رايح تشتري مع مراتك حاجة انت مش مقتنع بيها.. بس انت وافقت خلاص ... كمل جميلك وإختار معاها الحاجة دي بنفس راضية من غير ماتفضل تنفخ وتتعصب عليها .. إنت كده كده دافع فلوس ... فمفيش داعي تكسر فرحتها بالحاجة اللي هاتجيبها ليها.

هاتروحي مع جوزك مشوار تقيل على قلبك... لكن انت قررتي انك هاتروحي عشان خاطره .... بلاش بقى تقلبي وشك وتلوي بووزك وتفضلي تحسسيه بالذنب.
عملتي حاجة عشان خاطره ... خليكي لطيفة وماتخليهوش يندم انه كان حابب انك تكوني معاه

هاتاخد مراتك و الولاد عشان تتفسحوا.... وهي إتأخرت في تجهيز نفسها والولاد.... بلاش تتخانق معاها وتنكد عليها وعلى الولاد ... إبلع موضوع التأخير ده دلوقتي ...وخليهم ينبسطوا بالفسحة.. وإبقى إتكلم معاها بعدين في قصة التأخير وشوف هاتساعدوا بعض ازاي وحاولوا توصلوا لحل.
بلاش تضيع طعم الخروجة اللي انت تعبان فيها وهاتدفع فيها فلوس عشان تبسطهم عشان خاطر حاجة صغيرة ممكن نتكلم فيها بعدين.

بلاش تبوظوا حاجات كبيرة بتعملوها وبتتعبوا فيها ما دام هاتعملوها.... وبلاش نبوظ الأوقات اللي المفروض إنها أوقات سعيدة ونخليها ذكريات سلبية بدل ما تكون ذكريات جميلة.

#دفا_البيوت
#محمد_فتحي