قدرات - راكان علي

التجربة السابعة في القدرات

بسم الله الرحمن الرحيم
انا طالب حاصل على 97 بالقدرات بفضل الله اولا ثم بفضل دعوات الوالدين وثم جهدي الي بذلته
اولا حاب انوه على نقطه مهمه ان مافي شخص غبي وان مافي شخص مايقدر يجيب الدرجه العاليه الي يطمح لها
اخوكم في الله حاصل في اول وثاني محاوله على 72 و 78 بعدها قدرت ارتفع. الى 97
طيب تجربتي مع القدرات (تقدر تقرا الخلاصه تحت)
------------------------------------------------------
كنت داخل الثانويه وكل خوفي كان من شي اسمه قدرات بالبدايه ماكنت اعرف وش يعني كمي ولفظي ولا شي كنت طالب اقل من العادي حتى ابسط معادلات الرياضيات ماكنت اعرف احلها بالمختصر بس اعرف اجمع واطرح واضرب حتى القسمه ماكنت اعرف
المهم كنت اسمع كثير كلام من طلاب ثاني وثالث الي اكبر مني وان الاختبار تعجيزي ومحد يقدر يجيب فيه حتى 75 دخلت عاليوتيوب وانصدمت من كمية الناس الي اشوفها تجيب درجه عاليه والتحفيز الي اسمعه ووقتها تعرفت على قناة راكان علي الله يجزاه الخير
شفت مقاطع وعرفت المصادر الكويسه ولما جت اجازة بين اول وثاني بديت اذاكر التأسيس من المعاصر7 وكنت متحمس مره خلصت التأسيس مع مراجعته بشهر ماكان ذاك المستوى وبدت الدراسه
وقتها طحت باول غلط الي هو اني ماعرفت انظم وقتي بين القدرات والمدرسه وكمان طحت بالغلط الثاني الي هو اني ركزت عالمدرسه واهملت القدرات
وبديت اسوف كنت مااقدر حتى اخلص نموذج واحد من الكمي او اللفظي فقطعت الى ان جاء اختباري واختبرت وطانت النتيجه طبعا متوقعه جبت 72
بعدها جاني احباط من القدرات وقطعت تماما عن القدرات الى ان جا شهر رمضان قررت اني ارجع واحاول اجيب اعلى رجعت عدت التأسيس مره ثانيه من المعاصر 7 وكان تأسيسي الحمد لله ممتاز بديت تدريب بعدها من اصدارات عماد وخلصتها بشهر ونص تقريبا (كانو٦٥ اصدار بس)اختبرت وجبت 78
73 كمي و 83 لفظي تحطمت صدق وقتها لان حرفيا شهرين ونص كانت مذاكرتي كمي فقط واللفظي ذاكرته قبل الاختبار بيومين حرفيا وبنكين بس خلصت وقتها ثاني ثانوي دخلت على ثالث وبالاجازه خذت ورقه وقلم وبديت اسجل الاخطاء الي سويتها
واستنتجت كالاتي
اول شي طريقتي بالتدريب كانت غلط اني اهمل قسم على حساب قسم ماتنفع
ثاني شي كنت اشوف الفيديو بدون مااطبق او احل
بشكل فعلي
ثالث شي كنت اسمع نصايح كثيره غلط زي ان ركز عالكمي اكثر النصيحه لاتاخذها الا من اكثر من شخص مقفل ومختم وعارف وش يقول
رابع شي مااعطيت الوقت الكافي من اول واضطريت اهمل المدرسه حرفيا خلال فترة مذاكرتي للمحاوله الثانيه فالظغط الزايد اعطى نتايج عكسيه بدل ان يفيدني
بدت اجازة بين ثاني وثالث ثانوي وعرفت اني لازم وقتها اعطي 200% من مجهودي اشتريت كتاب المعاصر 8 وبديت اذاكره خلصته تقريبا بشهر
بعدها اشتركت بدورة ايهاب وكنت اتابع معاه البثوث اول باول الى ان خلصت الدورة كامله وذاكرت اصدارات عماد وملف المفكر وملف المنصف 1500 المجاني وعدت المفكر وعماد مرتين زياده
كل هذا تم خلال 4-5 اشهر والحمد لله ربي ماضيع تعبي والحمدلله مجهوداتي بانت بالمحاوله الثالثه
----------------------------------------------------
الخلاصه التأسيس لحد يتعدى عماد وصدقوني تأسيسكم راح يصير حديد (او حتى اينشتاين كثيرين ينصحون فيه)
من ناحية التدريب جربت كل المصادر المعروفه وااكد لك انهم متشابهين بنسبة 95%
اللفظي لاحد يتعدى ايهاب لان الاختبار نسخ لصق حرفيا
---------------------------------------------------
خلاصة الاخطاء
١- شي عدم التوكل على الله والثقه التامه بان الله كاتب لك الخير
٢- انك تسمع نصيحه من الاشخاص الغلط
٣-التسويف
٤- تحطيم الذات واليأس
٥- لازم تعطي نفسك وقت الي يناسبك انا مدة مذاكرتي 5 اشهر كنت مرتاح فيها ماحرمت نفسي من شي عادي اطلع واستانس واسوي الي ابيه
٦- التشتت بين المصادر
٧-عدم المراجعه بشكل دوري
٨-عدم مراجعة الاخطاء
---------------------------------------------------
خلاصة تجربتي
مدة المذاكره 5 اشهر
المصادر للفظي ذاكرت دورة ايهاب عبد العظيم والكمي تأسست من المعاصر 8 وتدربت من المفكر وعماد وال 1500
كنت اشوف المقطع لايهاب والملف معي مطبوع واسجل العلاقات والملاحظات وبعدها احل الاختبار الالكتروني واذا اخطيت اعيده الى ان اجيب 100%
الكمي كنت احل الاصدار كامل واحط مؤقت والاسألة الي اخطي فيها اصورها واراجعها بين فتره والثانيه
---------------------------------------------------
وبس لاتنسوني من صالح دعائكم ودعواتكم لي بالتحصيلي🫡

