فَكِّرْ

اغلب المشاكل الزوجية والعاطفية تبدي بالعناد وتنتهي بي
علاقات حلوه مدتها سنين تنتهي بسبب العناد، وهالمرة مضطر احمل اغلب السبب للمرأة.
مشكلة من تتعامل المرأة بعاطفتها فقط بدون عقلها، الانترنيت والمجتمع رسخوا هالفكرة بداخلها وخلوها تؤمن بأنها عاطفية فقط، بالمقابل الرجل عقلاني ومنطقي اكثر، وهاي المعادلة هي السبب بالمشاكل النشوفها حاليًا
العاطفة بدون عقل ما تفيد والعكس صحيح،
فمن تجين تعاندين هنا دا تتعاملين بعاطفتج بدون ذرة عقل، لأن لو شغلتي عقلج اول قانون راح تشوفي كدامج هو ان العناد صفة تهدّم رجولة الزوج، راح يگوم يحسج رجل آخر يعارض كلامه، وهنا الزوج مستحيل يسمح برجل آخر بالبيت وتبدأ الخلافات.

ربّ الأسرة مفهوم أنعدم عند البنات الي وعن واتثقفن على الأنفتاح الغربي الخبيث الصدروا الهن عن طريق السوشل ميديا والمسلسلات والقصص الوهمية.
ربّ الأسرة هو رجلج والسند الوحيد المتبقي الج بمعادلة الحياة الصعبة، وهيّ صفة القوامة المذكورة بالقرآن، التميّز الذكر عن الأنثى
أي محاولة منج لأخذ هذا الدور،
غريزيًا معناها هددتي رجولته وبديتي بمرحلة العناد بالقرارات وهالشي ما ممكن أي رجل حقيقي يتقبله.

طبعًا اكو استثناءات لكلامي، وحده منهن أن زوجها احتمال يطلع مو صاحب مسؤولية، واحد فاهي لا يحل ولا يربط ولا إله أي دور رجولي، هنا من حقها تصير ربّة الأسرة هيّ لأن العينتين ما ماخذ دوره الحقيقي اساسًا، وطبعًا من حقها تعاند وترفض اذا جان قرار الرجل ضد الدين واللأسس الأخلاقية، وهذي حالات شاذة مو بصدد ذكرها حاليًا.

ما أنكر أبدًا أن المرأة غير قادرة على أن تكون ربّة الأسرة، بالعكس تكدر لكن من تكون الأسرة خالية من رجل حقيقي، بهل حالة فقط، أما بوجود هذا الرجل، يسقط دورها بالزعامة وإصدار القرارات.

الزواج مشاورة مو مشاركة، يعني تتشاورون بالقرارات لكن اليصدر القرار هو ربّ الأسرة فقط، من تنضجين لهاي النقطة وتتقبليها بدون تذمر او إنزعاج، فأنتِ بديتي تفهمين اول نقطة بعالم الزواج والعلاقات الصحيحة.

وكلكم عيوني.

