الشاعر عبدالله الشويلي

#شهادة_ام_البنين_ع

مملكه من الوفه والشيم
عاصمه وعدها راعي العلم

ربت اليسوه للخوه فزعه بيها
وغيره الكافل ابو فاضل صنع اديها

منو اللي شايف بعمره
بيرغ للبدو بصحره
ما رفعت ولا مره
عدهم ضرة الزهره

عدهم ام الاربعه بيرغهم اسمها
وچي تنحب على الخيم ولاچمهم المها
الحد هسه تشوف البدو ما عافت خيمها

العذب لاهل البدو لو نبع
نخو جف الكفيل وطلع

البدو حَچايه اوفايه من حچيها
وغيرة الكافل ابو فاضل صنع اديها

.
.
.
سُلاله للوفه جفها
اللغه تعجز توصفها
بس الساقي يعرفها
گلب للغيره شايفها

وگلب الحيهم والهله والفزعه الثجيله
بعيون الحظ والبخت خلتها العقيله
بحيل أمه أبا الفضل طاح وباقي حيله

وصته اعله الجفوف السمر
تنگطع عالنهر من يمر

وگطع اجفوفه وتشوفه ام أخيها
وغيرة الكافل ابو فاضل صنع اديها
.
.
.
.
كتبت عالعلم چلمه
وينه اليرجع امدمه
راسه الينگطع زلمه
لو حشم ابو اليمه

أنه الجبت اربع ولد حكمه بيها باجر
حتى الحومه تنگطع من اربع محاور
والشاهد أبو الفضل گطاع الگناطر

على جيوش العدو يالعمر
طير ابابيل اريدك تمر

غَربل العسكر موت احمر طَب عليها
وغيرة الكافل ابو فاضل صنع اديها
.
.
.
.

هالدره الكلابيه
نسميها الحسينيه
بگلبها خيمه مبنيه
ساكن بيها ابو ارقيه


ما موجوده بكل زمن هالروح النقيه
شسوت لله يا تُرى هالحرمه الابيه
وخلاها تجي وره فاطمة الزجيه

بالضعن نفترض لو مشت
جان هم يكفلها راعي البخت

الغذته خوه ومروه وَفْى ليها
وغيرة الكافل ابو فاضل صنع اديها
.
.
.
.
رايتها اعله كل رأيه
نبيه وتنقرا ايه
حُسينية بخت هايه
دگت للدمع ثايه

نور الخدمه الماطفه البيها نشد عزمنا
واجب نشكرها بدمع لو رفرف علمنا
هي الخلت كربله تسري بمسرى دمنا

بينا زرعت دموع وجمر
شما لطمنا وجَب تنشكر

زلم سوتنا وانطتنا من بچيها
وغيرة الكافل ابو فاضل صنع اديها


الشاعر عبدالله الشويلي

مدد يا ابو فاضل

معروفه الغيره الشيعيه
من عندك يبن البدويه
ماخوذه الروح الحربيه
من روحك يالروحك تچوي

البارد يحتر من يتذكر
چفك ذاك الطاح الاسمر
طبع الحبك عالشر يزئر
نار بگلبه اعله الشر تدوي

.
منك اتعلمنه فن اسمه القتال
واليگابلنه مصيره للزوال
زلم والساحات تشهد للرجال
.
.
.
.

نلوي اذراعه الشال اذارعه
والضدك ما يبقى بگاعه
كل ذاك الجيش وأتباعه
لا جو ولا كاع اتلمه

نحفر راسه الحطنه برأسه
والمذهب انتم حراسه
أنصار حسين احنا وناسه
نسحگ بطن اللبوه بظلمه

خل يطبعون العرب طول السنين
ويانه جف حيدر علي الحبل المتين
همه عدهم اسلحه وعدنا الحسين
.
.
.
.
العادانا نفوت بعينه
ريحاً صرصر من هدينه
والزهراء احتاروا بينه
هزيناهم هز الرايه

ما ملينه وملانه الشر
راويناهم يوم المحشر
جفك انطه الضوء الأخضر
وبنصهم دگينه الثايه

غيرة الشيعه وعلي كلها أفزعت
وحاله من حال الحجر ذاك السكت
الصِمت هاليوم جده هم صِمت



.
.
.
.
كالو آلاف التهوانه
گلنه العباس احنا ويانه
خيبر واجنوده وحيطانه
نقلعها بيا حيدر كلها

ضربت مرحب رجعناها
واخيام العز ثبتناها
ارض المحتل هزيناها
وين التوجعهم نندلها

ما نساوم عالقضيه من زمان
احنا من انطگ نحطها بالمچان
وادم اتعيش برعب والنا الامان


.
.
.


