إستشارة طبية

اكثر سؤال بالوقت الحالي بخصوص لقاح الحصبه بالمدارس
ابني بيه تحسس قصبات هل يصير القح ؟
ابني عنده لوكيميا الدم هل يصير القح ؟
اكو اساس علمي للقاح الحصبه المختلطه باعمار فوق عمر اللقاح العاديه؟
هل اكتفي بلقاحات الجدول لو ضروري اعزز مناعه طفلي ضد الامراض؟
الجواب هو:
لقاح الحصبه المختلطه هو من نوع اللقاحات الحيه المضعفه
لذلك راح يكون ممنوع فقط على :
1. الاطفال و البالغين اللي عدهم صدمه تحسسيه سابقه لهذا اللقاح او صدمه تحسسيه لماده ال neomycin او جلاتين
مثل ما قريتوا يعني تحسس شديد و دخول مستشفى و كذا مو تحسس بسيط لان 10 بالميه من الاطفال يصير عدهم طفح جلدي بسيط بعد لقاح الحصبه المختلطه
2. الاطفال اللي عدهم نقص مناعه مشخص
مثلا الاطفال اللي عدهم سرطانات دم
او ياخذون ادويه مثبطه للمناعه مثل متلازمه النفروتك
3. اللقاح ممنوع على الحوامل
نجي للسؤال اللي يطرحوه جماعه المجموعه الطبيه
هل للقاح باعمار خارج اللقاح الروتيني اساس علمي ؟
نكول نعم بالمناطق اللي تنتشر بيها الحصبه ممكن إجراء اللقاح مره كل ١٠ سنوات لتعزيز المناعه الشخصيه و المجتمعيه
هل اللقاح ضروري لجماعه حساسيه القصبات؟
طبعا و جدا
و لقاح الانفلونزا بعد ضروري
و لقاح الكورونا بعد
سارعوا للقاح
تره الحصبه مو هينه
و لا تخلي الندم ياكلك مثل مدا اشوف هسه من تجي الام لان ما ملقحه الطفل و يصير بيه حصبه
د. سيف سمير البياتي اخصائي طب الاطفال

السگوة

💥مصطلح متداول لدى العراقيين معروف بالنسبة للامهات والبيبيات

⛔مخيف ومرعب بالنسبة للاطباء

❗ماهو مصطلح السگوة🤔🤔🤔🤔🤔🤔

🔴هو عبارة عن خليط من النباتات تجمع مع بعض وبنسب مختلفة وتغلى وتعطى للطفل الذي يعاني من الاسهال الحاد.

❌الخطورة تكمن في محتويات هذا الشراب الذي اثبت علميا ومعمليا انه يحتوي على.

✔️مادة الرصاص السامة.
✔️يحتوي على نسب عالية من المواد المنومه.
✔️يحتوي على مركبات عشبيه مضادة للمغص.
✔️تحوي على مكونات محظورة للاطفال لايقاف الاسهال.

🌑استخدامها بهذا الشكل لاشكل شراب يجعل الطفل خامل لايتقبل الرضاعة ونتيجة النقص الحاصل بالسوائل والتاثير السلبي للمواد المخدرة ومضادات الاسهال تودي الى فشل كلوي وغيبوبة.

🌑من النادرعبور هذه المرحلة المتقدمة حتى مع الغسل الكلوي.

🌑لهذا تعتبر هذه المأساة كارثة بالمعنى الحقيقي وكابوس للطبيب وكيفية التعامل معاها والخروج باقل الاضرار والحفاظ على سلامة الطفل الذي لاذنب له غير موروث شعبي لايعي خطورة هذا المركب السام والمحرم.

⏺هناك طرق اخرى لعلاج الاسهال عند ممتهنين الطب الشعبي ومسميات كثيرة.
✅البخه وهو طين من نوع معين من مكان محدد محمل بمركبات الكبريت والرصاص تطرح على اليافوخة او طرفي الانف وبنفس الهدف القطاءعلى الاسهال.

✅كذلك اعطاء الطفل بعض المكونات الحيوانية كااكل القنفذ وما الى ذلك.

✅هذه الانواع من العلاجات تشتهر في جو الجهل والفقر وغياب المسؤلية والرقابة.

🌑مع تشجيع من الاهل بسبب الجهل والتجهيل وغياب التوعيه الصحية من مخاطر هكذا مواد سامة على الطفل والمجتمع.

❗نهيب بكم ونحن مقبلون قريبا على موسم الاسهال الامتناع وتوعيه المحيطين من ضرورة مغادرة هذه الافكار المميتة.



د. رضا مضاء الكبيسي
أخصائي طب الاطفال

شنو فوائد قراءه القصص للاطفال ؟
قراءة القصص للطفل تطور لديه السمع و التذكر و تعزز التحدث
فهو او هي من يسمع القصه راح يبدي بتكوين علاقات وارتباطات بين احداث القصة
وتتطور لديه الذاكرة السمعية والاستيعاب السمعي ويصبح الطريق معبداً له نحو اللغه
اي لعد هو او هي راسا ينطلق و يسولف
اضافة للأثر النفسي للقصة على الطفل وخاصة قبل النوم يمكن بالقصة ان نروي ماذا حدث وماذا يمكن ان يحدث ومن الضروري وصف الصور الموجودة بالقصة والمشاعر التي يعبر عنها الاشخاص في القصة
كل ذلك يحفز مخيلة الطفل ويستثير دماغه ويدفعه نحو الفهم والتمحيص والتساؤل وهنا يبحث عن مفردات وجمل للتعبير عما يجول في خاطره ..
تقرولهم قصه ؟
د. سيف سمير البياتي اخصائي طب الاطفال