اجتي سيارة مال شرطة بدون سابق انذار شالتني ، وبرغم تحفظي بالتعامل بسلوكي صعدت بدون ما اسأل
اتمنيت اخذ شريط الـxanax لأن اعاني من رهاب وتوتر اذا كعدت بصف شخص ماعرفه، هذه الدوه يخليني استوعب الخوف ويحول كل مأساة بداخلي الى سخرية كبيرة ,
وصلنا لمكان يشبه الكنيسة متحول الى سجن، تهمتي ماعرف شنيه لحد الآن،
محد حقق وياية ولا شفت ضابط او صعدت لقاضي، نزلت من السيارة الشرطي كلي وصلنا لمدينة الضياع، لا تتعب نفسك وتخابر محد يكدر يطلعك،
فتت من باب هيكلها حديد، جديدة الأنشاء مصبوغة بلون اسود ، استغربت من شفت العالم المسجونة هناك
نصهم اعرفهم ، المسؤول عن المساجين ضابط عنده عقدة تجاه الحيوانات،
يجيب اي حيوان كدام المساجين يعذبه ويكتله تخويفاً الهم ، الأنسان من يتطبع بالخوف يتحول لحيوان يخاف ان يُعذّب او يُقتّل
وهذا الشي الراد يوصله الضابط لكل سجين جديد يفوت الهالمدينة المسجونة،
ونجح هذا الاسلوب وياية، من قتل كدامي جرو صغير، واني قبل لا انشال بساعة جنت اوكل بزونة شارع قوطية سردين
بعد هذا المشهد رحبوا بيه المساجين ، هواي بيهم عرف، محد بيهم يعرف تهمته، جابوني حالي حالهم ، الي استغربت منه اول مرة اشوف سجن بي شوارع ومحلات وناس مبسطه عيشتها عالمساجين
تكدر تفتر براحتك بس ماتكدر تشرد، بنهاية كل شي اكو بوابة حديد مسدود بابها
الغريب كل العايشين بهذا السجن عنده جرأة يغلط ويفشر ويضحك ويلعب بصوت عالي، كلهم متعايشين بس الشي الممنوع عليهم هي عبور بوابة الحديد، كل شغفهم وحماسهم ينتهي من يرجع الضابط، الكل يرتبك ويخاف ويترقب اي حيوان جايبه اليوم يعذبه، مرات يجيب حيوان يطلقه كدامنا يخلينا نلزمه ونلعب وياه وندري ثاني يوم بعد مانشوفه
كل الموجودين جانت گلوبهم طيبة وغزيرين الدمع، مرة واحد كلي هذي المدينة العايشين بيها مستمرة بالقتل ، اليوم الماينقتل بيها شي تختفي، سمعته واخذت حجايته مو بمنتهى الجدية
جان مجتمعنا عبارة عن بشر بحياتهم الواقعية مرضى مايكدرون يختلطون بالمجتمع، اغلبيتهم تاخذ ادوية مثلي حتى بس يتنفس، او يهدأ، او ينام عالأقل من وكت ومرتاح، هناك ما احتاجيت بعد لأدويتي
اسولف براحتي ويسولفون براحتهم، مرة احتفلنا بشخص ويانه لأن بقى ساعتين ما مختنك، واحتفلنا بشخص ثاني لان كدر يستمع لحديث دار عن الوجودية بدون مايحس بقلق، سوينا فريق نلعب بيناتنا، صح جو هالمدينة كئيب، لون السمة أحمر قاتم ومابيها شمس، بس اكلنا وشربنا سوه ، ورغم هذا التماسك يجي الضابط بالاخير وياه حيوان يكتله كدامنا ويرجعنا لسابق طبعنا

هالمرة جايب وياه جرو كلش صغير وخشب حتى يحرقه ، بقيت الليل كله ما نايم، نزلت بدون ما أحز يلاحظني جمعت الخشب وحركته ورجعت لفراشي،
دخلت المدينة انذار واجه الضابط اول واحد بيده حديده يدور على الجرو بوسط النار، ضحك ضحكة صوتها مسموع ورجع هو والبقية لأماكنهم
تغطيت والجرو يمي ،كعدت الصبح بقيت محافظ عليّ جوه جربايتي ، شفت هوسة جوه كالوا الضابط لاول مرة يتمرض، رغم نار البارحة بس لاول مرة من عشرات السنين ماينكتل حيوان ، وكلهم يصيحون وين الجرو مال بارحة
ضميت الجرو بقمصلتي، بقيت اتمشى شفت بوابة سريّة من بعيد اتقربتلها، بابها مفتوح ركضت وعبرت، عالشارع تركت الجرو يروح بحال سبيلة ركض بعيد جان يوكف على بعد مسافة، اندارلي وباوع بنظرة عطف، جان يريد يگلي بهاي النظرة شكرًا لأن انقذت حياتي وراح كمل طريقه بالحريّة،
ومن بعيد اسمع صخب واحتفالات عارمة
رجعت للمدينة لكيت بابها مسدود والكل محتفل بأنجازي
اول مرة واحد يعبر البوابة وموت الضابط بفراشه
اتحررت المدينة من القتل بس ماكدرت ارجعلهم
لوحتلهم من بعيد وودعتهم
ورجعت لسجن حريتي القديم.

وكلكم عيوني.

