قناة الشاعر محمد الموسوي

يابو الرضا شوك بينه هوايه __ يابو الرضا شايلين الرايه
يابو الرضا شيعتك وفايه

_______

1)


لباب المراد اتعنه __ وادخل ضريح الجنة
يابو الرضا اتمنى __ تحسبني قريب

انته الملكت احساسي __ عالي بخدمتك راسي
يالتسوه اهلي وناسي __ يا اجمل حبيب

هايم من زغر هايم __ ماهمني حجي اللايم
عندي زيارة الكاظم __ تسوه الدنيا ياناس

كل شيعي ومحب ناده __ من بابك خذه مراده
هذا ملوحة السادة __ يشبه عمه عباس

كاضي الشدد جايين نزوره __ هيبة علي من صفاته ونوره
ولحضرته طلعوا المشاية

_______

2)

يابو الكرم يالغالي __ مشاي الك هنيالي
هيبة وضريحك عالي __ ياباب المراد


كلبك جبير وصاير __ سور وملاذ الزاير
والعنده حاجه وحاير __ يكضيهه الجواد

واجب خدمتك واجب __ ها ياحضرة الراهب
بيك ملوحة الغالب __ تشبه حيدر هواي

جيت وروحي ملهوفه __ درب الخدمة ماعوفه
لا والكطعوا جفوفه __ ما اعوفك يمولاي


يابو الهله يالمضيفك عامر __ مثل الحسن ماترجع زاير
وبكل شبر هلك دكوا ثاية

_______

3)

يابو البخت والشارة __ تنطي اليجيك بشارة
ترزقني كون زيارة __ يالجفك كريم

هيبة شكبر نوماسك __ والغيرة هاي براسك
شايلها من عباسك __ مولاي العظيم


انته السيد العالم __ ياراهب بني هاشم
بيك احتارت الوادم __ جايب صبرك منين

مثلك ماشفت واحد __ جفه مكيد و ساجد
هيبة و وكفتك شاهد __ تشبه وكفة حسين

انت الأبي واللسان الناطق __ هيبة علي وبيك زود الصادق
انت الكمر فوك المسناية
________

4 )

هاشمي وكلك غيرة __ عشنه بهواك وخيره
كلما نطيح بحيره ___ يالكاظم نجيك

حب وعطاء انشوفك __ مفتوحه دووم اجفوفك
يابو الرضا ما اعوفك __ للموت اعتنيك


صالح من نسل صالح __ جفك بالكرم مالح
يالمثل الشمس واضح __ درة بظلمة الليل

يرهب كل سجن صوتك __ مايوم الهلا تفوتك
هز الظلم تابوتك __ يمراويهم الويل


من حضرتك علمتنه الهيبه __ يخسه الظلم ياحزام النيبة

اسمك نزل __ في صريح الايه

_______

5)


درب العشك ربانه __ خدام الك سوانه
انته الكلب سلطانه __ يالجاهك جبير


اسمك حرز للخايف __ والاعمى يمك شايف
هنياله كلمن واكف __ يم باب الأمير



كلبي من الفرح طاير __ خادم عندك وزاير
لو اجيبن الف شاعر __ كلهه بوصفك تحير

لو ياهو اليحط روحه __ وصفك محد يلوحه
تنكط غيرة وملوحه __ سرك ماله تفسير

ياسيدي يبن شيخ السادة __ يالخدمتك عدنا صارت عادة

راحة كلب بالصحن وفيايه

_____

محمد الموسوي

جديد
قصيدة المشاية الكاظمية
لباب المراد اتعنه

أداء الرادود سيد فاقد الموسوي
كلمات محمد الموسوي

هيئة وارث الائمة/ الكوت _ النعمانية

ابو الكافل __ ولا اجامل
علي الأول وماخلي بشر غيرة
نفس صاعد __ نفس نازل
الما حبه حنطته تاكل شعيره

______

1)

كلوله ما ابيع النبض كلوله
حايط بصفه اليعترض كلوله
ماخذ الميه بحب علي هذا انا
انا الشروكي الصيحوا صفكوله