من يصير عندك طفل لاول مره

حتعرفين انتي شكد قويه

عمرك ماتخيلتي ممكن تتحملين الم الولادة

سواء الطلق الطبيعي

او الم جرح القيصيرية

حتعرفين انك انسان عنده طاقة صبر جباره

وانك مصدر لتغذيه انسان ثاني لاحول ولاقوه

التغذيه هايه مو فقط بالمعنى الحرفي كالرضاعه

وانما ايضا تغذيه روحيه بالحب والاحتواء

حتعرفين انك تكدرين تسوين هوايه اشياء عمرك ماتصورتي انك ممكن تسويها

حتشوفين نفسك تعتنين بطفل، وتسوين اكل، وتنظفين، وترتبين ، وتخططين ، وتقرين

وتحضنين

وتطبطبين

وتواسين

وتفكرين لامور بالبعيد

وتباعين للامور بغير منظار

حتصير عندك قوى خارقه

مثلا

استخدام الاقدام لسد الابواب

استخدام اصابع اليد ال5 لحمل الاكواب

اصدار اصوات الوشه لتهدئه الطفل لساعات

كتم رغبتك بالبكاء والصراخ

تتحملين الم انتزاع خصله شعر من رأسك

تسوين كل مهامك حتى وانتي مريضه

تسهرين بشكل يومي ومتواصل وتبقين على مستوى عالي من العطاء

القدره على الاحساس بالخطر قبل وقوعه

الاحساس بحاجات الطفل حتى وانتي نايمه

القدره على استخدام ايد وحده بهواي مهمات خصوصا قبل ما تكتشفين شياله الاطفال

من يكون عندك طفل تحسين كل لحضه هي مهمه وكل ثانيه هي وقت مهم

ايامك ماتكون فارغه

ابدا

ايامك حتكون ممتلئه جدا جدا حد الاختناق 😂

ماحتكون عندك رفاهيه انك تشكين من الفراغ 🤪

من يكون عندك طفل مجرد تباوعين عليه وهو نائم وصحته زينه ومرتاح انتي ترتاحين

من يكون شبعان انتي تشبعين

حتترفعين عن الانانيه

حتكونين شخص بمرتبه عاليه

وبالحقيقه هواي بعد كلام

لكن اذكر واكول

ما يمكن تحصلين هاي الامور اذا ماتنازلتي عن ماسبق

لان الدنيا اخذ وعطاء

ماكو واحد ياخذ كلشي بنفس الوقت

ننطي من صحتنا وعمرنا ووقتنا

حتى الله يوفقنا مع اطفالنا

من يكون عندك طفل

حتكونين ام

ومو كل وحده ولدت

هي

ام ♥️

الله يرزق كل محروم بما يتمنى 💕

د.اسماء البدري

و ولدتي طفلك
و صرت انت و طفلك وحدكم
و غيرتي ملابسه و خليتيه بفراشه نايم و صافنه على ضحكته و هناك كلتي ويه نفسك ( هاي اني شسويت!!!!)
معقولة اني ادبرها!
معقولة اني صرت ام و راح اسوي المطلوب مني !
صدك راح ادبرها و ادبر الامومه !
هذا الصوت موجود برأس كل أم جديده
برأس كل أم حريصه و ناويه تتم المهمه
هذا الصوت اسمه الشعور بالذنب
و حتى تتجاوزيه هذه النقاط لك :
❤ تاكدي انه انت ما تسوين اي شي خطا !
هذا يستدعي الكثير من المعرفه و الاهتمام
حاولت بكل جهدي و خلال 6 سنوات اعرفكم بكل شي صح و انه تبعدين كل البعد عن إيذاء طفلك
لا تلومين نفسك لان غسلتي لطفلك مثلا و تمرض لان عمر المرض ما يجي من النظافه
و لا تلومين نفسك لان ما خفضتي الحراره
انت الافضل دامك تسعين للافضل بس سوي كلشي صح
و الا اكيد لومي نفسك لو صدكتي مثلا انه الثوم يعالج ابو صفار !!!
او مثلا لو انطيتي دبس لطفلك و هو بعده عمره ايام و سديتي معدته
او اعطيتي سكوه و صار عند طفلك عجز كلوي
او ظليتي مستمره على النستاكورت اكثر من 5 ايام
و غيرها من التصرفات اللي كتبت عنها بوستات طويله
❤ دائما خلي خطه مضاده للشعور بالذنب
مثلا تنقهرين لان ترحين لدوامك
بالمقابل انت كرري ويه نفسك انه الدوام مثلا هو لأجل طفلك
و انه الشهاده اللي راح تاخذيها مثلا هي لزياده مستواك العلمي
و انه اي خطوه ممكن تشعرين بالذنب بعدها هي لأجلك اولا و لتحقيق هدف اخر
❤ ابتعدي عن من يحسسك بالذنب
اكيد عرفتوا منو؟ 😉
من تبدي المعزوفه انه كله بسببك اطلعي من الغرفه و لا تناقشين ابدا
هذا يعادل اقوى رد في العالم
❤ من تحسين بالحيره و انه هل هذا التصرف صح او خطأ فكري بالواجهه الاخرى من الموضوع !
يعني شون
يعني لو اني ما مسويه شنو كان صار ؟
لو اني ما اداوم شون ادبر المصاريف
لو اني ما اخذ الشهاده الفلانيه شراح يصير ؟
❤ اخذي وقت مستقطع مع طفلك يوميا
اخذي راحه و اطلعي ويه طفلك
تنفسي بعمق
و اكلوا بمكان هاديء
و غيري جو
صعبه؟
مجرد ارتاحي و اخذي قيلوله راح تتغير حساباتك بعدها
❤ تذكري دائما
كلنا عدنا تحديات
انت
و زوجك
و بايدن
و مسي
و اللي دا يكتب هذه الأسطر
كلنا عدنا تحديات
و لازم نخطا في مكان ما
بس هنا لازم نفكر جيدا انه اذا ما مستعده للتحديات ماكو داعي نزيد التحدي تحدي
و اذا كانت امورك صعبه و طفلك صعب ماكو داعي نزيد الصعوبه و نجيب طفل رقم 2 او 3 او 4
نمشي بهدوء و نقرر جيدا و ما نزيد التحديات علينا و على أنفسنا
❤ و شنو يعني اذا اخطئتي؟
لا تظلين تلومين نفسك
اي بالشهر مره او اثنين اطلبي دلفري
و اي صح العياط على الاطفال خطا بس احيانا تعيطين
انت مو من واجبك تتابعين الطفل ٢٤ ساعه باليوم فأنت مسؤوله بقدر والد الطفل عن مراقبه طفلك
❤ هذا لن يدوم للأبد
احساسك بالضياع و الذنب لن يدوم
الاطفال يتغيرون
و طفلك سيتغير
خففي من تحميل نفسك كل هذا
فأنت بالاخير الام
د. سيف سمير البياتي اخصائي طب الاطفال

انوب!! شبيها الحجلة 🙄

يولد الانسان بدماغ مكون من نصفي كره، نصف الدماغ الايمن، والنصف الايسر🧠

يتحكم كل نصف منهم ، بنصف الجسد المعاكس💫

يعني نصف الدماغ الايمن، يتحكم بحركات اليد اليسار، والقدم اليسار, والعين اليسار ⬅️

ونصف الدماغ الايسر، يتحكم بحركات اليد اليمين والقدم اليمين والعين اليمين ➡️

وعندما يحرك يده اليمين يحركها بسيطره (هيمنة) نصف الدماغ الايسر، ويعمل كل جزء بشكل منفرد

الى ان تحين مرحلة الحبو والزحف

يبدا فصي الدماغ بالعمل معا 😍

فلو لاحضنا حركه الطفل عند الزحف او الحبو، فانه يعاكس حركاته

يقدم اليد اليمن، مع الركبه اليسار

وهذا التناغم الجميل والمتناسق يكون بعد مرات ومرات ومرااااات عديده من الفشل والانبطاح ، والارتطام والمحاولات

ومنها عودته الى الخلف وغيرها من المحاولات التي لاتؤدي الى الحركه المتناسقة

واخيرا فانه ينجح في تكوين وصلات عصبية في دماغة تربط النصفين معا (نصفي الدماغ) 🤩

وعندما يحدث هذا الترابط،

فان عيني الطفل تبدا كذلك بتجميع الصور ، الصوره القادمه من العين اليمن، والصورة القادمه من العين اليسار ، تتجمع في مكان واحد