قبل أحداث داعش جان عندي فلسين ابيع واشتري غراض مستعملة ، اجاني ولد صديقي من زيونة كلي احمد اكو واحد عقيد ركن متقاعد عنده غراض يريد يبيعهن، يريد يصفي البيت ويسافر، رحتله العصر للبيت
الرجل جان هيبة وشخصية عالية، اتخيلت نفسي جندي كدامه راح ينطيني واجب على ساتر لو اركض ١٤ مرة عقوبة بمركز النهروان
بصوت قيادي كلي ابني مابيه حيل انزل الغراض الباقيات بالبيتونة هن لوحات وشمعدانات وكتب اذا تفيدك اخذ التريده منهن وانزل
فتت للبيت رغم الوحده العايشها بس تحس الاحاديث القديمة الدارت هنا تتراودلك، وجهتني للمكان البي الغراض خادمة مسيحية لابسة اسود عيونها تحمل الكثير من الهم والمسؤولية
من وصلت للمكان شفت كنز من الغراض، مُسجّل قديم بي نشرة اضوية وثاني صغير تسمع بي اخبار الحرب وشمعدانات كرستال سوارفيسكي بالأضافة لكتب قيّمة ، فتحت كتاب لنيتشه سرحت بالقراءة ما أشوف اله واحد واكف بصفي بلبس افندي كلي الدين ثورة العبيد ، كتله الدين مو يعتبر سلوك ؟ كلي اي طبعاً بس برأي نيتشه ثورة العبيد
هذا رأيه هو ، اقراله وابدي بالعلم المرح وديربالك تقره لأستاذه شوبنهاور ذاك تشاؤمي وانت بعدك صغير خاف يكسر واهسك بالحياة رغم ان نيتشه بالاخير تمرد على استاذه، كتله اول مرة اسمع بهالشي ، ردت اصعد واشوف شكو غراض بعد شفت مجموعة من النمل خفت ادوس عليهن لايموتن، كلي تعرف النملة عدها بُعدين وانت عندك ٣ ابعاد ! كتله شلون ؟
كلي انت تكدر تندار يمنه ويسره وتكدر تباوع كدامك وفوكاك ، النملة بس تباوع كدام ويمنه ويسره ، كتله اكو مخلوق عنده بعد رابع ؟ كلي ليهسه العلم مامكتشف بس ابقى اقره
كلي عندك اصدقاء ؟ كتله عندي بس اني قليل المعشر ومااحب التقي هواية ، كلي احسن الانسان كل ماجان اجتماعي كل مايصير اقل عبقرية
ماكملت دراسة ؟ كتله متوقف حاليًا بسبب الظروف انجبرت اشتغل، كلي مجتمعك اللئيم يخلق اسباب الفقر والعاهة وراها يحتقرك اذا انصابيت بي، كتله انت اخو صاحب البيت ؟ جاوبني لا
گلي برجسون الفرنسي يكول الانسان ميال بطبيعته لموافقة الجماعة الينتميلها بس العبقري هو الينتمي للبشرية جمعاء ، شايف بيك عبقرية مغلفها بالسخرية وهذا الشي يحبب الناس الك
بلحظة سمعت صوت اقدام واحد يصعد الدرج
شفت العقيد يضحك بوجهي، كلي ابني فضني اكو واحد يسولف ويه تمثال علي الوردي.

علي متزوّج، يوم من الايام طلب الباسوررد مال موبايل مرته، اعترضت علّي وماقبلت ، كلها شتريدين تضمين عليه؟ ماجاوبته وراها عافت البيت واتطلكت منه بعد زواج امتد خمس سنين بطفلة صارت ضحية شك

واحد خاطب وحده بعد شهر يتزوجون ،كاعد يمها اجتها رسالة عالواتس من شخص دازلها صورها ، بقت صافنة بعين خطيبها كلتلة والله العظيم ماعرفه منو، كلها لتحلفين مصدك بيج
وره فترة عرفوا صاحبتها هيج مسوية لان تغار منها ،اجتي گالت لخطيبها انت شلون صدكت بية واقتنعت بسرعة ، كلها لان عندي ثقة عالية بيج لا أكثر ،