انا الشردوا كباله
شيعي وحب علي خباله
انا الشامر عكاله
يمك ياعلي

شيعي فلاحة وملاجة
كلها كبالي تتباجة
حيدر عندي شباجة
يسوه كل هلي

حيدر تكتل شارته __ هيبة نظرته
يرمز للنصر بالحومه فقاره

عاشك اسمه ورايته __ حلوه زيارته
خيمة وتحتمي بفيايه زواره

_____

2 )

عوفوني لا اطلع صدك من طوري
وانشر واكتلكم قهر بستوري
رافضي وغير الرافضي ماريده
وتراب جدمك ياعلي كافوري


انا الهيبة الشروكي
عابر عالذهب سوكي
حيدر يمشي بعروكي
واعشك حيدره

كلبي من الفرح طاير
حلال الشدد صاير
المايفرح صدك خاسر
دنيا وآخره


عاشك اسمك ياعلي __ ياروحي وهلي
ولغيرك ابد مادنكت راسي

حيدر حلال الشدد __ صايحلك مدد
بكد هذا الهوه اليعبر عله انفاسي



محمد الموسوي

جبير السادة مكتوبة 👆👆

علي فاطر كعبة الله صياره
علي بيده جنة الله وناره
علي ما خاسر حرب بالحومه
بيه علامات النصر فقاره

علي علي

أسد يا داحي الباب _ نخاك وآدم تاب _ اذا طاريك انجاب
أظل هايم
شدهت عقول الناس _ جمالك ماينقاس __ يالمخلف العباس
كمر هاشم



علي مولانه هوه الكلب سلطانه خيمه وستر فوكانه
علي ويكضيهه كل شدة تعصي ويانه نركض ندك بيبانه
علي بالمحشر شفيعنا حيدر حيدر ياعلي مولانه

______
2)

اسمك محلي الحجي ال بلساني
وأكثر من الدم مشه بشرياني
حبك منسيني كل العالم
حبك معيشني عالم ثاني

علي علي


أحبك يابو لثام دخيلك ياضرغام جناب الشيخ العام
عله الغيرة
جمالك ما مسبوق ولا بإنسان مطروق شبيهك مامخلوق
صدك حيرة

ضوه بياقوته درة كنز مصموته فوك العرش منحوته
يبخت الشافك عينه شكثر مبخوته ماجنت الأعمى تفوته
عجيب المنظر ماينوصف حيدر حيدر ياعلي مولانه


______

3)

باهته الحومه وفقاره ملوحه
واليطكه براسه طيفه يلوحه
يافكر حظه اليكابل سيفه
كبل رمشة عينه ياخذ روحه

علي علي

علي مو ياهو الجان علي مبجي الشجعان علي ملح الميدان
دخيل اسمه
برز ضموهه الروس اجه الفوكاهه يدوس المعلمهه دروس
ابو اليمه

نزل للحومه حيدر دخيل علومه راوه الظهر ونجومه
اليموت بكيفه محد يموت بيومه خله الزلم مصدومه
شجاع وقسور ماينكدر حيدر حيدر ياعلي مولانه


______

4)

خايف احسد روحي ياهنيالي
عندي صورة يم ضريح الغالي
ماشفت مره بحياتي الراحه
ومن ازورك الكه راحة بالي

علي علي

يساكن هاي وهاي احسك دوم وياي ضريحك يامولاي
يزيح الهم
اذا بالشدة نطيح مدد مولاي نصيح رساله بجف الريح
تحط بلسم

علي ما ابيعه خيمة عله راس الشيعه يأمر امر ونطيعه
يعبرك باجر للجنة بس توقيعه ربك فرض تشريعه
صراط ومعبر حبل النجاه حيدر حيدر ياعلي مولانه

________
5)

علي عيونه لهسه ما موصوفه
تخضع الكمره لسمار جفوفه
طلكته الكعبه ومحمد ناده
بت أسد جابت أسد للكوفه

علي علي

علي ماشاء الله مناقب ربه انطاه عله الكونين علاه
ولي الرب
يلقب حامي الجار ابو الحسنين كرار دخيله وبالفقار
شطر مرحب

جبير السادة خادم اله ولاولادة بالحضرة ينطي مراده
عبر ديوانه فوك الكرم وزياده هاشم كرمهم عاده
اليعوفك يخسر فاز اليحب حيدر حيدر ياعلي مولانه

_______
محمد الموسوي

جديد
جبير السادة

أداء
عباس عجيد العامري
كلمات
محمد الموسوي