هذا التجمع وتمركز الصوره يحدث بالتزامن مع حركات الزحف والحبو

كلما ذكرنا لان الدماغ يبدا بالعمل معا فيجمع الصورتين لتصبح صوره واحده مركزيه (حقيقة الابعاد) 👍🙃

بدلا من صور متعدده وهميه الابعاد 👎

السؤال الان

⁉️هل من الممكن ان يتجاوز الطفل مرحلة الزحف والحبو ؟

⭕فعليا ممكن ، ويوجد الكثير من الاطفال يمشون دون المرور بالحبو والزحف

لكن السئ بالموضوع ان الطفل لم ينمو بشكل صحيح وسيعاني من مشاكل لاحقا ، لانه لم يطور التناسق بين نصفي الدماغ

⁉️ماهي هذه المشاكل؟

⭕كثيره، ولو امكن تجميعها ساذكر التالي

🔺1.عدم قدرته على الركض لمسافات طويلة بشكل متناسق (يعني ميكدر يركض عدل وكلساع يوكع )

🔺2.صعوبه تحديد اماكن الاشياء ( وهذا نراه في ان يفشل في ادخال القصبة في علبه الحليب او العصير ، لانه لايستطيع تكوين صوره مركزيه ويرى صور مختلفة متحركه بابعاد وهميه ويبقى يتخبط في محاولة الامساك بها)

🔺3.صعوبه القراءة لنفس السبب

🔺4.عسر الكتابه، ولنفس السبب لانه لايرى السطر بشكل جيد ولايرى موقع القلم بشكل جيد، وكذلك مشاكل الكتابة المعكوسة

⁉️الوقاية؟

⭕بمجرد ولادة طفلك لاتفكر ان تحرمه من الزحف والحبو عندما يكون مستعد، وشجعة على ذلك بان تضعه على بطنه عده مرات باليوم

⁉️العلاج؟

⭕استدرك الموضوع ، اذا كان كبيرا او صغيرا

عادي خلي يرجع يزحف والعب وياه لعبه الحيوانات مثلا هسه نلعب مثل بزونه هسه مثل الحصان ... الخ

⁉️النصيحة؟

⭕لاتشتري حجلة ولا تنصح بيها وخلي الطفل ينمو بشكل طبيعي مثل ما رب العالمين خلقة ، رب العالمين خلق الانسان باحسن تقويم ، والزحف والحبو مرحلة مهمة، مو مرحلة "وساخة" وخلي بالحجلة حته نخلص ... هذا تدريب محتاجه حته ينمو عقلة وتنمو قدراته

⁉️زين ما اكدر الا حجلة لان عمتي/امي/ابوه/ العشيرة/ بيت الجيران يزعلون؟

⭕قللي ثم قللي ثم قللي ،

لان الضرر اكثر من النفع ولازم تخلي يعوض, يعني اذا خليتي بالحجلة الصبح، هاهيه شيليها باقي النهار خل يزحف ويعوض

⁉️الحجلة تساعد على المشي؟

⭕لا ابدا ولا تساعد ولايمها على العكس تماما فانها تاخر قدره الطفل على المشي شهرا كاملا

⁉️زين لعد مو بيت جيراني 24 ساعه بالحجلة ومشت هي عمرها 9 اشهر؟

⭕لو مخلتها بالحجلة جان مشت بعمر 8 اشهر

والعبرة مو منو يمشي اسرع، هو مو سباق العبره ان الطفل ياخذ كل فتره عمريه حقها،

شنو فائده مشى هسه ،

لكن طول عمره محيكدر يركض عدل؟ 🤔

وطول عمره عيونه مشتته؟ 🤔

الصوره بالاسفل توضح الحبو وكيف يعمل الدماغ بتناسق

ملاحظه: كل طفل وقابليتة اكو يحبو مده طويلة واكو قليلة المهم يحبو ويوصل مرحلة حبو متناسق بحيث يتحرك برشاقة واريحية مو كلساع مكلوب ومبطوح ولاطخ راسه ، من يوصل مرحلة الحبو برشاقه وتناسق يعني اتقن التمرين.

#النمو

#مرحلة_الحبو_والزحف

د.اسماء البدري

شنو السبب للجرائم والاعتدائات والعنف الي يصير برمضان؟

او يكول ها صار عصبي لان جوعان؟

نشوف الموضوع علميا

وناخذ جولة داخل الدماغ

#الدماغ

يولد الانسان ويكون عنده الدماغ الاولي هو المهمين (فعال منذ الولادة)

الي خل نكول نمثلة

🔴باللون الاحمر

الي هو رد فعل فطري غريزي للحصول على الحاجات الاساسية من امان

وغذاء

وراحه جسدية،



🟡ثم يتطور الدماغ المتوسط وخل نكول عليه لونه اصفر ، والي هو ردود فعل عن المحيط والبيئه ومتمثل بالهروب والدفاع

🟢ثم الدماغ المتقدم الي خل نمثلة باللون الاخضر، هذا هو الي يقدم حلول منطقية ويخلي الانسان يفكر ويستنتج ويحاول يسيطر على مجريات حياته

اذا لم تتم تلبية حاجة الجزء الاحمر🔴

❌ مستحيل يكدر يفعل الاخضر

يعني اذا هو جوعان وخايف صعب يفكر بحلول منطقية، وكل الي يسوي هو ان يطالب بالغذاء و الامان

واذا اكو شخص ديهدده او اسد واكف كبالة،

❌ ايضا صعب جدا يفكر بحلول منطقية ويشغل الجزء الاخضر ، وحيكون الجزء الاصفر 🟡هو المسيطر وكل الي يسوي هو الهجوم او الدفاع..

وعليه ابدا وابدا لايمكن التحدث مع الطفل بمنطقية والجزء المسيطر من دماغة هو الاحمر او الاصفر

لو تعيد بدل المرة زليار، محيسمع كلامك اصلا

لبي حاجته اولا، واطفأ اشعار الجزء الاحمر/الاصفر🔴🟡

ثم تحدث مع الطفل بمنطقية

وهذا طبعا ايضا يدخل بي العمر

كلما كان اصغر كلما كان الجزء الاحمر/الاصفر هو المهيمن والاخضر ضعيف وغير مسيطر

◀️مثال/ طفل يعاني من قلق انفصال بعمر 9 شهور

وديحس بتهديد الفراق

لو تكابلة منا لباجر وانت تشرح انه عادي ماما تروح وترجع ، محتطلع بنتيجه، لان الجزء للاخضر هو غير فعال بشكل جيد

🔸وعليه تقبل انه رح يرفض ويصرخ بكل مره من تغادر👍،

بمرور الوقت حيبدي يقل بناءا على (مرور زمن)، وبناءا على الخبرات الي خلت الجزء الاخضر يبدا بالنمو

والخبرات هي نفسها (التعليم) / التجارب

◀️مثال/ طفل بعمر 3 سنوات جريته من ايده بقوة وكلته يلا امشي وانت معصب ومخنزر، وارد جدا ينمطل بالكاع ويبدي يرفض ويتشنج لان انت شكلت تهديد عليه وفعلت الجزء الاصفر وعليه يبدي يتهرب او يدافع

