أبرار مُصطفىٰ

عرفتوا لما تقروا آيات من القرآن الكريم وتدبروا فيها وتكونوا مؤمنين إيمان تام بيها
وتتحق معانيها في حياتكم!
فتكون سُبحان الله الآية متفسرة ومتجسدة قدامك في حياتك الواقعية بتساخير من الله عزّ وجلَّ 🤍

لو تسألوني هل كل اللي أنتِ فيه توا حُسن تخطيط؟ حظ! سعي؟
إجابتي حتكون (لا)

وحنقوللكم إنه:

- حسن الظن بالله يعطيك المعجزات لما تنوضي الصبح وكلك إيمان داخليًا إن ربي حيعطيك وينوّر بصيرتك، يتحقق الشيء فعلاً مهما طالت المُدة
﴿إِنِّي ظَنَنتُ أَنِّي مُلَاقٍ حِسَابِيَهْ ۝ فَهُوَ فِي عِيشَةٍ رَّاضِيَةٍ﴾
آية وتحققت في حياتي فعلاً ✅

- كل ما يكتبه الله خير ليك، الف حاجة تمنّيتها وماصارتش حاولت على خاطرها وماتحققتش، زعلت في البداية صح لكن مافيش أي شعور بالندم بالعكس حرفيًا بديت نفرح لما ما تصييرش وكُلّي قناعة بإنها لخيّرة ليا
﴿وَعَسَىٰٓ أَن تَكۡرَهُواْ شَيۡـٔٗا وَهُوَ خَيۡرٞ لَّكُمۡۖ وَعَسَىٰٓ أَن تُحِبُّواْ شَيۡـٔٗا وَهُوَ شَرّٞ لَّكُمۡۗ وَٱللَّهُ يَعۡلَمُ وَأَنتُمۡ لَا تَعۡلَمُونَ﴾
آية وتحققت في حياتي فعلاً ✅

- كرم الله وفضله لمن يحسن الظن به، في القراية في الخدمة وفي كل الأمور ضروري تكوني واثقة إن رزقك على الله أنتِ تسخري بس وأسعي ومن غير ما تأذي حد ولا تتحدّي غيرك ورزقك يجيك لعندك ومش حيوقف على خدمة معينة
﴿وَمَن يَتَّقِ اللَّهَ يَجْعَل لَّهُ مَخْرَجًا ۝ وَيَرْزُقْهُ مِنْ حَيْثُ لَا يَحْتَسِبُ ۚ وَمَن يَتَوَكَّلْ عَلَى اللَّهِ فَهُوَ حَسْبُهُ﴾
آية وتحققت في حياتي فعلاً ✅

- وعد الله بالأفضل لمن أحسن العمل في طاعتك لله والمحافظة على عباداتك (من صلاة، صيام، صدقة...) وفي تصرفاتك مع أقرب الناس ليك طاعتك لعيلتك واحترامك ليهم، احترامك وتقديرك لنفسك ومعرفة حدود دينك وين ماتمشي
﴿مَن جَاءَ بِٱلۡحَسَنَةِ فَلَهُۥ خَيۡرٞ مِّنۡهَا وَهُم مِّن فَزَعٍ يَوۡمَئِذٍ ءَامِنُونَ﴾
آية وتحققت في حياتي فعلاً ✅

- سعة رحمة الله ولطفه بعباده، الجانب المظلم في حياتي اللي 99% منكم مايعرفوش عليه شيء ومستحيل يتخيلوه ولا يتوقعوا حجمه..ومع هذا كله كنت وقاعدة
لاتوا واثقة ومتأكدة إن رحمة ربي فوق كل شيء حزين صار معاي وهو ارحم عليا من كل ضرر وشر
﴿وَرَحْمَتِي وَسِعَتْ كُلَّ شَيْءٍ فَسَأَكْتُبُهَا لِلَّذِينَ يَتَّقُونَ﴾
آية وتحققت في حياتي فعلاً ✅

الإيمان قولاً وفعلاً يحقق ويسخرلكم كل ما تتمنّوا 🤍
الحمد لله دائمًا وأبدًا.

• في كُل تفاصيل حياتنا، سواء قرايتنا وسعينا لتحقيق وكسب أعلىٰ الدرجات.. أو شُغلنا وخدمتنا وعملنا على تطويرها والتحّسين منها.
ومواجهتنا للصعوبات والتحديات اللي تصيير معانا..

في مبدأ يقول اعمل بذكاء وليس بجُهد، أني نوافق المبدأ هذا من ناحية ونعارضه من ناحية آخرى..

