السلام على مولانا محمد الجواد صلوات الله وسلامه عليه


عايش عالدموع _ مهيج ابوي احزاني
ايسولف عالضلوع _ واحد يكسر الثاني
مثله رايد موتتي
يحرك الحر جثتي
ايسولف عالضلوع _ واحد يكسر الثاني



والدي جان _ ايهيج الأحزان
يحجي عن الطف قصص وتهيج الجروح
من ازغر انسان _ لأكبر انسان
ياهو يذكر اسمة خله كبالة مذبوح

يالجواد حسين ابونة جسمة مطحون
وعبرت عليه ما تشوفة عمتك ام عون

ما ترحم الخيل _ من تسحك اعله ضامي
ولو جلجل الليل _ تسحك بنحرة الدامي
صعبة تنشف دمعتي
يحرك الحر جثتي
ايسولف عالضلوع _ واحد يكسر الثاني



ميت وكام _ صوب الخيام
من سمع زينب تحشم بالهواشم
تعثرة الارماح _ وعالوجه طاح
تالي آيس صاح عوفوهه الفواطم

صاح عوفو زينب واخذو العمر
ماخذوهه حجايتة وغثهه الشمر

طلعهه العيال _ بنص الزلم ركضهن
وخشنات الحبال _ يم النهر جتفهن
الغربة شافت عمتي
يحرك الحر جثتي
ايسولف عالضلوع _ واحد يكسر الثاني



اليهظم الحال _ سبي العيال
يالجواد اربع دول يفترن النوك
الغربة يحدون _ وصلفة العيون
فرجة صارن يبني من طروهن السوك

انت خدرك عمرة ما شايفتة غربة
وخدر الحسين بقصر يوليدي صعبة

مجلس زلم جان _ مو للحرم كعداتة
ينخن بالإخوان _ الشامت تغث جلماتة
عليهه زيّد جمرتي
يحرك الحر جثتي
ايسولف عالضلوع _ واحد يكسر الثاني



بموتتك راح _ يبني ترتاح
تاخذ من حسين بأجر جم مصيبة
تموت عطشان _ ويابس اللسان
لكن هدومك عليك ومو سليبة

ثلث ليالي تبقة نايم بالشمس
تلوج من سم العدة مو من رفس

ما داستك خيل _ لا راسك ايكطعونة
صبح ومسه وليل _ اهل الردة ايفرونة
لهاي زادت ونتي
يحرك الحر جثتي
ايسولف عالضلوع _ واحد يكسر الثاني



بسطح الديار _ تبقة محتار
وابنك الهادي بعيد بأخر انفاس
بس اجالك _ وشافه حالك
غسلوك وشيعوك وتنحب الناس

بس حبيبك تدري جسمة تارس الكاع
ابنة لمة وضل يدور خنصرة الضاع

ابن اشرف الناس _ بالبارية ايلمونة
الهد حيلة عباس _ وزينب تبجي عيونة
هينة حيل مصيبتي
يحرك الحر جثتي
ايسولف عالضلوع _ واحد يكسر الثاني


خادم خدام زينب صلوات الله وسلامه عليها
حميد كاظم الشمري