوي ايصيح اجيبة منين
اعيش المن بغياب حسين



تمنيت اروح لكربله واحضر بيوم العاشر
وافزع للحسين بعمد من يستغيث بناصر
خليني اموت بكربله هو اني اموتن باجر
وكل حافر ايدوس الابن يسحك بصدري الحافر

اذا ما افزع اضل بالخيمة
الم عيالة التهج بالهيمة
الحرم بعدك يروحن وين
اعيش المن بغياب حسين



من تحترك كل الخيم اصبح ستر لعيالك
ومن تصبح الهيمه جمر اعله متوني اشيل اطفالك
تمنيت اطيح وما ردت زينب تطيح اكبالك
ويطكني ويعوف الحرم لمن يهد جتالك

ترة بنياتك اديهن ترفه
اذا تتجوة ابد ما تشفه
الفجر يمشي الضعن لاوين
اعيش المن بغياب حسين



لو حملو من الفجر لدرب السبي عدوانك
وانت ادرة كلهن يستحن من الزلم نسوانك
شما ننضرب راسك حجه وشامت يطك باللسانك
شكد رادتك زينب تجي يا وسفه خالي مجانك

اليكود الناكة يعثر بيهه
واخيتك تعبت ردت تلفيهه
بقت صوبك تدير العين
اعيش المن بغياب حسين



اخر محطات السبي بنص القصر خلوهن
واسماهن بكل اللسن وادم غرب يحجوهن
المحد عرفهن عد علي بشام الهظم عرفوهن
ومن تحجي زينب بالقصر شفاف الابن ضربوهن

خلص كل حلمي وبقيت بدارة
اواسي بنيتة واتاني اخبارة
خلص حلمج يم البنين
اعيش المن بغياب حسين


خادم خدام زينب صلوات الله وسلامه عليها
حميد كاظم الشمري