🔸الحل/ لاتحسسه انت عامل مهدد، جرب ان تكون صديق اكثر، بان تكول له يلا حبيبي خل نروح غير مكان، تعال وياي اريد تساعدني

وغيرها من العبارات الوديه حتى دماغة الاصفر لايشتغل ويدخلنا بنوبه غضب

🟢كلما كان الجزء الاخضر من الدماغ قوي، كلما كان الانسان اكثر رزانه وحكمه

وهذا الشي نلاحظه عند الشخص الحكيم الي يتميز بالوقار

وحتى لو عانى من استفزاز او تهديد نشوفه يبقى مسيطر على دماغة ومايسمح للجزء الاصفر ان يتفعل

بالعكس يبقى محافظ على هدوءة وتوازنه

وبعضهم حتى في حال الجوع يبقى مسيطر ويبقى دماغة مستقر وميفعل الجزء الاحمر

🔶هذا الشي هو من لب التربية الدينية

لو نظرنا الها بعمق وشاهدنا التدريبات اليوميه والشهرية والسنوية،

مثال على ذلك الصيام

هو تحدي الجوع ، وتدريب رائع على ان يكون الانسان على مستوى من الهدوء رغم هو جائع

والي يشتم ويغلط ويجاوز راح عنه الصيام، لان هي الفكره مو بسطحيه مجرد متاكل!!

هو تدريب عميق حتى تكون حكيم ورزن وتطفئ الجزء الاحمر🔴❌

🔶مثال اخر ، في غزوة الخندق عندما كان الجوع شديد، النبي صلى الله عليه وسلم شد حجر على بطنه واكمل حفر النفق!

مثال رائع في التحكم بالعقل والجسد وتفعيل العقل الاخضر🟢 والاخذ بزمام الامور

⭕نرجع لواقعنا ونحجي عن الاشخاص الي نكول عليهم ( مزعطه)

والي همه متهيجين ومنفعلين وميعرفون يسيطرون على نفسهم ، واي شخص قادر على استفزازهم

هذولي همه الي بعدهم بالعقل الطفولي وماكدروا يطورون قدرات التحكم بالدماغ ،

يعني بالمختصر

الانسان مايكبر عقله مجرد بمرور الايام والسنوات

العقل يكبر من يسيطر عليه ويدربه ويكبت شهواته

قريت بالتعليقات يكول اي هو الصيام السبب

لا عزيزي الصيام مو السبب

الانسان المنفلت هو السبب

الي ماحصل تربيه وماعرف يلجم نفسه وكبر وهو على هذا المنوال يبقى بعقل طفولي مستفز مستفر مجرد جاع شويه صار طفل يصيح ويهوس ويعتدي وحتى يرتكب جرائم

الصيام مو بس مناكل ونشرب

الصيام تربية ♥️

د.اسماء البدري

اليوم مصطلح جديد
حابب اعرفكم عليه
#lovey
اللي هو اللعبه او الشغله اللي تخلي الطفل ينام
ممكن تكون حتى ملهيه او اصبعه
ممكن تكون بطانيه او لعابه
ال lovey هي اللعابه الصغيره اللي تساعد على النوم
اكيد ما تفيد بعمر الشهر و اقل
بس من الممكن ادخالها بعمر ٣ اشهر او ٤ اشهر
قسم من الاطباء يفضلون تدخل بعمر ٩ اشهر إلى سنه على حسب توصيات الأكاديميه الامريكيه لطب الأطفال اللي تنصح انه فراش الطفل يكون خالي من اي شي لا بطانيه و لا مخده و لا اي شي
المهم نرجع لل LOVEY
شروطه انه يكون ناعم مو صلب
ما ياذي الطفل
يختفي نهارا و يظهر ليلا
حتى ينربط دائما بالنوم
يعني من يشوف اللعابه مالته يعرف انه هذا وقت النوم
.
.
شون تعرفين طفلك على ال lovey ؟
اذا ترضعين طبيعي خليه بين الطفل و بين صدرك من يرضع برضعات الليل حتى يصير بيه عطرك
و اذا صناعي فخلي موجود بسريره و يوم بعد يوم قربيه على طفلك
.
.
شنو فوائد ال lovey ؟
تساعد الطفل على النوم
و حتى ترجع نومه اذا من يكعد باليل و يلكاه بصفه
و يعلمه على النوم وحده
فائده وحده اللخ
انه تكدرين تودين ال Lovey هديه بمكان الحجله لان الحجله ممنوعه
.
.
عادي راح اقرا تعليقات
هذا ما يفيد لجهالنا !!
لا عيني يفيد و نتائجه رهيبه
انت خليك بالإحباط اللي انت بيه
شكرا الكم
د. سيف سمير البياتي
اخصائي طب الأطفال

رفض الاعتراف بالخطأ

والشخصية المستفزه الي تشوف كل الناس غلط بس هو الصح .. 😌

هذا شلون صار ؟؟ 🤔

خل نشوف ...

طفل عمره سنه ونص ديركض وعثر بالطبله ..

وكع وكام يبجي .. 😭

جتي امه/أبوة/أخته/اخوه/ ايا كان الشخص..

👦ها حبيبي شبيك؟

👶واواا

👦 وين؟

⁦◀️⁩اشر على رجله وأشر على الطبله

الشخص البالغ:

👦طا طا طا طبله متشوفين !! شلون تعورين حبيبي !

بهذا الموقف الطفل راسا حيسكت ويصفن واحتمال يضحك .. مستغرب من هذا التفكير ! واثار انتباهه بشده .. ليش؟ لان مو طبيعي 😅

الطبله شعليها؟! هو الي منتبه لوجودها !! 🙄

⏪زين نكمل ..

كبر الطفل ودخل مدرسه 🏫

واجى يبجي فيي يوم من الايام.. 😭

👩ليش حبيبي منو بچاك؟😲

👦المعلمه...

👩ليش؟ 😡

⁦◀️⁩طلع ورقه امتحانه راسب لان الجواب مالته غلط

⏪كومي يا ام ياحبابه يا مربيه الأجيال ركضي على المدرسه 🏫

واخذي الطفل وياج..

وطلعي لسان طوله متر ونص..

وكولي شلون معلمه ترسب ابني ..🤬

اصلا اني ابني محد يلحكه بذكاءة ونباهته😌

والصوج كله بالمعلمة هي اصلا متعرف تدرس ولا توصل الفكره للطلاب !! 😡

وبحضور الطفل...😑

هاي المواقف الصغيره والتفاصيل الدقيقة .. هي الي حتخلق هذا الشخص ..

الي مستحيل يعترف بغلطه.. 😏

يذب اللوم والصوج على كلشششششششي.. الا نفسه!

مستعد يطلع بكلشي عيب..

بالهوه 🍃

بالمي🌊

بالشارع 🛣️

بالمنطقه ..🏬

بزوجته أبناءه ومدير الشغل ⁦👩‍👧‍👦⁩⁦🕴️⁩

وحتى عامل النظافة..