ياسمين لكت بموبايل زوجها وحدة دازتلة رسالة "تسلملي" تابعته وره فترة سمعتة يحجي وياها ،زعلت منة وراحت البيت اَهلها بالاخير طلعت نازحة يساعدها هي وجهالها حتى بس تدعيلة مرتة تصير زينة لان عدها عملية بعد اسبوع

اكو فرق جبير بين الشك والغيرة تحت اَي مسمى ،أب وبنته، أم وابنها ، اخ وأخته, او ارتباط زواج او صداقه
الغيرة المنصفة دليل عالحب،
الشك بالمقابيل دليل عالنقص

هيج مشاعر حقيقية، اذا ما واثق من الشخص التريده، انهي تجربتك وياه اول وتالي مثل هالعلاقة يبقى محكوم عليها بالفشل
مامجبور شخص تحسسه 24 ساعة غلطان وياك ولازم يبررلك كل تصرفاتة حتى متفهمه غلط ،

السجن الحاط بي أغلى ناسك يجي يوم راح تخليهم يكسرون بابة ويطلعون يشوفون حياتهم،
الحب والاهتمام مايكتبلك قصة تريدها بداخلك

"من الثقة والتفاهم تنكتب النهايات السعيدة"

وكلكم عيوني.

مشكلة جبيرة من تقنّع روحك راح تجيك مكافأة على الشفته بحياتك، وكفتك على حيلك بعد كل وكعة، على كل معاناة عانيتها، على كل اعتذار انتظرته وماصار، على حجاية اتحملتها على وضع انحطيت بي واضطريت تكمله لأن ماكو حل ثاني غيره.

تحس الك حق جبير ودا تنتظره
من مايجي بوكته راح يتضاعف، وتغالط بروحك وتنتظر عدالة السماء،

ببساطة الحياة مو عادلة او بمعنى اهم احنه شايفين العدالة على كد نظرتنا القاصرة .
الأمور العشتها ماجانت ثمن دفعته وتنتظر مكافئتها، الشي الراح درس مهم ومجموعة تجارب القصد منها تبقى الشخص الي هو حاليًا نفسك انت.. بكل قوتك وصمودك

اذا اكو مكافأة انتظرتها فأنت استلمتها، اذا رايد تشوفها باوع على نفسك بالمرايه
تفقد هواي من گلبك حتى تكمل بيها جزء من عقلك
هذي معادلة الحياة.

وكلكم عيوني.

أي انسان من تحس انت شايفه من جوه ومن بره وتكدر تحدد نقاط جماله الحقيقي بعيداً عن الغريزة التقيّد مشاعرك الفعلية
وتكدر تتفاعل وياه بظروفه وحالته النفسية، ساعتها راح يبين التفاهم والانسجام اليخلق اجمل حب وتعرف وراها سر امتلاك روحه.

وكلكم عيوني.

البارحة جنت دانتظر تكسي كدام مستشفى الطفل بالإسكان، أكو سيارة مال شرطة واكفه يمها ثنين شرطه ديأدون واجبهم ويسولفون، أسمع واحد منهم يگله ما يموت اذا مو بيومه، صاحبه ما جان متفق وياه، يگله واذا طلّع رشاشه وفرغها براسه شلون، گله والله ما يموت اذا مو بيومه، وعاد الجملة اكثر من 5 مرات بنفس صياغ الحديث.
اجاني التكسي ورحت وكمّل يومي عادي ، بس بقيت شويه افكر بالجملة مال الشرطي، مع انُ مو غريبه عليّه واني شخصيًا حاجيها هواي، بس من عادها 5 مرات بصوت عالي خلاني افكّر بيها بمدى أبعد وحوّلها الى جملة غير روتينية كأنك اول مرة تسمعها.

قبل شوي دا اگلب بالأنستكرام شفت الإعلام والبيجات المصرية مخبوصة بخبر بشع جدًا
وحده مخطوبة وحامل وعايشه يم خطيبها وخطيبها عايش يم اهله، فهاي ولدت الطفل وبنفس الثانيه شمرته من الطابق الثالث بالمنوّر ( الترك مال بيت) !!
الصوره تظهر حتى الحبل السري مال الطفل بعده موجود، يعني جانت ناويه تشمره اول ما يطلع من بطنها.