يرحل قائد يطلع قائد
تفزع ميه بموت الواحد
يا عباس وانت الشاهد
ما نرجع الا انصفيها

عدنا الميت حيٌ يرزق
بلكي الله انموت ونتوفق
وندرك هذا الفتح الاصدق
لحسين الروح انوديها

المعركه البيها زلمكم تنحسم
علمتنا الفعل مقياس الزلم
اليگطع اجفوفه لَدِينه اكبر شهم


الشاعر عبدالله الشويلي
@AbdullahAlshwaily

#شور

#بعدَ_شهادة_ابيها_وقفت_على_قبرهِ_قائلة



گلبي أعله فگدك محترگ والناس حرگت بابي
تموت بعتبْتي لو شفت بالضلع صار اصوابي
بمتني ادفع اجذوع الوكت واجفوفي فوگ احجابي
ما غزرت ملحت أمس اليوم اجو لعتابي

نكروا الخير يركضون اجوني بالحطب
شرد اگلك على الصار وشنو بيا انضرب
مو حرب هاي واجتني ركض كل العرب

ـــــــــــــــــــــــــ
شفته الضحك بجنازتك يم بابي سرفن جفه
گالوله فاطم رد وأن وبالضلع حيل اتشفه
بابي طفت بس الگلب ناره ابد ما تطفه
من غمضت عيونك شفت بويا العيون الصلفه

اول انسان تكتله أنا جلمت وأن
وبلا موعد تجيله مواعيد الحزن
بويا بچفاك ولوني وقرح دمعي الجفن

ـــــــــــــــــــــــــــ
افراگك كسر خاطر واجه الظالم كسرلي اضلاعي
يالودعت زينب ترا گرب وياها اوداعي
ناعِيتك اني من متت وريتك الليه الناعي
ساعي الدمع ليل الهجر ما وصل منك ساعي

هذا يا نوم يمرني وطفه بجفي الجمر
يوصل الليل والعيون يفز بيها الكسر
گلبي وي حايط الباب صفه نفس الفطر

ــــــــــــــــــــــــــــــ
عاده يبويا بالعرب لو نار شافت تفزع
حتى النسه تحشم الزلم والديره لا ما تهجع
ليش بوكت ذاك الحرگ ما رضى واحد يطلع
الميت سمع صوت الضلع معقوله محد يسمع


حتى من راحت النار ولا واحد اجه
وجنت اسمع يگولون ابنها ما نجه
وكتب دخاني بسماي الرجه يهل الدرجه
.
ـــــــــــــــــــــــــ
بجف واحد ادعي يالابو وادموعي تاكل خدي
ما اشتكي گبال الأهل بالحجره اونن وحدي
گد ما يعت گلبي الالم والدمع فطر خدي
يصير النهار اظلم عليّ والموت يحضر عندي

روحي تتوازه عالموت ويمر بالي خبر
انت گتلي تموتين واجي بقرب سفر
شوكت امضيله لگبري وعلي يسد النظر


عبدالله الشويلي الشويلي
@AbdullahAlshwaily

بوصلة العشگ دخلت بنذار
الموعد بالنجف يم حامي الجار

تتغازل اجدامي ارد امشي بالامي لحيدر علي الدامي حن گلبي الضريحه
يمه العيون تصب موعدنا موعد حب لو نفترض بالجُب ياخذني امنَ اصيحه

منو مثل ابو الحسن اقرب من الابهر
منو شايفله بشر يوگع يمه الاشتر
على الماعنده خبز نلگاه خبزه حيدر
وعلى اعدائه بالحرب هو الموت الاحمر

زلمتنا شهم لا ما نحتار
الموعد بالنجف يم حامي الجار
.
.
.
.
للمايسد بابه ...الطلعني من غابه ...طينتي من اترابه..... وكل الحب والحساس
الغيره الحسينيه ....بگلبي وسواجيه ....طگت وما بيه ...احمل بُعده يا ناس