لكن ميطلع العيب الي بي !

واكيد مثل ما متعودين منعرض فقط مشاكل ..

نريد حلول ..

نرجع لاول مثال💫

⏪تعور بالطبله تبوسي وتحضني وتبوسين مكان الالم وتكليله اسم الله عليك حبيبي تعورت هسه تصير زين أن شاء الله .. وانتبه مره ثانيه لاتعثر بالطبله حتى لاتتعور... 👍

⏪رسب بالمدرسه كعدي وياه شوفي ليش مديفتهم .. ممكن هو فعلا مقره زين أو اصلا مديداوم ويحضر الدروس🤷

وومكن فعلا المعلمة مدتشرح زين ..

بس هذا لايعني أنه نذب صوج عليها.. ونكعد بس ننتقد! 😑

مشرحت زين نروح على غيرها أو نطلب المساعده أو اي حل ثاني .. 👍

من اكو غلط

اول مكان نصلح بي الغلط هو نفسنا .. 👤

تفكيرنا.. 🧠

وراها نصلح المحيط

"ان الله لا يغير ما بقوم حتى يغيروا ما بأنفسهم "

صدق الله العظيم

وهكذا ..

لاتكبرين رأسه وهو الغلطان ... ❌

الغلط نعترف بي ونصلحه .. 👍

حتى يصير شخص متصالح وسعيد ويكدر يرفع من مستواه بكل مره ...🥰

مو يبقى يذب الصوج على كلشي وهو منزه! 🙄

ماكوو بشر مايغلط ..

#ا#تربية_الاطفال
وجلّ من لايخطأ ..

مودتي 🌷

د.اسماء البدري

مشاعر الامومه الاولى ، هي وقود الفطره, التي ستقود الام خلال رحلتها الطويله ..

اول قاتل لتلك المشاعر،

هي عباره (عوفي يبچي) لطفل حديث ولادة!!

فعل اناني مستفز ، يدل على كميه القسوه وانعدام الرحمة

قد يظن البعض أنه لا بأس بذلك ،

ويقول :

هسه شدعوه شصار واذا معافته قابل حيموت!

لكن الحقيقه هي ليست (بالموت والحياة)

وانما

بطريقه تدريب الام على انتزاع المشاعر الطبيعيه، واستبدالها بكميه لا مبالاة ,

طريقه قتل الرحمه في قلب الام واستبدالها ب (لا تعودي)

طريقه تحويل العلاقه بين الام والطفل من محبه ورحمه إلى (واجب يجب انهاءه بسرعه)

امهات لايملكن في قلبهن ذره عطف،

اشاهد بام عيني ، ام تنظر إلى أطفالها نظره (شوكت اخلص)

كل هذا بسبب العادات المتوارثة،وطريقه وئد الفطرة

شاهدت طفلا بعمر 9 سنوات تقريبا.. يقتل حيوان صغير، بكميه لا مبالاة تقشعر منها الابدان ... ! 😔

كمية العنف التي يحملها وهو لايزال طفل!! لاتوصف

ولاندري ماذا سيتحول عندما يكبر ...!

ارجوكم ... حافظوا على الفطرة ..

الأم حب وعطاء وحنان

مو (عوفي لايتعود)

مو (حتى تلحكين على الشغل)

مو (لا تشيلي)

مو (عوفي يبجي)

🌷حبك لطفلك ومشاعرك لطفلك ... لن تتواجد بمجرد ولادتك،

🌷حبك لطفلك هو علاقه تبدأ من اول يوم عندما تحاولين جاهده أن تفهمي ماذا يريد منك

🌷حبك لطفلك هو عندما تركضي باقصى سرعة عند سماعه يبكي، رغم علمك تماما أنه في مكان آمن ..

🌷حبك لطفلك هو دليلك في رحله الامومة

🛑🛑لاتتخلي عن مشاعرك ابد ابدا ابدا ..🛑🛑

وعندما تشعرين بالتعب أو بالارهاق.. اطلبي المساعده فوراً

ليس من الامومه ابدا أن تضغطي على نفسك.. ❌

ليس من الامومه أن تنهاري في منتصف الطريق..❌

الامومه هو أن تقدري نفسك وطاقتك ، وتستعيني بالمساعده، كله في سبيل أن تحافظي على طفل صحي، سليم، سعيد.. معافى ⁦❤️⁩

ولكل شخص يعيش مع ام لديها طفل صغير، كل مساعده تقدمها هي دليل إنسانية ورحمه ...

ارحموا من في الأرض يرحمكم من في السماء.. ⁦❤️⁩

#الام

#عيد_الام

د.اسماء البدري

شلون امنع نفسي ان اضرب الطفل؟

حجينا بالجزء السابق شلون نطبق النصيحة الاولى الى تبعدنا عن الغضب،

وملخصها:

1️⃣⁩افهم طفلك

2️⃣ركز جهدك الاول على تربية واستيعاب الطفل

3️⃣ولنفسك عليك حق، اخذ وقت ترتاح بي وتصفي مخك

4️⃣نظم وقتك وجدول اعمالك.. ولاتخليها تتراكم

هاي النقاط طبعا لازم الاسره كلها تفهمها (الاب والام وكل شخص يعيش معكم بالمنزل)

اليوم نتكلم ، عن فقدت اعصابي ووصلت حدي.. شلون امنع نفسي من أن أضرب الطفل؟

🌼🌼النصيحة الاولى🌼🌼

📍قال رسول الله صلى الله عليه وسلم:"إذا غضب أحدكم و هو قائم فليجلس؛ فإن ذهب عنه الغضب و إلا فليضطجع"

معنى الحديث هو تغيير وضعيه الجسد،

(اذا واقف اجلس، اذا جالس اضطجع أو قم وقف، اذا كنت تمشي، هرول .. اذا كنت تهرول امشي،،)

يعني تشتيت التركيز عن الموقف الي أدى إلى الغضب..

⁦◀️⁩مثال: جنتي تنظفين المطبخ ودك التلفون ورحتي عليه، رجعتي شفتي الطفل فاتح الدولاب وموكع علبه الحليب على الأرض وفوكاها ناثر جاي وصايره خلطبيطه 😂

اغلب الأمهات تفقد اعصابها واحتمال جدا كبير تضرب الطفل بهذا الموقف..

وهذا للأسف من قصر فهمها لطبيعة الطفل.. وبرمجه مسبقة سلبيه أنه اهم شي البيت نظيف!

المهم شفتي هيج راسا اطلعي من المطبخ ولاتحجين ولا حرف ...🤫

اتنفسي بعمق، وتعوذي من الشيطان الرجيم

يعني كولي (اعوذ بالله من الشيطان)

📍قال تعالى سبحانه : "وإِمَّا يَنزَغَنَّكَ مِنَ الشَّيْطَانِ نَزْغٌ فَاسْتَعِذْ بِاللَّهِ "

ومن تحسين هدئتي واصبحتي قادره على اداره الموقف ارجعي على الطفل...

وطبعا على حسب عمره حيكون التصرف ... والتعليم ..