المعجزة بالحادثة هاي، أن الطفل ابو الحبل السري الوكع من الطابق الثالث الي عمره دقايق فقط، عايش!
بقى ساعتين يبجي لحد ما انتبهوا الجيران على الصوت وراحوا شافوا ونقذوا!

معجزة حتى بالخيال ما تكدر تستوعبها، معجزة تذكرك بقصة طفل بالقرآن، امه شمرتَه بالبحر حتى تحمي ورجعلها سالم وكامل
بس شتان ما بين أم موسى والأم المصرية هاي!
مباشرةً اني واقره الخبر تذكرت جملة الشرطي الگالها البارحة

وفعلًا كلامه، اذا جان مو يومك ف الله سبحانه وتعالى راح يبعد عنك الموت حتى اذا جنت بنص البحر ، حتى اذا نشمرت من الطابق الثالث انت والحبل السري مالتك!
واذا جان هاليوم يومك، فراح يجيك القدر حتى وأنت نايم.

تأملوا بالموت ولا تنسونه ابد، لأنهُ الزائر الوحيد الما ينساكم
الله يرزقنا وإياكم حسن الخاتمة يارب

وكلكم عيوني.

ذاك اليوم قبل ما اصعد لشقتي بالشارع شفت ابو ستوتة ضربته سيارة ، انكلبت الستوتة فوگاه، طلعت وخرتها من فوكاه وشلته خليته على رصيف العمارة ، الحمد لله الولد مابي شي بس من الحادث بقى مصدوم، ابو السيارة طلع ابن اوادم ماانهزم، بقى ويانه وانحل الموضوع بكل اريحية وبساطة، بقى يمي الولد يرتاح ويستعيد وعيه من الحادث، گتله اكثر من مرة يصعد وياي لشقتي يرتاح لكن رفض لأن استحه مني بسبب ملابسة الوصخة، هو يشوفها وصخه لكن اني اشوفها أنظف من هواي قوط ملبوسه بالحكومة، طَلَع مبايله خابر على واحد كله سويت حادث بسيط تعال أخذني عبالي خابر اخوه لو واحد من كرايبه، وره نص ساعة اجه الولد بس شافه ظل يبجي علّي ، نزع قمصلته ولفافه ولبسهلياه، طلع بره شغل الستوته اشتغلت مابيها شي بس الصناديك البلاستيك مال صمون اتكسرت، كله ليش ماخابرتني من وكت جنت طالع ، راح اخذ الستوتة واروح واذا حجه ابو الفرن اكله طارن بالهوه واتكسرن خل يخصمني
انت روح ارتاح بغرفتنه راح اكلهم ماجد مريض بي فلاونزة
كتله انت شتصير منه ؟ كلي احنه ولد ولاية وحده واجينا هنا نشتغل سوه.

عظمة الصاحب والصديق الصدك تحس انت ضامنه، اذا تحتاجه تلكاه كبالك، دعمه النفسي حجايته، فلوسه، هدومه، وكته، روحه لو لزم الامر
عظمة صديق ماجد يعوفلك طمأنينة بگلبك دايمة حتى لو بس بحجاية وحتى لو ردته كل سنتين مرة
سند وراحة بالمطلق، ويحسسك انت مو وحدك كدام مصائب الدهر والفقر والاعجاز ، بدءًا من اللفاف اليحطه على ركبتك وانتهاءًا بالخوف على صحتك حتى لو على حساب المخاطرة برزقه
الصديق الحقيقي قيمة جبيرة بحياتنا والله العظيم
الشخص اليرسخ جواك استرخاء ويخليك تعيش بيها.

الله يلهمنا حسن اداء الموقف تجاه غيرنا، نصير مصدر أمان ويه كل انسان نعرفه ونعوفله خيط طمأنينة بحياته . ونتمنى . نتمنى كلنا نصير مثل صديق ماجد ❤️