التجربة الخامسة في القدرات

مصادري : ايهاب ومنصف وعماد ( عماد تاسيس)

طريقة المذاكرة:
بالنسبة للفظي انا اعتمدت على الفهم بشكل كبير مااعتمدت عالحفظ ابدا … كنت اشوف المقطع الاول واركز على كل معلومة تنقال بالفيديو واحاول اني استوعبها وفي حال مافهمت اعيده اكثر من مره وبعد مايخلص المحاضرة اراجع الي اخذته بالمحاضرة واقراها بصوت عالي حاول انك تشغل كل حاسة وقت المذاكرة والمراجعة ( كل مازادت حواسك وقت المذاكرة زاد فهمك وانجازك) وبعدها اخش على الاختبار الالكتروني واي سؤال خطأ عندي سواء لفظي ولا كمي احطه بملف خاص للاخطاء واراجعه بين فترة وفترة

بالنسبة للكمي اكثر شي مهم اتوقع اقدر اقول لكم اياها التاسيس حرفيا تدربت بس على 32 مقطع ( 1600 سؤال) وماجاني شي منهم نسخ لصق الا من التقفيلات حتى على حظي لما جاني بالاختبار وحليته على التقفيل صححه استاذ محمود بعده بيوم وطلع غلط لكن الحمدلله وبرضو يخوان نصيحتي تذاكرون من المقاطع الاخيرة افضل لان النسخ واللصق يجي هناك انا ماجاني شي نسخ لصق من البنوك ال 32 الي تابعها