🌼إذن ملخص النصيحة الاولى🌼

⭕انسحب (غير وضع الجسد) ثم

⭕اصمت ثم

⭕استعذ من الشيطان الرجيم ثم

⭕تنفس بعمق

⭕واجعل نفسك المسؤول الأول والملام الاول. (لان هي هاي الحقيقة)

⭕ثم عالج الموقف

هاي في حال تصرف الطفل لايؤدي إلى ضرر مباشر على صحه الطفل ..

نكمل في الجزء القادم مع نصائح أخرى ... لتسكين الغضب

مع مودتي 🌷

د.اسماء اسماعيل البدري

و مثل كل سنة
يبدي رمضان
و تبدي حالات التسمم بالرز البايت
لان اهلنا يبدون يسوون الرز بالفطور
و بما انه الطفل ما يصوم ثاني يوم
فيحمون الرز اللي تقدم بالفطور و انترك اكثر من ساعتين قبل الخزن بالثلاجه و يقدموه اله كوجبة غداء
.
متلازمة الرز المقلي
Fried rice syndrome
تكدرون تبحثون عنه بكوكل
هو الرز اللي ينترك بعد تحضيره بره الثلاجه ساعتين و اكثر
هذا الترك راح يخلي نوع من البكتريا تتكاثر بيه
المشكله انه اعاده تسخينه ما راح تقتل هذه البكتريا
و الحل ؟
اما تحضير رز طازج و تناوله خلال ساعتين بعد تحضيرة
او تبريده راسا بعد تحضيره ثم خزنه بحافظات خاصه مو بنفس القدر اللي تم تحضير الاكل بيه و عادي احميه ثاني يوم
د. سيف سمير البياتي
اخصائي طب الأطفال

رمضان كريم عليكم

شايفين السرك؟

يجي اسد لو نمر لو دولفين ... يسوي حركات معينه ... وباتقان ...

هاي الحركات هل رب العالمين خلقها بالاسد؟ أو النمر؟؟ أو الدولفين؟؟

طبعا لا

ماكو اسد بالدنيا لحاله يمشي على حبل لو يكمز من دائرة لدائرة ...

ولا اكو دولفين بالدنيا يجي لحاله يلعب بالطوبه وي الجهال!!

لعد هذولي شلون صاروا؟؟ 🙄

صاروا من خلال الترويض..

شنو الترويض؟

الترويض هي عمليه إجبار كائن معين على سلك سلوك معين... في فتره زمنيه معينه.. مع استخدام طريقه العقاب والثواب ...

يعني يجي الدولفين ويحطون كدامه الطوبه..⚾ ويحطوها على مقدمه وجهه.. من يرفض أو ينهزم ... ينضرب ..

ويقيد بقوه ... ويمنع من الطعام .. وغيرها من وسائل الترويض..

ومن يحطها على وجهه ... يتم تشجيعه واعطاءه الطعام مباشره ...

وتكررررر مره ومرتين وعشرين

إلى أن يستنتج الدولفين🐬 أنه في سبيل ابقى على قيد الحياة واحصل اكل وما انضرب ، ولا انجلد.. لازم احط الطوبه على وجهي ..

ويتروض !

وتجي الناس للسرك فرحانه بمنظر دولفين يفر طوبه على وجهه وتدفع فلوس حتى تشوف هذا المنظر ... ليش؟؟

لان منظر مو طبيعي! منشوف هذا المنظر بكل مكان !

هذا مشهد شاذ عن الطبيعيه .... ❌

هذا الحجي هسه شنو رباطه برمضان؟🤔

رباطه شفت بكروب وحده فرحانه بزينه رمضان وحاطه ميز بي مالذ وطاب من مجسمات واكل وتحفيات..

والتعليقات من باب المزاح يكلولها هاي شلون باقي على حاله شو جهالنا ميخلون شي بحاله .. 😅

فكان الجواب هو (اخلي بنتي بالحجلة واراقبها وكلما تتقرب وتمد ايدها اضربها علي ايدهاواعيد مره ومرتين وعشره الى ان بعد متتقرب)

هسه احنا شعلينا بيها هي حره بجهالها ..

اي صح هي حره وكل واحد حيحصل نتيجه تربته

السبب الي خلاني اكتب هذا البوست هو كميه المينشنات والرغبه العارمه الي تولدت عند الأمهات بأنه يتبعون نفس هاي الطريقه الانانيه الترويضيه ... ! 😨

طفلج مو حيوان وتروضي!! 😕

طفلج انسان عنده ذكاء عالي وحب استكشاف..

استكشافه يبدي من المحيط ثم يتوسع..

اذا محيطه مستكشفه ... شلون حيستكشف الحياه؟

شلون حيتعلم ابسط المهارات؟

انتي بهذا التصرف قضيتي على أهم رغبه عند الانسان الي هي منها برزت النا كل العلوم..

من فيزياء وفلك وجغرافيا ...

رغبه الاستكشاف والفضول ...

رغبه هذا شنو ومنو شنو متكون..

هذا شنو وشلون صار..

هذا شنو وشلون يشتغل ...

مبروك عليج بيتج الملئ بالتحفيات..

ومبروك عليج طفل بعمر الزحف بس ميمد ايده على كلشي!!!!!!!

"مثل الدولفين الي يفر على وجهه طوبه"

الطفل بهذا العمر مو طبيعي يتصرف هيج..!

ملاحظة: هسه تجي وحده تكول لعد شلون؟

الشلون مادام تزوجتي وخلفتي خليج كد المسؤولية.. مسؤليتج تربين طفلج سليم عقليا وجسديا.. ومن ضمن هاي المسؤوليه تتنازلين عن هواي أمور.. وهاي ابسطهن.. ولتخافين من حيشبع طفلج فضوله (بعمر ٥ سنوات تقريبا) محيضل عنده فضول ل التحفيات

امهات انتبهوا ولاتركضين وره كل نصيحه تسمعيها ...

والي كلش هيج تحب زينه رمضان وعدها طفل يزحف.. خليها مكان عالي

ورمضان كريم علينا وعليكم 🌛

د.اسماء البدري

لتتصورون مثل المسلسلات 😅😅

الرضاعة الطبيعية عملية معقدة لتتصورون مثل المسلسلات حيجي الطفل تحطوه عالثدي راسا يتعلم والحياة سعيدة وهاهية🙃

يحتاج انتوا تتعلمون والطفل يتعلم👍🏻

لانه الطفل من يجي ميعرف يلتقم لحد مايتعلم راح تتعبون شوية
مثل سياقة السيارة اول شي صعبة وراها تصير عملية تلقائية متفكرون بيها
اضافة الى انه الثدي نفسه مثل المكينة واكفة صارلها سنين فيحتاجلها تدريب
فضروري البنات الحوامل قبل الولادة ترطبون الثدي والحلمة

❤️❤️❤️❤️

نقطة ثانية الرضاعة من الممة عملية اقرب للمص
الرضاعة من الثدي عملية اقرب للمضغ
فاذا الطفل اول ما جا للدنيا وبعده مامضبط المضغ واجي انطيه ممة راح يتخيل انه هاي هي الحركة الوحيدة اللي يكدر يسويها بحلكه
فلما يجي البريست راح يمص مراح يمضغ وبالتالي ندخل بارتباك الحلمة
🚙🚙🚙