وكلكم عيوني

هذا اني
اذا جنت سعيد وياك راح أحسسك شكد مهم عندي، واذا جنت ضايج ومكسور خاطري منك راح أحسسك شكد وجودك ماله داعي بحياتي،
هذا اني
اذا أفتهمتني زين راح تكسبني طول العمر، وإذا ما فتهمتني راح تعاني بكل دقيقة وياي
هذا اني
الكلمة مني صعبة تطلع، بس اذا طلعت تكون حقيقية مية بالمية وعهد على ذمتي دائمًا.
اذا شفتني أحبك وأقدرك وما شفتك أحترمت هالشي، راح تشوف مني وجه ثاني ثنينه ننصدم بي
وإذا قدرتني أردها الك بألف إبتسامة
ممكن تحس يمي أنّك أهم بشر بحياتي، وبعد ثانيه اخرى تحس أنك لاشيء، افعالك تحدد مكانتك عندي

هذا اني
ما طلبت شي من أحد، وأحب الزوار خفيفي الظل مهما كانوا قريبين مني
ولدت وحيد بهدوء وأغادر وحيد بهدوء
وما أحتاج أحد.

وكلكم عيوني.

برأيي - أن المُثقف الحقيقي - الذي أشعر بأنَهُ وصلَ ما وصلَ إليهِ من الفَلسفة الحياتية والدينية والروحيّة وتغلغل في أزقة العلمِ والمعرفة - هو الشخص الذي قَرأ بتمّعن جميع ما كتبوه أحفاد نبيّ الله محمد صلّ الله عليهِ وآلهِ وسَّلم، وهم الأئمة الأثنا عشر عليهم السلام، يترأسهم في المقدمة إمام البلاغة ومنشأها، عليّ بن ابي طالب عليهِ السَلام، فإنهم لَم يتركوا كبيرةً وصغيرةً في شتى علوم الحياة إلا واستبقوا العلماء في كتابتها، فعلمهم الواسع وفلسفتهم العميقة بالدين والحياة لم تأتِ بمحضِ صدفة، بل هيّ طيفٌ مستمرٌ من أطياف مدينةُ العلمِ حبيب الله ابا القاسم محمد صلّ الله عليهِ وآلهِ وسَّلم.
وبرأيي - أن الجاهل الحقيقي - هو مَن لم يقرأ لهُمُ.

أحمَد قاسم.

مرات الإنسان يحتاج يبتعد مسافة حتى يعرف حقيقة الأمر، القرب الشديد من أي شيء يخفي عنّك هواي حقائق، تخيل تكون لازك بصف حايط ورافع راسك وتباوع عليه، حتشوفه جبير لكن ما راح تشوفه كله، اكو جزء منهار من عنده، اكو فطر بالجهة اليمنه، اكو نباتات دتطلع من جواه، وحتى تلكه بي رسمة مثل الباب راسمها شاب حاول يهرب من الحياة، ولو تباوع اكثر حتلكى مكتوب لا ترمي الأوصاخ هنا.

من ترجع كم خطوة حتتضحلك حقيقة هذا الحايط، مميزاته وعيوبه، واحتمال أسرارة هم،
اعرف صعبة من يبتعد الإنسان عن ذاته حتى يعرف نفسه، وكلش صعبة من الإنسان يبقى ما يعرف نفسه.
لكن هذا اللازم يصير بوقت مفصلي بحياتك، بوقت نسميه احنه التغيير، نسميه بداية جديدة
يحتاج ترجع كم خطوة حتى تعرف انتَ وين؟
شسويت بهاي حياتك، شنو هدفك ؟ على شنو عايش انتَ ؟ حتى تكرر نسختك المعتادة كل يوم ؟ أكل وشرب ونوم وطلعه وونسة،
اكو نشاز موجود باللحن، اكو صوت داخلي دائمًا تسمعه انتَ، صوت يكلك يله ، يله عاد ، الفرصة ما راح تجيك حتى تتغير ، الفرصة أنتَ تصنعها ، أنتَ المسؤول عن تغير نسختك السابقة المكررة
بأفكار جديدة بعادات وبناس جدد، بروح جديدة، أنت المسؤول عن شحن طاقتك من جديد، من إعادة ضبط أحلامك وخططك من جديد، حتى الكون الجبير هذا يتخلص من فضلاته الزايدة، أنتَ شنو ناقصك حتى تتخلص من كل هالسلبية الشامرها على نفسك ؟

والأهم برحلة التغيير، مبدأ صغير يخليك تعيش مرتاح وبالك صافي
"فانية ، فكن إنسان".

وكلكم عيوني.