🔴نصيحة مهمة !!
يخوان والله بقول لكم كلام مر عليكم كثير وانا مر علي كثير وماكنت مستوعبه ومر عليكم ومنتو مستوعبين قد ايش هي مهمة ( الوتر ) يخوان والله عظيمة عظيمة صلوا الوتر هي كلها ركعة وحدة بس اركعها بجوف الليل واسأل الله فيها كل شي تبيها وحاول يعني انك تطلع كل الي بخاطرك وتستشعر ان ربي فعلا ربي الان يشوفك ونازل من سابع سماء عشان الشخص هذا الي يوتر (هل مِن سائلٍ فأُعطيَه؟ هل مِن مُستغفِرٍ فأغفِرَ له؟ هل مِن داعٍ فأستَجيبَ له؟)

التجربة الثانية في القدرات

بسم الله الرحمن الرحيم
1- المصادر
2-نصائح
3-المدة

المصادر:
تأسيس المعاصر 8
تدريب المنصف
اللفظي دوره ايهاب بس للتدريب بدون تأسيس


نصائح:
التأسيس بيكون صعب عليك
وحتى بعد ما تخلصه مهو شرط انك تقدر تحل كل المسائل
هو فقط يعطيك طرق الحل والافكار
التدريب بالبداية صعب
بس هو الي بيسهل عليك
بعد توفيق الله
والمنصف او عماد او المفكر
كلهم نفس محتوى بعض
بس انا كنت مع المنصف
وكان رهيب بكل شيء
حتى موقعه فيه ميزات جميلة
والكمي بكل اختباراتي يكون 90%
منه
واخر اختباره كله منه ما عدا سؤال
المدة :
انا اكثر شخص اسوف واماطل
ما احس المدة مهمه المهم تختم
كل شيء وتكون مستعد
بس لو نحسب وقت المذاكرة الفعلي
اول اختبار ثلاث شهور
الثاني شهر
الثالث شهر
والموضوع سهالات بإذن الله
لا تشيلو هم وتعطونه اكبر من حجمه

التجربة الاولى في القدرات

بسم الله الرحمن الرحيم
هذي درجتي وعقبالكم اعلى الدرجات
طبعا بتكلم على المصادر اول شي

مصادر اللفظي ايهاب عبدالعظيم طبعا دخلت اللفظي بدون تأسيس بس تدريب وجاني الأسالة حرفيا نسخ لصق

والكمي عماد الجزيري تأسيس وتدريب في التأسيس ممتاز جدا اما التدريب ماش صراحة انصح في التدريب المنصف كثير يمدحوه

طريقة المذاكرة للفظي كانت اتابع المقطع وبعدها اختبر عليه واذا كان عندي اخطاء احفظها بالجوال عشان اراجعها بعدين وقبل الأختبار ب اسبوع اراجع البنوك كاملة واتأكد اني ما خليت شي


اما الكمي تأسست بعد ما خلصت عليه راجعت عليه ع السريع هو والقوانين والتدريب اختبر الاصدار واشوف الأغلاط واتعلم منها كذا

واهم شي بالنسبة ليا اشوف الدعاء والوتر الزبدة تكون قريب من الله وسلامتكم ومتأكد انكم حتجيبوها بالراحة

السلام عليكم أحلى متابعين 🌟

باقي لنا 600 مشترك فقط ونوصل لهدفنا الكبير: 50 ألف مشترك على قناتي في اليوتيوب! 🎉🔥 دعمكم كان السبب بعد الله في وصولنا لهذي المرحلة، وأنا متأكد أنكم قدها ونقدر نحقق الهدف مع بعض ❤️

إذا ما اشتركتوا لسا، هذا وقتكم تكونوا جزء من نجاحنا! 👇
[رابط القناة]

شكراً لكل واحد دعمنا بكلمة، تعليق، أو حتى مشاهدة بسيطة. انتوا الأساس! 🙏

لا تنسوا تنشروا الرابط لأصحابكم وأهلكم، خلونا نوصل لهدفنا قريب! 🚀