عدل ميت يم علي ما اگدر اعوفه
ماشوف ابني والأهل بس كون اني اشوفه
بدمي يمشي ابو الحسن ماي بوجهي خَله
عكس كل الحَب أنه جرحي اسمه كوفه

گلبي ما يحب غير الكرار
الموعد بالنجف يم حامي الجار
.
.
.
.
هذا أنه المرتب .....مو مثل كلمن حَب.....بالحُب ولا اتعب. ...ما شفته وعشگته
ما اگدر بدونه ......خلاني بعيونه.....مجنونه مجنونه ......بوجداني كتبته

ولا اشوفه منذهل قيس وكل جنونه
ينسى روحه والهوى لو شايف عيونه
أنه بحبي الهاشمي چم قيس العبرته
صرت عبده منشمل بالطافه الحنونه

وبجاله صرت املك اسرار
الموعد بالنجف يم حامي الجار

.
.
.
.
حي الله اسد خيبر ....الفارس القسور .....صاعقه موت احمر ... بالعركه جفوفه
فقاره المرتب .....يحمر اذا يغضب ...حيدر علي لو طب .....بيها يخلي خوفه

على العركه من يطب من اربع محاور
طلع مثله ابو الفضل لذا دمه فاير
ادخيله يسطر سطر شد الله وثاقه
العدو ما كاتب شطر وحيدر قاده شاطر

يصهر بالرگب بيده الفَقْار
الموعد بالنجف يم حامي الجار
.
.
.
.
حاشا المدليني ...گبره ودرب ديني ..باجر يخليني.....بوحشة گبري وحدي
يحل الوصال وياه .... حتما بكبري الكاه .....ما ينسه من أنساه....حيدر كلشي عندي


يِّضَوي الظلمه غدا من يجبل عليه
وجناح الخدمه يجي وي نوره اليه
يركبني جف علي وياخذني لعظمته
وأنه شاهر دمعتي عالخد للزجيه

وما دامه يجي ما اشوف النار
الموعد بالنجف يم يم حامي الجار


الشاعر عبد الله الشويلي
@AbdullahAlshwaily

أمنية خادم بعد انتهاء الخدمة

خلْصت وانتهت هاي السنة ويالنوح
لچن يبقى الگلب مذبوح عالمذوح
زغير وجانت امنيتي اعله گد گلبي
من تخلَص الخدمه العمر كله يروح


واموتن بالحسينية
شهيد الدمعه والنيه
بگلب محروگ عالضامي
مثل ما ماتت ارقيه

اعله گبري تكتبون مشه وعنده حسره
اعله زينب واهلها بعد بي لطم صدره
على اترابي ما اريد اسم ماي يخوتي
عطاشى لهسه ومهجهم چنها صحره


.
.
.
.
اذا لا سامح الله والسنه الجايه
أخذني الموت منكم واحتزم رايه
ارفعوا صورتي اباب الحسينية
وابچولي اعله زينب وكت القرايه

غطو الصوره بالرايه
لمن تبدي القرايه
بكلت الله ارد ابچي
ما شابع بچي اهوايه

أنه ادري بعيوني بمحرم حنينه
يبچيها الحسين بغربته وآنينه
اذا عايش انعى واريد بمماتي
نواعي يربعي بنبرتي الحزينه

.
.
.

بالسابع الصورة لا تعلگوها
وي چفيّ الدلال الحاره اچفوها
زحمه من الخيم توگع واضل واگف
ويم الماي أبدًا لا تخلوها


حطو الجربه عالصوره
ونبله حمره مكسوره
وراية مشگگه خضره
وخوذت راس مفطوره

أنه الماله موقف اذا ماله دمعه
شرجعه محرم يخوتي شرجعه
خلص شهر الحسين گضت احلى ايام
شعود الليالي حچي گلبي اسمعه



.
.
.
ما شابع طبر بالرأس احس تقصير
اذكروني يربعي بساعة التطبير
بكل عاشر لحيتي مطينه اعله حسين
وعيوني حمر مثل الخدود اتصير