مرة اخرى

كل الحب للأشخاص التقره جرايدي الطويلة 😆

لمن چنه زغار، جانت وحدة من العابنا هي نطير طيارات ورقية، وجانت نوعين، نوع نسميها طيارة ورقية صغيرة، والنوع الاخرة چبيرة بالبالون، والأخيرة مداها ابعد، ولمن تطير الطيارة فوگ وتنجم تصير ثگيلة، وتحتاج خيط قوي، وحتى نقوي الخيط بعد لغرض المكاصيص وية البالونات الأخرى، نسويله شيشة، والشيشة هي گزاز مال شمعة نيون نطحنها بالهاون وعجين مال تمن، ونخبطهن سوه، ونمشيه عالخيط حتى يصير مسلح. الطيارة أو البالون نسويها غالباً من ورق الجرايد، ومو أي واحد يكدر يسويها وإنما الماهرين بس حتى متكون بيها ميلة أو جفّة، ونسويلها ميزانية مضبوطة ونشد الخيط بالشباك مال بيتونة السطح حتى تبقى الطياره سبوع واكثر بالسمه.
چنه نركز على تقوية الخيط ومتانته من نطيّر طيارة البالون ام المدى البعيد حتى نضمن انها مراح تنگطع ابد

هاي الطريقة لحد الآن استخدمها بكل محطات حياتي، بكل حلم اريد احققه وبكل رغبة اريد اسويها، إذا جان البالي بعيد المنال ( مداه بعيد) انطيه كل جهدي وتركيزي وأرسم اله كل الخطط القوية الي تمثّل الخيط القوي بالطيارة، ابدًا ماستخدمت خيط بسيط لأي حلم اطلقه بالسماء،
اني مؤمن بأن كل خطوة تتحقق هيّ بتدبير وعناية إلاهية لو مهما جان الخيط قوي.
بس التدابير الشخصية أمر حتمي، حتى ما تسبب لنفسك خيبة أمل وتهدم ثقتك،
نتيجة أحلامك بعيدة المدى، الي تستخدملها خيط رفيع!

وكلكم عيوني.

أفضل خدمة ممكن تقدمها لأعصابك هاي الأيام أنك تبتعد عن الترند العراقي
وتحاول تتفرج بدون ما تنطي رأيك، مو أنانية لكن الرأي المخالف والمختلف وسط هاي المعمعة ما إله شراية، لذلك جر نفس ودرب نفسك على عدم استخدام الكيبورد، طبعاً هاي المعمعة ما تقتصر على السياسة بس، بل في كل المجالات: السياسة، المجتمع، الدين، الثقافة، ودائماً الرأي المخالف يُقمَع وينتهي في سلة المهملات خصوصاً من قبل المثقفين. لا، بل صار من الطبيعي جدًا أنك تشوف شخص يفترض أنه مثقف حاط ملاحظة بآخر المنشور: “رجاء اللي عنده رأي مخالف لا يعلق.” أبو الشباب يريد بس تصفيق

وكلكم عيوني.

هواي سامع هاي العباره قبل
( لتختار شريك حياتك على أساس الحب)
ويجون يطرحون نظريات وهميّة ويگولون اذا حبيت شخص ما راح تشوف سلبياته وراح تفقد عقلك ومتختار صح بإعتبار أن حبك راح يطغي على عقلك ومن هالسوالف الي مالها صحّة.

بدون شك الحبّ وحده غير كافي لنجاح أي علاقة عاطفية تنتهي بالزواج بما يرضي الله،
وآني شخصيًا ناشر أكثر من 15 بوست عن التفاهُم بين العلاقات ومأكد على ضرورته وأهميته المطلقة، ومُصّر لحد الآن على انهُ الشرط المهم لنجاح أي علاقة ، لكنَهُ ليسَ الأهم ، لأن الإنسان نفسيًا ما يكدر يتفاهم ويّ شخص ما يحبه، مراح يكدر يوصل وياه لنقطة حل دام هوَ ما عنده مشاعر المودَة والرحمة المذكورة بالقرآن والمتمثلة بالحب اتجاهة.

