أنا ليه دايمًا بتكلم عن سماع القرآن وليه دايمًا بقول إنه له أثر كبير في القلب؟

بعيدًا إن اللي جرب هيفهم واللي بيعمل ختمات سماع باستمرار فاهم أثر القرآن على القلب

هحكي موقف جميل
كنت بنزل چيم بعيد عن بيتنا شويتين

فكنت بمشي لحد الچيم
بدل ما أركب فكان المسافة حوالي ربع ساعة أو تلت ساعة مشي

في الأول كنت برن على حد من صحابي عشان محسش بملل خاصةً إني مكنتش متعودة أخرج من البيت وقتها

بعد كدا كنت باخد الهاند فري معايا
وكنت مشغلة سورة الأحزاب للشيخ محمود البنا بس مجود

وكنت ماشية في الشارع والسماء كانت جميلة!
والطريق كله شجر

وكنت بسمع وبتأمل الطرق

فوقع في قلبي وأنا بسمع إنه آية أنتِ دلوقتي بتسمعي كلام ربنا
متخيلة؟
يعني الآيات دي أُنزلت على النبي ﷺ
وهي كلام ربنا

كنت شوية وهعيط في الشارع لما استشعرت المعنى
فركزت مع الآيات
وسمعتها
حسيت إنه الآيات دي كأنها أُنزلت ليا لوحدي

لذلك سورة الأحزاب من أقرب السور لقلبي
كان أول مرة أحس فعلًا إني بسمع كلام ربي!

فلذلك واحنا بنسمع ممكن نستشعر؟
مش بتيجي من مرة واحدة

بس لما نسمع الآيات كدا ونمررها على قلبنا حتى لو مش فاهمين
بيكون لها وقع عذب وجميل على القلب💗

اية رجب