1
پێشبینی مەکە، ئەگەر ڕاست دەرچوو
کەس نایە وەسفی، (زیرەکی)یت بکا
گەر هەڵە دەرچوو، هەر خەڵک زۆرە
گاڵتە بە عەقڵی، (کەرەکی)یت بکا

2
دەنگت هەڵمەبڕە، هەوڵ بدە با
ئاستی پەیڤینت، بڵند بێتەوە،
بە نمەی باران، نەک گرمەی هەور
تۆو شین دەبێ و گوڵ، دەگەشێتەوە.

3
ئەگەر شارەزای، ڕێگەکە نەبووی
واعیز هەر چی خواست،
پێچەوانەکەی، جێبەجێ بکە
ئەوەیە ڕێی ڕاست

4
مەماندەرە بەر، ڕێژنەی مۆچیاری
دە ئەوەندەی تۆ، هۆشیار و وریاین
گەر گوێی لە باوکی، گرتبا منداڵ
ئێستایش لە چاخی، بەردینا دەژیاین

حەمەسەعید حەسەن

(*) مۆچیاری: ئامۆژگاری