سامعين بالساعة الذهبية ؟
اول ما ينولد الطفل باول ساعة يكدر مباشرة يرضع من الثدي ويكون يعرف كلش زين وراها ينسى فلاحظوا انه استغلال هاي الساعة ضروري كللش حت يخزن عملية الرضاعة فلا تستهينون بيها

🌸🌸🌸

الرضاعة عملية يتدخل بيها الدماغ ، الثدي يرسل ايعازات للدماغ زود الحليب فيزود الحليب
فكلما الطفل مص اكثر حت لو ميطلع حليب كلما الدماغ استلم ايعاز وزود الحليب
💓💓💓💓

اللي يصير انه بطفرة النمو الطفل يبدي يرضع هواية هواية وهاي فطرته حت يزود حليب الام لانه هو ديكبر فيريد كمية الحليب تزيد
فلما يمر الطفل بطفرة النمو خليه يرضع لحد ما الحليب يزيد بس اللي ديصير انه تحسين انه هذا مدايشبع فتدخلين ممة فتنلاص الوضعية ،
فانتظري واصبري خلي الثدي وجسم الطفل هم يتفاهمون اكو علاقة بينهم انتي طلعي نفسج وطلعي امج وعمتج همين 🤣🤣🤣

🌹🌹🌹🌹

هسة الدنيا رمضان ، بنوتات اذا حليبكم ماكفى افطروا بس لتدخلون صناعي علمود تصومين لانه انتي تعرفين الفرق بيناتها ، يعني اذا الام تحب تدخل الصناعي لاي سبب اوك بس مو علمود اصوم ادخل الصناعي ترة حرامات
🌴🌴🌴

يعني بنات الصيام حت نتقرب الى الله فاذا انتي دتتقربين الى الله بشي يقلل الفوائد للطفل فبلاها

ورمضان كريم علينا وعليكم
منقول من د.جمانا عدنان

⁦☑️⁩تجنبي الاكل العالي بالدهون والسكريات مثل الوجبات السريعه🍟🍔 والحلويات🍧🍩 لأنها تزيد العطش ولا تمدك باحتياجاتك من العناصر الغذائية الهامة.

⁦☑️⁩اهتمي في تغذيتك وفي وجبة السحور🌙 بإنها تحتوي على كربوهيدرات مثل الرز والمكرونة وبقوليات 🍚، ولاتنسي الفواكه والخضار 🥕🍒 ، والأغذية الي تحتوي عالكالسيوم مثل اللبن والبيض🥛🍳 والبروتين.

⁦☑️⁩ ومرة لخ اشربي كمية كافية من المي🥛 والسوائل ولبن وحليب🥣 وشوربات🍲 بين الفطور والسحور 💧وابتعدي عن المنبهات. (قهوه وجاي)
.........🌙.🌛.................................

🔘شلون اعرف الطفل دياخذ حليب بشكل كافي؟ (ديشبع)

١-⁦▫️⁩ زيادة وزن الطفل بالمستوى الطبيعي لعمره (حسب جداول متابعة نمو الرضع)📈وهي علامة جيده لحصوله على ما يكفيه من الحليب.

٢- ⁦▫️⁩عدد الحفاظات المبللة🚼: ان تبليل الطفل من ٦ الى ٨ حفاظات خلال ٢٤ ساعة أيضا علامة جيدة انه يحصل على ما يكفيه من الحليب(على ان يكون لون البول اصفر فاتح وبدون رائحة )

٣- ⁦▫️⁩سماع الام صوت ابتلاع الطفل للحليب اثناء الرضاعه

٤- ⁦▫️⁩تمتع الطفل بالسعاده والهدوء بعد الانتهاء من الرضعة.😋

٥- ⁦▫️⁩طراوة ثدي الام بعد الانتهاء من الرضاعة قد يدل على افراغ الطفل للحليب.

⁦◼️⁩⁦◼️⁩ملاحظة مهمه : بكاء الطفل😭 لا يعني دائما عدم حصول الرضيع على كفايته من الحليب ،
هناك عدة أسباب اخرى للبكاء مثل تغيير اوقات النوم والرضاعة في شهر رمضان,
كذلك قد يمر الطفل بمرحلة فورة النمو التي تجعله يرغب في المزيد من الرضاعة وهي مرحلة مؤقتة،

⭕⭕ وفي حالة ثبوت عدم حصول الطفل على ما يكفيه من الحليب يجب استشارة المختصين بالرضاعة لعمل اللازم.

.........🌙.🌛.................................

🔘هسه اخر شي انصوم لو لا؟ 🤔

📣⁦✔️⁩قرار الأم المرضعة بعدم الصيام يجب أن يكون مبني على تجربتها للصيام لمعرفة مدى تأثير الصيام عليها وعلى رضيعها.
يعني جربي تصومين وشوفي وضعج وراها قرري،

⭕⭕وينصح بالإفطار وعدم إكمال الصيام في الحالات الآتية:
١- الشعور بالعطش الشديد.
٢- تغير لون البول الى اللون الداكن.
٣- حدوث أعراض انخفاض سكر الدم مثل الاحساس بالدوار، أو الدوخة، والضعف، والتعب أوالإغماء.
٤- جفاف الفم، والحلق الشديد.
٥- الشعور بالصداع أو زغللة في النظر.
٦- هبوط في ضغط الدم.
٧- الشعور بإجهاد عام.
٨- قلة كمية حليب الثدي عن المعتاد بشكل قد يؤثر على وزن ونمو الرضيع.

.........🌙.🌛.................................
⁦
⁦✴️⁩⁦❇️⁩⁦✴️⁩ملاحظات أخيرة منه⁦✴️⁩⁦❇️⁩⁦✴️⁩:

هناك بعض التعليقات الغريبة(بين النسوان) بخصوص صوم المرضع في رمضان منها :
🔴 ان المرأة افضل لها ان تصوم وتفطم الطفل من الرضاعة الطبيعية وتقدم له الحليب الصناعي لان قضاء دين رمضان سيكون متعب فيما بعد !!!!! وهذا الأمر مخالف للشرع اساسا، قال رسول الله صلى الله عليه وسلم : ( إن الله يحب أن تؤتى رخصه كما يحب أن تؤتى عزائمه ). ويمكن الاستزاده في هذا الموضوع عند علماء الدين،

المعنى، الله سبحانه وتعالي ميريد هيج صيام اذا يترتب عليه ضرر على الام والطفل.

🔴 ان المرضع التي تفطر في رمضان هي امرأة ضعيفة!!!!
في الواقع كل امرأة تختلف عن الأخرى هناك من تستطيع الصوم في رمضان وهناك من لا تستطيع، والتي لا تستطيع الصوم الحل هو الفطر وليس فطام الطفل وادخال الحليب الصناعي🍼 فالإسلام اجاز للمرضع الفطر في رمضان اذا كان الصوم سيؤثر على الطفل، والفطر لايدل على ضعفها بل هي امرأة قوية💪 تكافح من اجل رضاعة طفلها.