بدون الحب مراح تكدر تتقبل شي، لا أخطاء الشخص المقابل ولا عذرك إله،
المودة والرحمة الممزوجة بالتفاهم والمُغلفة بمصطلح الحب هيّ نقطة السر الي تخلي زواجك ناجح وتحت العناية الإلهية،

وأتذكر
الحب مراح يفقدك عقلك.

وكلكم عيوني.

اني من زمان ضد حفلات الصور والسكراب والهرج والمرج اليصير بيها، ورأيي طارحه سابقًا قبل سنين
واشوفها شي زايد وماله داعي خاصة بزمن الترند السخيف الي خله الناس تركض وره الشهرة المزيفه.
ومن حقج ك بنيه ملتزمه بعبايتها وحجابها انُ تنزلين من الستيج بكل هدوء بوقت تشغيل الأغاني ، لا غبار على هاي الخطوة ابدًا.

بس الدكة الناقصة من تصورين نفسج انتِ وتنزلين من الستيج وتقللين قيمة زميلاتج الباقيات وتهينيهن بهاي الطريقة الي غايتها الوحيدة الترند وزيادة عدد متابعينج وحتى تسمعين كم عفيه من كم ملطلط.

صديقاتج ذني جنتي 4 او 5 سنوات وياهن، صنعتوا موافق وذكريات تعتبر الأهم بمسيرة حياتج كشابه.
صدكيني الدين مو هيج، وبعمر الدين ما راح يكون سلعة ترويجية تحصلين بيها اكسبلور، لأنُ بمجرد نشرج لهذني الريلزات فتحوّل الموضوع الى رياء وليس إلتزام حقيقي إسلامي.

وكلكم عيوني.

كل إنسان عنده لونين،
أبيض وأسود، مرات الإنسان ينرفض بسبب مميزاته مو بسبب عيوبه، مرات محبتك تصير چبيره على فلان او عطائك يصير اكبر من قيمته، او تلگاه ما مصادف گلب نظيف مثلك وما متعوّد على صدق المشاعر، اباله الناس كلهم خاينة وكلهم مو خوش اوادم، العاش عمره متعگل بناس غلط ما يفهم قيمة الناس من يقابلهم، مثل ما تلكه بشر يرفضون النعمة راح تلكه بشر ترفض الناس الصح.

وكلكم عيوني.

مرة اشتريت قميص ماركة جان بوكته، جنت قليل البس قمصان ، اكثر لبسي بالصيف تشيرتات وبالشته بلوز ، هذا القميص الغالي كلما البسه أتقيد وماارتاح بي ، ارجع انزعه والبس بلوزي ابو العشرتالاف المرتاحله ، مرات تشوف واحد غني صاعد سيارة عادية ، هو يكدر يشتري اَي سيارة تعجبه بس تشوفه صاعد سيارة هوندا صغيرة
الموضوع مو فلوس بس هو مرتاحلها

وجنت اعرف ابو شركة موبايلة ايفون فايف قديم برغم ماجان توه نازل ال7plus سألته ليش ماتغير موبايلك كلي هذا تعودت علّي بعد وحتى لو ردت أغيره اشتري فايف نفسه

الموضوع ماله علاقة بالشكل والجمال والسعر
الموضوع اقتناع وثقة وتجربة وموضوع مهم يوصلك للحقيقة
لاتستغرب انت كشاب حلو ومرتب وسيارتك اخر موديل المعجب بيها تحب واحد حالته ميسورة لأن شافت جزء منه يكملها ، ولاتتعجبين انتي وحده حلوه واغلب العالم تباوع عليج واحد يختار غيرج انسانة بسيطة لأن ارتاحلها وفهمها .

التفاهم هذا اهم موضوع بهذا الكوكب، الراحة النفسية التلكاها بناس يشبهوك، بمطعم ترتاح لكعدته، بتشيرت ماخذ راحتك بي، بأغنية تسمعها، الراحة التلكاها ويه الهادئين امثالك لو ويه التافهين الي على نيتهم اليشبهوك
الموضوع مابي مغامرة، مادام انت اختاريت راحتك النفسية ومارايد شي غصب عنك وتبقى تشوفه غلطة مستديمة تعيش بيها الباقي من حياتك.

عيش حياتك برغبتك، لا غصبًا عليك.

وكلكم عيوني