من اسمع نعي الناعي
احس تتكسر اضلاعي
واذا كال الخيم طاحت
اطيح ودمعتي الساعي


رغبتي بحياتي الحسين اشوفه
يرد للعليله وتِقَبل جفوفه
ورضيعه يشربه ويرد ببتسامه
وربابه تحضنه وبعد ماكو خوفه



.
.
.
.
اذا حل المشي بجم خطوه اذكروني
من گبري واصيح وياكم اخذوني
سوولي قبر رمزي بطريق حسين
والزوار خليهم يسحگوني

الزاير لو مشه اعليه
يرضى عني ابو ارقيه
عدل ميت يربعي اني
روحي بالحسينية

خلود اليخدمه يجي بالاطاعه
اليضيع بعبرته يوصله ضياعه
اليدور الحقيقه الخيم كلها واقع
السلك درب الحسين دمعته متاعه



الشاعر عبدالله الشويلي
@AbdullahAlshwaily

ذيج الحياة وهذا الحسين
عالم .... قرر الوين
تمشي.... بدمعت العين

بابين عندك وانت تختار
باب الحسين وباب للنار



بين الخلود وعدمه خيّر مسار القدم
بالدنيا لازم تنچوي لو تنجوي بالخيم
مو عاقل الباع الوفه واشترى دنيا العدم
العباس عاف المشرعه وكله ركض للسهم

وي آل هاشم أنكر الذات
والمات وي حسين ما مات
كون النفس لحسين آهات
شمحله العمر لو يكضي بالخدمه

صفيها نيتك عندك حسين
المن ....ضام العين
افهم ....كلنا ميتين

دارين عندك تمشي يا دار
باب الحسين وباب للنار

.
.
.
.
لو تنسي لو تنذكر بيدك اختار الدرب
ذاكه وهب كلشي ترك واختار عقله الحرب
وعلمنا جون المابچه لحسين ماله گلب
درب الحسين شكد صعب وبس الزلم للصعب

عاين وهب نصراني بس صار
جندي حسيني وغيرته نار
وبرجعته الحر فاق الاحرار
فز الضمير بداخله اورده

انظر العابس شگگ الثوب
ولسه .... ذكره مكتوب
عابس ....رجل مهيوب

شختار شوذب والمن اندار
باب الحسين وباب للنار
.
.
.
.
تخيل يرد بيك الزمن وتحضر حرب كربله
سبعين ألف ضد السبط وسبعين واحد اله
وينطون ملك الري الك بس ترمي وي حرمله
اويه ابو الأكبر تنذبح شتختار يا مسأله


تسمع الصوت امنِ الصواوين
هل من مناصر ينصر حسين
وتشوف ربعه كلها ميتين
ودمعته بعينه ومنحني ضهره

معقوله ما راضي الله وتروح
يمه ... وتوهب الروح
وتالي ....تصير مذبوح

تشوف الشمر وتشوف الازغار
باب الحسين وباب للنار
.
.
.
.
كل البشر تعشگ لچن بس علي حبه صدگ
تحب علي لوما تحب هو الگلب يحترگ
ميثم التمار انصلب والسبب چان العشگ
يا أبا الحسن يا أبا الحسن سلمان گلبه يدگ

وشأخذ من دنياه وشعاف
غير ابو حسين بعينه ما شاف
كل العرب من هيبته اتخاف
من بيت حيدر فارسي اصله

المقداد عاف الدنيا واختار
حيدر...شايب وغار
بالحب..صار تذكار

شايب وصار وغيره ما صار
باب الحسين وباب للنار

.
.
.
.
الدنيا عِله والدوه چف علي وچف الگمر
بحر المتاعب والحزن لا تغرگ بهل البحر
والدمع تذكرت السفر ولابد يحل هالسفر
المجلس متاع الاخره الما لطم صدره خسر

بيوم القيامه انت حيران
اتخيل الزهره تنادي يفلان
انت الخدمت بيت الاحزان
وياي گوم الجنه تنتظرك


الوي الحسين اليوم وياه
باجر....بصفه تلگاه
ومنه....يسمع ال آه

تنصر حسين اتخاوي الأنصار
باب الحسين وباب للنار


الشاعر عبدالله الشويلي

@AbdullahAlshwaily