- الجانب الأول ضروري نسّعوا فعلياً ونبدلوا كامل جهدنا في تحقيق كُل شيء نطمحوله، لأن ببساطة اللي يزرع يُحصد ومافيش شيء يجي بالساهل؛ اللي يجي بالساهل يمشي بالساهل والنجاح فيه حيكون مؤقت فقط وماليشي أي طعمة.
مانبيش نقوللكم أن وراء كل نجاح فشل، لأنه مش شرط ومش قانون ثابت يعني نفشلوا باش ننجحوا.. لكن الحقيقة أن مافيش إنسان وصل ونجح وحقق شيء مُعين وكويس ودار أثر وبصمة في حياته من غير ماواجهوه صعوبات ومشاكل وظروف ماكانتش قنينة!
واللي خلّاه يوصل إصراره وعزمه وقُدرته على التحمل وإيمانه الكبير بالله سُبحانه وتعالىٰ أكيد.
وتأكده بأن كل الظروف جت على مقاسه وأنه بالفعل يقدر يتخطّاها {لَا يُكَلِّفُ اللَّهُ نَفْسًا إِلَّا وُسْعَهَا }.

- الجانب الثاني اللي هو العمل بذكاء، أول خطوة "التجاهل" مش عدم المُبالاة لا، لكن نحاولوا على قد مانقدروا نتجاهلوا الجوانب المظلمة والسلبية سواء كانت البيئة المُحيطة من ظروف أو حتى أشخاص!
مانخلّوهمش يأثروا فينا ويقللوا من إنتاجيتنا.
ثاني خطوة "التجاوز" تجاوز المواقف السيئة والناس المُحطمة..
والشيء الثالث "التفاؤل والتفكير بإيجابية" كُل ما كنت مُتفائل وتحمد في الله وعندك نظرة إيجابية لكُل شيء سلبي يصير معاك كُل ما كُنت عندك القُدرة والاستطاعة على (التجاهل والتجاوز وبدل المجهود بشكل غير مُفرط).

خطوات بسيطة مُش مقعدة بالرغم أن مش أي حد يقدر عليها لانها تعتمد على بعضها البعض، لو أنجزت وحققت بعض منها حتقدر تتوفق في تحقيق الباقيات.

وطبعًا خلّيك ديما متفكر وتردد في قوله سُبحانه وتعالى:
{فَاسْتَجَابَ لَهُمْ رَبُّهُمْ أَنِّي لَا أُضِيعُ عَمَلَ عَامِلٍ مِّنكُم}.

ربي مُستحيل يضعيلك تعب وجهد، حتى لو ماسخرلكش في الشيء اللي تبيه من أول من مرة لخيّرة ليك حيعوضك وحيكتبلك الأحسن.

ربي يكتبلكم التوفيق والسداد، ويباركلكم في وقتكم وعلّمكم.🤍

-أبرار أبوعجيلة.

نفس النّاس اللي ضحكوا لما كنت تهدرز على أحلامك حيجي يوم ويقولولك فخورين بيك وماتوقعناش هكي.
نفس الأشخاص اللي قالولك مستحيل توصل حيجي يوم ويقولولك كيف درتها!
نفس البشر اللي وقفوا ضدّك وحاولوا يضرّوك حيجي وقت ويستغربوا كيف كملت وماتأثرتش...

الرحلة طويلة وصعبة وأقوىٰ تحدّي وصراع فيها هو الشخصيات هذه، كمل 🤍

و أجعَلني مِمّن سَمِعتَ دُعاءَهُم فَأجَبتَهم يَاربّ.

نتمنَّىٰ من قلبي
السنة الجاية زي الوقت هذا تكون الدنيا حطتنا في المكان اللي خاطرنا فيه، لأيام تليق بينا، لنهايات سعيدة نستحقها، ليالي نستريح فيها من تعب سنين فاتت.. نتمنّىٰ إنّ الله يلقِ علينا وعلى قلوبنا السكينة والراحة، ومانشوفوش حزن فات ولا يمرّ حتى في بالنا.🤍

أن ترزقني ما أحبه تماماً كما تمنّيته،
وأن تأتيني المسرّات من حيث لا أحتسب.

أدعوك أن تجب دعواتي إلى درجة تعجبني، وأن تفتح لي أبواب الخيرات جميعها، وأن تطمئنني كثيراً حتى لا أخشى أي شيء.

أدعوك أن تفاجئني بما أهوى كما ترضاه لي،
وأن تملأ فؤادي بالفرحة التي لا يعكر صفوها أي شيء يا ربّ. 🤍