واخر شي ابقى اكلج:
#انتي_الصح
#واستمري

واعانا الله وإياكم على الصيام وعلى الرضاعة وجعلها في ميزان حسناتنا 😄.

منشن الي حايره..

د.اسماء البدري

بمناسبة شهر رمضان المبارك

الرضاعة الطبيعية والصيام 🌹

كل عام وأنتم بخير بمناسبة شهر رمضان المبارك .. وتقبل الله منا ومنكم صالح الاعمال ...

موضوع الصيام والرضاعة الطبيعية اله اكثر من جانب، ديني وصحي وعلمي، مثل ماعودناكم سنتناول الموضوع بالتفصيل أن شاء الله ♥️

.........🌙.🌛.................................

🔘شرعاً 📿:
معظم رجال الدين الإسلامي 👳 أجمعوا على أن الحامل والمرضع 🤰🤱حكمهما حكم المريض، إذا شق عليهما (تعبهم) الصوم شرع لهما الفطر، وعليهما القضاء عند القدرة على ذلك، كالمسافر والمريض ؛ لقول الله عز وجل : ( فَمَنْ كَانَ مِنْكُمْ مَرِيضاً أَوْ عَلَى سَفَرٍ فَعِدَّةٌ مِنْ أَيَّامٍ أُخَرَ ) البقرة/184 .
.........🌙.🌛.................................

🔘علمياً 🔬:
بشكل عام على حسب عمر الرضيع ⁦⁦👶🏼⁩ واعتماده على الرضاعة الطبيعية وحدها أم لا، يمكن للمرضعة الاستمرار في الرضاعة الطبيعية 🤱أثناء الصيام مع القدرة على إنتاج الحليب الكافي خلال فترة الصيام دون التأثير على كمية الحليب او قيمته الغذائيه👍 حيث ان جسم الأم يقوم بالتكيف عن طريق استخدام السعرات الحرارية المتاحة(من مخزون الجسم)

حيث ان تكوين الحليب الطبيعي لا يأتي مباشرة من الأكل الذي تتناوله الأم ولكن يأتي من مكونات جسمها وبذلك عليها أن تحرص على تغذية جسمها لتعويض ما ينقص منه.

.........🌙.🌛.................................

🔘صحياً🏥:
⁦⬅️⁩ فوائد استمرار الرضاعة :
١- 🔹 يحمي الأم من المشاكل المرتبطة بعدم تفريغ حليب الثدي مثل الاحتقان والآلام وتحجر الثدي.

٢- 🔹تزامن رمضان مع فصل الصيف 🌡️وما يرتبط به من زيادة احتمالات حدوث عدوى الجهاز الهضمي والإسهال للأطفال، كل ذلك يعزز من أهمية الرضاعة الطبيعية في تقوية مناعة الطفل 💪وحمايته من العديد من الأمراض .

٣- 🔹الرضاعة الطبيعية المنتظمة في رمضان تساعد الأم على استئناف الرضاعة دون مشاكل بعد انتهاء شهر رمضان، فإذا ما توقف الطفل عن الرضاعه الطبيعية في شهر رمضان وتمت تغذيته بالرضاعه الصناعية سيتعود عليها و سيكون من الصعب عودته الى الرضاعه الطبيعية بعد ذلك.

٤- 🔹استمرار الرضاعة الطبيعية يعزز غريزة الأمومه👩‍👩‍👧 ويزيد الارتباط بين الأم وطفلها خاصه مع المواليد حديثي الولاده.👶🏻

⁦⬅️⁩ تأثير الصيام على الأم المرضع :
⁦◀️⁩شعور أشد بالعطش وربما يصل إلى أن تعاني الجفاف خاصة لو كانت لا تهتم بشرب الكثير من السوائل بعد الإفطار
⁦◀️⁩وهناك أعراض أخرى مثل أن يصبح لون البول داكنًا وله رائحة،
⁦◀️⁩شعور بالدوخة والضعف، وربما يصل للإغماء مع صداع متواصل. 😩

وهذا الأمر نسبي يعني يختلف بين ام وأخرى على حسب عوامل كثيرة منها اختلاف طبيعة الجسم .

.........🌙.🌛.................................

🔵 المرأة المرضعة التي تقرر الصوم في رمضان عليها الإلتزام بالنصائح التالية خصوصا اذا كان الطفل عمره دون ال٦ شهور ومعتمد اعتمادا كاملا على الحليب:

١- الراحة وعدم بذل مجهود كبير في فترة الصيام.
٢- تأجيل الشفط الى مابعد الافطار ولكن تستمر في الرضاعة خلا فترة النهار للمحافظة على الإدرار.
٣- الإبتعاد عن المنبهات كالشاي والقهوة واستبدالها بشاي الأعشاب كاليانسون والشمر (الحبة الحلوه) والحلبة.
٤- الحرص على تناول الأطعمة المدرة خلال فترة الفطر مثل التمر المكسرات النيئة الغير مملحة الموز الشوفان والفواكهة المجففة كالتين والمشمش المجفف.
٥- شرب لترين من الماء، وكذلك الحرص على شرب ماء جوز الهند العضوي مفيد جداً للمرضع بعد فترة الصوم يساعد الجسم في استعادة المعادن الأساسية.
٦- تأكدي من توفير مخزون من الحليب المشفوط لحالة الطوائ

.........🌙.🌛.................................

تغذية الام المرضع أثناء الصيام:

التغذية علمود جسمك وصحتك ماتتدهور مع الصيام والرضاعة 🤱🏻♥️، أما الطفل ماتتغير عليه مكونات حليبك وفوائده 👶🏻، لان الحليب يتكون من مخزون الجسم،
لكن من تكون تغذيتك جيدة نسبة الدهون في حليبك تزيد فتشبعه ويزيد وزنه . .

⁦☑️⁩تناولي فطور متنوع غني بالعناصر الغذائيه الهامه وابدأي بالتمر.

⁦☑️⁩كثري من الخضروات والفواكه 🍉🍇 لما تحتويه من فيتامينات وسوائل.

⁦☑️⁩احرصي على تناول الالياف الغذائيه المتوفرة في الشوفان والخضروات الورقية مثل الخس والجرجير ،⁦☘️⁩

⁦☑️⁩تناولي بين الفطور والسحور وجبات مغذية صغيرة في حجمها كبيرة في محتواها من الفيتامينات والمعادن خصوصا الكالسيوم والزنك والفوسفور على سبيل المثال سلطة زبادي بالفواكه ،المكسرات، السموذيات او المنتجات الجاهزه الداعمة للرضاعة مثل منتجات ملكي ميكرز milky maker's

⁦☑️⁩لا تنسي شرب الماء والسوائل 🍶وكذلك الاعشاب مثل شاي المردود وتجنبي الشعور بالعطش فترة ما بعد الفطور.

⁦☑️⁩تجنبي الاكل المالح مثل الأجبان🧀 والمخللات والمكسرات المملحه والمتبلة لأنها تؤدي الى العطش